Maarhk 12 - Ojibwe Kihcimasina'ikan

Ekii'-aawehcikaaketc Ciisahs iniwe kaa⁠tipentaminitc shoominikihtikewin

¹ Miitahsh okii'-maaciikanoonaa' Ciisahs e'⁠aawehciketc. O'o kii'‑ihkito: “Aapitink peshik inini okiih kihtikaanaa' shoominaahtikoo'. Shikwa okii'-waahkaamenikanihkantaan okihtikewin. Shikwa tahsh kii'⁠waanaapihka'ike keshi siinipiikishkawintwaa shoominak e'⁠minwahtihsowaatc. Shikwa tahsh okii'-oshihtoon otahshawaapiiwikamik. Miitahsh okii'-aawi'aa' kihtikewininiwa' i'i kihtikewin ci⁠kanawentamaakotc, shikwa paanimaa ci⁠pahkwenamaakotc ke⁠ontisinitc kihtikewinink. Miitahsh pahkaan ahkiink e'⁠ishaatc waahsa.

² Ahpii tahsh wecihcihsek ci⁠mawinswaanintwaa shoominak e'⁠mekwaatihsowaatc, okii'-ishinisha'waan ini peshik otanohkii'aakanan ci⁠pahkwenamaakotc kihtikewininiwa' otoontisiwinini, minihk wentinaminitc i'imaa e'⁠ataawaakenitc i'i shoomina'.

³ Iki tahsh kihtikewininiwak okii'-otihtinaawaan ini anohkii'aakanan ekiih pahpahkihte'waawaatc. Miitahsh pishihshikwaya'ii kaa'ishi kiiwenisha'waawaatc ekaa kekoon ekii'-miinaahsikwaa.

⁴ Miitahsh miinawaa peshik okii'-anoonaan anohkii'aakanan a'a inini kaa⁠tipentank kihtikewin. Iki tahsh kihtikewininiwak okiih kihci pahpahkihteyaahkohtikwaane'waawaan kaye eh⁠kihci akaciwinaakwaninik okiih tootawaawaan ini anohkii'aakanan.

⁵ Shikwa miinawaa peshik okii'-ishinisha'waan a'a inini. Miitahsh kaa'⁠ishinihsikonitc kihtikewininiwa'. Niipiwa' keyaapi okii'-anoonaa' anohkii'aakana' 'awe kaa⁠tipentank. Aanint itahsh okiih pahpahkihte'okoni, aanint kaye okii'-nihsikoni i'i kihtikewininiwa'.

⁶ Piinihsh itahsh peshik ehta awiyan okii'-ayaawaan, miiwanini kaakiih saaki'aatc okosihsan a'a inini. Miiwan itahsh ini kekahpii okii'-ishinisha'waan, ‘Kehcinaac oka kihci inenimaawaan ninkosihsan,’ e'⁠ihkitotc.

⁷ Miitahsh aanciko kii'‑ihkitowak kihtikewininiwak: ‘Miiwan ohsha ono okosihsan a'a kaa⁠tipentank 'owe kihtikewin! Taka nihsimaataanin, ci⁠tepipitaawank kaawiih tipinawewisinihpan,’ kii'‑ihkitowak.

⁸ Miitahsh tepwe kaa'ishi kaahcitinaawaatc ini kaa⁠tipentank okosihsan, ekii'-nihsaawaatc, weti ohpimekihtikewin ekii'-ahpakitoowaatc i'i miiyaw.

⁹ “Aaniin itahsh kiinawaa enentamek ke⁠ishihcikehpan a'a kaa⁠tipentank kihtikewin? Tapi takwihshin hsa ci⁠pinihsaatc i'i kihtikewininiwa', shikwa oka/⁠aawi'aa' pahkaan awiya' i'i shoominikihtikewin ci⁠kanawentamaakotc.

¹⁰ Kehcinaac kikii'-anamihtoom o'owe eshipii'ikaatenik Kishemanitoo otihkitowin: ‘Iki kaa⁠waahkaa'ikewaatc anihshaa okii'-wepinaawaan ini peshik kaa⁠onishihshinitc ahsiniin, miiwanini mayaa kaa⁠/aapaci'aatc kaaTipenciketc ci⁠kiishihcikaatek i'i waahkaa'ikan.

¹¹ Mii'owe kaa⁠maamahkaaci ishihciketc a'a kaaTipenciketc,’ ihkitoomakan,” kii'‑ihkito Ciisahs.

¹² Ikiweniwak itahsh kaa⁠niikaanakinsowaatc Coowak otaanawiih tahkonaawaapaniin Ciisahsoon. Okiih kihkenimaawaan aaniihsh e'⁠aawehcikenitc wiinawaa eh⁠tashimikowaatc. Onsaam itahsh okiih kohsaawaa' i'i kaa⁠maamawenonitc. Miitahsh kaani ishinakanaawaatc ekii'ani maacaawaatc.

Otaanakiih kakwekashki'aawaan Ciisahsoon ci⁠wanikiishwenitc tipa'ikewishooniyaan ci⁠tashimaanitc

¹³ Miitahsh kii'⁠anoonaawak iki aanint Perahsiiwininiwak (Pharisees), i'i kaye Herat (Herod) owiiciiwaakana' kekoon ci⁠kakakwecimaawaatc Ciisahsoon ewiionci kaahcitinaawaatc.

¹⁴ Ahpii tahsh wetihsaawaatc okii'-inaawaan: “Okihkino'amaake, ninkihkentaamin e'⁠nihtaatepweyan kaye ekaa wiihkaa awiya eh⁠papaapisiskenimaahsiwatc aaniin ke⁠inenimihk. Taapishkoo kahkina awiya kitishi kanoonaa. Kaawiin aaniihsh kipapaapisiskentamowaahsiin awiya wakicaya'ii eshi ayaatc. Kwayahk itahsh kikihkino'amaake Kishemanitoo kaashi antawenimaatc awiyan ci‑inaatisinitc. Wiintamawihshinaam itahsh: Inahte na ci⁠tipa'amawank taakihs shooniyaan a'awe Maawac iko Kihciokimaa, kemaa kaawiin?

¹⁵ Kika tipa'amawaanaan ina, kemaa kaawiin?” okii'-inaawaan. Ciisahs itahsh eh⁠kihkenimaatc eh⁠kakwewayeshimikotc, okii'-inaa': “Aaniihsh wenci koci'iyek? Taka piitamawihshik peshik waapaapihko shooniyaanhs ci⁠waapamak,” okii'-inaa'.

¹⁶ Okiih piitamaakoo' itahsh. Miitahsh kaa'⁠inaatc: “Awenehsh wa'a kaa⁠masinihsininik ohtikwaan, awenehsh kaye 'owe owiinsowin?” okii'-inaa'. Miitahsh kaa'ishi nahkwehtaakotc: “Maawac iko Kihciokimaa 'awe,” okii'-ikoo'.

¹⁷ Miitahsh kaa'⁠inaatc: “Kitaa miinaawaa ohsha a'awe Maawac iko Kihciokimaa kaa⁠tipinawewisitc, kaye 'awe Kishemanitoo kitaa miinaawaa i'i wiin kaa⁠tipinawewisitc,” okii'-inaa'. Okii'-maamahkaasihtaakoo' itahsh.

Ekiih kakwecimintc aaniin keshi ayaakipan kiih⁠kiiwepimaatisink

¹⁸ Okiihpi otihsaawaan itahsh iki Saacahsiiwininiwak (Sadducees). Miiwak ikiweniwak kaa⁠ihkitowaatc ekaa awiya ci⁠kiiwepimaatisii'intc kii ishkwaanipotc. Miitahsh eh⁠kakwecimaawaatc Ciisahsoon:

¹⁹ “Okihkino'amaake, kikii'-oshipii'amaakonaan o'owe onahshowewin a'a Moosihs (Moses): awiya niponitc wiicihkiweyan, ekaa kaa'⁠onicaanihsihsinik, ci⁠otaahpinamawaatc ini owiitikemaakanini kaye ci⁠oniicaanihsitc, ci⁠nihtaawikihtamawaatc ini wiicihkiweyipaniin.

²⁰ Aapitink itahsh kii'⁠niishwaahciwak (7) e'⁠owiicihkiweyintiwaatc. Shikwa kii'⁠wiitike a'a kaa⁠sasiihkisitc. Miitahsh kaa'ishi noontenipotc ekii'-oniicaanihsihsik.

²¹ Miitahsh miinawaa 'a kotak i'imaa kaakii'ani onci ohshiimenshimaawitc kaa'ishi wiitikemaatc ini ihkwewan. Miitahsh kewiin peshikwan kaa'ishi nipotc. Kaawiin kewiin kii'⁠oniicaanihsihsii. Miitahsh miinawaa peshikwan kaa'⁠ishiwepisitc a'a ehkonihsiwaatc.

²² Miitahsh piinihsh iki kaa⁠niishwaahciwaatc kaakii'-wiitikemaawaatc kiih⁠caakinipowak, kaawiin kii'⁠oniicaanihsihsiiwak. Miitahsh kekahpii kaa'ishi nipotc kewiin a'a ihkwe ishkwaac.

²³ Awenen itahsh ke⁠owiitikemaakanihpan ini ihkwewan paanimaa pi kiiwepimaatisiiwikiishikahk?” kii'ishi kakwetwewak iki Saacahsiiwininiwak.

²⁴ Ciisahs itahsh okii'-nahkwehtawaa': “Mii ohsha 'iwe wenci wanikiishweyek, ekaa eh⁠kihkentansiwek Kishemanitoo otihkitowin, kaye eshi kashki'ewisitc Kishemanitoo.

²⁵ Ahpii tahsh kiiwepimaatisink, kaawiin awiya inini ta⁠wiitikehsii, kaawiin kaye ihkwe ta⁠wiitikemaahsii. Taapishkoo ta⁠ishipimaatisiwak encala' kihcikiishikonk eyaanitc e'⁠wiitikentihsinik.

²⁶ Shikwa tahsh 'iwe kaa⁠nipowaatc ci⁠kiiwepimaatisi'intwaa, kehcinaac kikii'-anamihtoom i'i masina'ikan Moosihs kaakii'-oshipii'ank, i'imaa entashintenik i'i pihkohkohpaanhs ekiih sahkitenik ekii'-ankwaahkitehsininik, kaakii'ishi kaanoonikotc Kishemanitoon: ‘Niin oManitooman Eparahaam (Abraham), shikwa oManitooman Aaisik (Isaac), shikwa oManitooman Cekap (Jacob),’ mii'i kaa'⁠ikokopanen Moosihs ini Kishemanitoon.

²⁷ Mii'owe ehkitonk, oko kaa⁠oKishemanitoomiwaatc, mihsawaa aana inintwaa e'⁠nipowaatc, keyaapi ohsha pimaatisiwak. Wawiinke kiwanikihkino'amaakem e'⁠ihkitoyek ekaa kiiwepimaatisiwin e'⁠ayaamakahsinok,” okii'-inaa' Ciisahs i'i Saacahsiiwininiwa'.

Ekii'-wiintank i'iwe kaa⁠niikaanentaakwaninik onahshowewin

²⁸ Peshik itahsh inini kaa⁠kihkino'amaaketc Onahshowewin okii'-naasihtawaa' eh⁠kakanoonitinitc. Shikwa okii'-nihsitohtawaan e'⁠onishihshininik eshi nahkwehtaminitc wiin Ciisahsoon. Miitahsh i'i opikakwecimaan: “Wekonen naakaanentaakwahk onahshowewin?” okii'-inaan.

²⁹ Miitahsh eshi nahkwehtank Ciisahs: “O'o hsa naakaanentaakwahk onahshowewin: ‘Pisintamohk kiinawaa Isriyal (Israel) ininiwak! Peshik ehta ayaa kaaTipenciketc. Mii'awe Kishemanitoo kaa⁠Tipeniminank.

³⁰ Misiwe tahsh kite'iwaank kika saaki'aawaa 'awe kaaTipenciketc kiKishemanitoomiwaa. Kika saaki'aawaa minihk ke⁠pimaatisiyek. Shikwa kahkina kekoon eshi naakatawentamek, kaye kahkina kekoon eshihcikeyek minihk keshi kashkihtooyek, kika saaki'aawaa kaaTipenciketc.’

³¹ O'o miinawaa peshik kehci inentaakwahk onahshowewin: ‘Kika saaki'aawaak kiicipimaatisiiwaak, aaniin ehpiihci saaki'itisoyek, mii'i ci⁠ahpiihci saaki'ekwaa,’ ihkitoomakan. Kaawiin awahshime ahpiihtentaakwahsinoon onahshowewin ahpiihc wiin ono,” okii'-inaan.

³² Miitahsh e'⁠ikotc ini ininiwan kaa⁠kihkino'amaakenitc Onahshowewin: “Okihkino'amaake, kwayahk kitihkit. Tepwe peshik ehta ayaa Kishemanitoo, kaawiin pahkaan awiya ayaahsii.

³³ Kaye kika saaki'aanaan Kishemanitoo eni kohkote'eyank kaye kahkina kekoon eshi naakatawentamank, kaye minihk eshi kashkihtooyank. Kaye kika saaki'aanaan a'a kiicipimaatisiinaan taapishkoo eshi saaki'itisoyank. Awahshime kihci inentaakwan ishihcikeyank ono niishin onahshowewinan, ahpiihc wiin kahkina piinankwa awahkaanak ci⁠caakisontwaa eh⁠pakitinikaakaaniwiwaatc, kaye ahpiihc wiin pahkaan kekoonan pakitinikewinan aana miinank Kishemanitoo,” kii'‑ihkito 'awe inini.

³⁴ Ciisahs itahsh e'⁠waapantamawaatc weweni e'⁠nahkwehtaminitc, otinaan: “Aasha kekaa ci⁠otookimaamiyan Kishemanitoo,” okii'-inaan. Miitahsh kaawiin awaac kii'‑inamanci'ohsiiwak awiyak keyaapi ci⁠kakwecimaawaatc Ciisahsoon kekoon.

Aanti wentahkaanesinitc Kishemanitoo kaa⁠onaapamaatc ci⁠pimaaci'iwenitc

³⁵ Paanimaa tahsh eh⁠kihkino'amaaketc Ciisahs i'imaa Kihcianami'ewikamikonk, o'owe kii'ani ihkito: “Iki kaa⁠kihkino'amaakewaatc Onahshowewin o'owe ihkitowak: ‘A'awe Kishemanitoon kaa⁠onaapamikotc ci⁠pimaaci'iwetc, i'imaa Tepitink (David) ta⁠ontahkaanesi.’ Aaniin tahsh wenci ihkitowaatc o'o?

³⁶ Wiin Tepit kaakiih kihci'okimaawikopanen, ekiih kanootamawaatc Kishemanitoon, kii'‑ihkitoopan o'owe: ‘KaaTipenciketc okii'-inaan ini kaa⁠Tipeniminitc: “I'imaa ishi namatapin ninkihcinihkink inahke, piciinak kika ishi'in wiinke ci⁠shaakooci'atwaa ci⁠tahkohkaanatwaa iki kaa⁠nishkenimihkwaa,” ’ mii'i kaa'⁠ihkitokopanen.

³⁷ Wiin Tepit eh⁠tashimaatc ini Kishemanitoon kaakii'-onaapamaanitc, ‘Mii'awe kaa⁠Tipenimitc,’ otinaan. Kaawiin tahsh awiya opiiwesiiman eh⁠tashimaatc, ‘Nintipenimik’ otaa inaahsiin,” kii'‑ihkito Ciisahs. Iki tahsh kaa⁠maamawenowaatc okii'-minohtawaawaan ini Ciisahsoon.

Ekiih tashimaatc Ciisahs enaatisinitc iniweniwa' kaa⁠kihkino'amaakenitc onahshowewin

³⁸ Shikwa tahsh ekii'ani kihkino'amaaketc o'o kii'‑ihkito: “Ahshowinihkook iki kaa⁠kihkino'amaakewaatc Onahshowewin, iki kaa⁠minwentamowaatc ci⁠kakaanwaapiika'ashewaatc, kaye eh⁠kihcipooshoo'intwaa entashi ataawenk.

³⁹ Ahpii tahsh kaye eshaawaatc i'imaa anami'ewikamikonk, okakwe wiitapimaawaa' i'i kaa⁠niikaanakinsonitc. I'imaahsh kaye kaa⁠tashi wiihkwantiwintc maawac wiihkakwe niikaanapiwak.

⁴⁰ Shikwa owayeshimaa' i'i kaakiiwaatisinitc ihkwewa' cikii'-mahkamaawaatc kahkina ataaya'iimini. Miitahsh i'i kakaanwesh enikohk kaaonci anami'aawaatc oko kaa⁠kihkino'amaakewaatc onahshowewin, eh⁠kwayahkohcikehkaasowaatc. Wiinke tahsh awahshime ta⁠kihci tipaahkonikaniwiwak,” kii'‑ihkito Ciisahs.

Peshik okiiwaatisiihkwe ekiih pakitiniketc

⁴¹ Ciisahs itahsh kii'⁠onapi i'imaa ishitipishkoo eshi ahtenik i'i eshi pakitinikenk Kihcianami'ewikamikonk. Okii'-waapamaa' itahsh i'i pemaatisinitc eh⁠pakitinaanitc shooniyaan. Iki tahsh kaakii'-wenootisiwaatc niipiwa' kiih⁠pakitinikewak.

⁴² Kiihpi/ayaa tahsh peshik okiiwaatisiihkwe ekiih kitimaakisitc, ehpi pakitiniketc niishin osaawaapihkoonhsa', maakishaa peshik piiwaapihkoonhs e'⁠inakinsonitc.

⁴³ Miitahsh kaa'ishi antomaatc Ciisahs okihkino'amawaakana' e'⁠inaatc: “Ina wa'aweti! Tepwe kekoon kiwiintamawininim. Wa'aweti okiiwaatisiihkwe eh⁠kitimaakisitc, nawac kihtakinteni 'owe wiin kaakiih pakitiniketc, ahpiihc iki minihk kaa⁠pakitinikewaatc.

⁴⁴ Ikihsh wiin kahkina kiih⁠pakitinikewak eh⁠kihci inashkina'aawaatc oshooniyaamiwaan. A'ahsh wiin okiiwaatisiihkwe, aana kitimaakisitc okii'ishi pakitinaan kahkina, ampooshke ko kekii'onci pimaatisihpan,” kii'‑ihkito.