Maarhk 15 - Ojibwe Kihcimasina'ikan

Eh⁠kakakwecimikotc Ciisahs ini Paailatan

¹ Piciinak itahsh eh⁠pimoohka'aminitc, eh⁠papaashiink, kii'⁠maawaci'itiwak iki Kihcianami'ewikimaak, iki kaye kaa⁠niikaanakinsowaatc Coowak, kaye kaa⁠kihkino'amaakewaatc Onahshowewin, kahkina kaye kaa⁠nihtaa onaahkonikewaatc, mincikahkina ekii'-naanaakasowewaatc. Miitahsh kaa'ishi mamaancikwahpinaawaatc Ciisahsoon, inkoci e'⁠ishiwinaawaatc e'⁠miinaawaatc ini Paailatan (Pilate).

² Miitahsh eshi kakwecimaatc a'a Paailat ini Ciisahsoon: “Kiin ina iki Coowak okihciokimaamiwaan?” okii'-inaan. Ciisahs okii'ishi nahkwehtawaan: “Mii'iwe ehkitoyan,” okii'-inaan.

³ Iki tahsh Kihcianami'ewikimaak niipiwa' kekoonini okakwecimaawaan ini Ciisahsoon.

⁴ Miinawaa tahsh kii'onci kakwetwe a'a Paailat: “Kaawiin ina kekoon kiwii'ishi nahkwehtansii? Inashke minihk eshi anaamimikooyan!” okii'-inaan.

⁵ Keyaapi tahsh Ciisahs kaawiin kekoon kii'⁠nahkwehtansii. Maamahkaac okii'onci inenimikoon ini Paailatan.

Ekiih kiishaahkonintc a'awe Ciisahs

⁶ Tahsink itahsh e'ishi ciikahkamikisinaaniwank Pimaaci'ikoowi Wiihkwantiwin, kii'⁠nihtaa ishihcike a'a Paailat (Pilate), ekiih pakitinaatc peshik awiyan kaa⁠kipa'omintc, awenenan iko mehsawenimaanitc i'i Coowa'.

⁷ I'i ahpii kiih⁠kipaahkwa'ikaniwi a'a peshik inini, Paraapahs (Barabbas) e'⁠ishinihkaasotc. Okiih takokipa'okoomaa' kotak awiya' kaakii'-nihshiwenitc ekii'-miikaanaanitc ini wekimaawaatisinitc, ekii'-nihshiwanaatahkamikisiwaatc.

⁸ Miitahsh kaahpi ishi maawaci ishaawaatc niipiwa' awiyak i'imaa Paailatan owaahkaa'ikaniniink, e'⁠maaciikakwecimaawaatc: “Ishihcike'ihshinaam taapishkoo mooshak eshihcike'iyaank o'o ahpii!” kii'‑ihkitowak.

⁹ Miitahsh kaa'ishi nahkwehtawaatc a'a Paailat: “Kika pakitinamawininim ina ini Coowak okihciokimaamiwaan?” okii'-inaa'.

¹⁰ Aaniihsh Paailat wiinke okiih kihkenimaa' i'i Kihcianami'ewikimaa' e'⁠ontenimaanitc ini Ciisahsoon, mii'iwe kaa'onci ishiwitamaakotc. Aaniihsh kahkina awiya okii'-minohtawaawaan Ciisahsoon.

¹¹ Iki tahsh Kihcianami'ewikimaak okiih kakaansomaawaa' i'i kaa⁠ohkwenonitc ci⁠kakwe tepimaanitc ini Paailatan, meshkwac ci⁠pakitinamawintwaa ini Paraapahsan.

¹² Miitahsh miinawaa kaa'ishi kanoonaatc a'a Paailat i'i kaa⁠ohkwenonitc: “Aaniin tahsh enentamek ci‑ishihcike'ak a'awe kaa⁠inek okihciokimaamiwaan iki Coowak?”

¹³ Miitahsh kaa'ishi nahkweshaakowewaatc: “Saka'o aashiteyaahtikonk!”

¹⁴ Kii'ishi nahkwehtam itahsh Paailat: “Aaniin itahsh? Aaniihsh kaa'ishi macihciketc?” okii'-inaa'. Nawac itahsh awahshime kiih⁠kihcishaahshaakowewak, “Saka'o aashiteyaahtikonk!” e'⁠ihkitowaatc.

¹⁵ Miitahsh i'i kaa'ishi pakitinaatc a'a Paailat ini Paraapahsan, e'⁠inentank ci⁠minwentaminitc i'i kaa⁠ohkwenonitc. Miitahsh kaa'ishi anoohkiitc ci⁠pahshanshe'omintc ini Ciisahsoon. Shikwa okiih pakitinamawaa' shimaakanihsha' ci⁠saka'waanitc aashiteyaahtikonk.

Ekii'-nihshipaahpinotaakotc Ciisahs i'i shimaakanihsha'

¹⁶ Iki tahsh shimaakanihshak okii'-ishiwinaawaan ini Ciisahsoon i'imaa piintikamik, mii'imaa kihcionahshowewinini kaa⁠ishitaatc, Pariihtwaariyam (Praetorium) kaa⁠ishinihkaatek ekii'-antomaawaatc i'i eni kohkwenonitc shimaakanihsha'.

¹⁷ Miitahsh ekiih kiicihkonaye'aawaatc ini Ciisahsoon, kaa'ishi pihsihkamo'aawaatc i'i kaa⁠mahkatemiskwekaninik kashkiikiiwin. Shikwa okii'-ahpihkaanaawaa' e'⁠oshihtoowaatc okaawiminakashii' wiiwahkwaan, ekiih pihsihkamo'aawaatc.

¹⁸ Miitahsh kaa'ishi anamihkawaawaatc e'⁠inaawaatc: “Pooshoo kiin kehciokimaahkantawatwaa Coowak!” okii'-inaawaan.

¹⁹ Miitahsh kaa'ishi pahpahkihte'waawaatc i'imaa ohtikwaaniniink i'i wiihsikop, kaye eh⁠sasiihkwaanaawaatc kaye e'⁠ociciinkwanapiihtawaawaatc, e'⁠nanaawakiihtawaawaatc kaye.

²⁰ Miitahsh kaa'⁠ishkwaa nihshipaahpinotawaawaatc okiih kiicihkonaye'aawaan i'i kaa⁠mahkatemiskwekaninik kashkiikiiwin, miinawaa wiin iko okikishkikanini ekiih pihsihkamo'aawaatc. Miitahsh kaa'ishi maaciinaawaatc ekii'anta akosaka'waawaatc aashiteyaahtikonk.

Ekiih saka'ontc Ciisahs aashiteyaahtikonk

²¹ Kiih⁠pimiayaa tahsh peshik inini mekwaa ehpimahkamikaninik, Saaiman (Simon) e'⁠ishinihkaasotc, i'imaa Saairiiniink (Cyrene) kaakii'-onciitc. Mii'awe kaa⁠okosihsitc Aalikihsaantaroon (Alexander) kaye Oroohpahsan (Rufus). I'imaa ohpimeaya'ii kiihpionci takohshin ewii anicehkishkank ootena. Mii'awe kaa'ishi koonkonikotc shimaakanihsha' ci⁠pimiwitamawaatc Ciisahsoon otaashiteyaahtikomini.

²² Miitahsh weti kaa'⁠ishiwinintc Ciisahs i'imaa eshi pihkwatinaanik Kaalkahtaa (Golgotha) e'⁠ishinihkaatenik, mii'iwe ehkitonk Ohtikwaanikekanihkaank.

²³ Otaanakiiwii'-mina'aawaan i'i shoominaapo ekii'-waninaweyaakaminikaatenik kekoon ekaa keonci nihsitosihsinik, mar (myrrh) e'⁠ishinihkaatenik. Kaawiin itahsh kiiwii'-minihkwehsii.

²⁴ Miitahsh ekiih kiicihkonayepinaawaatc kaa'ishi akosaka'waawaatc aashiteyaahtikonk. Miitahsh kaa'ishi ahpakicikewaatc keonci kihkentamowaatc wekonen i'i kikishkikan ke⁠otaahpinamowaatc entahsopeshikowaatc. Mii'i nahke kaa'ishi nenaawa'oonitiwaatc okikishkikanini.

²⁵ Kiih⁠shaankahso tipa'ikaneyaani eh⁠kishepaawakaninik, mii'i ahpii kaakii'-akosaka'waawaatc.

²⁶ Shikwa kii'⁠oshipii'ikaate kihkinawaacihtamaakewin, wekonen kaaonci akosaka'ontc a'a Ciisahs. “Mii wa'a Coowak okihciokimaamiwaan,” kii'‑ihkitoomakan.

²⁷ Shikwa niishin (2) omahkantweshkak kewiinawaa kii'⁠akosaka'ikaasowak, keyaapi e'⁠niishinitc aashiteyaahtikoo', peshik i'imaa okihcinihkiniink inahke, peshik itahsh kaye onamantinihkiniink inahke eshi'-akoocininitc Ciisahsoon.

²⁸ [Mii 'i wiinke ekii'-ishihsenik i'i kaakiih kiishaacipii'ikaatenik Kishemanitoo otihkitowin: “Kiih⁠takwakimaa iniweniwa' kaa⁠piikonaminitc inaahkonikewin,” kii'‑ihkitoomakanini.]

²⁹ Miitahsh iki kaa⁠mayaashkawaawaatc okii'-nihshipaahpi'aawaan ekii'-nanaamihkweniwaatc e'⁠inaawaatc: “Yohoo! Kiwiih piikopitoonaapan iitok i'i Kishemanitoo kaashi anami'ehtawintc, miinawaa kii⁠nihsokiishikwakaak ewiih kiiwe oshihtooyampan!

³⁰ Kiin pimaaci'itison! Piniihsaantawen i'imaa aashiteyaahtikonk!” kii'‑ihkitowak e'ishi miihkinsomaawaatc.

³¹ Shikwa peshikwan iki Kihcianami'ewikimaak, iki kaye kaa⁠kihkino'amaakewaatc onahshowewin okiih paahpi'aawaan Ciisahsoon e'⁠itiwaatc: “Pahkaan awiya' okiih pimaaci'aa'. Wiin itahsh kaawiin okashkihtoohsiin ci⁠pimaaci'itisotc!

³² Mii 'awe kaa⁠itisotc Kishemanitoo kaa'⁠onenimaatc ci⁠pimaaci'iwenitc e'⁠aawitc, kaye ke⁠kihciokimaahkantawaatc Isriyalininiwa' (Israel). Taka cikii'onci niihsaantawetc i'imaa aashiteyaahtikonk, kika tepwehtawaanaan e'⁠aawitc, waapantamowank!” kii'‑itiwak. Iki kaye niishin ininiwak kaakii'-wiici akosaka'okoomaawaatc Ciisahsoon, kaye wiinawaa peshikwan okii'ishi kakaansomaawaan.

Ekii'ishi poonipimaatisitc Ciisahs

³³ Miitahsh e'⁠aapihta kiishikahk kii'⁠maacii kashkiitipihkan misiwe ahkiink, piinihsh e'⁠nihsotipa'ikaneyaak.

³⁴ E'nihsotipa'ikaneyaak itahsh kiih⁠kishiiwe a'a Ciisahs: “Ilooi! Ilooi! Lamaa sapaahtanii?” kii'‑ihkito. Mii'i ehkitonk: “NiManitoom! NiManitoom! Aaniin tahsh kaaonci nakashiyan?”

³⁵ Miitahsh kaa'⁠ihkitowaatc aanint i'imaa kaa⁠ciikikaapawiwaatc: “Ina tahsh, onantwewemaan Ilaaicawan (Elijah)!”

³⁶ Miitahsh peshik inini kaa'ishi piicipahtwaatc iska'ipaan ekiih kintaapiikinank shoominaapoonk, ekii'-niimaahkwa'ank mihtikoonhsink, ekii'-inaahkwa'amawaatc otooniniink ini Ciisahsoon ewii mina'aatc, e'⁠ihkitotc: “Taka ci⁠piniihsinikotc ini Ilaaicawan!”

³⁷ Ciisahs itahsh kiih⁠kihcikishiiwe. Miitahsh kaa'ishi poonipimaatisitc.

³⁸ Miitahsh i'i ahpii weti Kihcianami'ewikamikonk kaa'ishi taashkiikihsek kaa⁠kihpakaak aakawekinikan i'imaa piintik kaa‑akootek Kishemanitoo owaahkaa'ikaniink. Ishpimink inahke kiihpionci maacii taashkiikihse piinihsh weti naashaya'ii.

³⁹ I'imaa tahsh pehsho aashiteyaahtikonk kaakii'-niipawitc okimaawishimaakanihsh kaa⁠inaahsamikaapawiihtawaatc ini Ciisahsoon, ahpii e'⁠waapamaatc eshi poonipimaatisinitc, kii'‑ihkito: “Tepwe iinsan wa'a inini Kishemanitoon okii'-oKosihsimikoon!” kii'‑ihkito.

⁴⁰ Shikwa kii'⁠ayaawak ihkwewak i'imaa ehkotepinaakwaninik ekii'-onsaapiwaatc. Mekweya'ii ko kii'⁠ayaawak oko nihsin (3) Saloomi (Salome), shikwa Meri (Mary) mii'awe Maakatala (Magdala) ootenawenhsink kaakii'-onciitc, shikwa kotak a'a miinawaa peshik Meri mii'awe okosihsa' kaa⁠ishinihkaasonitc Coosihs (Joses) kaye Ciimis (James) ohshiimenshimaa.

⁴¹ Miiwakoko ihkwewak kaakiih piminisha'waawaatc ini Ciisahsoon Kaalaliiwi ahkiink (Galilee) mekwaa i'imaa ekii'-ayaanitc, ekiih papaapami'aawaatc. Shikwa keyaapi niipiwa' kii'⁠ayaawak ihkwewak kaakiihpi wiici takohshinoomaawaatc ini Ciisahsoon i'imaa Ceroosalamink (Jerusalem).

Ekii'ishi na'inikaniwitc a'awe Ciisahs

⁴² Aasha kii'ani onaakohshin, ekaa mahshi eh⁠pankihshimohsik ekiih pahkweshikanikiishikahk. Mii'i ahpii ekii'-waweshiihtaawaatc Coowak cipwaa Anwepiiwi kiishikaninik.

⁴³ Kii'⁠ayaa tahsh peshik eh⁠kihci inentaakositc onahshowewinini, Coosap (Joseph) kaa⁠ishinihkaasotc, ekii'-onciitc ootenawenhsink Eramahtiiya (Arimathea) e'⁠ishinihkaatenik. Kewiin okii'-ahshawaapantaan Kishemanitoon ci⁠oshihsitoonitc otipencikewinini. Kiih⁠soonkite'e Coosap ekii'-ishaatc Paailatan (Pilate), ekiih kakwecimaatc i'i Ciisahsoon wiiyawini ci⁠na'inank.

⁴⁴ Kiih⁠koshkwentam itahsh a'a Paailat aasha e'⁠niponitc ini Ciisahsoon e'⁠wiintamawintc. Shikwa kii'⁠anoohkii ci⁠pinaasihkaakotc ini okimaawishimaakanihshan. Miitahsh eh⁠kakwecimaatc: “Aasha na kinwesh kaakii nipotc Ciisahs?” okii'-inaan.

⁴⁵ “Eha', aasha kii'⁠nipo,” okii'-ikoon. Miitahsh kaa'ishi kanoonaatc a'a Paailat ini Coosapoon: “Haw kika na'inaan i'i miiyaw,” okii'-inaan.

⁴⁶ Miitahsh kaa'awi ishi ataawetc Coosap i'i waapishkiikin. Miitahsh kaa'ishi onci pina'ank i'i wiiyawini Ciisahsoon kaakii'ishi akootenik aashiteyaahtikonk, shikwa ekiih titipeyiikinank waapishkiikinonk. Miitahsh kaa'ishi na'inank i'imaa na'initiiwikamikonk kaa'ishi wiimpaapihka'ikaatenik. Miitahsh kaa'⁠ishitihtipinaatc ini kihciahsiniin kaa⁠kipa'ikaakaaniwinitc i'imaa eshi ishkwaantemiwaninik na'initiiwikamik.

⁴⁷ Shikwa kaye kii'⁠ayaawak Meri Maakatalawihkwe (Mary Magdalene) kaye a'a kotak Meri (Mary) kaa⁠okosihsitc Coosihsan (Joses). Okii'-waapantaanaawaa eshi pimihshimimintc ini Ciisahsoon.