Nikamonan 146 - Ojibwe Kihcimasina'ikan

Emiikwehciwenimintc Kishemanitoo Pemaaci'iwetc

¹ Nanaahkomihk kaaTipenciketc! Nintahcaahkonk ninkashi nanaahkomaa kaaTipenciketc!

² Ninka nanaahkomaa hsa kaaTipenciketc minihk ke⁠pimaatisiyaan, ninka nikamoohtawaa kaye ci⁠miikwehciwenimak minihk iko ke⁠pimaatisiyaan.

³ Keko wiin ahpenimohken ininiwak wekimaawentaakosiwaatc ke⁠nipowaatc keshkihtoohsikwaa ci⁠pimaaci'iwewaatc.

⁴ Ahpii hsa tahsh nipowaatc, mihtahkamikonk hsa ta⁠kiiwe inentaakosiwak; miihsh i'i ahpii kiishikaninik wa⁠ishihcikewaahpan kaawiin ta⁠kihkentaakwahsinini.

⁵ Ta⁠shawentaakosi hsa awiya kaa⁠wiici'ikotc oKishemanitoomini Cekapoon (Jacob), kaa‑ahpenimonotawaatc kaaTipencikenitc oKishemanitooman,

⁶ kaakii oshihtoonitc kiishik, ahki, kihcikam kaye, kahkina kaye kekoon i'imaa ayaanikin. Wiin iitok mooshak kaa⁠tepweyentaakositc.

⁷ KaaTipenciketc hsa onaatamawaa' kaa⁠wehsaani'imintc, otahshamaa' kaye kaa⁠noonteskatenitc. Opakitinaa' kaye i'i kaa⁠tahkonimintc,

⁸ owaapi'aa' kaye kaa⁠waapihsinik, omayaawikaapawi'aa' kaye kaa⁠maahkisinitc; osaaki'aa' kaye i'i kweyahkwaatisinitc.

⁹ Onaatamawaa' ihsa kaye kaa⁠mayakisinitc, onaanaakaci'aa' kaye kwiiwahshishaana', kiiwaacihkwe' kaye. Owanashkwe'aa' itahsh kaye wa⁠ishihcikenihpan mecaatisinitc.

¹⁰ KaaTipenciketc hsa ta⁠nehpici tipencike. Nanaahkomihk kaaTipenciketc kiKishemanitoomiwaa kahkina keni tahswewaanakisiyek eyaayek Saayan (Zion) ecikaatek.