Nikamonan 16 - Ojibwe Kihcimasina'ikan

Keshi'aanami'aatc Awiya Cikehcinaa'owenimotc

Mii 'oweni Peshik Tepit Onikamon

¹ Oo Kishemanitoo, kanawenimihshin, kiin iitok kaa⁠naacipa'iwaaninaan.

² O'o hsa ninkii inaa kaaTipenciketc, “Kiin hsa ninTipencikem; kaawiin hsa wenishihshik nintaa ayaahsiin nishihke ayaayaampaan.”

³ KaaTipenciketc opimaatisiima' o'omaa ahkiink eyaanitc hsa etatawe onishihshentaakosiwa'. Miiwak ihsa iki kehci inenimakwaa wiinke kaye eh⁠saaki'akwaa.

⁴ Ikiweniwak hsa kaa⁠piminisha'waawaatc kotak manitoo' aanciihke tani maanentamook. Kaawiin itahsh niwii wiicihtwaawaahsiin miskwiiwi pakitinaahsowaatc, kaawiin kaye ninka wiinimaahsii' omanitoomiwaa'.

⁵ Tepencikeyan, kiin hsa kaakii ona'ooshiyan keshi tipinawewisiyaan, keshi otahkiimiyaan kaye; kiin hsa kehcinaac kikani kanawenimihsh weti niikaanaya'ii.

⁶ I'i hsa eshi tipa'ahkiihtamawiyan eshi ayonishihshik mayaa ayishihse; tepwe hsa kaashi tipinawewisiyaan etatawe onishihshin!

⁷ Ninka miikwehciwenimaa hsa kaaTipenciketc kaani wiintamawitc ke⁠ishihcikewak; mihsawaa ko eh⁠tipihkahk ninte'ink nintonci kihkino'amaakoowis.

⁸ Mooshak hsa ko nintanenimaa kaaTipenciketc eshi'ayaawak. Pehsho hsa eh⁠wiiciiwitc, kaawiin hsa kekoon ninka wahkawinikohsiin.

⁹ Miitahsh wenci minwentamaan ninte'ink, wenci ihkitoyaan kaye e⁠minwentamaan; mii hsa 'i niwiiyaw ke⁠onci aayiici anwepiimakahk.

¹⁰ Kaawiin iitok awaac kika ishi nakashihsii anaamahkamik weti onipook kaa⁠ishi'ayaawaatc. Kaawiin kaye kiin Kishemanitoo kika pakitinihsii kaa⁠na'entami'inaan ci⁠tashi wanaatahk niwiiyaw i'imaa nipowinink.

¹¹ Kikii kihkentamoo'ish keni ina'atooyaan tepwe ci⁠pimaatisiyaan. Wiinke hsa kika tepi moocihkentamo'ish e⁠wiiciiwiyan.