Nikamonan 104 - Ojibwe Kihcimasina'ikan

Ehmiikwehciwenimintc Kahkina Kekoon Kaakii'oshihtootc

¹ Nintahcaahkonk hsa ninka onci miikwehciwenimaa kaaTipenciketc. Oo Tepencikeyan ninKishemanitoom etatawe kikihci inentaakos; eh⁠kikishkaman kihtentaakosiwin, okimaawentaakosiwin kaye;

² kaa⁠waahseyaak kaye kipisihkaan taapishkoo kaashi kikishkikaatek kashkiikiiwin. Mii kaye kaah⁠tootaman kiishik ekii tashweyiikipitooyaan taapishkoo kaa⁠toocikaatek pakwaanekamik.

³ Kikii ishi oshihtoon kaye kitaawin ishpimink nipiihkaank. Mii kaye enwaataman waahkwiin kimiikaasowi'otaapaanink, kii⁠piminoowek mii 'imaa eshi pimi ayaayan.

⁴ Nootin kaye mii 'i enwaataman kaa⁠papaamaacimowaatc awiyak, kaa⁠waawaahtehsek kitinwaataan taapishkoo kaa‑anohkiihtawihkwaa.

⁵ Kiin kaye wiinke kikii aayiitahtoon ahki i'imaa kaashi ahtek, kaawiin tahsh wiihkaa ta⁠wahkawihsehsinoon.

⁶ Kii⁠oshi pakitinaman hsa nipi kihcikamiink mii hsa kaa⁠tootaman taapishkoo kashkiikiiwin kaa⁠pakiciikinikaatek; kihci waciin tahsh wiinke kii⁠nihkipiiwan.

⁷ Ahpii tahsh kiih⁠kishii kanootaman nipi, mii 'i kaa⁠ishi maaciiyaakamihsek; ekii maaciipa'iweyaakamihsek ahpii kii⁠noontamaamakahk kaakii ishi shaakowewatc kii⁠pinehsiiwihtaakosiwatc.

⁸ Kihci waciihkaank hsa itahsh kii⁠ani ayishiciwan piinihsh ekii ani ocihciciwank kaashi papahsatinaak, kaakii ishi oshihtoowampanen ke⁠ishi'ayaak i'i nipi.

⁹ Kikii oshihsitoon hsa aanti ke⁠ahko ishaamakahk i'i nipi miinawaa wiihkaa ci⁠nihkipiihsinok o'o ahki.

¹⁰ Kitishihtoon kaye moohkiciwinipi ci⁠mamoohkiciwank kaashi papahsatinaak, siipiin kaye ci⁠ayishiciwankin kaashi nanahsawatinaak.

¹¹ Mii hsa tahsh i'imaa wentaakamancikewaatc aya'aawihshak mihshawahkamik kaa‑ayaawaatc, pikwaci maanshimihtatimook kaye wenci teminihkwewaatc.

¹² Pinehshiinshak kaye kaa⁠papaamihsewaatc mii 'imaa eshi wasihswanohkewaatc ciikipiik, eh⁠tanwewitamowaatc mekweya'ii kaashi wawatihkwanihkaanik.

¹³ Weti tahsh ishpimink kaashi ayaayan kitoonci ishihcike cishi kimiwank kaashi papiihkwatinaak, miitahsh o'o ahki eshi tepinawesiimakahk misiwe e⁠naakwahk kitanohkiiwin.

¹⁴ Kiin kaa⁠ishihtooyan mashkohsiin ci⁠maaciikinkin ke⁠miiciwaatc pishihkiwak, kihtikaanan kaye inini ke⁠pamihtootc, ci⁠nihtaawikihtootc ke⁠miicitc i'imaa ahkiink.

¹⁵ Ci⁠oshihtootc kaye shoominaapooni ke⁠minote'eshkaakotc, pimiteni kaye ke⁠minwiinkweshkaakotc, ci⁠oshi'aatc kaye pahkweshikanan ke⁠mashkawisiishkaakotc.

¹⁶ Kiishkaahtikook Lepanan (Lebanon) ahkiink kaa‑ayaawaatc hsa wiinke tepihsewak nipiini, kaaTipenciketc omihtikoma' wiin iko kaakiih kihtikaanaatc.

¹⁷ Miitahsh i'imaa pinehshiinsha' eshi oshihtoonitc owasihswanini; kihci mooska'ohsiwa' kaye mii 'imaa eshi wasihswanohkenitc kiishkaahtikonk.

¹⁸ Pikwaci maanatihkwak hsa kii⁠oshihtamawaawak waciin ci‑ishitaawaatc, kaashi ayahsiniihkaanik tahsh wiin Paacaarwak (Badger) ishi kaasowak.

¹⁹ Kiin kikii ishi'aa tipihki kiisihs ke⁠onci kikencikaatek aaniin keni ishiwepahk; kiisihs kaye okihkentaan ahpii ke⁠pankihshimotc.

²⁰ Kiin kikii oshihtoon kaa⁠kashkiitipihkahk. Kii⁠tipihkaninik tahsh mii 'i kahkina aya'aawihshak noohpimiink kaa‑ayaawaatc eshi mateyiiwaatc.

²¹ Oshki mihshipishiwak hsa kaye noontaakosiwak kii⁠antawencikewaatc, e⁠nanaantawaapantamowaatc miicim Kishemanitoon kaa⁠miikiwenitc.

²² Kiisihsoon tahsh ehpi moohka'aminitc, mii 'i eshi kiiwewaatc e⁠awi pimihshinowaatc owaashiwaank.

²³ Mii hsa wiin i'i ahpii pemaatisiwaatc, eshi tootamowaatc otanohkiiwiniwaan, e⁠anohkiiwaatc piinihsh e⁠ani onaakohshininik.

²⁴ Tepencikeyan, etatawe hsa niipiwa' kekoonan kikii oshihtoonan, kikakiihtaawentamowiniink ohsha kahkina kekoon kikii onci oshihtoon! Mooshkinewak ohsha o'omaa ahkiink kahkina kaakii oshi'atwaa!

²⁵ I'i tahsh kaye kihcikam wawiinke mihcaa, mankateyaa kaye, mii hsa imaa eyaawaatc kaa⁠kashki'aahsiwintwaa ci⁠akimintwaapan ehpiihci paahtiinowaatc aya'aawihshak kaa⁠mamaantitowaatc, kaa‑ayakaahshiinshiwaatc kaye.

²⁶ Kihci ciimaanan kaye pimaahsinoon kihcikamiink, mii kaye imaa kihci ohkaatiikinepik kaakii oshi'atc entashi otaminotc.

²⁷ Kahkina hsa kitahpenimonotaakook ci⁠ahshamatwaa ahpii kiiwii wiihsiniwaatc.

²⁸ Kii⁠ahshamatwaa tahsh mii 'i eshi miiciwaatc, kiin iitok kaa⁠ontinamawatwaa eshi wiihsiniwaatc, miihsh i'i eshi tewiihsiniwaatc.

²⁹ Ahpii hsa tahsh kiih⁠kaasowatc, mii 'i wiinke eshi sekisiwaatc; kii⁠otaahpinamowatc kaye opakitanaamowiniwaan, mii 'i eshi nipowaatc e⁠ani kiiwe ishi'ayaawaatc paashkinehkamikonk kaakii onci oshi'aawintwaapanen.

³⁰ Kii⁠miinatwaa tahsh pakitanaamowin mii 'i eshi oshi'intwaa, kiin kaye oshki pimaatisiwin kitahtoon o'omaa ahkiink!

³¹ Taka kaaTipenciketc okihci inentaakosiwin nehpic ta‑ayaani, taka kaye oka minwentaanan kaakii oshihtootc!

³² Kii⁠kanawaapantank ahkiini mii 'i eshi nininkishkaanik; kii⁠saaminank kihci waciini mii 'i eshi paashkinenikin.

³³ Ninka nikamoohtawaa hsa kaaTipenciketc ninKishemanitoom minihk iko ke⁠pimaatisiyaan, ci‑ina'amaan e⁠miikwehciwenimak.

³⁴ Taka kaye kaashi naanaakatawentamowak oka minwaapantan, wiin iitok kaaTipenciketc kaa⁠onci minwentamowak.

³⁵ Taka omacitootamook ta⁠nihshiwanaacihcikaniwiwak o'omaa ahkiink, iki kaye kaa⁠maci'ishiwepisiwaatc taka kaawiin awahshime ta‑ayaahsiiwak. Nintahcaahkonk ninka onci nanaahkomaa kaaTipenciketc! Nanaahkomaataa kaaTipenciketc!