Nikamonan 14 - Ojibwe Kihcimasina'ikan

Inini Omaci'ishiwepisiwin Ehtashintenik

Mii 'oweni Peshik Tepit Onikamon

¹ Kaa⁠kakiipaatisitc hsa ihkito ote'ink, “Kaawiin ohsha ayaahsii Kishemanitoo!” Kahkina hsa ko noociko nihtaa ishihcikewak, wiinke kaye nihtaa mamaashiiwak; kaawiin hsa awaac iko peshik ayaahsii kaa⁠onishihshininik kaa⁠tootank.

² KaaTipenciketc hsa naashaya'ii inaapi, kihcikiishikonk e⁠onsaapamaatc pemaatisinitc, e⁠nanaantawaapamaatc awiyan ci⁠kakiihtaawentaminikwen, awiyan kaye ke⁠antone'okotc.

³ Kahkina hsa kii⁠pahkeshkaawak, kahkina kaye kaa⁠tahshiwaatc maamawi ani noociko ishi'ayaawak. Kaawiin hsa awaac iko peshik ayaahsii kaa⁠onishihshininik ke⁠tootankipan, kaawiin hsa ko aapiinc peshik ayaahsii.

⁴ KaaTipenciketc tahsh ishi kakwetwe, “Iki hsa kahkina kaa⁠maci'ishiwepisiwaatc, kaawiin ina okihkentamaawinihsiiwak? Miiwak iitok iki kaa⁠nihshiwanaaci'aawaatc nimpimaatisiima' taapishkoo ininiwak kaashi kitamwaawaatc pahkweshikanan, kaawiin kaye wiihkaa ninkanoonikohsiik.”

⁵ Wawiinke hsa tahsh ta⁠kakwaatakaanimisiwak, aaniihsh Kishemanitoon owiiciiwaani' i'i kweyahkwaatisinitc.

⁶ Kaa⁠maci'ishiwepisiwaatc hsa owanashkwehtamawaani aaniin wa‑ani ishihcikenitc kaa⁠kitimaakisinitc, shaakooc itahsh kaaTipencikenitc onaatamaakoni.

⁷ Ampehsh itahsh shaakoocihtwaawin otihsikowaatc Isriyalak (Israel) ci⁠onciinik Saayanink (Zion). Wiinke iitok ta⁠kihci minwentamook Isriyalak pemaatisiwaatc, ahpii miinawaa kiiwe minohse'ikowaatc kaaTipencikenitc.