Maarhk 6 - Ojibwe Kihcimasina'ikan

Ekii'-aanawenimikotc Ciisahs owiicionciimaakana'

¹ Kii'anionci maacaa tahsh a'a Ciisahs ekii'-ishaatc i'imaa otayaawinink kaakiih tashiompikitc, ekii'ani wiiciiwikotc ini okihkino'amawaakana'.

² Miitahsh ekii'-ishikiishikahk kaa⁠otAnwepiiwi kiishikanohkewaatc iki Coowak, kii'⁠maaciikihkino'amaake Ciisahs i'imaa Coowa' otanami'ewikamikoniink. Niipiwa' itahsh i'imaa kii'⁠ayaawak. Kahkina tahsh awiya okii'-maamahkaasihtawaawaan ini Ciisahsoon, e'⁠ihkitowaatc: “Aaniinti naa wentinank wa'a inini ono kekoonan? Wekonen tino kakiihtaawentamowin kaa⁠miinintc? Ina kaa‑ahpiihci maamahkaacihciketc!” kii'‑ihkitowak.

³ “Kaawiin ina mii wa'a mihtikonaape, kaa⁠okosihsimikotc Meriin (Mary)? Mii wa'a kaa⁠ohshiimenshitc Ciimisan (James), Coosihsan (Joses), Cootahsan (Judas), Saayimanan (Simon). Kaawiin ina kaye mii wa'a otawemaa' kaa⁠wiiciayaamankwaa o'omaa ootenawenhsink?” kii'‑ihkitowak. Miitahsh i'i kaawiin okiiwii'-otaahpinaahsiwaawaan.

⁴ Miitahsh kaa'⁠ihkitotc Ciisahs: “Awiya otipaacimo Kishemanitoon kaa⁠kanootamawaatc omacenimikoo' owiicionciimaakana' ehta, kaye otinawemaakana', iniweniwa' kaye kaa⁠wiiciyayaamikotc. Pahkaan awiyan otishpenimikoon,” kii'‑ihkito.

⁵ Kaawiin i'imaa okiih kashkihtoohsiin kihcianohkiiwin ci⁠tootank, mii ehta ci⁠mihci ishininciinitc pankii awiya' e'⁠aahkosinitc, ekii'-minoayaa'aatc.

⁶ Kii'⁠maamahkaatentam itahsh awiyan ekiih tepweyenimikohsik. Miitahsh i'i kiih⁠papaaishaa i'imaa ootenawenhsan ekiih kihkino'amaaketc.

Ekii'-maacinisha'waatc Ciisahs neniishin i'i mitaahswahshiniishin okihkino'amawaakana'

⁷ Okii'-antomaa' i'i kaa⁠mitaahshiniishinitc okihkino'amawaakana', ekii'-maacinisha'waatc ekii'-neniishinitc, ekii'-inaahkonaatc ci⁠shaakooci'aanitc maciahcaahkwa'.

⁸ Okii'-inaa' itahsh: “Keko kekoon pimiwitoohkek e'⁠maacaayek, mii ehta sahka'onan. Kaawiin kaye pahkweshikan, kaawiin kaye pakohsencikewipiina'ikan.

⁹ Kika kikahkisinem itahsh. Keko tahsh niishwekihkonayehkek. Eshi'⁠oyek ehta ko ishi maacaak,” kii'‑ihkito.

¹⁰ Mii 'o kaye kaa'⁠inaatc: “I'imaa keishi kiiyooteyek waahkaa'ikanink, mii'imaa peshikwan ayaak piinihsh i'imaa cionci maacaayek ootenaank.

¹¹ Kiishpin itahsh inkoci ani takohshinek otaahpinikoohsiwek, nehpicipisintaakoohsiwek, inkoci 'imaa onci ishaak. Paahpaawisitehshimoonok cionci kihkentamowaatc e'⁠wanitootamowaatc,” okii'-inaa'.

¹² Miitahsh kaa'ishi maacaawaatc iki kihkino'amawaakanak, ekii'ishi kakiihkwewaatc, i'i pemaatisinitc ci⁠kwehkaatisinitc.

¹³ Miitahsh niipiwa' okiih saakicinisha'amawaawaa' maciahcaahkwa' awiya', ekiih poosinaawaatc kaye niipiwa' kaa‑aahkosinitc ekii'-minoayaa'aawaatc.

Cwaan Siika'antaakewinini ekii'-nihsaakaniwitc

¹⁴ A'a tahsh Herat (Herod) kihciokimaa okii'-noontaan eh⁠papaamimimintc ini Ciisahsoon. Aanint kii'‑ihkitowak: “Mii nankwana wa'a Cwaan (John) Siika'antaakewinini ekiih kiiwepimaatisitc. Mii maawiin i'imaa wentinamokwen ci⁠maamahkacihciketc,” kii'‑ihkitowak.

¹⁵ Aanint tahsh wiin kii'‑ihkitowak: “Mii wa'a Ilaaica (Elijah).” Aanint kaye kii'‑ihkitowak: “Mii wa'a peshik otipaacimo peshikwan e'⁠ishinaakositc iki weshkac kaakiih-kanootamawaawaakopanen Kishemanitoon,” kii'‑ihkitowak.

¹⁶ Ahpii tahsh e'⁠noontank a'awe Herat, kii'‑ihkitoo: “Mii wa'a Cwaan Siika'antaakewinini kaakiih kiishkikweta'wak. Kiih⁠kiiwepimaatisi kehcinaac!” kii'‑ihkito.

¹⁷ Wiin aaniihsh Herat kii'⁠anoohkiipan ci⁠tepipinimintc ini Cwaanan kaye ci⁠tashimamaancikwahpisonitc kipaahkwa'otiiwikamikonk ci⁠ayaanitc. Mii hsa 'owe kaakii'onci ishihciketc Herat, ci⁠minwentaminitc ihkwewan Hirootiyahs (Herodias) kaa⁠ishinihkaasonitc. Aaniihsh mekwaa okii'-wiitikemaan. Wa'a tahsh ihkwe aasha kii'⁠onaapemi ini Pilapoon (Philip), miiwan ini wiicihkiweyan a'a Herat.

¹⁸ Cwaan itahsh okii'-inaapaniin ini Heratan: “Kaawiin inahtehsinoon kiicihkiwe owiitikemaakanan ci⁠wiiciyayaamatipan,” okii'-inaan.

¹⁹ A'a tahsh ihkwe, mii 'awe Hirootiyahs, okiionci nishkenimaan ekiiwii'-nihsaac ini Cwaanan. Kaawiin itahsh okiih kashkihtoohsiin.

²⁰ A'awe aaniihsh Herat okiih kohsaan ini Cwaanan, ekiih kihkenimaatc kwayahk e'⁠ishiwepisinitc, kaye e'⁠onakimikonitc ini Kishemanitoon. Mii'i kaa'ishi kanawenimaatc. Okii'-minohtawaan ini Cwaanan eh⁠pisintawaatc. Ahpii tahsh iko e'⁠noontawaatc, kii'⁠mikoshkaatentam.

²¹ Inkotink itahsh kii'ani kashkihcikaateni 'iwe kaa⁠mihsawentank a'a ihkwe. Inkotink eh⁠kiishikaninik Herat kii'⁠wiihkwanke eh⁠tipishkank. Miitahsh ekii'-wiihkwamaatc iniweniwa' kaa⁠niikaanentaakosinitc okimaawiwinink, kaye shimaakanihshiiwikimaa', iniweniwa' kaye kaa⁠niikaanentaakosinitc Kaalaliiwi ahkiink (Galilee).

²² Hirootiyahs itahsh otaanihsan kiihpi piintikewan ekii'-niimihtawaanitc, ekii'-minwentami'aanitc ini Heratan, iniweniwa' kaye kaakii'-wiihkwamimintc. Miitahsh kaa'⁠inaatc a'a Herat ini oshkiniikihkwen: “Wekonen iko mehsawentaman kakwecimihshin, kika miinin,” kii'‑ihkito.

²³ Shikwa tahsh kiih⁠kihciahshotamaake, ekii'-ahpimotc Kishemanitoon: “Wekonen iko ke⁠kakwecimiyan kika miinin, impooshke kakwecimiyan aapihta kaa⁠tipentamaan kika miinin,” okii'-inaan.

²⁴ Miitahsh kaa'ishi saaka'ank a'a oshkiniikihkwe, ekii'awi kanoonaatc ini omaamaan: “Wekonen ke⁠kakwecimak?” okii'-inaan. Miitahsh kaa'⁠ikotc: “Cwaan Siika'antaakewinini ohtikwaan, mii'iweni kakwetwen,” okii'-ikoon.

²⁵ Miitahsh weyiip kaa'ishi naasihkawaatc ini kihciokimaan e'⁠inaatc: “Shemaak ninantawentaan i'i Cwaan Siika'antaakewinini ohtikwaan kihcionaakanink ci⁠ahtenik, ci⁠miishiyan,” kii'‑ihkito a'a oshkiniikihkwe.

²⁶ Miitahsh kaa'ishi kihci mincinawesitc a'a kihciokimaa. Kaawiin itahsh kii'‑inentansii ci⁠aanwehtawaatc, ekiih kihciahshotamawaatc ekii'-noontaakotc kahkina iniweniwa' kaakii'-wiihkwamaatc.

²⁷ Shemaak itahsh peshik okii'-antomaan shimaakanihshan ekii'-anoonaatc ci⁠piitoonitc i'i Cwaanan ohtikwaanini. Miitahsh shemaak kaa'ishi ishaanitc weti kipaahkwa'otiiwikamikonk ekii'awi kiishkikweta'waanitc.

²⁸ Miitahsh kaa'ishi piitoonitc i'i ohtikwaanimaa onaakanink, ekii'-miinaanitc ini oshkiniikihkwen. Mii'i kaa'ishi miinaatc omaamaan i'i ohtikwaanimaa, a'a oshkiniikihkwe.

²⁹ Ahpii tahsh kaa'⁠noontaminitc i'i Cwaan okihkino'amawaakana' okiih pinaasihkamini i'i wiiyaw, ekii'-ninkwa'aminitc.

Naanink mitaahswaahk awahshime e'⁠ahshamaatc Ciisahs

³⁰ Iniweniwa' itahsh Ciisahs kaakii'-maacinisha'waahpan kiihpi ishikiiwewa' i'imaa eshi ayaatc, ekiihpi wiintamaakotc kahkina kekoon kaah⁠papaaishihcikenitc, kaye tahsh kaah⁠papaaishikihkino'amaakenitc.

³¹ Miitahsh kaa'-inaatc: “Ampeyohk, inkoci ishaataa kiinehtawint nihshihkeaya'ii ci⁠ayaayank pinamaa ci⁠anwepiyek,” okii'-inaa'. Aaniihsh niipiwa' okiih pinaasihkaakowaa' kaye kii'ani maamaacaawa', ekii'ishi ocaanimahkamikisiwaatc Ciisahs kaye okihkino'amawaakana'. Ampooshke kaawiin kiih⁠tawihsehsiiwak ci⁠wiihsiniwaatc.

³² Miitahsh i'i ciimaanink kaa'ishi maacii'owaatc weti nihshihkeaya'iink ewii'-ishaawaatc wiinehtawaa.

³³ Niipiwa' itahsh okii'-waapamikowaa' e'ani maahkwakomowaatc, ekiih kihkenimikowaatc. Miitahsh kaani ishi pimaashakaamepa'itinitc ekii'-aasihkaakowaat ekii'-onciinitc i'imaa kahkina ootenaank.

³⁴ Ahpii eh⁠pimishakaatc aasha okii'-waapamaa' Ciisahs eh⁠paahtenonitc awiya' kaa⁠pimaawaci'itinitc. Okiih kitimaakenimaa' e'ishi ayaanitc maanahcaanihshink ekaa awiya eh⁠kanawenimikohsinik. Miitahsh kaa'ishi maacii kihkino'amawaatc niipiwa' kekoon.

³⁵ Aasha tahsh e'ani onaakohshininik okiihpi kanoonikoo' okihkino'amawaakana': “Pikwacaya'ii o'omaa, aasha tahsh naacionaakohshin.

³⁶ Taka maaciinisha'o weti eshi pehshowankin ayaawinan kaye ootenawenhsan, ciwii'-ataawewaatc ke⁠miiciwaatc,” okii'-ikoo'.

³⁷ Miitahsh kaa'⁠inaatc: “Kiinawaa ko miinihkook ke⁠miiciwaatc,” okii'-inaa'. O'o tahsh okii'-ikoo': “Aaniin tahsh niinawint keshi ataaweyaankipan a'a minihk pahkweshikan ci⁠ahshamankitwaa? Inkotwaahsokiisihs awahshime taakii'-anohkii awiya ini minihk ci⁠kashki'aahpan shooniyaan,” okii'-ikoo'.

³⁸ Miitahsh kaa'⁠inaatc: “Awi waapamihkook aaniin tahswaahtik pahkweshikan eyaawek,” ihkito. Ahpii tahsh kaah⁠kihkenimaawaatc aaniin minihk eyaawaawaatc okiihpi inaawaan: “Naanan ayaawak, shikwa niishin (2) kinooshek,” ihkitowak.

³⁹ Ciisahs itahsh okii'-inaa' kahkina ci⁠ayoohkwapinitc i'imaa eshi minwashkohsiwaninik.

⁴⁰ Miitahsh kaa'ishi ayoohkwapinitc, aanint neninkotwaahk, aanint nenaanimintana ekiih tetahsopiwaatc.

⁴¹ A'a tahsh Ciisahs okii'-otaahpinaa' i'i naanan pahkweshikana' kaye i'i niishin kinooshe'. Ishpimink itahsh kii'‑inaapi, ekii'-nanaahkomotc, ekiih pahpahkwepinaatc pahkweshikana', ekii'-nenaawinamawaatc okihkino'amawaakana' ci⁠maamaata'oohkiinitc. Kaye ko 'i niishin kinooshe' okii'-nenawinamawaa' ci⁠maamaata'oonimintc entahshinitc.

⁴² Miihsh i'i kahkina kaa'onci tewiihsininitc.

⁴³ Miitahsh kaa'ishi papaa maawantoonamowaatc ishkwancikanan ikiwe kihkino'amawaakanak, pahkeshikana' kaye kinooshe'. Mitaahshiniishin wiikopiimahkahkoon kii'⁠mooshkineniwan.

⁴⁴ Ikiweniwak itahsh kaakii'-wiihsiniwaatc, naanink mitaahswaahk (5,000) kiih⁠tahshiwak iki ininiwak.

Wakicipiik ekii'ishi pimohsetc a'a Ciisahs

⁴⁵ Miihsh i'i shemaak kaa'ishi kanoonaatc okihkino'amawaakana' 'awe Ciisahs: “Mii'i kiinawaa ani ishimaacii'ok. Weti akaamink ootenawenhsink ani ishimishakaak Pehseta (Bethsaida) kaa⁠ishinihkaatek. Paanimaa kaye niin ninkapi ishi takohshin,” okii'-inaa'. Ahkawe tahsh wiin okiih kanoonaa' ini kaa⁠maamawenonitc ciani kiiwenitc.

⁴⁶ Ahpii tahsh kaah⁠pooshoo'aatc, wiinehta kii'‑ishaa eh⁠pihkwatinaanik ekii'awi anami'aatc.

⁴⁷ Ahpii tahsh eni⁠mikiishikaninik aasha mihshawakaam kii'⁠ayaawa' okihkino'amawaakana' i'imaa ciimaanink. Wiin itahsh wiin Ciisahs nihshihke kii'⁠ayaa mihtahkamik.

⁴⁸ Okii'-waapamaa' itahsh okihkino'amawaakana' ekii'-ocaanima'okonitc eh⁠kakwe ashepoyenitc e'⁠oncishkawa'aminitc. Paanimaa tahsh ahpii paataapaninik okii'-naasihkawaa', ekiih pimohsetc wakicipiik ekiiwii'ani mayaashkawaatc.

⁴⁹ Ahpii tahsh kaa'⁠waapamaawaatc e'⁠wakicipiikinaminitc, “Ciipay maawiin a'awe,” kii'‑inentamook, ekiih shaakowewaatc.

⁵⁰ Aaniihsh kahkina okii'-waapamaawaan, kaakii'onci sekisiwaatc. Shemaak itahsh okiih kanoonikowaan Ciisahsoon: “Mashkawite'ek!” okii'-ikowaan. “Niin ohsha! Keko sekisihkek,” okii'-ikowaan.

⁵¹ Miitahsh kaa'ishi poosinotaakowaatc. Mii kaa'ishi kipihtaanimahk. Wiinke tahsh kiih⁠kwiinawi inentamook.

⁵² Kaawiin aaniihsh mahshi okii'-nihsitaawentansiinaawaa 'iwe kaah⁠toocikaniwinitc pahkweshikana', onsaam ekiih petentamowaatc.

Kenehsaritink otaahkosiik ekiih pimaaci'aatc Ciisahs

⁵³ Mii hsa kaa'ishi aashawa'amowaatc, ekii'ishi mishakaawaatc ahkiink Kenehsarit (Gennesaret) e'⁠ishinihkaatek, ekiih kihciwaahkwahpitoowaatc ociimaaniwaa.

⁵⁴ Piciinak iko eh⁠kapaawaatc okii'-nihsitaawinaakoo' Ciisahs i'i pemaatisinitc.

⁵⁵ Misiwe ayaawinink awiyak okiih papaa ishi naacipa'aawaa' otaahkosii' ehpi ishiwinaawaatc otahpihshimoniniink eh⁠pimihshininitc i'imaa e'⁠noontamowaatc Ciisahsoon e'⁠ayaanitc.

⁵⁶ Miitahsh aanti ko kaa'⁠ishaatc Ciisahs, ootenawenhsink kaye kihciootenaank, kaye ohpimeya'ii, okii'ishi pimihshimaawaa' otaahkosii' i'imaa entashi ataawenk. Shikwa tahsh okiih pakohsenimaawaan Ciisahsoon: “Taka oka mihcisaaminaanaawaa wanahkwek kikikishkikanink,” okii'-inaawaan. Awenenak itahsh iko kaah⁠saaminank wawiinke kii'⁠minoayaawak.