Maarhk 14 - Ojibwe Kihcimasina'ikan

Oniikaanisiik ekiih kakwemihkamowaatc aaniin keshi nihsaawaatc Ciisahsoon

¹ Keyaapi kii'⁠niishokiishikwakaa cipwaa ocihcihsenik kaawii'ishi ciihkahkamikisinaaniwank Pimaaci'ikoowi Wiihkwantiwin kayehsh e'ishi kiishikahk e'⁠ompisikaniwihsik pahkweshikan ci⁠amontc. I'i tahsh Coowak oKihcianami'ewikimaamiwaa' kaye iki kaa⁠kihkino'amaakewaatc Onahshowewin, okii'-naanaantone'aanaawaa keishi kiimooci tahkonaawaatc ini Ciisahsoon, ekiiwii'-nihsaawaatc.

² Kii'‑ihkitowak itahsh: “Kaawiin kitaa⁠tahkonaahsiwaanaan mekwaa e'⁠wiihkwantinaaniwank, maakishaa ta⁠kihci ompwehkamikisiwak, ci⁠piikwahkamikisiwaahpan,” kii'‑ihkitowak.

Minaakwa'on ekiih siikinamawintc ohtikwaanink a'a Ciisahs

³ Kii'⁠ayaa tahsh Ciisahs i'imaa Pehtaniink (Bethany) e'⁠ishinihkaatenik ootenawenhs, i'imaa kaa⁠ishitaanitc peshik ininiwan, Saaiman (Simon) e'⁠ishinihkaasonitc, mii 'awe kaakii'-omikiiwaahpinehpan. Mekwaa tahsh ehtashi wiihsininitc Ciisahs, kiihpi piintike peshik ihkwe ekii'-ayaatc kaayaahkwakintenik minaakwa'onini, ekii'ishi piintenik i'imaa ahsiniiwi omootayaapihkonk aalapaastar (alabaster) tino ahsiniink kaakii'onci oshihcikaatenik. Naart (Nard) kaakiih tinowaakamik minaakwa'on, kaawiin kekoon kiih⁠takwaakaminikaatehsinoon. Okiih poohkwaapihkinaan itahsh eshi akaahsiciipwaapihkaninik i'i omootayaapihk a'a ihkwe, ekiih siikinamawaatc i'i minaakwa'on i'imaa Ciisahsoon ohtikwaaniniink.

⁴ Aanint itahsh i'imaa piintik kaayayaawaatc kii'⁠wahsitaawentamook e'⁠aayitiwaatc: “Aaniihshwiin wenci nihshiwanaacihtootc i'i minaakwa'on?

⁵ Niipiwa' shooniyaa taakii'-inataawaakaaniwan. Kekaa peshikoahki taayanohkii awiya ci⁠kashki'aatc ini minihk shooniyaan. Taakii'onci miinaapaniik ketimaakisiwaatc kii'‑inataawaakaaniwankipan minaakwa'on,” kii'‑ihkitowak. Mii'i ekiih kishiikanoonaawaatc ini ihkwewan.

⁶ Ciisahs itahsh kii'‑ihkito: “Poonimihk! Aaniihshwiin wenci mikoshkaasomek? kehcionishihshininik kaakiih tootawitc,” okii'-inaa'.

⁷ “Mooshak ayaawak o'omaa kaashi ayayek iki ketimaakisiwaatc, piko ahpii ci⁠minohcike'ekwaapan inentamek. Niin itahsh kaawiin pishihshik kika/⁠ayaawihsiim.

⁸ Kii'‑ishihcike hsa wa'a ihkwe 'iwe minihk eshi kashkihtootc. Kiishaac okiih siikinaan i'i minaakwa'on i'imaa niiyawink ewii na'ahsikooyaan.

⁹ Tepwe kiwiintamawininim: Aanti ko keshi tipaatocikaatek i'i minwaacimowin misiwehkamik, kaye o'o kaakii'-ishihciketc ta⁠tashimaa wa'a ihkwe ci⁠maamihkoomintc,” kii'‑ihkito.

Cootahs Iskeriyat ekii'-mamishimaatc ci⁠tahkonikaniwinitc ini Ciisahsoon

¹⁰ Miitahsh kaa'ishi maacaatc a'a peshik iki kaakii'-mitaahshiniishiwaatc kihkino'amawaakanak, Cootahs Iskeriyat (Judas Iscariot) kaa⁠ishinihkaasotc, ekii'-ishaatc i'i Coowak oKihcianami'ewikimaamiwaa', ekii'awi kanoonaatc: “Kika kihkinowinininim i'imaa keshi kaahcitinek a'a Ciisahs,” ekii'-inaatc.

¹¹ Wiinke tahsh kii'⁠minwentamook iki Kihcianami'ewikimaak, ekii'-inahshotamawaawaatc shooniyaan ci⁠tipa'amawaawaatc ini Cootahsan. Miitahsh kaa'ishi antone'ank a'a Cootahs aaniin keshi kaahcitinimintc ini Ciisahsoon.

Ekii'-wiiciwiihsiniimaatc Ciisahs i'i okihkino'amawaakana' ekiih Pimaaci'ikoowi Wiihkwantinaaniwank

¹² Maawac itahsh iko nihtam eh⁠kiishikahk e'⁠maatahkamikahk wiihkwantiwin mii'i ahpii e'⁠maaciiamontc pahkweshikan ekaa e'⁠ompisikaniwihsik, kaye mii'i ahpii kaaishi nihsintwaa maanahcaanihshensak kaawii'-amontwaa ehPimaaci'ikoowi Wiihkwantinaaniwank, mii'i ahpii Ciisahs okiih kakwecimikoo' okihkino'amawaakana': “Aaniinti tahsh eshi antawentaman ci‑ishi oshiihtamaakooyan ke⁠tashiwiihsiniyan eh⁠Pimaaci'ikoowi Wiihkwantink?” okii'-ikoo'.

¹³ Miitahsh kaa'ishi anoonaatc niishin okihkino'amawaakana' e'⁠inaatc: “Ishaak ootenaank, kika mekwaashkawaawaa inini ekii'-naata'ipiitc otahtoopaan. Mii 'awe piminisha'ohk.

¹⁴ Aanti tahsh iko keishi piintiketc a'a inini, mii'imaa ishi kakwecimihk a'a kaa⁠tipentank waahkaa'ikan: ‘Okihkino'amaake ihkito: “Aanti eyaak taawin ke⁠tashiwiihsiniyaank ninkihkino'amawaakanak ehPimaaci'ikoowi Wiihkwantink” kitik,’ mii'iwe inihk.

¹⁵ Kika waapanta'ikowaa tahsh i'imaa ishpimink e'⁠mihcaak pahkehcikan aasha ehtashi waweshihcikaatenik kaye kahkina kekoon eh⁠kwayaantahtek. Mii'imaa ishi oshiihtaak ci⁠wiihsiniyank,” okii'-inaa'.

¹⁶ Miitahsh kaa'ishi maacaawaatc ekii'ishi takohshinowaatc ootenaank. Mayaa tahsh okii'ishi mihkaanaawaa 'iwe kaa'ishi wiintamaakowaatc Ciisahsoon. Miitahsh kaa'ishi oshiihtaawaatc ci⁠wiihsiniwaatc eh⁠Pimaaci'ikoowi Wiihkwantink.

¹⁷ Ahpii tahsh wenaakohshininik okiihpi wiicitakohshinoomaa' Ciisahs i'i mitaahswahshiniishin okihkino'amawaakana'.

¹⁸ Mekwaa tahsh e'⁠ohpimehshinowiihsiniwaatc, okii'-inaa' Ciisahs: “Pisintamohk o'o: peshik a'a ninka ishihcike'ik kiinawaa kaa⁠wiiciwiihsiniiminakook ci⁠tahkonikooyaan,” kii'‑ihkito.

¹⁹ Miitahsh kaa'ishi mikoshkaatentaminitc kahkina, ekii'onci kakwecimaawaatc pepeshik e'⁠inaawaatc: “Kaa maawiin niin, ina?” okii'-ikoo'.

²⁰ Okii'-nahkwehtawaa' itahsh a'a Ciisahs: “Peshik kiinawaa kaa⁠mitaahswahshiniishiyek, peshik kaa⁠kintaanaatc opahkweshikaniman e'⁠wiitoohpamitc, mii'awe ke⁠ishihcike'itc.

²¹ Niin Inini oKosihsan, tepwe nintawinip taapishkoo kaa⁠ishipii'ikaatenik Kishemanitoo otihkitowin, e'⁠inaacimikooyaan. Kakwaanihsakahkamik itahsh a'a inini ke⁠ishihcike'itc! Nawaciko taa⁠onishihshin ekaa wiihkaa cikii'-nihtaawikihsikopanen a'a inini,” okii'-inaa'.

Pahkweshikan, shoominaapo e'⁠miinaatc Ciisahs i'i okihkino'amawaakana'

²² Mekwaahsh e'⁠wiihsiniwaatc okii'-otaahpinaan Ciisahs ini pahkweshikanan, ekii'-nanaahkomotc, ekiih pahpahkwepinaatc, e'ishi maamiinaatc okihkino'amawaakana', e'⁠inaatc: “Otaahpinihk. Miihsa 'owe niiyaw,” kii'‑ihkito.

²³ Miitahsh kaa'ishi otaahpinank minihkwaakan, e'⁠nanaahkomotc. Miitahsh kaa'ishi miinaatc. Kahkina kii'onci minihkwewa'.

²⁴ Miitahsh e'⁠ihkitotc: “Miihsa 'owe nimiskwiim, kaawii'-oncikawik ahpii nipohtamawakwaa niipiwa' awiyak. Mii 'owe cikihtahtek i'i ahshotamaatiwin kaa⁠miinaatc Kishemanitoo i'i pemaatisinitc.

²⁵ Weweni pisintamohk o'o: Kaawiin keyaapi nanaash ninka minihkwaatansiin shoominaapo, paanimaa weti eh⁠kiishikahk ci⁠minihkwaatamaan i'i oshkishoominaapo, weti ahpii kii kiishi oshihsitootc Kishemanitoo oTipencikewin,” kii'‑ihkito.

²⁶ Miitahsh kaa'⁠ishkwaa nanaahkomiwewi nikamowaatc kii'⁠maacaawak weti pihkwatinaank Aalip (Olive) Kihtikaanaahtikohkaank e'⁠ishinihkaatek.

Ciisahs kii⁠kihkenimaatc niiyaak Piitaroon ci‑ikotc ekaa eh⁠kihkenimikohsik

²⁷ Miitahsh kaa'-inaatc Ciisahs okihkino'amawaakana': “Kahkina kika nakashim. Mii'i aaniihsh eshipii'ikaatenik Kishemanitoo otihkitowin: ‘Kishemanitoo oka nihsaan ini okanawimaanahcaanihshiwen, miitahsh iki maanahcaanihshak kahkina keishi ohswepa'iwewaatc,’ ihkitoomakan.

²⁸ Paanimaa tahsh Kishemanitoo kiih⁠kiiwepimaatisi'itc, kika awi pii'ininim Kaalaliiwi ahkiink (Galilee),” kii'‑ihkito.

²⁹ Okiih kanoonikoon itahsh Piitaroon (Peter): “Kahkina awiyak aana nakanihkwaa, kaawiin keniin i'i nintaa ishihcikehsii,” okii'-ikoon.

³⁰ Ciisahs itahsh okii'-inaan: “Weweni maamihkawin! Noonkom kaa⁠tipihkahk, cipwaa ahkawaapanwetc niishwaa (2) a'a naapepaahka'aahkwaan, ‘Kaawiin ninkihkenimaahsii,’ nihswaa (3) kika ish,” okii'-inaan.

³¹ Nawac miinawaa enikohk kii'ishi nahkwehtam a'a Piitar: “Mihsawaa aana wiicinipoominaan, kaawiin wiihkaa niin nintaa ihkitohsii ekaa ci⁠kihkenimihsinowaan!” okii'-inaan. Miihsa ko peshikwan kahkina kaa'‑ayihkitowaatc iki kihkino'amawaakanak.

Ekii'ani ishaatc Ciisahs Kehsemaniink ewiih tashi anami'aatc

³² Kii'ani takoshinook itahsh i'imaa ayaawinink, Kehsemani (Gethsemane) e'⁠ishinihkaatenik. Miitahsh kaa'⁠inaatc Ciisahs okihkino'amawaakana': “O'omaa nanamatapik mekwaa anami'aayaan,” okii'-inaa'.

³³ Okii'-wiiciiwaa' itahsh Piitaroon (Peter), Ciimisan (James), Cwaanan (John). Miitahsh kiih⁠kihcikohtaacihse a'a Ciisahs, e'⁠ahpiihci mikoshkaatentank.

³⁴ Shikwa 'owe okii'-inaa': “Aasha taapishkoo e'⁠nihsikoyaan i'i nimaanentamowin,” okii'-inaa'. “O'omaa ayaak, ahshawaapik,” okii'-inaa'.

³⁵ Pankii ko awahsweti kii'ani ishaa Ciisahs. Kii'ani mihkopani'o mihtahkamik ekii'-anami'aatc, eh⁠pakohsenimotc, kiishpin ishihsekipan, ampehsh ci⁠pakitinaahsiwintc i'imaa ci‑ishaatc kakwaatakihtoowinink kaawii'-ocihcihsenik.

³⁶ “Aapa (Abba), ninTete!” kii'‑ihkito. “Kahkina kekoon kikashkihtoon. Ampehsh inkoci cionci otaahpinamawiyan o'o minihkwaakan ekaa cionci minihkwehsiwaan! Niin itahsh kaa⁠mihsawentamaan kaawiin ta⁠ishiwepahsinoon. Kiin ihsa kaa‑antawenimiyan, ta⁠ishiwepan,” kii'‑ihkito.

³⁷ Miitahsh okiih pikiiwenotawaa' Ciisahs i'i nihsin (3) okihkino'amawaakana'. Okii'-waapamaa' e'⁠nipaanitc. Okii'-inaan itahsh Piitaroon: “Saaiman (Simon), kinipaa na? Kaawiin ina kikiih kashkihtoohsiin peshikotipa'ikan ehta ci⁠shiipinkwahshiyan?” okii'-inaan.

³⁸ “Ahshawaapik,” okii'-inaa'. “Anami'aak ekaa ciani kakweci'ikoohsiwek. Aanawii'-mashkawentamek, kaawiin teahpiihciimakahsinoonan kiwiiyawiwaan,” okii'-inaa'.

³⁹ Miinawaa kii'‑ishaa Ciisahs kaakiih tashianami'aatc, peshikwan ekii'-ihkitotc.

⁴⁰ Miitahsh miinawaa eh⁠pikiiwetc okii'-waapamaa' e'⁠nipaanitc, ekiih kawinkwahshinitc. Okiih kwiinawi ikoo' itahsh.

⁴¹ Miitahsh nihswaa (3) ekiihpi kanoonaatc okihkino'amawaakana': “Keyaapi na kinipaam? Kitanwehshinim inahsh? Mii kishke minihk nipaak! Mii aasha e'⁠ocihcihsek! Na! Aasha niin Inini oKosihsan nimpakitinikoowis ci⁠tahkoniwaatc omacitootamook,” okii'-inaa'.

⁴² “Haw pasikwiik, ishaataa! Na 'aweti! Aasha takohshin a'a kaa⁠kihkinowinaatc i'i ke⁠tahkonimitc!” kii'‑ihkito.

Ciisahs ekiih tahkonikaniwitc

⁴³ Miitahsh mekwaa eh⁠kakitotc Ciisahs, kiih⁠pitakohshin a'a Cootahs (Judas), mii 'awe peshik iki mitaahshiniishin kihkino'amawaakanak. Kiihpi kiki takohshin niipiwa' awiya' ekiih kikoohkomaanenitc. Miihsa weti kaahpionci maacinisha'okowaatc i'i Kihcianami'ewikimaa' kaye kaa⁠kihkino'amaakenitc Onahshowewin kaye Coowa' oniikaanisiimini.

⁴⁴ A'awe tahsh Cootahs, mii 'awe kaakiihpi ishiwinaatc i'i ke⁠tahkonaanitc Ciisahsoon, okiih kiishaaci kihkino'amawaa': “Mii 'awe ke⁠ociimak otihtinaahkek, weweni maaciinaahkek,” okii'-inaapanii' 'awe Cootahs iniweniwa' kaa⁠wiiciiwikotc.

⁴⁵ Miitahsh piciinakiko e'⁠otihtank i'i ayaawin opikanoonaan Ciisahsoon: “Okihkino'amaake!” otinaan, e'⁠ociimaatc.

⁴⁶ Miitahsh okiih tepipinaawaan Ciisahsoon, ekii'-mamaancikonaawaatc.

⁴⁷ Peshik itahsh a'a kaa⁠ciikikaapawiwaatc okiih kihcikopitoon pashipa'ikewihkomaan ekiih pahkihte'waatc ini otanohkii'aakanini ini Maawac Kihcianami'ewikimaan, ekii'-mashihtawakewepa'waatc.

⁴⁸ Ciisahs itahsh okiih kanoonaa' iniweniwa' kaa⁠tahkonikotc: “Kipi kaahcitinim ina taapishkoo kiimoocishkiiwinini eh⁠tinowiwaanen, eh⁠kikisiyek kihcimoohkomaanan kaye pakamaakanan?

⁴⁹ Tahsokiishik kikii'-wiiciiwininim i'imaa Kihcianami'ewikamikonk ekiih kihkino'amaakeyaan. Kaawiinhsh wiihkaa kikiih tahkonihsiim. Miitahshiko 'i ci⁠ocihcihsek i'i kaa⁠ishipii'ikaatenik Kishemanitoo Otihkitowin,” okii'-inaa'.

⁵⁰ Miitahsh kahkina kii'⁠maaciipa'iwewa' okihkino'amawaakana', ekii'-nakanikotc.

⁵¹ Peshik itahsh okiih piminisha'waan Ciisahsoon oshki inini, waapishkiikin ehta ekiih kashkiikiitc. Okii'-otihtinikoo' i'i ininiwa' ewiih kakwe tahkonikotc.

⁵² Miitahsh kaa'ishi nakacipahtwaatc oshki inini i'i waapishkiikin, ekii'-maaciipa'iwetc kekoon e⁠kiihkikishkansik.

Ekiih tipaahkonikotc Ciisahs i'i onahshowewininiwa'

⁵³ Miitahsh eni ishiwinintc Ciisahs weti e'⁠ayaanitc ini kaa⁠niikaanentaakosinitc Kihcianami'ewikimaan. I'imaa tahsh aasha kii'⁠maawaci'itiwak iki Kihcianami'ewikimaak, kaye Coowak oniikaanisiimiwaa', kaye iki kaa⁠kihkino'amaakewaatc Onahshowewin.

⁵⁴ Ahpii tahsh kaah⁠pimiwinimintc Ciisahsoon, a'a Piitar (Peter) kii'ani mihciayoonsaapi, piinihsh i'imaa owaahkaa'ikaniniink ini Maawac Kihcianami'ewikimaan, akwaciink i'imaa kaashi wiimpihcikaatenik ekii'ishi piintiketc. Mii'imaa kaa'ishi wiitapimaatc i'i kanawencikewishimaakanihsha' ekii'onci awansotc ciikishkote.

⁵⁵ Weti tahsh piintik iki Kihcianami'ewikimaak kaye kahkina iki onahshowewininiwak okii'-nanaantaontinaanaawaa keishi maanaahkonaawaahpan ini Ciisahsoon keonci nihsaawaatc. Kiih⁠kwiinawi ontinikewak itahsh.

⁵⁶ Aaniihsh niipiwa' awiyak okiih kakiinawishki inwe'aawaan Ciisahsoon, kaawiin itahsh peshikwan kii'‑inaacimohsiiwak.

⁵⁷ Aanint itahsh kiih⁠pipasikwiiwak ekiih kakiinawishkiwaatc e'ishi tipaacimaawaatc Ciisahsoon e'⁠inaawaatc:

⁵⁸ “Ninkii'-noontawaanaan e'⁠ihkitotc: ‘Ninka piikopitoon o'o Kishemanitoo kaashi anami'ehtawintc ininiink kaakii'onci oshihcikaatenik. Kii⁠nihsokiishikwakaak (3) itahsh ninka kiishi oshihtoon peshik mehci oshihcikaatehsinok,’ kii'‑ihkito,” okii'-inaawaan.

⁵⁹ O'o hsa wiin kaawiin peshikwan kii'‑ihkitohsiiwak kewiinawaa.

⁶⁰ Miitahsh kaa'ishi pasikwiitc a'a Maawac Kihcianami'ewikimaa. Naawaya'ii kii'⁠niipawi ekiih kanoonaatc ini Ciisahsoon: “Kaawiin ina kekoon kiwii'ishi nahkwehtansii kaaishi macaacimihkwaa?” okii'-inaan.

⁶¹ Ciisahs itahsh kaawiin awaac kekoon kii'‑ihkitohsii. Kaawiin kii'⁠nahkwehtansii. Miinawaa tahsh a'a Maawac Kihcianami'ewikimaa okiih kakwecimaan ekii'-inaatc: “Kiin ina 'awe Kishemanitoo kaa'⁠onaapamaatc ci⁠pimaaci'iwenitc? Kiin ina oKosihsan a'a Kishemanitoo kaa⁠ishpentaakositc?” okii'-inaan.

⁶² Ciisahs itahsh okii'-inaan: “Mii 'awe nintinow. Niin Inini oKosihsan kika waapamim ci⁠okimaawapiyaan okihcinihkink inahke a'a kaa⁠MaamawiMashkawentaakositc. Mekwe wahkwiink ninka pinaakos kiishikonk,” kii'‑ihkito.

⁶³ Miitahsh eshi taashkipitootc okikishkikanan a'a Maawac Kihcianami'ewikimaa e'⁠nishkaatisitc, e'⁠ihkitotc: “Awenen awahshime kekii'-ihkitohpan?

⁶⁴ Aasha kikii'-noontaanaawaa ekii'-macikiishwaanaatc Kishemanitoon. Aaniihsh kiinawaa enentamek?” okii'-inaa'. Miitahsh kahkina kaa'ishi paahtaayaahkonaawaatc ini Ciisahsoon, e'⁠inaawaatc eh⁠kashkihtamaasonitc nipowin.

⁶⁵ Shikwa aanint okii'-maacii sasiihkwaanaawaan ini Ciisahsoon. Shikwahsh ekiih kipwaapahpinaawaatc, okiih pahpahkihte'waawaan. “Kiin okihkentamaa!” okii'-inaawaan. “Wiinsh awenen kaa⁠pahkihte'ohk!” okii'-inaawaan. Shikwa iki kaye kanawencikewi shimaakanihshak okiih pahpahsiinkwekanaamaawaan.

“Kaawiin ninkihkenimaahsii” ekii'-inaatc a'a Piitar ini Ciisahsoon

⁶⁶ Piitar (Peter) itahsh i'imaa niihsaya'ii kii'⁠ayaa akwaciink i'imaa kaashi wiimpihcikaatenik i'i waahkaa'ikan. Okii'-mayaashkaakoon itahsh peshik oshkiniikihkwen, miiwanini peshik otanohkii'aakanan a'a Maawac Kihcianami'ewikimaa.

⁶⁷ Miitahsh e'⁠waapamikotc e'⁠awansotc, okiih kanawaapamikoon: “Kaye kiin iitok kikii'-wiiciiwaa 'awe Ciisahs, 'awe Naasaritiiwinini (Nazarene),” okii'-ikoon ini oshkiniikihkwen.

⁶⁸ Miitahsh kaa'ishi aanwehtank a'a Piitar: “Aaniin ehkitoyan? Kaawiin ninkihkentansiin,” okii'-inaan. “Kaawiin kinihsitohtawihsinoon i'i kaa⁠ihkitoyan,” okii'-inaan ini oshkiniikihkwen. Miihsh eni ishi saaka'ank i'imaa nahsawaya'ii kaani onci saakitamok.

⁶⁹ Miitahsh i'imaa miinawaa kaa'ishi waapamikotc ono anohkii'aakanihkwen, shikwa miinawaa ekiih kanoonaanitc iniweniwa' i'imaa kaa⁠wiicikaapawiihtawaanitc: “Mii wa'a peshik kaa⁠wiiciiwaawaatc,” kii'‑ihkitowan.

⁷⁰ Miinawaa tahsh kii'⁠aanwehtam a'a Piitar. Naakeyihsh miinawaa okii'-ikoo' iniweniwa' kaa⁠wiicikaapawiihtaakotc: “Tepwe ohsha kiin peshik kitaaw! Kaalaliiwi ahkiink (Galilee) kekiin kitooncii!” okii'-ikoo'.

⁷¹ Miitahsh kaa'ishi mashkawikiishwetc a'a Piitar: “Maano kekoon Kishemanitoo ninka tootaak kiishpin tepwehsiwaan! Kaawiin ninkihkenimaahsii wa'a inini kaa⁠tashimek!” okii'-inaa'.

⁷² Miitahsh i'i shemaak kii'⁠noontaakosi miinawaa a'a naapepaahka'aahkwaan. Miitahsh kaa'ishi maamihkawihsetc Piitar i'i kakii'-ikohpan Ciisahsoon: “Cipwaa noontaakositc a'a naapepaahka'aahkwaan niishwaa (2), aasha nihswaa (3) ci⁠aanwehtaman ci⁠kihkenimiyan,” ekii'-ikotc. Miitahsh kaa'ishi moohkwentank kaa'ani ishi kihcimawitc.