Nikamonan 145 - Ojibwe Kihcimasina'ikan

Miikwehciwi'anami'enikamon

Mii 'oweni Peshik Tepit Onikamon

¹ NinKishemanitoom Kehciokimaahkantawiyan, ninka tashintaan hsa kikihci inentaakosiwin, miikwehc kika'inin nehpic iko.

² Entahso kiishik hsa kika miikwehciwenimin, kiwiinsowin kaye kika miikwehciwenimin nehpic iko.

³ Aahpici hsa kihci inentaakosi kaaTipenciketc, ishpentaakosi ci⁠miikwehciwenimintipan, kaawiin hsa wiihkaa ta⁠tepici kihkencikaatehsinini eshi kihci inentaakositc.

⁴ Peshikwewaan hsa pemaatisiwaatc oka ani ayaanihke wiintamawaawaa' kotak keni ayaanihke nihtaawikinitc; ci⁠ani tashintamowaatc eshi mashkawihcikewatc.

⁵ Oka tashintaanaawaa hsa kikihci inentaakosiwin, eshi kihciokimaawentaakosiwatc kaye, niin itahsh ninka naanaakatawentaanan kaa⁠maamahkaatentaakwahkin kitishihcikewinan.

⁶ Pemaatsiwaatc hsa oka tashintaanaawaa eshi mashkawentaakwaninik kaa⁠kohtaanentaakwaninikin kitanohkiiwinan, keniin itahsh ninka wiintamaake eshi kihci inentaakosiyan.

⁷ Oka tashintaanaawaa hsa kahkina eshi wenootaninik kiminotootaakewin, ta⁠ciihki nakamowak kaye ci⁠nikamoohtamowaatc kikwayahkwaatisiwin.

⁸ KaaTipenciketc hsa kishewaatisi, koohpaatencike kaye. Shashiipikitaaso, wenooci saaki'iwe kaye.

⁹ Kahkina hsa awiyan entahso peshikonitc ominotootawaan, okoohpaatentaan kahkina kekoon kaakii oshihtootc.

¹⁰ Oo Tepencikeyan, kahkina hsa kekoon kaakii oshihtooyan kika nanaahkomikon; pemaatisiwaatc tepinawewisiyan kika miikwehciwenimikook.

¹¹ Ta⁠wiintamaakewak hsa eshi kihci inentaakwaninik kitookimaawiwin, oka tashintaanaawaa kaye eshi mashkawihcikewatc.

¹² Miihsh kahkina awiyak pemaatisiwaatc ci⁠kihkentamowaatc eshi mashkawihcikewatc, eshi kihciokimaawentaakwaninik kaye kitookimaawiwin.

¹³ I'i kitookimaawiwin kaawiin wiihkaa ta⁠poonihsehsinoon, eshi Tipencikeyan kaye tani nehpici ayaa shaapwaya'ii eni tahshiwaatc keni ayaanihke nihtaawikiwaatc. KaaTipenciketc hsa kehcinaac ta⁠ishihcike kahkina eshi ahshotamaaketc, osaakihtoon kaye kahkina kekoon kaakii oshihtootc.

¹⁴ Osiitonaa' hsa kaye kaa⁠maanshihsenitc, omayaawikaapawi'aa' kahkina kaa⁠pankihshininitc.

¹⁵ Kahkina hsa awiyak kikanawaapamikook eh⁠pakohsenimihkwaa, kika ahshamaak itahsh na'i ahpii noontehsewaatc.

¹⁶ Kininciink hsa kekoon kitoonci miikiwe, miihsh eshi tepihsewaatc eshi mihsawencikewaatc kahkina entahshiwaatc pemaatisiwaatc.

¹⁷ KaaTipenciketc hsa kahkina kekoon eshihciketc kwayahkwentaakwanini, eshi koohpaatenciketc hsa kaye kahkina kekoon otootaan.

¹⁸ Aahpici hsa opeshwaapamaa' i'i kahkina kaa⁠kanoonikotc, kahkina hsa ko tepwewinink kaashi kanoonikotc.

¹⁹ Oka mooshkine miinaa' hsa eshi mihsawentaminitc i'i kwehtaanenimikotc. Oka noontawaa' kaye e⁠shaakowaanikotc, miihsh keshi pimaaci'aatc.

²⁰ KaaTipenciketc hsa onaanaakaci'aa' kahkina kaa⁠saaki'ikotc; kahkina tahsh wiin oka nihshiwanaaci'aa' mecaatisinitc.

²¹ Nintoonink hsa ninka onci miikwehciwenimaa kaaTipenciketc. Taka kahkina awiya' kaakii oshi'aatc oka miikwehciwentamini kehtentaakwaninik owiinsowin nehpic iko.