Nikamonan 132 - Ojibwe Kihcimasina'ikan

Kaashimiikwehciwencikaatenik Kihci anami'ewikamik

¹ Oo Tepencikeyan, keko waniihkewaahken kahkina Tepit (David) kaakii ishi kakwaatakihsetc.

² Mii hsa owe kaa⁠ishi ahpimonotawaakopanen kaaTipencikenitc, ekii ayiici ahshotamawaakopanen kaye Cekapoon (Jacob) weKishemanitoominitc meshkawentaakosinitc, miihsh o'o Tepit kaa⁠ihkitokopanen,

³ “Kaawiin ninka piintikehsii nintaawinink, kaawiin kaye ninka kawihshimohsii,

⁴ kaawiin kaye ninka pasakwaapihsii ci⁠nipaayaampan,

⁵ paanimaa hsa kii⁠mihkamowak keshi'ayaatc kaaTipenciketc, kii⁠mihkamowak ke⁠ishitaanitc Cekap oKishemanitooman meshkawentaakosinitc.”

⁶ Weti hsa Ehparaht (Ephrath) ninkii onci noontaamin eh⁠tashintek i'i ahshotamaakemahkahk, ekii ishi mihkamaank itahsh mihshawahkamink Cear (Jaar) ecikaatek.

⁷ Miihsh o'o kaa⁠ihkitoyaank, “Taka ishaawaataa kaaTipenciketc otayaawinink; taka anta anami'ehtawaataa eshi ahpisitepitc.”

⁸ Oo Tepencikeyan, taka piishaan eshi'ayaak kitanwepiiwikamik cipi kikiiyan ahshotamaakemahkahk wenci kihkinawaasinaakwahk kimashkawisiiwin.

⁹ Taka hsa kitanami'ewikimaamak oka kikihkonayaantaanaawaa kikwayahkwaatisiwin; taka kaye pemaatisiwaatc tepinawewisiyan ta⁠shaakowewak ke⁠ahpiihci minwentamowaatc.

¹⁰ A'a tahsh onci kitanohkii'aakan Tepit, keko hsa aanawenimaahken wenaapamatc ci⁠kihciokimaawitc.

¹¹ Kiin Tepencikeyan, kaakii ayiici ahshotamawaawatipan iitok Tepit kitanohkii'aakan, kaawiin iitok kika aantentansii i'i kaakii ishi ahshotamaakeyan, o'o ekii ihkitowampanen, “Peshik hsa kiin iko kipiiwesiim ta⁠kihciokimaawi, ci⁠naapishkawihk i'i kaashi kihciokimaawiyan.

¹² Kiishpin hsa kikosihsak kanawentamowaatc kaakii onahtaawak ahshotamaatiwin, nintihkitowinan kaye ke⁠kihkino'amawakwaa, miitahsh keni okosihsiwaatc nehpic iko ci⁠ani naapishkawimihk o'o kaashi kihciokimaawiwatc.”

¹³ KaaTipenciketc ohsha okii onaapantaan Saayan (Zion); e⁠mihsawentank i'imaa ewii ishitaatc, e⁠ihkitotc,

¹⁴ “Mii hsa iwe eshi'ayaak keshi anwepiyaan nehpic iko, mii hsa imaa eshi mihsawentamaan ewiih tashikimaawiyaan.

¹⁵ Ninka minohsehtoon hsa Saayan aaniin iko keshi noontehsek, iki kaye ketimaakisiwaatc i'imaa eyaawaatc ninka tepahshamaak.

¹⁶ Anami'ewikimaak kaye i'imaa ayaawaatc ninka ishi'aak ci⁠kikihkonayaatamowaatc pimaaci'ikoowisiwin, pemaatisiwaatc kaye i'imaa wenci tipentaakosiwaatc ta⁠nehpici nakamowak ke⁠ahpiihci minwentamowaatc.

¹⁷ Miitahsh ci‑ishihcikewak peshik Tepit opiiwesiiman ci⁠ani kihciokimaawinitc ke⁠kihci inentaakosinitc; ci⁠kanawentamowak eshi tipenciketc ke⁠onaapamak ninkihciokimaam.

¹⁸ Ke⁠shiinkenimikotc hsa ninka ishi'imaa' ci⁠kikishkaminitc akatentamowin, otookimaawiwin itahsh wiin tani minohseni ci⁠ani kiishinaakwaninik.”