Maarhk 9 - Ojibwe Kihcimasina'ikan

¹ Shikwa tahsh kii'ani ihkito 'a Ciisahs: “Nintepwe eh⁠kanooninakook. Aanint kiinawaa o'omaa kaa‑ayaayek kaawiin ta⁠nipohsiiwak, paanimaa waapantamowaatc i'i Kishemanitoo otipencikewinini pinaakwaninik, kikimashkawisiiwin ci⁠okimaawinitc,” okii'-inaa'.

Pahkaan ekii'-ishinaakositc a'awe Ciisahs wakitatin ekii'-ayaatc

² Paanimaa tahsh nenkotwaahsokonakaanik, Ciisahs okii'-wiiciiwaa' Piitaran (Peter), Ciimisan (James), Cwaanan (John), weti kaaishi kihcipihkwatinaanik ekii'-ishiwinaatc, wiinehtawaa ekii'ani aamaciwewaatc. Miitahsh mekwaa eh⁠kanawaapamikotc, pahkaan kii'‑ishinaakosi a'awe Ciisahs.

³ Wawiinke kii'⁠waahsikonayeso e'⁠ahpiihci waapishkaanikin okikishkikanan. Kaawiin awiya o'omaa ahkiink i'i taa‑ahpiihciwaapishkipiikinikehsii 'iwe kaa'ishi waapishkaanikin Ciisahs okikishkikanan.

⁴ Okii'-waapamaa' itahsh e'⁠naakosinitc Ilaaicawan (Elijah) kaye Moosihsoon (Moses) eh⁠kanoonaanitc ini Ciisahsoon.

⁵ Piitar itahsh okiih kanoonaan Ciisahsoon: “Okihkino'amaake, onishihshin o'omaa e'⁠ayaayank. Taka ninka akawaahte'ikemin. Nihsin (3) ninka oshihtoomin, peshik kiin, kaye Moosihs peshik, kaye peshik Ilaaica.”

⁶ Aaniihsh kiih⁠kwiinawi ihkito, ekiih sekisiwaatc.

⁷ Miitahsh kiihpi ishinaakwanini wahkwi, ekiihpi⁠/aakawishkaakowaatc. Miitahsh i'imaa kaakii'onci noontawimintc awiyan eh⁠kiikitonitc: “Mii wa'a ninKosihs. Ninsaaki'aa. Mii 'awe pisintawihk!” kii'‑inaawak.

⁸ Sesakooc itahsh kii'⁠ayinaapiwak. Kaawiin keyaapi awiyan okii'-waapamaahsiwaawaan, mii ehta Ciisahsoon kaa⁠wiiciiwikowaatc.

⁹ Paanimaa tahsh mekwaa e'⁠niihsaciwewaatc, weweni okii'-aayiisomaa' Ciisahs i'i nihsin okihkino'amawaakana': “Keko awiya wiintamawaahkek i'i kaa'⁠waapantamek, paanimaa kiih⁠kiiwepimaatisiyaan, niin Inini oKosihsan e'⁠aawiyaan,” kii'‑ihkito.

¹⁰ Miitahsh okii'-nana'ihtawaawaan i'iwe kaa'⁠ikowaatc, wiinawaa tahsh iko okiih tashintaanaawaa, wekonen itahsh o'owe kaa'⁠itaminitc Ciisahsoon, “Ninka kiiwepimaatis,” e'⁠ihkitonitc.

¹¹ Okiih kakwecimaawaan itahsh: “Iki kaa⁠kihkino'amaakewaatc i'i Coowa' otoonahshowewinini ihkitowak o'o: ‘Ahkawe nihtam tapi takohshin a'a Ilaaica. Aaniihshwiin oko wenci ihkitowaatc?’ ” okii'-inaawaan.

¹² Okii'-nahkwehtawaa' itahsh Ciisahs: “Tepwe kii'‑inahteni 'awe Ilaaica nihtam ci⁠takohshink ci⁠waawenahtootc kahkina kekoon. Aaniin tahsh enentamek i'iwe niin e'⁠ishipii'ikaasoyaan, Inini oKosihsan ciwiih kakwaataki'imintc ci⁠aanawenimimintc e'⁠ihkitoomakahk?

¹³ Kiwiintamawininim itahsh, aasha tepwe kiih⁠pitakohshin a'a Ilaaica. Wekonen iko kaa'⁠inenimintc kiih⁠tootawaa. Mii'iwe mayaa kaa'⁠ishipii'ikaatenik ekiih tashimintc,” okii'-inaa'.

Ekiih pimaaci'aatc Ciisahs peshik kwiiwisenhsan kaa⁠kikishkawaanitc maciahcaahkwan

¹⁴ Ahpii tahsh kaahpi otihsaawaatc i'i kotak kihkino'amawaakana', okii'-waapamaawaa' ekii'-waahkaashkaakonitc kihciniipiwa' kaa⁠maamawenonitc, i'i kaye kaa⁠kihkino'amaakenitc Coowa' otOonahshowewinini ekiih kakwe shaakoosomikonitc.

¹⁵ Ahpii tahsh e'⁠waapamikotc Ciisahs i'i kaa⁠maamawenonitc, kiih⁠ciihkentamohsewa', kii'⁠ahpa'itiwa' kahkina, ekiihpi pooshoo'ikotc.

¹⁶ Ciisahs itahsh okiih kakwecimaa' okihkino'amawaakana': “Wekonen i'i kaa'ishi kanoonekwaa?” okii'-inaa'.

¹⁷ Peshik itahsh i'i kaa⁠ohkwenonitc okii'-nahkwehtaakoon: “Okihkino'amaake kitaanawiih piitamawin ninkosihs eh⁠kikishkawaatc maciahcaahkwan tino kaanihtaa weshkaakohsik.

¹⁸ Piko aanti e'⁠otihsikotc, opankihshimikoon. Piihtewitoone kaye mamaatweyaapiteshkaa e'⁠ocipinikoshkaakotc. Nintaanakiih kakwecimaak iki kikihkino'amawaakanak ci⁠saakicinisha'amawaawaatc ini maciahcaahkwan. Okiih pwaanawi'aawaan itahsh,” otikoon.

¹⁹ Okiih kanoonaa' itahsh Ciisahs: “O'omaa kahkina eyaayek! Etatawe kaawiin kinihtaa tepweyentansiim! Kaanaka naa minihk ke⁠wiiciiwinakookipan cipwaa maacii tepweyentamek? Kaanaka naa minihk ke⁠shashiipeniminakook? Taka piitamawihshik a'a kwiiwisenhs,” okii'-inaa'.

²⁰ Miitahsh kaa'ishi piinaawaatc ini kwiiwisenhsan. Ahpiihsh wiyaapamaatc a'a maciahcaahk ini Ciisahsoon, shemaak okii'-ocipinikoshkawaan ini kwiiwisenhsan. Miitahsh kaa'ishi kawihsenitc ekiih tihtihtipipani'onitc ekiih piihtewitoonenitc.

²¹ Miitahsh Ciisahs okiih kakwecimaan ini weniicaanihsinitc: “Aanahpii 'i wenci ishiayaatc?” okii'-inaan. Miitahsh kaa'⁠ikotc: “Ahpane ko wenci apinoonciishiwitc.

²² Niipiwa'aank okii'-ahpakinikoon i'imaa ishkotenk kaye i'imaa nipiink ewii nihsikotc. Kiishpin itahsh kiin kekoon kashkihtooyan, kitimaakenimihshinaam, wiici'ihshinaam!” ihkitowan ini ininiwan.

²³ Ciisahs itahsh okii'-inaan: “Kiishpin kiin kashkihtooyan kitinin! Awiya tepweyenimaatc Kishemanitoon, kahkina kekoon ta⁠kashkihcikaateni,” kii'‑ihkito.

²⁴ Shemaak kiih⁠kishiiwe a'a wekosihsitc e'⁠ihkitotc: “Nintepweyenimaa! Wiici'ihshin onsaam pankii eh⁠tepweyenimak!” kii'‑ihkito.

²⁵ Miitahsh e'⁠waapamaatc Ciisahs maamaw ehpiicipa'itinitc i'i pemaatisinitc, okiih kihcikanoonaan ini maciahcaahkwan: “Kiin nehtaawe'iwehsiwan kaye kekii pihte'iweyan maciahcaahk! Oncinakash a'a kwiiwisenhs kitinin! Keko miinawaa wiihkaa pi⁠kikishkawaahken!” okii'‑inaan.

²⁶ Miitahsh kiih⁠kishiiwe a'a maciahcaahk, ekii'-ahpiihci ayocipinikoshkawaatc ini kwiiwisenhsan. Okii'-nakanaan itahsh. Taapishkoo tahsh ekii'-nipotc kii'‑ishinaakosi a'a kwiiwisenhs. Miitahsh kaa'⁠ihkitowaatc niipiwa': “Aasha nipo,” kii'‑ihkitowak.

²⁷ Ciisahs itahsh okiih sakinihkenaan ekiih pasikwii'aatc ini kwiiwisenhsan. Miitahsh kaa'ishi niipawinitc.

²⁸ Ahpii tahsh kaah⁠piintiketc Ciisahs i'imaa waahkaa'ikanink, nihshihke okiih kanoonikoo' okihkino'amawaakana': “Aaniihsh niinawint kaa'onci kashkihtoohsiwaank ci⁠saakicinisha'amawankitc a'a kwiiwisenhs ini maciahcaahkwan?” okii'-ikoo'.

²⁹ Miitahsh okii'-inaa': “Ono tino maciahcaahkwan kaawiin awiya otaa kashki'aahsiin ci⁠saakicinisha'waatc; mii ehta anami'ehtawaatc Kishemanitoon kekiionci saakicinisha'waatc awiya ini maciahcaahkwan,” kii'‑ihkito.

Miinawaa ekii'-wiintank keishi nipotc 'awe Ciisahs

³⁰ Miitahsh i'imaa kaa'anionci maacaawaatc ekii'ani shaaposhkaawaatc Kaalaliiwi ahkiink (Galilee). Kaawiin itahsh kii'‑inentansii awiya ci⁠kihkentaminitc.

³¹ Aaniihsh okiih kihkino'amawaa' i'i okihkino'amawaakana' e'⁠inaatc: “Niin Inini oKosihsan ninkaishi pakitinikoowis ci⁠tahkoniwaatc ininiwak, kaye ninka nihsikook. Miitahsh kii⁠nihsokiishikwakaak miinawaa ninka kiiwepimaatis,” okii'-inaa'.

³² Wiinawaahsh wiin kaawiin kii'⁠nihsitohtansiiwak i'i kaakii'-itank. Kiih⁠shaakwenimowak itahsh ekii'onci manaasomaawaatc.

Ekii'-wiintamawaatc okihkino'amawaakana' awenen nawac ke⁠niikaanentaakositc

³³ Weti tahsh kiih⁠pitakohshinook ootenawenhsink, Kaparniyam (Capernaum) e'⁠ishinihkaatenik. Miitahsh ekiih piintikewaatc i'imaa waahkaa'ikanink, okiih kakwecimaa' Ciisahs i'i okihkino'amawaakana': “Wekonehsh kaahpi tashintamek kiihpi pimohseyank?” okii'-inaa'.

³⁴ Kaawiin tahsh inkotano kii'‑ihkitohsiiwak. Mii aaniihsh i'i kaakiih tashintamowaatc, awenen nawac a'a ke⁠niikaanisitc, ekiih kakweshaakoosontiwaatc.

³⁵ Miitahsh kaa'ishi onapitc, ekii'-antomaatc Ciisahs i'i kaa⁠mitaahshiniishinitc. Miitahsh kaa'⁠inaatc: “Awiya wii'⁠niikaanentaakositc, maamaw otaanaank ta⁠inenintiso, kahkina awiya' oka anohkiihtawaa',” okii'-inaa'.

³⁶ Miitahsh kaa'ishi sakinihkenaatc apinoonciishan, e'⁠inaatc itahsh i'i okihkino'amawaakana':

³⁷ “Awenen iko ke⁠wiici'aatc peshik o'o apinoonciisha', niin onci e'onci ishihciketc, mii peshikwan keniin e'ishi wiici'itc. Awenen ihsa waaci'ikwen, kaawiin niin ehta niwiici'ikohsii, iniweniwan ihsa owiici'aan Kishemanitoon, miiwan ini kaapi ishinisha'onitc,” okii'-inaa'.

A'awe ekaa kaakakwe kipihtinihsinowank kiwiici'ikonaan e'⁠ihkitotc

³⁸ Miitahsh kaa'ishi kanoonikotc ini Cwaanan (John): “Okihkino'amaake, ninkii'-waapamaanaan peshik inini eh⁠saakicinisha'amawaatc maciahcaahkwa' awiya', kiin e'⁠ahpimotc kitishinihkaasowin. Intawaahsh ninkii'-onci'aanaan, aaniihsh kaawiin kipapaawiiciiwikohsiinaan,” okii'-ikoon.

³⁹ Ciisahs itahsh o'owe okii'-inaan: “Keko onci'aahkek. Awiya kaakii'ishi maamahkaacihciketc niin e'⁠ahpimotc nintishinihkaasowin, kaawiin wiipa ninka macitashimikohsii.

⁴⁰ A'awe hsa wiin awiya ekaa kaa⁠kakwekipihtinihsinowank, kiwiici'ikonaan.

⁴¹ Tepwe kitinininim, awenen iko ke⁠mina'inowekwen peshikominihkwaakan nipi, eh⁠kihkeniminek niin Kishemanitoo oPimaaci'iwewininiiman kaa⁠piminisha'oyek, e'onci ishihciketc, ta⁠tipa'amawaa kehcinaac.”

Kakweci'ikoowin eh⁠tashintank a'awe Ciisahs

⁴² “Shikwa kiishpin awiya macitootamo'aatc peshik onoweniwa' kaa‑akaahshiinshinitc kaa⁠tepwehtawinitc, nawac taa⁠onishihshin kaa⁠mihcaapihkisinitc ahsiniin ci⁠tahkopicikaniwinihpan ohkwekanink ci⁠pahkopiiwepinikaniwihpan kihcikamiink, ahpiihc wiin ci⁠macitootamo'aatc apinoonciishan.

⁴³ Kiishpin wenci macitootamo'ikowanen 'iwe kaa⁠inaapacihtooyan kininc, kiishkata'an! Nawac taa⁠onishihshin napaneninciiyampan ci⁠otihtaman pimaatisiwin ke⁠pooni ayaahsinok, ahpiihc wiin niishoninciiyan ci‑ishaayampan maci ishkotenk, i'iwe ekaa wiihkaa iyaahtawehsinok.

⁴⁵ Kiishpin kaye wenci macitootamo'ikowanen kisit kaa⁠inaapacihtooyan, kiishkishan! Nawac taa⁠onishihshin ci⁠maahkihseyan, ci⁠otihtaman i'i pimaatisiwin wiihkaa ke⁠pooni ayaahsinok, ahpiihc wiin minciniish ci⁠ayaayampan kisitan ci⁠ahpakinikooyan i'imaa maci ishkotenk.

⁴⁷ Kiishpin kaye wenci macitootamo'ikowanen kishkiinshik kaa⁠inaapacihtooyan, kicaapiwepa'otison! Nawac taa⁠onishihshin peshikwahk ehta kishkiinshik, ci⁠otihtaman Kishemanitoo entashi okimaawitc, ahpiihc itahsh wiin niishoshkiinshikweyan ci⁠ahpakinikooyampan i'imaa maci ishkotenk,

⁴⁸ i'imaa wiihkaa eshi nipohsinik i'i oohkwe' kaa⁠panaaci'ikotc awiya, kaye wiihkaa kaaishi aahtawehsinok ishkote kaa⁠caakisokotc,” kii'‑ihkito.

⁴⁹ Shikwa kii'‑ihkito: “Kahkina pakitinaahsowinan shiiwihtaakana'ikaatewan keonci pehkahkin keonci otaahpinikaatekin. Miitahsh peshikwan kahkina awiya eshinaakwaninik kakwaatakihtoowin ci⁠otihsaapantank taapishkoo ishkoteni eh⁠pehki'ikotc.

⁵⁰ “Onishihshin i'i shiiwihtaakan. Kiishpin itahsh wii'⁠aanihsihpokwahk i'i shiiwihtaakan, aaniihsh ke⁠tootamampan miinawaa ci⁠shiiwihtaakanihpokwahkipan? Taapishkoo kaashi minohpokwahk i'i miicim eh⁠shiiwihtaakanihpokwahk, mii'i ishi minowiiciintik entahsopeshikoyek, ci⁠minohseyek,” kii'‑ihkito.