Nikamonan 25 - Ojibwe Kihcimasina'ikan

Kiianami'aa Cikihkinowinikotc Kaye Cikanawenimikotc KaaTipencikenitc

Mii 'oweni Peshik Tepit Onikamon

¹ Tepencikeyan, kiin hsa nintahcaahkonk kitishi anami'ehtawin.

² Kiin hsa ninKishemanitoom kaa⁠tepweyeniminaan. Keko pakitinihshihken ci⁠akaci'ikooyaan; keko pakitinaahken kaa⁠shiinkenimiwaatc ci⁠shaakooci'iwaatc.

³ Kehcinaac hsa awiya ehpenimonotawihk kaawiin wiihkaa kika pakitinaahsii ci⁠akaci shaakooci'intc, iki hsa wiin eshkwaaht kaa⁠shashiipihtamowaatc ta‑akaci shaakooci'aawak.

⁴ Oo Tepencikeyan, waapanta'ihshin inahke eshihtwaayan, kihkino'amawihshin ci⁠kihkentamaan kitishaawiin.

⁵ Kihkinowinihshin, kihkino'amawihshin kaye kitepwewinink inahke cishi pimaatisiyaan, kiin iitok ninKishemanitoom kaa⁠pimaaci'iyan; kiin ohsha kaa‑ahpenimonotawinaan kapekiishik.

⁶ Oo Tepencikeyan, maamihkawinotan kikihci koohpaasinaakewin, kisaaki'iwewin kaye mewisha kaakii nihtaa naakohtooyan.

⁷ Keko tahsh maamihkawinotanken kaakii ishi maci'ishihcikeyaan kii⁠oshkaatisiyaan, kaakii ishi shashiipihtamaan kaye. Oo Tepencikeyan sesekaawiyan, kiminotootaakewinink hsa inahke ishi maamihkawinotawihshin.

⁸ KaaTipenciketc itahsh eh⁠sasekaawitc, eh⁠kwayahkwaatisitc kaa⁠onci kihkino'amawaatc omacihcike' inahke ke⁠ishaanitc.

⁹ Tepahsenimonitc hsa otishikihkinowinaa' kwayahkwaatisiwinink inahke, okihkino'amawaa' kaye otishihtwaawin.

¹⁰ Minotootaakewinink hsa, tepweyentaakosiwinink kaye inahke kaaTipenciketc otishi kihkinowinaa' kahkina kenawentaminitc otahshotamaakewin, otinaahkonikewin kaye.

¹¹ Oo Tepencikeyan, kiwiinsowinink hsa onci poonentan nimaci'ishihcikewinan aanawiin eh⁠paahtiinatihkin.

¹² Awenenan hsa ko ininiwan ke⁠kohtaanenimikotc kaaTipenciketc? Miiwan hsa ini ke⁠kihkino'amawaatc inahke ke⁠ishaanitc kaakii ishi onentamawaatc.

¹³ Miiwan hsa ini ke⁠minohsenitc, opiiwesiimini kaye tani tipinawewisiwa' ahkiini.

¹⁴ KaaTipenciketc hsa osaaki wiiciiwaa' kaa⁠kohtaanenimikotc, oka kihkentamo'aa' kaakii oshihtootc ahshotamaatiwin.

¹⁵ KaaTipenciketc hsa mooshak ninkanawaapamaa, wiin hsa kaa⁠pimaaci'itc kii⁠pita'wewak.

¹⁶ Tepencikeyan, pi⁠naasihkawihshin ci⁠koohpaasinawiyan, wiinke iitok nishikatentam, wiinke niniinami'ayaa kaye.

¹⁷ Kaashi wahsitaawihseyaan hsa ninte'ink etatawe ani paahtiinatinoon; taka kiin aapa'ohshin saakisi'ihshin eshi wahsitaawihseyaan.

¹⁸ Inashke waapantan eshi kakwaatakihseyaan, eshi wahsitaawihseyaan kaye, poonentan kahkina nimacitootamowinan.

¹⁹ Inashke kaye waapam kaa⁠shiinkenimiwaatc ehpiihci paahtiinowaatc; wiinke hsa ninkakwaanihsaki nishkenimikook.

²⁰ Kanawenimihshin ci⁠naatamawiyan; keko pakitinihshihken ci⁠akaci shaakooci'ikooyaan, kiin iitok kaa⁠naacipa'iwaaninaan.

²¹ Taka wenishihshik, kwayahkwaatisiwin kaye ninka kanawenimikoon, kiin iitok kaa‑ahpenimonotawinaan.

²² Oo Kishemanitoo pimaaci' Isriyalak (Israel) kahkina kaashi wahsitaawihsewaatc.