Nikamonan 27 - Ojibwe Kihcimasina'ikan

Miikwehciwi'anami'aawin

Mii 'oweni Peshik Tepit Onikamon

¹ KaaTipenciketc iitok kaa⁠waahseshkamawitc, kaa⁠pimaaci'itc kaye, awenen itahsh ke⁠kohsakipan? Wiin hsa kaa⁠kanawentank nimpimaatisiwin; kaawiin itahsh ninka kohtaacihsii.

² Ahpii hsa mecaatisiwaatc, nekaashkawiwaatc kaye, kaa⁠shiinkenimiwaatc kaye, ehpi naasihkawiwaatc ewii nihshiwaatc, ta⁠pisokehshinook hsa ci⁠pankihshinowaatc.

³ Mihsawaa hsa ko shimaakanihshak waahkaashkawiwaatc, kaawiin ninte'ink ninka ishi sekisihsii; mihsawaa ko pi⁠miikaashiwaatc, mii hsa piko 'i keyaapi keshi kehcinaa'owentamaan.

⁴ Peshikwayek hsa kekoon ninkiih kakwecimaa kaaTipenciketc e⁠antone'amowak; ci‑ishitaawak kaaTipenciketc owaahkaa'ikanink minihk iko ke⁠pimaatisiwak, ci⁠waapantamowak kaaTipenciketc omino ishi'ayaawin, ci⁠anami'e naanaakatawentamowak kaye okihci anami'ewikamikonk.

⁵ Ahpii hsa kiishikaninik wahsitaawihsenik; okihci anami'ewikamikonk hsa ninkashi kanawenimik; ninka kaanik hsa ci⁠aakawihshimitc i'imaa okihci anami'ewikamikonk, eshi ishpaapihkaanik ninkashi pakitinik.

⁶ Miitahsh i'i ci⁠shaakooci'akwaa kaa⁠shiinkenimiwaatc kaa⁠waahkaashkawiwaatc; miihsh o'o nahke keshi pakitinamawak okihci anami'ewikamikonk ci⁠shaahshaakowewak eh⁠minwentamowak; ninka nikam, ci‑ina'amaan eh⁠miikwehciwenimak kaaTipenciketc.

⁷ Oo Tepencikeyan noontawihshin kii⁠shaakowaaninaan, koohpaasinawihshin, nahkwehtawihshin kaye.

⁸ Ahpii o'o e'ishiyan, “Antone'ohshin ci⁠anami'ehtawiyan,” miihsh kaa⁠ihkitoyaan, “Haw kika antone'on!”

⁹ Keko kaasoohtawishihken! Keko ninkoci ishinisha'waahken niin kitanohkii'aakan e⁠nishkaatisiyan; kiin iitok kaapi wiici'iyan. Keko aanawenimishihken, keko kaye wepinishihken, Kishemanitoo nimPimaaci'iwem!

¹⁰ Aana hsa wiin nintete, nimaamaa kaye wepiniwaatc, kaaTipenciketc wiin ninka otaahpinik.

¹¹ Oo Tepencikeyan, kihkino'amawihshin kitishihtwaawin, ishi kihkinowinihshin eshi tahtakwaak miihkana, aaniihsh onsaam ayaawak kaa⁠shiinkenimiwaatc.

¹² Keko ishi pakitinishihken eshi mihsawentamowaatc kaa⁠shiinkenimiwaatc, noociko waa⁠inaacimiwaatc ohsha niwiih pi naasihkaakook, ewii'ishiwaatc ci⁠nihshiwaatc.

¹³ Shaakooc itahsh o'o ninkehcinaa' ci⁠otihsaapantamowak kaaTipenciketc otoonishihshentaakosiwin o'omaa ahkiink.

¹⁴ Ahpenimonotawihk kaaTipenciketc, mashkawisiik, mashkawentamook kite'iwaank; tepwe ahpenimonotawihk kaaTipenciketc.