Nikamonan 32 - Ojibwe Kihcimasina'ikan

Tipaacimitisowin Shikwa Kishemanitoo Opoonentamaakewin

Mii 'oweni Peshik Tepit Onikamon

¹ Shawentaakosiwak ikiweniwak omacihcikewiniwaan kaa⁠poonentamawintwaa, omacitootamowiniwaan wiinke kaakiih kaahsiinamawintwaa!

² Shawentaakosi a'a inini omacitootamowin ekaa wiihkaa ewii akintamaakohsik kaaTipencikenitc, kaye kaa⁠wayeshihtaakosihsik!

³ Ahpii kii⁠noontaatihsiwaampaan ekiih tashintansiwaan nimacitootamowinan, mii hsa 'i niwiiyaw kaakiih caakiimakahk ekii moohkoneyaan kapekiishik.

⁴ Kekapetipihk hsa, kekapekiishik kaye kikii nana'ahshish; wiinke ekiih caakii'iyan taapishkoo kaashi paankotek kaa⁠shahki'ayaak kii⁠kishaahtek e⁠niipink.

⁵ Miitahsh kaakii wiintamawinaan nimacitootamowinan ekiih kaatamawisinowinaan nimaci'ishihcikewinan. Mii hsa kaa⁠ihkitoyaan, “Ninka wiintamawaa hsa kaaTipenciketc nimacitootamowinan.” Miihsh kaakiih poonentamawiyan eshi mikoshkaatentamo'ikoyaan nimacitootamowin.

⁶ Taka hsa tahsh entahshiwaatc awiyak kehciwenimihkwaa kika anami'ehtaakook mekwaa e⁠ishihsek cikii mihkaakooyampan; ahpii hsa tahsh kihci mooshka'aninik, kaawiin ta⁠ocihcipiihsiiwak.

⁷ Kiin hsa kitinow kaashi kaasoyaan; kikanawenimihsh hsa ci⁠maanshihsehsiwaan, e⁠waahkaashkawiyan hsa mii 'i ena'amaan eh⁠pimaaci'iyan.

⁸ KaaTipenciketc itahsh ihkito, “Niin hsa kika waawiintamawin, kika kihkino'amawin kaye aanti nahke ke⁠ishaayan; Kika maamiinomin, kika kanawaapamin kaye ci⁠naanaakaci'inaan.

⁹ Keko tahsh wiin inentaakosihken taapishkoo mihtatim, shoonshoomihtatim kaye wenihsitohtamowinihsikwaa, kaa⁠onci kashki'intwaa ehta piiwaapihkoon e⁠tahkwantamowaatc ke⁠onci pisintawihkwaa.”

¹⁰ Paahtiinatininiwan hsa eshi maanshihsewaatc meci'ishiwepisiwaatc; a'a tahsh wiin kaa⁠tepweyenimaatc kaaTipencikenitc owaahkaashkaakon ominotootaakewinini.

¹¹ Kiinawaa hsa kweyahkwaatisiyek minwentamok, ciihkentamok kaye aaniihsh kaaTipenciketc kaa⁠wiitoohkawinek; nikamok kahkina kweyahkwaatisiyek kite'iwaank.