Nikamonan 51 - Ojibwe Kihcimasina'ikan

Keshi'anami'aayankipan Cipoonentamaakooyank

Mii 'oweni Peshik Tepit Onikamon

¹ Oo Kishemanitoo, taka koohpaatenimihshin, mooshak inahke kaashi saaki'iweyan. Wiinke iitok wenootan kikoohpaatenimiwewin ci⁠kaasii'aman nimacitootamowinan.

² Wiinke hsa pehkaapaawashihshin nimacitootamowinink onci, wiinke hsa ko pehki'ihshin ci⁠ayaahsiwaan macitootamowin.

³ Nimaamihkaw hsa nimaci'ishihcikewin, mooshak ninkihkentaan eh⁠kikisiyaan nimacitootamowin.

⁴ Kiin hsa ehta ko kaakii macitootawinaan, ekii ishihcikeyaan macikekoon enaahsamiiyan. I'i tahsh kaa⁠inaahkoniyan eh⁠macitootamaan, mii hsa 'i kwayahk e'ishiyan, kaawiin kaye kekoon kitishi anaamentaakosihsii i'i kaa⁠inaahkoniyan.

⁵ Inashke, macitootamowinink ohsha ninkii ishi nihtaawik, nimaamaa kaye kiih⁠kikishkawaawaahsomitc aasha omacitootamoo ninkii onci inakimikoo.

⁶ Tepwe hsa kimisawentaan kaa⁠tepweyentaakwahk piincaya'ii ci⁠ayaak nimpimaatisiwinink; kihkino'amawihshin tahsh ci⁠kakiihtaawentamaan piincaya'ii ninte'ink.

⁷ Poonentamawihshin nimacitootamowin, miitahsh i'i ci⁠pehkisiyaan; kisiiyaapaawanihshin, miitahsh nawac ci⁠waapishkisiyaan ahpiihc wiin koon.

⁸ Taka ishi'ihshin ci⁠noontamaan minwentamowin, ciihkentamowin kaye; aanawiin ekiih piikoniyan taapishkoo ohkanan kaa⁠poohkoshkaakin, miinawaa ci⁠minwentamaan.

⁹ Keko tahsh wiin kanawaapantanken nimacitootamowinan, kaasii'an hsa kahkina nimacaatisiwinan.

¹⁰ Oo Kishemanitoo, oshihtoon kaa⁠pehkahk ote'imaa nimpimaatisiwinink, pakitin kaye kweyahkwentaakositc oshki ahcaahk nimpimaatisiwinink.

¹¹ Keko ninkoci ishi wepinihshihken kaashi ayaayan; keko otaahpinamawihshihken kaa⁠tipinawewisiyan kitAhcaahk.

¹² Kiiwe miishihshin hsa minwentamowin kaa⁠onciik kipimaaci'iwewinink, ishi'ihshin hsa nimpimaatisiwinink ci‑inentamaan ci⁠na'ihtawinaan.

¹³ Miitahsh i'i ci⁠kihkino'amawakwaa kaa⁠macitootamowaatc entinowiyan, miitahsh i'i ci⁠kiiwe naasihkawihkwaa.

¹⁴ Oo Kishemanitoo taka kanawentan nimpimaatisiwin, kanawenimihshin ci⁠nihshiwehsiwaan, miitahsh i'i ci⁠ciihkentamaan ci⁠tashintamaan kikwayahkwaatisiwin.

¹⁵ Tepencikeyan, wiici'ihshin ci⁠kiikitoyaan, nintoonink itahsh ninka onci ihkit e⁠miikwehciweniminaan.

¹⁶ Kaawiin kinantawentansiinan pakitinaahsowinan, nintaakiih piitoonan iitok; kaawiin kaye kiminwaapantansiinan kaa⁠caakisikaatekin tino pakitinaahsowinan.

¹⁷ Awiyan kaa⁠tapahsenimonitc otahcaahkoniink, mii hsa ehta i'iweni tino pakitinaahsowin Kishemanitoo kaa‑antawentank. Oo Kishemanitoo, kaawiin hsa kitaanawenimaahsii awiya kaa⁠tapahsenimotc, kaa⁠kwehkentank kaye ote'ink.

¹⁸ Oo Kishemanitoo, taka minotootan i'i Saayan (Zion) ci⁠minohsek; kiiwe oshihtoon kaashi waahkaayaapihkinikaatek Ceroosalam (Jerusalem).

¹⁹ Miitahsh i'i payesh ci⁠minwaapantaman kwayahk pakitinaahsowinan, kaa⁠caakisikaatekin kaye tino, wiinke kaye kaa‑ankwaahkisikaatekin tino pakitinaahsowinan; aape pishihkiwak itahsh ta⁠pakitinaahsowaakaniwiwak i'imaa kaashi pakitinaahsoonk.