Maarhk 13 - Ojibwe Kihcimasina'ikan

Eh⁠kiishaaciwiintank Ciisahs ci⁠piikopicikaatenik Coowak oKihcianami'ewikamikowaa

¹ Ahpii Ciisahs eni saaka'ank i'imaa Coowak oKihcianami'ewikamikowaank okiih kanoonikoon peshik okihkino'amawaakanan: “Okihkino'amaake, oko kiniin wenishihshiwaatc kihciahsiniik, kaye ono wenishihshinkin kihciwaahkaa'ikanan!” okii'-ikoon.

² Ciisahs itahsh okii'-inaan: “Kiwaapantaan ina ono kehci ishinaakwahkin waahkaa'ikanan? Kaawiin kanake awaac peshik ahsin ta/akwiihtawaapihkihshinsii. Kahkina ta⁠niihsiwepa'ikaniwiwak,” kii'‑ihkito.

E'⁠wiintamawaatc niikaanaya'ii keni ishihsekin kekoonan

³ Miitahsh ekii'ishi namatapitc Ciisahs i'imaa newatatink eh⁠pihkwatinaak Aalip (Olives) Kihtikaanaahtikohkaank kaa⁠ishinihkaatek, ekii'-inaahsamapiihtank Kihcianami'ewikamik eshi ayaanik. Okiih pinaasihkaakoo' itahsh Piitaran (Peter), Ciimisan (James), Cwaanan (John), Entaroon (Andrew), kiimooc ekii wiihkanoonikotc.

⁴ “Wiintamawihshinaam, aanahpii ono ke⁠ishihwepahkin? Wekonehsh ke⁠kihkinawaacihsek i'i ahpii waa⁠ocihcihsekin?” ekii'-ikotc.

⁵ Miitahsh okii'-maaciikihkino'amawaa' Ciisahs: “Ayaankwaamisik, keko awiya kika wayeshimikohsiiwaa.

⁶ Niipiwa' ihsa okapi aapacihtoonaawaa niwiinsowin i'iwe ci‑ihkitowaatc: ‘Niin a'a nintaaw.’ Niipiwa' awiya' oka wayeshimaawaa'.

⁷ Shikwa ahpii noontamek pehsho e'⁠matwemiikaatink, kemaa kaye mihcitipaatotek waahsa e'⁠miikaatink, keko mikoshkaatentankek. Aaniihsh kehcinaa'owentaakwanoon ci⁠ocihcihsekin. Kaawiin itahsh mahshi ta⁠ishkwaahsehsinoon o'o kaa⁠pimihsek ahki.

⁸ Ta⁠kihci miikaatiwak awiyak pepahkaan kaa⁠tahswewaanakisiwaatc kaye kaa⁠tahsinkin okimaawiwinan. Ayaanint ayaawinink ta⁠koshkwahkamikihse i'i ahki, shikwa ta⁠mantawiinaaniwan. Ono tahsh kepi ishiwepahkin taapishkoo inentaakwanoon emaacii wiihsakaahpinetc ihkwe ewii waapamaawahsotc.

⁹ “Kiinawaa tahsh ayaankwaami'itisok. Kika ishiwinikoom i'imaa entashi onahshowenk. Kaye kika tashi pahpahshanshe'okoom i'imaa Coowak otanami'ewikamikowaank. Shikwa 'iwe niin eh⁠tepwehtawiyek kikaonci ishiwinikoom i'imaa eshi ayaawaatc kihcionahshowewikimaak kaye kihciokimaak. Miitahsh i'i ci‑ishihseyek ci⁠wiintamawekwaa i'i minwaacimowin.

¹⁰ O'o tahsh minwaacimowin ahkawe ta⁠wiintamawaawak kahkina kaa⁠tahswewaanakisiwaat pemaatisiwaat.

¹¹ Ahpii tahsh tahkonikooyek kaye ishiwinikooyek i'imaa tipaahkonitiwinink, keko kiishaac naanaakatawentankek aaniin keishi nahkwehtamek. Wekoneniko ke⁠miinikoowisiyek i'i ahpii e'⁠ishihsek, mii'i ihkitok. Kaawiin kiinawaa kitihkitowiniwaa kika/⁠aapacihtoohsiim. Ini hsa wiin Kishemanitoo otAhcaahkwan okiikitowinini kika/⁠aapacihtoom.

¹² Ininiwak oka mamishimaawaa' ini wiicihkiweyiwaa' ci⁠nihsimintc. Iki kaye otetemaak oka tootawaawaa' oniicaanihsiwaa', shikwa iki apinoonciishak oka shiinkenimaawaa' oniiki'ikoowaa'. Oka ishihcike'aawaa' i'i ci⁠nihsimintc.

¹³ Kaye kiinawaa eh⁠tepwehtawiyek kikaonci shiinkenimikowaa kahkina awiya. A'a hsa wiin ke⁠shashiipentank piinihsh kahkina kekoon ci‑ishkwaahsenik, ta⁠pimaaci'aa.”

A'awe ke⁠kakwaanihsakentaakositc kaawii'-nihshiwanaatahkamikisitc ke⁠piyayaatc

¹⁴ “Kika waapamaawaa 'awe eh⁠kakwaanihsakentaakositc kaawii'-nihshiwanaatahkamikisitc. Ta⁠niipawi i'imaa kekii'ishi niipawihsikipan,” kii'‑ihkito. (Taka 'awe enamihtootc o'oweni kaa⁠ishipii'ikewak oka nihsitohtaan wekonen kaa'⁠itaminitc Ciisahsoon.) “Ahpii tahsh waapantamek,” kii'‑ihkito, “maano iki eyaawaatc Cootiiyaawi ahkiink (Judea) tayahpa'iwewak i'imaa eshi ayishpatinaanik.

¹⁵ Awiya tahsh ke⁠ayapitc eshi tahtakwaanik wakiciwaahkaa'ikan i'i ahpii, shemaak iko ta⁠kishiiniihsaantawe ci⁠maaciipa'iwetc. Kaawiin ahkawe ta⁠piintikehsii owaahkaa'ikanink ci⁠manipitootc kekoon ci⁠maaciitootc.

¹⁶ Shikwa awiya mekwaa e'⁠anohkiitc kihtikewinink i'i ahpii, keko ahkawe ta⁠kiiwehsii owaahkaa'ikanink ci⁠manipitootc opiinsihkawaakan.

¹⁷ Ta⁠ocaanimisiwak itahsh iki ke⁠kikishkawaawahsowaatc kaye ke⁠nooni'aawahsowaatc i'i ahpii keni ishiwepaninik!

¹⁸ Ishi anami'aak itahsh ekaa cini ishiwepahsinok mekwaa eh⁠pipoonk.

¹⁹ I'iwe ke⁠ahpiihci kakwaataki ishiwepahk, kaawiin wiihkaa kii'onci kihkentaakwahsinoon, ahpane kaakii'-oshihtootc Kishemanitoo i'i ahki, piinihsh kaye noonkom 'owe ahpii, kaawiin kaye miinawaa wiihkaa taishi kihkentaakwahsinoon.

²⁰ A'a tahsh wiin kaaTipenciketc tipinawe, okii'onci onentaan acina ehta ci‑ishikiishikaninik. Kiishpin o'owe kii'‑ishihsehsikipan, kaawiin awiya taakiih shaapwiihsii. I'i tahsh wiin otoonaapancikana' kaakii'onci onakimaatc tipinawe, okii'onci onentaan ekaa onsaam kinwesh ci‑ishikiishikahsininikin.

²¹ “Kiishpin awiya i'i ahpii ininek: ‘Inashke 'omaa ayaawan ini Kishemanitoo kaakii'-onenimaatc ci⁠pimaaci'iwenitc!’ Komaa kaye ihkitotc awiya: ‘Inashke ayaa weti!’ ihkitotc, keko tepwehtawaahkek.

²² Tepwe tapiyayaawak awiyak ‘Niin Kishemanitoo kaa⁠piicinisha'otc ci⁠pimaaci'iwewak,’ ke⁠inwaanitisowaatc. Komaa kaye ‘Niin kaa⁠kanootamawak Kishemanitoo,’ ta⁠itisowak, ci⁠wayeshinkewaatc itahsh. Ta⁠waapanta'iwewak kihkinawaacihcikewinan kaye maamahkaacihcikewinan keonci wayeshinkewaatc. Ampooshke Kishemanitoon otoonaapancikanini okawii'-wayeshimaawaa' kiishpin cikiih kashki'aawaatc.

²³ Kiinawaa tahsh ahshwiik! Aasha kahkina kekoon kikii'-niikaanaacimohtawininim keni ishiwepahk.”

E'wiintank Ciisahs keshi ayaanik otakohshinowin

²⁴ “I'i tahsh ahpii naake, kii'‑ishkwaa ocaanimisink, tani kashkiitipihkihse kiisihs, kaye 'awe tipihkikiisihs kaawiin ta⁠saakaahsikehsii.

²⁵ Iki tahsh wanankohshak ta⁠matwe pankihshinook i'imaa onci kiishikonk. Shikwa ini kekoonan kaa⁠soonkentaakwahkin kiishikonk kaayayaakin, ta⁠washkihsewan i'imaa onci eshi kishipaashkaamakahkin.

²⁶ Shikwa mii'i ahpii ci⁠payahtenaakosiyaan niin Inini oKosihsan, ci⁠piyayaayaan i'imaa wahkwiihkaank. Kihcimashkawisiiwin kaye waahsesiwin ninkapi kikinaakos.

²⁷ Miitahsh i'i ahpii ninkapi ishinisha'waak nintencalimak, ninkaishi maawantoonaak iki pemaatisiwaatc kaakii'-onaapamakwaa, misiwe ko ci⁠ontinintwaa kaa⁠ontaanimaninik eshi misiwehkamikaanik.”

I'iwe eshi kihkinawaasinaakositc 'awe kihcishoominaahtik

²⁸ “Taka kakwekihkentamohk e'ishi kihkinawaasinaakositc a'a kihcishominaahtik pik (fig) kaa⁠tinwaahtikowitc, e'⁠ishihciketc. Kikihkentaanaawaa ahpii e'⁠noohkatihkwanakisitc eh⁠saakipakaak, aasha pehsho ewii niipink.

²⁹ Miihsako taapishkoo, ani ishi waapantamek ono keni ishiwepahkin, kikaonci kihkentaanaawaa aasha eh⁠pehshwentaakwahk ci⁠ocihcihsek.

³⁰ Tepwe kiwiintamawininim: kahkina ono kekoonan tani ishiwepanoon cipwaa nipowaatc oko noonkom kaa⁠pimaatisiwaatc.

³¹ Kiishik miina ahki kahkina ta/ankwanoon, inihsh wiin niin nintihkitowinan kaawiin ta⁠ishkwaahsehsinoonan, pishihshik ta⁠tepwewiniwanoon.”

Kaawiin awiya okihkentansiin aanahpii ke⁠pitakohshininitc Kishemanitoo oKosihsan

³² “Shikwa kaawiin awiya okihkentansiin i'i ahpii eh⁠kiishikaninik ke⁠ishihwepaninik, kaye ke⁠tahsotipa'ikaneyaanik. Ampooshke encalak kihcikiishikonk eyaawaatc kaawiin okihkentansiinaawaa, kaye niin oKosihsimaa kaawiin ninkihkentansiin. NinTete, mii ehta 'awe kehkentank.

³³ Ayaankwaamisik, ahshawaapik. Kaawiin aaniihsh kikihkentansiim aanahpii ke⁠ocihcihsek.

³⁴ Taapishkoo ta⁠ishinaakwan a'a peshik inini waahsa kaa⁠ishaatc, kaa⁠nakatank otaawin, eh⁠kanawenta'aatc otanohkii'aakana' entahsopeshik ci‑inanohkiinitc, e'⁠inaatc ini kaa⁠kanawentaminitc ishkwaantem ci⁠ahshawaapinitc.

³⁵ Kekiinawaa tahsh ahshawaapik. Niin taapishkoo nintinentaakos a'a inini kaa⁠tipentank waahkaa'ikan. Kaawiin kikihkenimihsiim aanahpii ke⁠takwihshinaan, komaa ani onaakohshik, komaa aapihtaa tipihkahk, komaa kaye ani piitaapank, komaa kaye wiipa kikishep.

³⁶ Ahshawaapik, sesakooc takohshinaan ekaa ci⁠mekwaanipaahsiwek ahpii pi otihsinakook.

³⁷ O'o tahsh kaa⁠ininakook, mii'i kahkina awiya enak: Ahshawaapik!” kii'‑ihkito Ciisahs.