Nikamonan 34 - Ojibwe Kihcimasina'ikan

Emiikwehciwenimintc Kishemanitoo Kaashiminotootaaketc

Mii 'oweni Peshik Tepit Onikamon

¹ Mooshak hsa ninka miikwehciwenimaa kaaTipenciketc; kaawiin ninka pakiciihsii miikwehc ci‑inak.

² Nintahcaahkonk hsa ninka onci miikwehciwenimaa kaaTipenciketc; taka iki kekwaatakihsewaatc ta⁠noontamook ci⁠onci minwentamowaatc kaye!

³ Wiintamaatitaa e⁠kihci inentaakositc kaaTipenciketc; taka maamaw kihci inentamowaataa owiinsowin.

⁴ Ninkii antone'waa hsa kaaTipenciketc, ninkii nahkwehtaak itahsh, ekii naatamawitc kaye kahkina eshi kohtaaciwak.

⁵ Iki hsa kenawaapamaawaatc kaaTipencikenitc ciihkentamowinaakosiwak; kaawiin hsa wiihkaa ta‑akasinaakosihsiiwak.

⁶ Wa'a hsa inini ketimaakisitc eh⁠shaakowetc, kaaTipencikenitc okii noontaakoon, miihsh eshi naatamaakotc kahkina kaashi maanshihsetc.

⁷ KaaTipenciketc hsa otencaliman owaahkaashkawaani i'i kaa⁠kohtaanenimikotc, e⁠shaapwii'aanitc.

⁸ Anta kihkentan inashke aaniin ehpiihci onishihshentaakositc kaaTipenciketc; shawentaakosi hsa a'a kaa⁠naacipa'iwaanaatc kaaTipencikenitc.

⁹ Kohtaanenimihk kaaTipenciketc, kiinawaa kaa⁠tipinawewisiiminek, kaawiin hsa kekoon noontehsehsiiwak iki kaa⁠kohtaanenimaawaatc.

¹⁰ Inashke mihshipihshinhsak noonteskatewak e⁠noontehsewaatc miicim, iki tahsh wiin kaa‑antone'waawaatc kaaTipencikenitc kaawiin ta⁠noontehsehsiiwak kekoon wenishihshininik.

¹¹ Ampeyohk kaa⁠saaki wiiciiwinakook apinoonciishak, pisintawihshik; kika kihkino'amawininim itahsh eshi kohtaanenimintc kaaTipenciketc.

¹² Awenen hsa ko kiinawaa kaa⁠saakihtootc o'o pimaatisiwin, mehsawentank kaye kinwesh ci⁠mamino pimaatisitc,

¹³ keko hsa tahsh noociko ishikiishwehken, keko kaye kiiwanimohken.

¹⁴ Nakatan macikekoon, wenishihshik noocihtoon; minihk iko ehko kashkihtooyan pisaan kakwe pimaatisin.

¹⁵ KaaTipenciketc hsa onaanaakasaapamaa' kweyahkwaatisinitc, otahsho noontawaa' kaye eshi shaakowaanikotc;

¹⁶ kaawiin itahsh wiin ominwaapamaahsii' kaa⁠macitootaminitc, ewii nihshiwanaaci'aatc ci⁠nehpici waniihkenotawimintc o'omaa ahkiink.

¹⁷ KaaTipenciketc hsa onoontawaa' kaa⁠kwayahkwaatisinitc kii⁠shaakowaanikotc; e⁠naatamawaatc kahkina eshi maanshihsenitc.

¹⁸ KaaTipenciketc hsa opehshwaapamaa' kaa⁠piikote'e entaminitc, opimaaci'aa' kaye eyaahsinik ahpenimowin.

¹⁹ Paahtiinatininiwan kweyahkwaatisitc eshi kakwaatakihsetc, kaaTipencikenitc itahsh misiwe otishi naatamaakoon;

²⁰ okanawentamini kaye kahkina ohkanan, kaawiin kanake peshik ta⁠poohkwa'ikaatehsinini.

²¹ Macikekoon hsa onihsikonaawaa meci'ishiwepisiwaatc; kaa⁠shiinkenimikotc hsa kweyahkwaatisitc ta⁠nihshiwanaaci'imaawa'.

²² KaaTipenciketc hsa opimaaci'aa' otanohkii'aakana'; kaawiin awiya kaa⁠naacipa'iwaanikotc ta⁠nihshiwanaatisihsiiwan.