Nikamonan 2 - Ojibwe Kihcimasina'ikan

Kishemanitoo Kaakii'onaapamaatc Kihciokimaan

¹ Wekonenini tahsh kotak pemaatisiwaatc wenci wii piikwahkamikisiwaatc? Wekonen hsa kaye pemaatisiwaatc ishi anihshaa wenci inentamowaatc i'i ewii ishihcikewaatc?

² Otookimaamiwaa' hsa, tepenimikowaatc kaye o'omaa ahkiink eyaanitc ohko inentamoo' e⁠wii nakaashkawaanitc kaaTipencikenitc, ini kaye kaakii onenimaanitc.

³ Mii hsa 'oweni ehkitowaatc, “Taka hsa piikopitoowaataanin opiiwaapihkweyaapiiwaan, ninkoci ci⁠ahpakitaawank, awahshime ci⁠tipenimihsinoowankitwaa.”

⁴ A'a hsa tahsh kaaTipenciketc nematapitc otookimaawapiwinink kihcikiishikonk mihci paahpi, e⁠paahpihtootc wa⁠ishihcikenitc.

⁵ Miitahsh e⁠nishki'ikotc eshi kishii kanoonaatc wiinke e⁠sekimaatc e⁠kohtaanihtaakositc e'inaatc,

⁶ “Niin ohsha piko ninkii onahsaa kaa⁠kihciokimaawi'ak i'imaa kaa⁠kihtentaakwahk waciink kaa⁠tanentaakosiwak Saayan (Zion) ecikaatek!”

⁷ O'o tahsh ihkito kihciokimaa, “Kehcinaac hsa ko ninka wiintamaakewaan ehkitotc kaaTipenciketc, o'o ekii'ishitc, ‘Kiin hsa ninKosihs, noonkom kaa⁠kiishikahk hsa kimaacii otetemihsh.

⁸ Kakwecimihshin, kika miinin itahsh kahkina pemaatisiwaatc ci⁠tipinawewisiyan, misiwe piko ahki ci⁠tipentaman.

⁹ Kika aahko tipenimaak hsa ci⁠aapacihtooyan ci⁠piiwaapihkowank tino kihciokimaak kaa⁠tahkonamowaatc, ci⁠pikishkikanaamatwaa taapishkoo waapikanahkihkwak kaa⁠ishihsewaatc.’ ”

¹⁰ Kiinawaa tahsh kehciokimaawiyek kakiihtaawentamok tepentamek o'o ahki ci⁠ayaankwaamisiyek.

¹¹ Anami'ehtawik kaaTipenciketc ci⁠kihtenimek, ci⁠kihkentamek e⁠kohtaanenimek.

¹² Kihtenimihk Okosihsimaa, ci⁠nishkaatisiihkantawihsinowek, ci⁠nihshiwanaaci'ihsinowek kaye ani pimi ayaayek aaniihsh wahkewikitaaso. Shawentaakosiwak hsa iki kaa⁠naacipa'iwaanaawaatc.