Neham 1 - Ojibwe Kihcimasina'ikan

¹ Mii hsa 'owe kaa⁠ishipii'ikaatek wiintamaakewin i'i onci kihci ootena Ninipe (Nineveh) kaakii ishi waapanta'intc Neham (Nahum) wenciitc Elkosh (Elkosh) ecikaatenik.

KaaTipenciketc Kaakii'ishinishki'ikotc Ninipe

² Tepenciketc Kishemanitoo ontentam, ewii nana'ahsaatc i'i e⁠anami'ehtawaanitc manitoohkaana'. KaaTipenciketc hsa tako nishkaatisi ahpii kii⁠nana'ahsaatc kaa⁠nakaashkaakotc. Onana'ahsaa' kaye kaa⁠nishkenimikotc, kaawiin kaye opooni nishki'ikohsii' kaa⁠shiinkenimikotc.

³ KaaTipenciketc hsa kaawiin wahke nishkaatisihsii, wiin kaye aahpici mashkawentaakosi. Awiyan kaa‑anaamentaakosinitc oncitako kaaTipenciketc oka⁠nana'ahsaan. Aaninti hsa piko kaaTipenciketc eshi pimohsetc, mii 'i eshi kihci piitaanimaninik. Wahkwiin ihsa, miiwan ini eh⁠paashkinewepishkiketc.

⁴ Kii⁠kanootank hsa kihcikam, mii 'i eshi paankwaninik. Siipiin kaye otootaanan ci⁠paankwaninikin. I'i hsa Peshan (Bashan) mihshawahkamik tani paahte. I'i kaye kihci waciw Kaarmal (Carmel) ecikaatek tani osaawinaakwan. Inihsh kaye waapikwaniin nehtaa ayaakin i'imaa Lepananink (Lebanon) tani waapicii'aahtewan.

⁵ Kihci waciin hsa wahkawihseniwan enaahsamiitc kaaTipenciketc, kaa⁠pihkwatinaanikin kaye ninkishkaaniwan. Ahkiini wahkawihseni kii⁠naakositc kaaTipenciketc, misiwehkamik kaye, kahkina kaye pemaatisinitc i'imaa eyaanitc ta⁠nininkaanimisiwa'.

⁶ Ahpii tahsh kii⁠nishkaatisitc, awenenan itahsh ke⁠shaapwiinihpan? Awiyan ina otaa shaapwiihkantamini otishkotewi nishkaatisiwin? Osiikinaan iitok ishkotenk enentaakwaninik onishkaatisiwin miihsh ahsinii' eshi piihsihsenitc e⁠ani paashkinehsenitc enaahsamiitc kaaTipenciketc.

⁷ KaaTipenciketc ohsha minwaatisi. Onaatamawaa' opimaatisiima' ahpii kii⁠maanshihsenitc, okanawenimaa' i'i kaa⁠tepweyenimikotc.

⁸ Taapishkoo hsa kaa⁠kihci kishiiciwank kii⁠mooshka'ank mii hsa 'i nahke keshi tetako nihshiwanaaci'aatc kaa⁠shiinkenimikotc. Kaye tahsh otishinisha'waa' i'i kaa⁠shiinkenimikotc eshi kashkiitipihkaninik.

⁹ Aaniin itahsh wa⁠ishi macitootawek kaaTipenciketc? Kika tootaakowaa ohsha ci⁠nihshiwanaatisiyek. Wiin iitok awiyan niishink wiihkaa onakaashkaakohsiin.

¹⁰ Taapishkoo hsa kaa⁠ohko'ootekin kaahshisiin, shoominaapoonk wenci kiiwashkwepiiwaatc, kahkina hsa ta‑ankwaahkisowak taapishkoo kaashi caakitekin kaa⁠paahtekin mashkohsiin.

¹¹ Kiinawaa iitok Ninipe kihci ootenaank eyaayek, i'imaa pemi onciitc inini kaawii macitootawaatc kaaTipencikenitc, kaa‑anoohkiitc noociko ci‑ishihcikewintc.

¹² Miitahsh o'o eninek kaaTipenciketc kiinawaa Isriyal, “Aanawiin e⁠kihci mashkawentaakosiwaatc, e⁠kihci paahtiinowaatc kaye Ahsiiriya (Assyria) ahkiink wenciiwaatc, kahkina hsa ta⁠nihshiwanaaci'aawak kaawiin ta⁠kihkentaakosihsiiwak. Kiinawaa tahsh Coota (Judah) eyaayek, ekiih tootawinakook ci⁠kakwaatakihseyek, kaawiin itahsh miinawaa i'i ninka ishihcikehsii.

¹³ Miitahsh ke⁠tootawinakook ci⁠pooni koohpaaci'inekwaa Ahsiiriya ahkiink wenciiwaatc, kaye tahsh ci⁠piikonamowak sakaapaaneyaapiin kaa⁠tahkopininekwaa.”

¹⁴ Miitahsh o'o kaaTipenciketc enaatc Ahsiiriya ahkiink wenciinitc, “Kaawiin iitok oka ayaawaahsiwaawaa' keni aanihke pimiwitoonitc owiinsowiniwaan. Ninka nihshiwanaaci'imaa' oshihkocikaniwi manitoohkaana' eyaanitc otanami'ewikamikowaank. Ninkwayaancihtaawaanan kaye wa⁠ishi na'inakwaa, kaawiin iitok te'ahpiihtentaakosihsiiwak ci⁠pimaatisiwaatc.”

¹⁵ Inashke weti kihci waciink inaapik, awiya eh⁠piicipahtootc ehpi minwaacimotc, eh⁠piitaatotank pisaan ayaawin. Kiinawaa eyaayek o'omaa Coota ahkiink ciihkahkamikisik, ci‑ishihcikeyek kaakii ishi aayiici ahshotamawekipan kaaTipenciketc. Iki hsa meci'ishiwepisiwaatc kaawiin miinawaa wiihkaa kika pi mawine'okohsiiwaak. Wiinke hsa ko ta⁠nihshiwanaacihcikaniwiwak.