Nikamonan 19 - Ojibwe Kihcimasina'ikan

Kishemanitoo Okihci'inentaakosiwin E'naakwaninik

Mii 'oweni Peshik Tepit Onikamon

¹ Weti hsa kiishikonk ishinaakwanini Kishemanitoo okihci inentaakosiwin, ishpimink kitishi waapantamowaamin aaniin kaa⁠ishi maaciitc.

² Eyentahso kiishik hsa kiwiintamaakomin, eyentahso tipihk kaye kiwaapanta'ikoomin ci⁠onci nihsitawinamank.

³ Kaawiin ishikiishwewin, ihkitowinan kaye aapatahsinoonan, kaawiin kaye ci⁠kishiiwek kekoon noontaakwahsinoon.

⁴ Shaakooc itahsh otinaacimowiniwaa misiwe o'omaa ahkiink ishaamakanini, ehkokishipaanik ahkiink kaye tepihtaakwanini. Kishemanitoo hsa okii oshihtamawaan kiisihsoon ishpimink ke⁠ishitaanitc.

⁵ Kiisihs hsa kiih⁠pi moohka'ank eh⁠kishepaawakaninik, mii hsa eshinaakositc taapishkoo inini kaa⁠kihci wiitiketc kaa⁠ciihkentank, taapishkoo kaye otaminoowinini kaawii noonte kakwecihkashiwetc.

⁶ Weti hsa inahke napane kiishikonk onci moohka'am, ishpimink eh⁠pimi ayaatc piinihsh e⁠ani takohshink nahpaacinahke kiishikonk inahke eh⁠pankihshimotc. Kahkina tahsh kekoon ahsamaahtenk ayaamakan.

KaaTipenciketc Okihkino'ikewin Ehtashintenik

⁷ KaaTipenciketc otinaahkonikewinan hsa wiinke kiishinaakwanini, mii hsa i'imaa wenci mashkawaatisitc ahcaahk. Otihkitowinan kaye tepwewentaakwaniniwan, mii 'imaa wenci miinintwaa kakiihtaawentamowin iki kaa⁠noontehsewaatc.

⁸ Eshi kihkino'amaaketc kaye wiinke kwayahkwentaakwanini, iki hsa kaa⁠na'ihtamowaatc wiinke ta⁠minwentamook. Otinaahkonikewinan kaye weweni ishihsininiwan, mii 'imaa wenciik nihsitohtamowin.

⁹ Kaashi kohtaanenimintc kaaTipenciketc wiinke onishihshin; kaawiin kaye wiihkaa i'i ta⁠poonihsehsinoon. Eshi tipaahkoniwetc kaye aahpici weweni ishihseni; mooshak kaye kwayahk ishihseni.

¹⁰ Miiwan iitok ini nawac kaa⁠mihsawentaakwahkin ahpiihc wiin maawac iko kaa⁠onishihshitc shooniyaa waapihk, miiwan kaye ini nawac kaa⁠shiiwankin ahpiihc wiin kaa⁠ishi shiiwank aamoowi siinsipaahkwat.

¹¹ Mii hsa imaa wentinamaan kihkentamaawin, niin kitanohkii'aakan, nintipa'amaako hsa e⁠na'ihtamaan ini inaahkonikewinan.

¹² Awenen ke⁠kihkentankipan aaniin eshi mamaashiitc? Tepencikeyan, taka pehki'ihshin kii⁠kihkentansiwaan kii⁠macitootamaan.

¹³ Kanawenimihshin kaye kakaancihc ci⁠macitootansiwaan kitanohkii'aakan kaatinowiyaan, ci⁠tipenimikohsiwaan kaye. Miitahsh i'i ci⁠kiishinaakosiyaan ci⁠tipenimikohsiwaan kahkina macitootamowinan.

¹⁴ Mii hsa eshi mihsaweniminaan ci⁠mino otahpinaman o'o kaa⁠ihkitoyaan, eshi naanaakatawentamaan kaye ninte'ink Tepencikeyan, nimPimaaci'iwem, ahsiniink iitok kitinenimin kii⁠naacipa'iwaaninaan.