Nikamonan 57 - Ojibwe Kihcimasina'ikan

Keshi'anami'aankipan Ciwiici'ikooyank

Mii 'oweni Peshik Tepit Onikamon

¹ Taka koohpaatenimihshin Kishemanitoo, taka koohpaasinawihshin, kiin iitok kaa⁠naacipa'iwaaninaan. Anaamaya'ii hsa kininkwiikanink ninkashi aakawihshimoon, piinihsh ci‑ishkwaa pimi ayaak kaa⁠kihci ishiwepahk.

² Nishaakowaanaa hsa Kishemanitoo Maawac Eshpentaakositc, kaa⁠miishitc aaniin eshi noontehsewak.

³ Kihcikiishikonk hsa ninka onci nahkwehtaak ci⁠shaapwii'itc, oka papaahpinenimaan hsa ini kaa⁠wehsaani'imitc. Kishemanitoo hsa ninaakohtamaak osaaki'iwewin, otepweyentaakosiwin kaye.

⁴ Mii hsa 'i enentaakwahk taapishkoo eyaayaan mekweya'ii eshi'ayaawaatc mihshipishiwak, e⁠ishi pimihshinaan eshi'ayaawaatc pikwaci aya'aawihshak, ininiwak enaapitewaatc taapishkoo ciipowepinikanink, pihkwahkonk kaye; otenaniwiwaan e⁠inentaakwaninikin taapishkoo pashipa'ikewihkomaanink.

⁵ Oo Kishemanitoo, naakohtoon kitishpentaakosiwin kiishikonk, kikihci inentaakosiwin kaye misiwe ahkiink.

⁶ Kaa⁠shiinkenimiwaatc hsa otashwekihshimaawaan ahsapiihkaanan ewii kaahcitiniwaatc; wiinke tahsh nishaakooci'ikoon wahsitaawentamowin. Waanihkewak wa‑ani ishaawak, wiinawaa tahsh iko kiih⁠piincihsewak.

⁷ Kishemanitoo ninte'ink hsa kitishi kihciwenimin, ninka nikam hsa, ci‑ina'amaan e⁠miikwehciwentamaan!

⁸ Taka ninka koshkohs nintahcaahkonk! Ninka amaci'aa kaye ninkihci matweyaapiikipicikan, nimatweyaapiikipicikanenhs kaye! Ninka koshkohs piitaapank.

⁹ Tepencikeyan, kika miikwehciwenimin itahsh mekweya'ii eshi'ayaawaatc kotak pemaatisiwaatc; kika nikamoohtawin kaye mekweya'ii eshi'ayaawaatc kaa⁠pepahkaanwewaanakisiwaatc.

¹⁰ Kisaaki'iwewin hsa etatawe paahtiinatin e⁠ocihcishkaamakahk kiishikonk, kitepweyentaakosiwin kaye e⁠ocihcishkaamakahk kiishikonk.

¹¹ Oo Kishemanitoo, naakohtoon kitishpentaakosiwin kiishikonk, kikihci inentaakosiwin kaye misiwe ahkiink.