Maarhk 4 - Ojibwe Kihcimasina'ikan

E'⁠aawehcikaaketc okihtiken

¹ Miinawaa tahsh kii'⁠maaciikihkino'amaake a'a Ciisahs i'imaa ciikipiik Kaalaliiwi Saaka'ikaniink (Lake Galilee). Miitahsh kaa'ishi maawaci'itinitc kehcipaahtiinonitc i'imaa e'⁠ayaatc, ekii'onci poositc ciimaanink. Mii kaa'ishi onapitc ekii'-akomotc ciikakaam. I'imaa tahsh kahkina kii'⁠ayaawa' i'i piyaahtiinonitc mihtahkamik eh⁠koahkiiwaninik.

² Niipiwa' itahsh kekoonan okii'onci wiintamawaa' e'⁠aawehciketc. Miitahsh ekiih kihkino'amaaketc okii'-inaa':

³ “Inashke pisintamohk! Aapitink kii'-ishaa peshik kihtikewinini ekii'awi sasiihswewepinank kihtikaanenhsan.

⁴ Eh⁠sasiihswewepinank kihtikaanenhsan, kiih⁠pankihsinoon aanint i'imaa kaaishi mashkawamok miihkanenhs. Pinehshiinshak itahsh i'imaa kiihpi poonihsewak ekii'-anikitaawaatc.

⁵ Shikwa aanint kaye kii'ishi pankihsinoon ini kihtikaanenhsan i'imaa shooshkwaapihkaank ehpi pakahkamikaanik. Shemaak itahsh kiih⁠pisaakahkiiwan. Aaniihsh kaawiin kiih⁠kipakahkamikaahsinoon.

⁶ Ahpii tahsh eni ishpakoocink kiisihs, kii'ani paahtewan, kii'ani papiihkwaahkwatooshkaawan. Pankii aaniihsh ehta kii'⁠ociipihkowanoon.

⁷ Shikwa aaninta kaye kii'ishi pankihsinoon ini kihtikaanenhsan i'imaa okaawiminakishiik kaashi nihtaawikiwaahpan. Ahpii tahsh miinawaa eshi saakahkiiwaatc oko okaawiminakishiik, okii'-wanaahtoonaawaan ini kaakiih kihtikaatenikin. Miitahsh kaawiin kiih⁠kiishi nihtaawikihsinoonan, kaawiin kaye miinawaa kihtikaanenhsan kii'onci nihtaawikihsinoonan i'imaa.

⁸ Shikwa aanint kaye kiih⁠pankihsinoon i'imaa eshi onishihshink ahki. Miitahsh kiih⁠saakahkiiwan, piinihsh kaye kii'ani kiishikinoon; kaye keyaapi kii'onci nihtaawikinoon kihtikaanenhsan, piinihsh aanint nihsimitana tahsin kii'onci nihtaawikinoon, kaye aanint ninkotwaahsimitana, kaye aanint ninkotwaahk tahsin kii'onci nihtaawikinoon entahsink,” kii'‑ihkito.

⁹ Shikwa tahsh okii'-inaa': “Taka pisintamohk, minihk wehtawakaayek,” kii'‑ihkito.

Owiintaan i'iweni wekonen wenci aawehciketc

¹⁰ Ahpii tahsh nihshihke kaa'‑ayaawaatc kaakii'-wiiciiwikotc, maamaw i'i mitaahshiniishin okihkino'amawaakana', okiih kakwecimikoo' aaniin keishi nihsitohtaakwaninikipaniin ini aawehcikanan.

¹¹ O'o tahsh okii'-inaa': “Kiinawaa kikihkentamo'ikowaa Kishemanitoo kaa⁠sanakaninikin kekoonan kaakiih kihkentaakwahsininikipaniin, mii'iweni Kishemanitoo oTipencikewin entashintenik. Ikiweniwak itahsh ekaa kaa⁠wiiciiwihsinowankwaa, kahkina kekoon aawehcikanink ishikihkino'amawaawak.

¹² Mii 'owe kaaonci ishihcike'intwaa: ‘Mihsawaa hsa ko aana waawaapantamowaatc, kaawiin oka nihsitaawentansiinaawaa. Shikwa, mihsawaa hsa ko aana naanoontamowaatc, kaawiin ta⁠nihsitohtansiiwak. Kiishpin nihsitohtamowaahpan otaa pikiiwenotawaawaan Kishemanitoon, miitahsh cikii poonentamaakowaatc,’ ” kii'‑ihkito.

Weweni owiintaan Ciisahs i'iweni kaaishi aawehcikaaketc okihtiken

¹³ Shikwa tahsh okii'-inaa': “Kaawiin ina kinihsitohtansiim? Aaniin tahsh kekii'onci nihsitohtamekipan kahkina ini aawehcikanan kiishpin nihsitohtansiwek o'o peshik aawehcikan?

¹⁴ A'a kihtikewinini, mii kaa⁠icikaasotc awiya eh⁠papaawiintank Kishemanitoon otipaacimowinini.

¹⁵ Inashke aaninta awiyak taapishkoo ishi ayaawak i'iwe kaaishi mashkawamok i'imaa kihtikaanenhsan e'ishi pankihsinkin. Onoontaanaawaa 'iwe Kishemanitoon otipaacimowinini. Piciinak itahsh e'⁠noontamowaatc, opi otaahpinamaakowaan ini Setanan (Satan) ci⁠waniihkewaatc i'i kaakii'-noontamowaatc tipaacimowin.

¹⁶ Shikwa aaninta awiyak inentaakosiwak taapishkoo kihtikaanenhsan eh⁠pankihsinkin i'imaa eshi pi pakahkamikaak eh⁠shooshkwaapihkaak. Kii⁠noontamowaatc tipaacimowin, shemaak iko otootaahpinaanaawaa e'⁠moocikentamowaatc.

¹⁷ Miitahsh taapishkoo kaa⁠nihtaawikinkin e'⁠ociipihkaawansinokin, kaawiin kinwesh ayaahsiiwak. Acina ehta tepwehtamook. Paanimaa tahsh otoonci mikoshkaaci'ikowaan awiyan komaa kaye otoonci kakwaataki'ikowaan ekii'-otaahpinamowaatc Kishemanitoon otipaacimowinini. Miitahsh weyiip iko ishi pakiciiwak.

¹⁸ Shikwa aanint taapishkoo ishi ayaawak ekii'ishi pankihsinkin kihtikaanenhsan i'imaa ahkiink eshi okaawiminakishiihkaak. Otaana noontaanaawaa Kishemanitoon otipaacimowinini.

¹⁹ Otoonsaamentaanawaan itahsh ono kekoonan o'omaa ahkiink kaa/⁠ayaanikin, kaye ominwentaanaawaa wenootisiwin, kaye pahkaan kekoonan onanaantawentaanaawaan. Mii hsa ono kekoonan kaa⁠wanaa'ikowaatc ekaa ci⁠papaamihtansikwaa Kishemanitoon otipaacimowinini, miitahsh kaawiin kekoon ta⁠onciimakahsinoon.

²⁰ Aanint itahsh ishi/ayaawak taapishkoo ekii'ishi pankihsinkin kihtikaanenhsan i'imaa eshi minohkamikaak. Miiwak oko kaa⁠noontamowaatc i'i Kishemanitoon otipaacimowinini, e'⁠otaahpinamowaatc kaye. Miitahsh e'ani piicinishkaawaatc, taapishkoo kaa⁠nihtaawikinkin e'⁠ishinaakosiwaatc i'imaa keyaapi kaa⁠nihtaawikinkin kihtikaanenhsan, aanint nihsimitana (30) tahsin, aanint kaye ninkotwaahsimitana (60) tahsin, aanint kaye ninkotwaahk (100) tahsin, mii'i eshinaakosiwaatc,” kii'‑ihkito.

Ekii'-aawehcikaaketc waahsahkonencikan ci⁠shekonikaatehsinok

²¹ Shikwa tahsh kii'ani ihkito Ciisahs: “Awiya piintikatootc waahsahkonencikan, oka/⁠animihkohshimaan ina ahtoopaanahkihkwan ci⁠kaatootc? Shiipaanipewinaahk ina okashi shekonaan? Kaa maawiin. Inwaate aaniihsh ci⁠akootekipan waahsahkonencikanaahtikonk.

²² Kahkina kekoon kaa⁠kaacikaatek, mii'iwe piciinak ci⁠mohsheyaapancikaatek. Shikwa kiishpin aanakii'-aakwana'ikaatekipan kekoon, mihsawaa ta⁠naakwan waahseyaank.

²³ Minihk wehtawakaayek, weweni pisintamohk!” kii'‑ihkito.

²⁴ Shikwa tahsh okii'-inaa': “Ayaankwaamentamohk o'o kaa⁠pisintamek. I'iwe inaahkonikewin keonci tipaahkonekwaa kiicipimaatisiiwaak, amii'iwe peshikwan inaahkonikewin kekiinawaa keonci tipaahkoninek Kishemanitoo, kaye awahshime kika inakintamaakowaa.

²⁵ A'awe hsa kaa⁠mino/aapacihtootc 'iwe kaa⁠nihsitohtank, mii'awe keyaapi ke⁠miinintc nihsitohtamowin. A'awe tahsh kaa⁠manaa/⁠aapacihtootc 'iwe kaa⁠nihsitohtank, ampooshke ta⁠otaahpinamawaa 'i minihk aanakii'-nihsitohtankipan,” kii'‑ihkito.

E'⁠aawehcikaaketc kihtikaanenhs eshi maaciikik

²⁶ O'o tahsh kaye kii'ani ihkito: “Mii hsa 'owe eshi ayaanik Kishemanitoo oTipencikewin, taapishkoo awiya inini i'imaa e'⁠ahpakitootc kihtikaanenhsan ahkiink.

²⁷ Nipaa eh⁠tipihkaninik, wanishkaa eh⁠kiishikaninik. Piinihsh iniwe kihtikaanenhsan ani saakahkiiniwan, e'ani nihtaawikininikin, aanawiin eh⁠kihkentansik a'a inini aaniin eshi maaciikinkin.

²⁸ Tipinawe aaniihsh o'o ahki nihtaawikihcikemakan, nihtam e'ani mashkohsiwank, piinihsh e'ani niiskanakihkink, miitahsh piinihsh eh⁠kiishikik.

²⁹ Ahpii tahsh kaah⁠kiishikik, miitahsh weyiip eshi kiishkishiketc inini, aaniihsh mii 'o ahpii ci⁠maawacihciketc,” kii'‑ihkito.

Ekii'-aawehcikaaketc maawac kaa/⁠akaahsink kihtikaanenhs

³⁰ Shikwa kaye kii'‑ihkito Ciisahs: “Wekonehsh miinawaa ke⁠wiintamawinakookipan ci⁠kihkentamooninakook Kishemanitoo otipencikewin? Wekonehsh tino pahkaan aawehcikan keonci waapanta'inakookipan aaniin i'i eshinaakwahk?

³¹ Mii 'owe eshinaakwahk: taapishkoo 'iwe peshik kihtikaanenhs, 'iwe maawac kaa/⁠akaahsink o'omaa ahkiink kaa⁠pakitinikaatek kihtikaanenhs.

³² Mii hsa 'o kaaonci piicinikik o'o maawac kaa⁠mihcaahkwahk, ini tahsh wiin kahkina kaa⁠mihcipimiayaamakahkin. Kihcimamaankatihkwanakisi. Iki tahsh pinehshiinshak pi ishiwasihswanihkewak eshi akawaahtenik,” kii'‑ihkito.

³³ Niipiwa' ihsa ono tino aawehcikanan okii'ishi wiintamawaa' 'iwe Kishemanitoon otipaacimowinini, minihk ihsa kaaishi kashkihtoonitc ci‑ishi nihsitohtaminitc.

³⁴ Aawehcikewinink ehta okii'onci kakanoonaa'. Ahpii tahsh e'⁠nihshihkeayaawaatc okii'-nihsitohtamoonaa' kahkina kekoon i'i okihkino'amawaakana'.

Ciisahs ekiih kipihtinank kihcinootin

³⁵ Miitahsh i'i peshikwan eh⁠kiishikaninik, ahpii wenaakohshininik, okiih kanoonaa' i'i okihkino'amawaakana': “Haw ihsa ishaataa weti akaamink,” okii'-inaa'.

³⁶ Miitahsh i'i kaa'ishi nakanaawaatc i'i miyaamawenonitc, ekii'ishi maacii'oonaawaatc Ciisahsoon i'imaa kaakii'ishi namatapinitc piintoonak. Pahkaan itahsh kaye kii'⁠ayaawan ciimaanan kaa⁠wiita'oomikotc.

³⁷ Miitahsh ketahto kiih⁠kihcipakamaaniman ekiih kihcimamaankaashkaanik itahsh, kiih⁠saahsiika'okowak ekii'ani mooshkinepiik i'i ciimaan.

³⁸ Wiin itahsh Ciisahs i'imaa kiih⁠tashinipaa otaahkaanink, ahpapiwinink ekii'-ahpihkwehshink. Miitahsh okii'-aamaci'ikoo' e'⁠ikotc: “Okihkino'amaake! Kaawiin ina kiwiih papaamentansiin ewii'-nihsaapaaweyank?” okii'-ikoo'.

³⁹ Miitahsh kaa'ishi wanishkaatc. Okiih kishiikanootaan nootin, kaye okiih kanootaan i'i nipi: “Mii'i minihk! Mii'i keshi aanwaahtink!” okii'-itaan. Miitahsh kaa'ishi kipihtaanimaninik, wiinke kaye kaa'ishi aanwaayaashkaanik.

⁴⁰ O'owe tahsh okii'-inaa' Ciisahs okihkino'amawaakana': “Aaniihshwiin wenci sekisiyek? Kaawiin ina mahshi kitahpenimonotawaahsiwaawaa Kishemanitoo?” kii'‑ihkito.

⁴¹ Aahpici tahsh kiih⁠kihcisekisiwak. O'owe tahsh kii'‑itiwak: “Awenen wa'a? Ampooshke nootin kaye saaka'ikan ona'ihtaakon!” kii'‑ihkitowak.