Nikamonan 119 - Ojibwe Kihcimasina'ikan

Cikihciwencikaatenikipan Otoonahshowewin KaaTipenciketc

⁵⁷ Oo Tepencikeyan, kiin ihsa ehta kaa‑antaweniminaan, miihsh eshi ahshotamawinaan ewii na'ihtamaan kitihkitowinan.

⁵⁸ Enikohkote'eyaan hsa ko kitishi pakohsenimin ci⁠koohpaatenimiyan ci‑ishihsek mayaa ehkitoyan.

⁵⁹ Ekii naanaakatawentamaan aaniin eshi pimaatisiyaan, miihsh kaakii nakatamaan meshkwac ewiih piminisha'amaan kitihkitowinan.

⁶⁰ Kaawiin hsa ninka pwaahtawiihsii ci⁠weyiipisiyaan ci⁠na'ihtamaan kitoonahshowewin.

⁶¹ Mihsawaa ko kakwe nakwaashiwaatc meci'ishiwepisiwaatc, kaawiin hsa ninka waniihkehsii kikihkino'amaakewin.

⁶² Aapihtaa tipihkahk hsa ninka wanishkaa ci⁠miikwehciweniminaan, aaniihsh kwayahkohsinoon kitoonahshowewinan.

⁶³ Nisaaki wiiciiwaak hsa kahkina kaa⁠kohtaanenimihkwaa, kahkina kaa⁠piminisha'amowaatc ehkitowatc.

⁶⁴ Oo Tepencikeyan, kisaaki'iwewin hsa ko misiwe ayaamakan ahkiink; kihkino'amawihshin hsa tahsh kitoonahshowewinan.

Kaa'ahpiihcikihci'inentaakwaninik KaaTipenciketc Otoonahsowewin

⁶⁵ Oo Tepencikeyan, minotootawihshin hsa niin tepahsenimoyaan kitanohkii'aakan mayaa piko eshihsink kitihkitowin.

⁶⁶ Kihkino'amawihshin ci⁠kihkentamaan aaniin keni ishihcikeyaan, ci⁠okihkentamaawiniyaan kaye, aaniihsh nintepwehtaanan kitoonahshowewinan.

⁶⁷ Cipwaa hsa nana'ahshiyan ninkii nihtaa wawaniinaapan, noonkom itahsh wiin ninkihciwentaan ehkitoyan.

⁶⁸ Etatawe hsa kisasekaayentaakos wiinke hsa e⁠nihtaa minotootaakeyan, kihkino'amawihshin hsa kitinaahkonikewinan.

⁶⁹ Iki hsa kehci inenintisowaatc noociko nintinaacimikook eh⁠kiiwanimowaatc; niin itahsh wiin iko enikohkote'eyaan ninka tipitootaanan kitinaahkonikewinan.

⁷⁰ Kaawiin kanake ci⁠koohpaatenimiwewaatc, niin itahsh wiin ninciihkentaan eshi kikihkino'amaakeyan.

⁷¹ Kii⁠onishihshinikopan iinsan kaakii nana'ahshiyampan, cikii onci kihkentamaampaan kitinaahkonikewinan.

⁷² Kitoonahshowewin hsa kaa⁠wiintaman nawac nintoonishihshentaan ahpiihc wiin niipiwa' kihcimitaahswaahk waapaapihko shooniyaak, osaawi shooniyaak kaye.

Kaatepweyencikaatenik KaaTipenciketc Otoonahshowewin.

⁸⁹ Oo Tepencikeyan, kitihkitowin kii⁠nehpici onahcikaate ci⁠ayaak kihcikiishikonk.

⁹⁰ I'i hsa kaashi tepweyentaakosiyan nehpic tani ayaamakan minihk iko keni ayaanihke nihtaawikinaaniwank; kiin iitok kaakii onahtooyan ahki keshi ahtek, miihsh i'imaa eyaak.

⁹¹ I'i hsa kaakii ishi onahcikeyan keyaapi noonkom kaa⁠kiishikahk pimihse, kiin aaniihsh kahkina kekoon kitipentaan ci⁠pamiihtaakoyan.

⁹² Kitoonahshowewin hsa kaa⁠minwentami'ikoyaan. Kiishpin o'o ishihsehsinokipan, aasha iinsan nintaakii nihsikoon o'o kaashi kakwaatakihtooyaan.

⁹³ Kaawiin hsa wiihkaa ninka waniihkenotansiinan kaa⁠inaahkonikeyan, mii iitok i'imaa wenci miishiyan ci⁠pimaatisiyaan.

⁹⁴ Naatamawihshin, kiin iitok kitipenimihsh; ninka kakwe piminisha'aanan kitinaahkonikewinan.

⁹⁵ Mecaatisiwaatc ohsha nintahkamaakook ewii nihshiwaatc; shaakooc itahsh ninka naanaakatawentaanan kitinaacimowinan.

⁹⁶ Nintishi kihkentaan hsa kahkina kekoonan aana kiishinaakwahkin shaakooc itahsh mihci tipinamawaakaatewan; kitinaahkonikewinan itahsh wiin kaawiin tipinikaatehsinoonan.

Keshisaakihcikaatenikipan KaaTipenciketc Otoonahshowewin

⁹⁷ Etatawe hsa nisaakihtoon kitoonahshowewin, mii hsa iwe kapekiishik kaa⁠naanaakatawentamaan.

⁹⁸ Kitinaahkonikewinan hsa mooshak e⁠wiiciiwikoyaan mii 'i niin nawac kaa⁠onci kakiihtaawentamaan ahpiihc wiin iki kaa⁠shiinkenimiwaatc.

⁹⁹ Nawac hsa nintoonihsitohtamowinim ahpiihc wiin kahkina kehkino'amawiwaatc, aaniihsh kitinaahkonikewinan ninihtaa naanaakatawentaanan.

¹⁰⁰ Nawac kaye niipiwa' nintoonihsitohtamaawinim ahpiihc wiin kihci aya'aak, aaniihsh nina'ihtaanan kitinaahkonikewinan.

¹⁰¹ Ninkanawenintis ihsa ci⁠maci'ishiwepisihsiwaan aaniihsh niwii na'ihtaan kitihkitowin.

¹⁰² Kaawiin hsa nintoonci nakatansiinan kikihkino'amaakewinan, kiin iitok iko kaa⁠kihkino'amawihshiyan.

¹⁰³ Etatawe hsa nisaakihtoonan kitihkitowinan, ahpiihc wiin kaashi minohpitamaan aamoowi siinsipaahkwat.

¹⁰⁴ Kitihkitowinink hsa nintoontinaan nihsitohtamowin; miitahsh kaa⁠onci shiinkentamaan entahsinkin wanitootamowinan.

Eshiwaahseshkaakemakaninik KaaTipenciketc Otoonahshowewin

¹⁰⁵ Kitihkitowin hsa nintoowaahsahkonencikan ci⁠kihkinowinikoyaan, miihsh ke⁠onci waahseyaak inahke keni ishaayaan.

¹⁰⁶ Tepencikeyan, tepwe hsa ninkii ayiici ahpim ewiih tootamaan kaa⁠kwayahkwentaakwahkin kitoonahshowewinan.

¹⁰⁷ Oo Tepencikeyan etatawe hsa nimpi kihci kakwaatakihtoo; kiiwe pimaatisii'ihshin ci‑ishihsek mayaa kaa⁠ihkitoyan.

¹⁰⁸ Oo Tepencikeyan, minwaapantan o'o kaashi miikwehci anami'ehtawinaan, kihkino'amawihshin kitoonahshowewinan.

¹⁰⁹ Aanawiin mooshak hsa ko e⁠naniisaaninaakwahk nimpimaatisiwin; kaawiin itahsh ninka waniihkehsii kitoonahshowewin.

¹¹⁰ Meci'ishiwepisiwaatc hsa otoonahtoonaawaa waa⁠ishi kaahcici'iwaatc, shaakooc itahsh kaawiin nintoonci pahkenotansiinan kitinaahkonikewinan.

¹¹¹ Kitinaahkonikewinan hsa ninehpici tipinawewis eh⁠kihtakintamaan, mii iitok i'imaa wenci minwentamaan ninte'ink.

¹¹² Ninte'ink hsa ko ninkii ishi onentaanaapan ewiih kanawentamaan kitinaahkonikewin minihk iko ke⁠pimaatisiyaan.

Emihsawentaakwahk Cina'ihcikaatenikipan KaaTipenciketc Otoonahshowewin

¹²⁹ Etatawe hsa maamahkaasihtaakwanoon kitinaahkonikewinan, miitahsh wiinke misiwe piko kaa⁠onci inentamaan ewiih kanawentamaan.

¹³⁰ Kehkino'amaakeyan hsa kaashi kiihkaa waawiintekin mii 'imaa wenci waahseyaak. Mii iitok i'imaa kaa⁠onihsitohtamaawinihsikwaa ke⁠onci maacii kakiihtaawentamowaatc.

¹³¹ Wiinke hsa piko tepwe nimihsawentaanan kitoonahshowewinan e⁠inentaakwahk taapishkoo e⁠noontayaapaakwenotamaan kitihkitowinan.

¹³² Piinaapin, ci⁠koohpaatenimiyan, ci⁠tootawiyan kaa⁠nihtaa tootawatwaa iki kaa⁠saaki'ihkwaa.

¹³³ Kaakii ishi ahshotamawiyan hsa ishihcike'ihshin ci⁠kanawenimiyan ci⁠pisokehshinsiwaan, keko pakitinanken meci kekoon ci⁠tipenimikoyaan.

¹³⁴ Shaapwii'ihshin hsa kaawiih tootawiwaatc ininiwak ke⁠wehsaani'iwaatc miihsh pisaan ci⁠na'ihtamaan kitinaahkonikewinan.

¹³⁵ Taka hsa wiinke minwaapamihshin, kihkino'amawihshin kitihkitowinan.

¹³⁶ Siipiiwentaakwan hsa kaashi oncikawaapiyaan onsaam aaniihsh kaawiin awiyak ona'ihtansiinaawaa kitoonahshowewin.

Weweni E'inaahkonikemakaninik KaaTipenciketc Otoonahshowewin

¹³⁷ Oo Tepencikeyan, kiin hsa kikwayahkwaatis, kwayahk e⁠inaahkonikeyan.

¹³⁸ Ini hsa kitinaahkonikewinan kaa⁠onahtooyan tepweyentaakwanoon wiinke kaye eh⁠kwayahkwentaakwahkin.

¹³⁹ Aahpici hsa ninishki'ikowaanan eshihcikewaatc iki kaa⁠shiinkenimiwaatc eh⁠papaamihtansikwaa kitihkitowinan.

¹⁴⁰ Kahkina hsa eshi ahshotamaakeyan kehcinaac tepweyentaakwanoon, etatawe nisaakihtoonan.

¹⁴¹ Wiinke hsa niin nintapahsentaakos, nintaanawentaakos kaye, shaakooc itahsh kaawiin niwaniihkenotansiinan kitinaahkonikewinan.

¹⁴² Eshi kwayahkwaatisiyan hsa kaawiin wiihkaa ta⁠poonihsehsinoon, kitoonahshowewin hsa kaye tepwewan.

¹⁴³ Aanawiin otihsikoyaan maanshihsewin, wahsitaawentamowin kaye, shaakooc iko kitinaahkonikewinink nintoonci ciihkentam.

¹⁴⁴ Kitinaahkonikewinan hsa nehpic iko kwayahkwentaakwanoon. Miinshihshin hsa kwayahk ci⁠nihsitohtamaan ci⁠pimaatisiyaan.

Keshikakwetwenkipan Awiya Ciwiici'intc

¹⁵³ Inashke kanawaapamihshin eshi kakwaatakihseyaan ci⁠naatamawiyan, kaawiin iitok niwaniihkenotansiin kitoonahshowewin.

¹⁵⁴ Naatamawihshin o'o kaa⁠ishi maanshihseyaan, ci⁠tako saakisi'iyan, ci⁠kiiwe pimaatisii'iyan mayaa piko ci‑ishihsek eshihsinkin kitihkitowinan.

¹⁵⁵ Mecaatisiwaatc hsa wiinke onaawaapantaanaawaa pimaaci'ikoowisiwin, onsaam kaawiin ishihcikehsiiwak ciwiih kakwe na'ihtamowaahpan kitinaahkonikewinan.

¹⁵⁶ Wiinke hsa wenootan eshi koohpaatenimiweyan oo Tepencikeyan, tootawihshin tepwe ci⁠pimaatisiyaan ci‑ishihsek mayaa eshihsinkin kitinaahkonikewinan.

¹⁵⁷ Paahtiinowak hsa kaa⁠shiinkenimiwaatc kekwaataki'iwaatc, kaawiin itahsh nintoonci nakatansiinan kitihkitowinan.

¹⁵⁸ Kiih⁠kanawaapamakwaa hsa iki meci'ishiwepisiwaatc, wiinke hsa ninkakwaanihsakamanci', aaniihsh kaawiin ona'ihtansiinaawaa kitihkitowin.

¹⁵⁹ Inashke niin ehpiihci saakihtooyaan kitihkitowinan, oo Tepencikeyan kanawentan nimpimaatisiwin taapishkoo kaashi saaki'iweyan.

¹⁶⁰ Kahkina hsa kitihkitowinan tepweyentaakwanoon; kahkina kweyahkwentaakwahkin kitoonahshowewinan nehpic ta‑ayaawan.

Keshi'anami'aank Awiya Ciwiici'ikoowisitc

¹⁶⁹ Oo Tepencikeyan, taka noontawihshin o'o kaashi shaakowaaninaan ci⁠wiici'iyan, miishihshin nihsitohtamowin ci‑ishihsek mayaa eshihsink kitihkitowin.

¹⁷⁰ Pisintawihshin o'o kaashi kakweciminaan, ishi naatamawihshin inahke kaakii ishi ahshotaman.

¹⁷¹ Taka hsa nintoonink kika onci miikwehciwenimin, kikihkino'amaw aaniihsh kitihkitowinan.

¹⁷² Taka hsa ninka nikamoohtaanan kitihkitowinan, kahkina iitok kitinaahkonikewinan kwayahkwentaakwanoon.

¹⁷³ Taka mooshak ahshwiin ciwi wiici'iyan, kitihkitowinan iitok ninkii onentaanan ewiih piminisha'amaan.

¹⁷⁴ Oo Tepencikeyan, wiinke hsa nimihsawentaan kipimaaci'iwewin, e⁠minwentamaan kitoonahshowewin.

¹⁷⁵ Taka ninka pimaatis ci⁠miikwehciweniminaan; ci⁠wiitoohkaakoyaan kitoonahshowewin.

¹⁷⁶ Ninkii wanihshin hsa taapishkoo maanahcaanihsh. Antone'ohshin, niin iitok kitanohkii'aakan, kaawiin iitok niwaniihkenotansiinan kitoonahshowewinan.