Nikamonan 42 - Ojibwe Kihcimasina'ikan

Inini Eshi'anami'aatc Waahsa Kaakii'inaamohkaanaakaniwitc

¹ Taapishkoo hsa waawaashkeshi kaashi noontayaapaakwenotank kaa⁠pimiciwaninik nipi, Kishemanitoo, mii keniin peshikwan nintahcaahkonk eshi antaweniminaan.

² Nintahcaahkonk hsa wiinke kitishi antawenimin, kaa⁠pimaatisiyan Kishemanitoo! Aanahpii hsa ke⁠ishaayaan ci⁠awi anami'ehtawinaan kaashi ayaayan?

³ Entahso kiishik, entahso tipihk hsa nimaw e⁠inentaakwahk nintooncikawaapiwinan e⁠omiicimimiyaan. Mooshak hsa kaa⁠shiinkenimiwaatc nintishi kakwecimikook, “Aaniinti tahsh eyaatc kiKishemanitoom,” e'ishiwaatc.

⁴ Wiinke tahsh nimaanentam ninte'ink otaanaank e⁠ishi maamihkawiyaan, ekii nihtaa wiiciiwakwaapan kaakiih paahtiinowaahpan pemaatisiwaatc, e⁠ishaawaahpan owaahkaa'ikaniniink Kishemanitoon. Eh⁠pimohsewaatc ekiih ciihkentamowaahpan, ekii nikamowaatc, ekiih shaahshaakowewaatc kaye e⁠miikwehciwenimaawaatc Kishemanitoon.

⁵ Wekonen tahsh wenci maanentamaan nintahcaahkonk? Wekonen kaye wenci maanshihseyaan? Kishemanitoo hsa ninka ahpenimonotawaa keyaapi ci⁠miikwehciwenimak, nimPimaaci'iwem, ninKishemanitoom.

^6-7 O'omaa kaa⁠ishi pakamaamihkaawiyaan nimpiikwentam ninte'ink, shikwaahsh Kishemanitoo ninkiiwe nanaakatawenimaa. Okii ishihtoon maanentamowin taapishkoo kaa⁠kihci maamankaashkaak misiwe i'imaa nintahcaahkonk. Pishihshik maanshihsewin ci⁠nakishkamaan taapishkoo kaa⁠inwewekamaashkaak kaa⁠nihkipiik, taapishkoo paawihtik pinehsiink kaa⁠inihtaakwahk wetinahke Cwaartan kaa⁠ishihtakweyaak weti onci waciink Haarman (Hermon) shikwa waciink Misar (Mizar).

⁸ KaaTipenciketc hsa ninaakohtamaak mooshak kaashi saaki'iwetc mekwaa kiishikaninik, ci⁠ayaawak ke⁠ina'amowak tipihkaninik, ci⁠ayaawak kaye aaniin keshi anami'ehtawak Kishemanitoo kaa⁠tipentank nimpimaatisiwin.

⁹ Mii ke'inak Kishemanitoo kaa⁠naatamawitc ahsiniink kaa⁠inentaakositc, “Wekonen tahsh kaa⁠onci waniihkenotawiyan? Wekonen tahsh wenci poonihsehsinok i'i kaashi kakwaataki'iwaatc kaa⁠shiinkenimiwaatc?”

¹⁰ Taapishkoo e⁠maahki'iwaatc niwiiyawink inentaakwanini iki kaa⁠shiinkenimiwaatc mooshak e⁠ishi paahpinotawiwaatc, “Aaniinti tahsh eyaatc kiKishemanitoom?” e'ishiwaatc.

¹¹ Wekonen tahsh wenci maanentamaan nintahcaahkonk? Wekonen tahsh wenci maanshihseyaan? Kishemanitoo hsa ninka ahpenimonotawaa keyaapi ci⁠miikwehciwenimak, nimPimaaci'iwem, ninKishemanitoom.