Maarhk 3 - Ojibwe Kihcimasina'ikan

Ciisahs ekii'-minwaaci'aatc ininiwan kaakii'-maahkininciinitc

¹ Miinawaa tahsh kii'ani piintike Ciisahs i'imaa Coowa' otanami'ewikamikoniink. Kii'⁠ayaa tahsh i'imaa peshik inini eh⁠shiikoshkaanik oninc.

² Aaninta tahsh i'imaa kii'⁠ayaawak kaawiih kakwe mamishimaawaatc ini Ciisahsoon. Okiih kanawaapamaawaan, taka ci⁠minoyayaa'aanikwen mekwaa e'⁠anwepiiwi kiishikaninik.

³ Ciisahs itahsh okiih kanoonaan ininiwan kaashiikoshkaanik oninciini: “Piishaan o'omaa niikaanaya'iink,” okii'-inaan.

⁴ Miitahsh kaa'ishi kakwecimaatc i'i pemaatisinitc: “Kii'‑inaahkonikaate na e'⁠Anwepiiwi kiishikahk ci⁠minohcikenk, kemaa ci⁠maashihcikenk? Kii'‑inaahkonikem ina ci⁠pimaaci'iwenk kemaa ci⁠nihshiwenk?” okii'-inaa'. Kaawiin itahsh kii'⁠nawiintaatihsiiwa'.

⁵ Ciisahs itahsh ekii'-waahkaayaapamaatc okii'-nishkaapamaa', ekii'onci wahsitaawenimaatc ekaa eh⁠kitimaakinaakehsinik. Miitahsh okiih kanoonaan ini ininiwan: “Niiminihkenin,” otinaan. Miitahsh ekii'-niiminihkeninitc kii'⁠minoyayaahseni 'iweni oninciini.

⁶ Mii'i kaani ishi saaka'amowaatc iki Perahsiiwininiwak (Pharisees), weyiip iko kii'⁠maawaci'itiwak tako kaye ikiweniwak kaa⁠wiiciiwaawaatc Heratan (Herod) kihciokimaan. Oko kahkina okiih tashimaawaan Ciisahsoon, aaniin i'i keishi nihsaawaahpan.

E'⁠maawaci ishaanitc i'imaa ciikipiik a'awe Ciisahs ewii'-naasihtaakotc

⁷ Ciisahs itahsh kaye okihkino'amawaakana' kii'ani ishi maacaawa' i'imaa Kaalaliiwi Saaka'ikaniink (Lake Galilee). Kihciniipiwa' itahsh ini pemaatisinitc okiih piminisha'okoo', i'imaa Kaalaliiwi ahkiink e'⁠onciinitc, kaye Cootiiyaawi ahkiink (Judea),

⁸ Ceroosalamiiwi ootenaank (Jerusalem), Icomiiyaawi ahkiink (Idumea) shikwa weti awahsinahke Cwaartanawi siipiink (Jordan) kiihpi onciiwak aaninta, shikwa miitaak ini ootenaank Tayar (Tyre), Saaitan (Sidon) e'⁠ishinihkaatenikin. Kiih⁠kihcipaahtiinowak iki kaakii'-noontamowaatc i'i kaani ishihcikenitc Ciisahsoon, ekiihpi onci otihsaawaatc.

⁹ Okiih kanoonaa' itahsh Ciisahs i'i okihkino'amawaakana' ci⁠wehpemihsitamaakotc ciimaanini, ekaa onsaam ci⁠siincishkaakohsik, ekii'-ahpiihci paahtiinonitc.

¹⁰ Aaniihsh aasha okiih pimaaci'aa' niipiwa' awiya'. Miitahsh i'i kaakiihpi onci siincishkaakotc kahkina kaa‑aahkosinitc ekiihpi kakwesaaminikotc.

¹¹ Shikwa ahpii piko e'⁠waapamikotc ini maciahcaahkwa' kaa⁠kikishkaakonitc awiya', kii'ishi kawipani'owa' i'imaa Ciisahs enaahsamikaapawitc, eh⁠kishiiwenitc: “Kiin Kishemanitoo oKosihsan!” e'⁠ikotc.

¹² Ciisahs itahsh kihciweweni okii'-onci'aa': “Keko ihkitohkek ‘Kiin Kishemanitoo oKosihsan,’ ” okii'-inaa'.

Ekii'-onakimaatc Ciisahs i'i mitaahshiniishin otishinisha'waakana'

¹³ Paanimaa tahsh kii'ani aamaciwe Ciisahs i'imaa eh⁠pihkwatinaanik. Shikwa okii'-antomaa' iniweniwa' wiin iko kaakii'-onaapamaatc. Shikwa tahsh okiih pinaasihkaakoo' otoonaapamaakana'.

¹⁴ Okii'-onakimaa' itahsh mitaahshiniishin ininiwa', e'⁠inaatc: “Kiinawaa nintishinisha'waakanak. Kikii'-onakimininim ci⁠pimi wiiciayaamiyek. Kaye tahsh kika ishinisha'oninim ci⁠papaakakiihkweyek,

¹⁵ kaye kika miinikoom kashki'ewisiwin ci⁠saakicinisha'amawekwaa maciahcaahkwa' awiyak,” okii'-inaa'.

¹⁶ Okii'-onaahkonaa' o'o mitaahshiniishin. Peshik ini kaakii'-onaahkonaatc Saaiman (Simon) kii'‑ishinihkaasowan. Piitar (Peter) kaye okii'ishi nankinihkaanaan.

¹⁷ Shikwa kii'⁠ayaawak Ciimis (James), Cwaan (John), kaa⁠wiicihkiweyintiwaatc. Miiwa' okosihsa' 'awe Sepatii (Zebedee). Mii hsa 'i kaa'ishi nankinihkaanaatc Ciisahs, Powanerciisak (Boanerges), owahkenishkaatisiik o'o ecikaatek ishinihkaasowin.

¹⁸ Shikwa oko kii'⁠ayaawak, Entaroo (Andrew), Pilap (Philip), Paarhtaalamiyo (Bartholomew), Maahtiyo (Matthew), Twaamahs (Thomas), Ciimis (James) kaa⁠okosihsimikotc Aalpiyahsan (Alphaeus), Taatiyahs (Thaddeus), Saaiman (Simon) kaye, mii 'awe peshik kaawiih kakwe aancihsehtootc okimaawiwin kaa⁠tinowitc.

¹⁹ Shikwa Cootahs Iskeriyat (Judas Iscariot), mii 'awe paanimaa ke⁠ishihcike'aatc ci⁠tahkonimintc Ciisahsoon.

Ciisahs ekii'-ikotc aaninta e'⁠wiici'aatc Setanan

²⁰ Miitahsh kaa'⁠ishkwaa onaahkonaatc o'o ininiwa', kii'ani kiiwe 'awe Ciisahs kaashitaatc. Miitahsh miinawaa kiihpi maawaci ishaawa' pemaatisinitc i'imaa eshi ayaawaatc Ciisahs, okihkino'amawaakana' kaye. Piinihsh kaawiin kii'‑ishihsehsinini impooshke ci⁠wiihsiniwaatc.

²¹ I'i tahsh otinawemaakana' Ciisahs, ahpii kaa'⁠noontaminitc, okiih kakwetepipinikoo', “Kiiwashkwe iitok,” ekii'-ikotc.

²² Weti tahsh kiihpi onciiwak Ceroosalamink (Jerusalem) aaninta iki kaa⁠kihkino'amaakewaatc i'i Coowa' otOonahshowewinini. O'o tahsh kii'‑ihkitowak ehtashimaawaatc Ciisahsoon: “Okikishkawaan ini maciaya'aan Pi'elsipoloon (Beelzebul),” kii'‑ihkitowak. Shikwa kii'‑ihkitowak aaninta: “Miiwanini otookimaamini ini maciahcaahkwa' kaa⁠wiici'ikotc Ciisahs ci⁠saakicinisha'amawaatc maciahcaahkwa' awiya',” kii'‑ihkitowak.

²³ Ciisahs itahsh okii'-antomaa' i'i pemaatisinitc. Okiih kakanoonaa' ekii'-aawehciketc: “A'awe maciaya'aa Setan kaawiin otaa kashkihtoohsiin ci⁠saakicinisha'amaasohpan i'i wiicimaciahcaahkwa', mii kaawiin inahsh i'i?

²⁴ Shikwa kiishpin nehpicimiikaatink i'imaa okimaawiwinink, kaawiin keyaapi taa⁠okimaahkantaatihsiim.

²⁵ Shikwa tahsh ikiweniwak kaa⁠peshikwewaanakitaawaatc, kiishpin nehpicimiikaatiwaatc kaawiin keyaapi ci⁠wiicitaantiwaatc, ci⁠miiwe'itiwaatc itahsh.

²⁶ Kiishpin tahsh kaye 'awe Setan miikaanaahpan otooshkiniikiima' kaye pepahkaanenintiwaatc, kaawiin keyaapi ta⁠mashkawisiihsii, mii'i ci⁠pooniyayaa'itisotc.

²⁷ Shikwa kaawiin awiya okashkitoohsiin ci⁠piintiketc otaawininiink ini kaa⁠mashkawisiinitc ci⁠mahkamaatc otaya'iimini, paanimaa ehta ahkawe mamaancikwahpinaatc ini kaa⁠mashkawisiinitc, miitahsh payesh ci⁠saakisihtoohpan otaya'iimini.

²⁸ “Kwayahk kiwiintamawininim: kahkina macitootamowinan taakiih poonentamawaawak pemaatisiwaatc, kaye minihk iko kekii maci inaawaakwen ini Kishemanitoon eh⁠paahpinotawaawaatc takiih poonentamawaawak.

²⁹ A'awe tahsh wiin ke⁠maci inaakwen ini Kishemanitoon otAhcaahkoni, kaawiin wiihkaa ta⁠poonentamawaahsii. Pishihshik itahsh iko ta⁠kikisi omacitootamowin,” okii'-inaa' 'awe Ciisahs.

³⁰ Aaniihsh okii'-inaawaan ini Ciisahsoon: “Okikishkawaan ini maciahcaahkwan.”

Ekii'-antomikotc Ciisahs omaamaan, wiicihkiweya'

³¹ Kiih⁠pitakohshinoo' itahsh i'i wiicihkiweya' Ciisahs kaye ini omaamaan. Akwaciink itahsh kii'⁠niipawiwa' ekii'-ishinisha'owenitc eh⁠piantomikotc.

³² Ciisahs itahsh mekwaa okii'-waawiitapimikoo' iniweniwa' kaa⁠maamawiinonitc. Miitahsh kaa'⁠inintc: “Na! Kimaamaa kaye kiicihkiweyak kipi antawenimikook i'imaa akwaciink,” kii'‑inaa.

³³ O'o tahsh kii'ishi nahkwehtam: “Awenen a'a nimaamaa? Awenenak iki niicihkiweyak?” kii'‑ihkito.

³⁴ Okii'-waahkaayaapamaa' iniweniwa' kaa⁠wiitapimikotc ekii'-ihkitotc: “Mii hsa wiinawaa nimaamaa kaye oko niicihkiweyak.

³⁵ Awenenak iko ke⁠ishihcikewaatc i'i kaa⁠inentank a'a Kishemanitoo, miiwakoko ke⁠inakwaa, niicihkiwe, kaye nintawemaa, kaye nimaamaa,” kii'‑ihkito.