Nikamonan 22 - Ojibwe Kihcimasina'ikan

Inini Eshishaakowetc Cinaatamawintc, Miikwehciwinikamon Kaye Ehtashintek

Mii 'oweni Peshik Tepit Onikamon

¹ NinKishemanitoom, ninKishemanitoom wekonen kaakii⁠onci nakashiyan? Nintaanakii shaakowe, nintaanakii mohkone kaye eh⁠kanooninaan ci⁠wiici'iyan, shaakooc tahsh waahsa kitayaa.

² Oo ninKishemanitoom, entahso kiishik hsa kitaana kanoonin, entahso tipihk kaye, kaawiin tahsh kinahkwehtawihsii, miitahsh kaa⁠onci nipaahsiwaan.

³ Kiin iitok kaa⁠kihciokimaawapiyan kaa⁠kihtentaakosiyan, Isriyalak (Israel) kaa⁠nihtaa miikwehciwenimaawaatc.

⁴ Ninkehteya'aaminaapaniik iitok kikiih tepweyenimikook; ekiih tepweyenimihkwaa miihsh kaa⁠ishi pimaaci'atwaa.

⁵ Ekiih shaakowaanihkwaa hsa, mii 'i kaa⁠ishi pimaaci'atwaa; ekiih tepweyenimihkwaa hsa kaakii onci minciinawesihsikwaa.

⁶ Niin itahsh wiin kaawiin ininiink nintinowihsii, otamwaapakwesiink hsa nintinow. Kahkina hsa awiyak nintaanawenimikook, nishiinkenimikook kaye.

⁷ Kahkina hsa kaa⁠waapamiwaatc nimpaahpinotaakook! Nisaakitenaniwehtaakook kaye, miihsh kaye eshi wewepihkwepani'owaatc e'ishiwaatc,

⁸ “E⁠ahpenimonotawatc itahsh kaaTipenciketc, wekonen tahsh wenci pimaaci'ihsinohk? Wekonen tahsh kaye wenci wiici'ihsinohk eh⁠saaki'ihk itahsh kaaTipenciketc?”

⁹ Kiin iitok weweni kaakii naakaci'iyan kii⁠nihtaawikiyaan, ekii ishi'iyan ci⁠ahpenimonotawinaan mekwaa kii⁠nooni'itc nimaamaa.

¹⁰ Kaashi ayaayan hsa ninkii ishi pakitinikoo kii⁠nihtaawikiyaan, ahpii hsa nimaamaa kii⁠nihtaawiki'itc ekii onci maacii oKishemanitoomiminaan.

¹¹ Keko tahsh wiin waahsa tanentaakosihken! Maanshihsewin ohsha aasha pehshonaakwan, kaawiin kaye awiya ayaahsii ke⁠wiici'ihpan.

¹² Kaa⁠shiinkenimiwaatc hsa aape pishihkiink enentaakosiwaatc paahtiinowak e⁠waahkaashkawiwaatc, taapishkoo kaa⁠sookentaakosiwaatc aape pishihkiwak Peshan (Bashan) ahkiink kaa⁠onciiwaatc.

¹³ Mii hsa eshi taawaniwaatc taapishkoo mihshipishiwak, e⁠kihci noontaakosiwaatc e⁠nenkimowaatc ewii piihsipishiwaatc.

¹⁴ Mii hsa 'i eshinaakosiyaan taapishkoo nipi kaa⁠siikinikaatek, nihkanan kaye kahkina nanasihsewan kaashi ayaanihkawihsinkin. Ninte' hsa ninkite taapishkoo pimite waahsahkonencikan kaashi ninkitek.

¹⁵ Wiinke hsa nimpaankokwantashkwe taapishkoo waapikanahkihk, nintenaniw kaye shakashkihse ninakaskonk. Kitishi pimihshimihsh hsa ci⁠tashi nipoyan kaashi paashkinehsek.

¹⁶ Ininiwak hsa e⁠ohkwiinowaatc niwaahkaashkaakook taapishkoo animook kaawii miikaasowaatc; miitahsh eshi pakone'amowaatc nininciin, nisitan kaye.

¹⁷ Kahkina hsa nihkanan waapancikaatewan. Kaa⁠shiinkenimiwaatc hsa ninkanawaapamikook, kaawiin kanake ci⁠poonaapamiwaatc.

¹⁸ Mii kaye eshi nenaawinamaatiwaatc ninkikishkikanan, miihsh kaye eshi ahpakicikewaatc e⁠anta pana'amowaatc awenen ke⁠ayaatc kaa⁠naapishkamaan.

¹⁹ Oo Tepencikeyan, keko tahsh kiin waahsa tanetaakosihken! Kiin iitok Kaa⁠mashkawisiiyan, taka weyiip pi⁠naatamawihshin!

²⁰ Pimaaci'ihshin pashipa'ikewihkomaanink ci⁠onci nihsikoohsiwaan; pimaacihtoon nimpimaatisiwin ci⁠nihshihsikwaa iki animook.

²¹ Naatamawihshin ci⁠maakwamihsikwaa oko mihshipishiwak; naatamawihshin oko onci kaa⁠oteshkaniwaatc pikwaci aape pishihkiwak.

²² Ninka wiintamawaak hsa niicipimaatisiik aaniin kaah⁠pi ishihcikeyan, kaashi maamawi ayaawaatc hsa kika tashi miikwehciwenimin.

²³ Miikwehciwenimihk, kiinawaa kaa⁠kohtaanenimek kaaTipenciketc! Kihtenimihk, kiinawaa kahkina Cekapoonk (Jacob) kaa⁠ontahkaanesiyek! Anami'ehtawihk, kahkina Isriyalihkaank kaa⁠ontahkaanesiyek!

²⁴ Kaawiin ohsha otaanawenimaahsii', kaawiin kaye oshiinkinawaahsii' kaa⁠kakwaataki aahkosinitc. Kaawiin kaye ninkoci inahke tashi kwehkikaapawihsii eshi'ayaanitc; onoontawaa' iitok kii⁠shaakowaanikotc ci⁠wiici'aatc.

²⁵ Weti hsa kaashi maamawi ayaawaatc Isriyalak kika tashi miikwehciwenimin i'i onci kaakiih pi ishihcikeyan. Eshi ayaawaatc hsa iki kaa⁠kohtaanenimihkwaa, mii hsa weti keshi pakitinaahsoyaan ci‑ishihcikeyaan kaakii ishi ahshotamaampaan.

²⁶ Iki hsa kaa⁠kitimaakisiwaatc ta⁠wiihsiniwak, wiinke ci⁠minomanci'owaatc ke⁠ahpiihci tewiihsiniwaatc. Iki hsa kepi naasihkawaawaatc kaaTipencikenitc oka miikwehciwenimaawaan. Taka hsa mooshak iko ta⁠minohsewak!

²⁷ Kahkina hsa pemaatisiwaatc o'omaa misiwe ahkiink kaa‑ayaawaatc ta⁠maamihkawiwak, miitahsh keshi kwehkiinotawaawaatc kaaTipencikenitc. Kahkina hsa kaa⁠tahswewaanakisiwaatc pemaatisiwaatc oka anami'ehtawaawaan.

²⁸ KaaTipenciketc iitok kihciokimaawi, wiin kaye otipenimaa' kahkina entahswewaanakisinitc pemaatisinitc.

²⁹ Kahkina hsa awiyak kaa⁠kihci inenintisowaatc ta⁠wiihsiniwak ci⁠animihkohtawaawaatc kaaTipencikenitc; kaye kahkina ikiweniwak ke⁠ninkwa'ikaniwiwaatc ninkwa'ahkaanink kaa⁠kashkihtoohsikwaa ci⁠pimaatisii'itisowaatc oka animihkohtawaawaan.

³⁰ Keni aanihke nihtaawikiwaatc pemaatisiwaatc hsa okani anohkiihtawaawaan kaaTipencikenitc; keni nihtaawikiwaatc hsa tani tashintamawaawak kaaTipencikenitc.

³¹ Iki tahsh mahshi nehtaawikihsikwaa ani ayaawaatc tani wiintamawaawak Tepencikenitc eh⁠kwayahkwaatisinitc aaniin kaahpi ishihcikenitc.