Maarhk 10 - Ojibwe Kihcimasina'ikan

Ekiih tashintank Ciisahs i'iwe wepinitiwin

¹ Kii'ani onci maacaa tahsh i'imaa ayaawinink. Weti kii'‑ishaa Cootiiyaawi ahkiink (Judea) inahke, shikwa kii'⁠aashawishkaa Cwaartanawi siipiink (Jordan). Miinawaa okiih pinaasihkaakoo' i'i kaa⁠pimaamawenonitc. Shikwa tahsh i'iwe kaakii'-nihtaa ishihciketc, okii'ani ishikihkino'amawaa'.

² Aanint tahsh okiihpi kakwewanikiishwe'ikoo' i'i Perahsiiwininiwa' (Pharisees), ekiih kakwecimikotc: “Inaahkonaa na inini ci⁠wepinaatc owiitikemaakanan?” okii'-ikoo'.

³ Ciisahs itahsh okii'-nahkwehtawaa': “Aaniin kaakii'-inaahkoninek Moosihs (Moses)?” okii'-inaa'.

⁴ O'owe tahsh kii'‑ihkitowa': “Moosihs okiih pakitinaan ininiwan ci⁠oshipii'aminitc i'i wepiniwewimasina'ikan, shikwa ci⁠pahkenisha'waanitc ini owiitikemaakanini,” okii'-ikoo'.

⁵ Ciisahs itahsh okii'-inaa': “Kikii'onci inaahkonikowaa Moosihs o'o kishashiipihtamowiniwaa onci.

⁶ Ahpii tahsh kaa'⁠oshihtootc kahkina kekoon Kishemanitoo, kii'‑ihkitom o'owe: ‘Okii'-oshi'aa' ci⁠naapeya'aawinitc kaye ci⁠noosheya'aawinitc.’

⁷ Shikwa kii'‑ihkitom: ‘Mii 'owe keonci nakanaatc inini oteten kaye omaamaan, ci⁠nehpici wiiciyayaamaatc ini owiitikemaakanan,

⁸ miitahsh noonkom ci⁠peshikwentaakwaninik opimaatisiwiniwaa,’ kii'‑ihkitom. Mii'i kaawiin keyaapi niishwentaakosihsiiwak a'a inini kaye owiitikemaakanan. Noonkom itahsh peshikwentaakosiwak.

⁹ Mii'i awiya keonci pahkewinaahsik ini owiitikemaakanan, aasha Kishemanitoo ekiih peshiko'aatc ininiwan kaye owiitikemaakanini,” kii'‑ihkito Ciisahs.

¹⁰ Miinawaa piintik e'⁠ayaawaatc okiih kakwecimikoo' okihkino'amawaakana' i'iwe wepinitiwin.

¹¹ Miitahsh o'o okii'-inaa': “Awiya owiitikemaakanan wepinaatc, miinawaahsh peshik otaahpinaatc ihkwewan, omacitootawaan ini nihtam kaakii'-wiitikemaatc.

¹² Komaa kiishpin ihkwe wepinaatc onaapeman, shikwa peshik miinawaa wiitikemaatc ininiwan, macitootam kaye wiin a'a ihkwe,” kii'‑ihkito.

Kishemanitoo kika shawenimik kii'‑inaatc i'i apinoonciisha'

¹³ Mii 'o ahpiihsh aanint awiyak okiih paapiitamawaawaan apinoonciisha' Ciisahsoon ci⁠saahsaaminaanitc. Iki tahsh kihkino'amawaakanak okii'-onci'aawaa' kaakiih piinaanitc apinoonciisha'.

¹⁴ Ciisahs itahsh ekii'-waapantank kii'⁠nishkaatentam. Okiih kanoonaa' itahsh okihkino'amawaakana': “Maano kika pakitinaawaak iki apinoonciishak ci⁠pinaasihkawiwaatc. Keko kipihtinaahkekwaanik. Ikiweniwak aaniihsh apinoonciishink enentaakosiwaatc, miiwak iki mayaa kaa⁠okimaahkantaakowaatc Kishemanitoon.

¹⁵ Tepwe kitinininim: Awiya wii'ishi otaahpinaahsik Kishemanitoon ci⁠okimaahkantaakotc taapishkoo apinoonciish e'ishi otaahpinaatc, kaawiin wiihkaa oka otihtansiin awiya i'imaa entashi okimaawinitc ini Kishemanitoon,” kii'‑ihkito.

¹⁶ Miitahsh pepeshik okiih tahkonaa' i'i apinoonciisha' eh⁠saaminaatc, “Kishemanitoo kashawenimik ci⁠minohseyan,” ekii'-inaatc.

Owenootisii eh⁠kakwecimaatc pimaatisiwin ini Ciisahsoon

¹⁷ Miinawaa ekii'-ayaancimaacaatc Ciisahs, peshik okiih pinaacipahtwaanikoon, ekiihpi ociciinkwanapiihtaakotc ini ininiwan, eh⁠kakwecimikotc: “Kiin menwaatisiyan okihkino'amaake!” e'⁠ikotc. “Aaniin ke⁠ishihcikeyaan ci⁠otihsikoyaan pimaatisiwin ke⁠pooni ayaahsinok?” okii'-ikoon.

¹⁸ Ciisahs itahsh okii'-inaan: “Aaniin wenci ishiyan ominwaatisii? Kaawiin ohsha awiya minwaatisihsii, mii ehta 'awe Kishemanitoo kaa⁠minwaatisitc.

¹⁹ Kikihkentaanan ono onahshowewinan: ‘Keko nihshiwehken, keko pimentamawaahken pahkaan awiya owiitikemaakanan, keko kimootihken, keko kiiwanimohken ci⁠anaamimatc awiya tipaahkonitiwinink, keko wayeshihtaakosihken, kika kihci inenimaa kitete kaye kimaamaa,’ ” okii'-inaan.

²⁰ Miitahsh kaa'⁠ikotc: “Okihkino'amaake, ono kahkina ninkiihpi onci naakacihtoonan ahpane pemi onci oshkiniikiiwiyaan,” okii'-ikoon.

²¹ Ciisahs okiih saaki'aan eh⁠kanawaapamaatc, e'⁠inaatc: “Peshik kekoon kinoontehse,” okii'-inaan. “Awi ataawaaken kahkina kaa⁠tipentaman. I'iwe tahsh kitoontisiwin kahkina miish iki ketimaakisiwaatc, weti kika ayaan wenootisiwin kihcikiishikonk. Miitahsh pipiminisha'ohshin ci⁠kihkino'amawinaan,” okii'-inaan Ciisahs ini ininiwan.

²² Miitahsh e'⁠noontank, kaa'⁠ishiniihsentamohsetc a'a inini. Miitahsh kii'⁠maacaa, ekii'onci kihcikashkentank. Aaniihsh kiih⁠kihciwenootisi.

²³ Ciisahs itahsh okiih kanawaapamaa' i'i kaa⁠waahkaanikaapawinitc. Okiih kanoonaa' itahsh i'i okihkino'amawaakana': “Mii'i ehpiihci sanakaninik iki kaa⁠kihciwenootisiwaatc ci⁠otihtamowaatc entashi okimaawinitc Kishemanitoon,” okii'-inaa'.

²⁴ Okii'-maamahkaasihtaakoo' itahsh okihkino'amawaakana'. Ciisahs itahsh kii'ani ihkito: “Siyaaki'inakook, wiinke ahpiihci sanakanini awiya ci⁠okimaahkantaakotc Kishemanitoon!

²⁵ Inashke otaapwaanawihtoon pihkwaawikanewimihtatim aana kakwe tepa'oosotc eshi pakoneyaanoweyaanik shaaponikan. Nawac itahsh awahshime oka pwaanawihtoon kaa⁠wenootisitc awiya ci⁠okimaahkantaakotc Kishemanitoon,” kii'‑ihkito.

²⁶ Miitahsh kaa'‑ahpiihcimaamahkaatentamowaatc iki kihkino'amawaakanak, ekiih kakwecintiwaatc: “Miitahsh ci⁠kashkihtoohsikipan awiya ci⁠pimaaci'intc!” kii'‑ihkitowak.

²⁷ Miihsh i'i kaa'ishi kanawaapamaatc a'a Ciisahs e'⁠inaatc: “Awiya hsa ko opwaanawihtoon. A'ahsh wiin Kishemanitoo kaawiin opwaanawihtoohsiin. Kishemanitoo kahkina kekoon okashkihtoon,” kii'‑ihkito.

²⁸ Piitar (Peter) itahsh okii'onci kanoonaan Ciisahsoon: “Inashke kahkina kekoon ninkii'-nakataamin ekiihpi wiiciiwikooyan,” okii'-inaan.

²⁹ “Tepwe,” kii'‑ihkito 'awe Ciisahs. “O'owe tahsh kiwiintamawininim: awenen iko kaa⁠nakatank otayaawin, komaa kaye nakanaatc wiicihkiweya', otawemaa', omaamaan, oteten, oniicaanihsa', komaa kaye okihtikewinan, niin kaye minwaacimowin e'onci ishihciketc,

³⁰ wa'a tino ta⁠kihcitipa'amawaa noonkom mekwaa pimaatisitc. Ta⁠miinaa inkotwaahk awahshime ayaawinan, wiicihkiweya', otawemaa', omaamaa', oniicaanihsa', kihtikewinan. Tako kaye ta⁠shiinkenimaa ci⁠onciihkikaniwitc i'iwe eh⁠piminisha'otc. Shikwa paanimaa weti niikaanaya'ii keni ishihsek ta⁠miinaa pishihshik ci⁠pimaatisitc.

³¹ Niipiwa' itahsh iki noonkom kaa⁠kihci inentaakosiwaatc ta‑akaahsentaakosiwak, kaye oko noonkom kaa‑akaahsentaakosiwaatc, mii ahpii weti ta⁠kihci inentaakosiwak,” kii'‑ihkito Ciisahs.

Misiwe kahkina ekiih caakiwiintank aaniin waah tootawintc Ciisahs waa'ishi⁠nihsintc

³² Kii'ani ishaawak weti miihkanaank kaa⁠inamoninik Ceroosalamiiwi ootenaank (Jerusalem), Ciisahs itahsh ekii'-niikaanohsetc. Kii'onci mikoshkaatentamook itahsh iki kihkino'amawaakanak. Iki tahsh kotakiyak otaanaank kaa⁠pimohsewaatc kiih⁠kohtaaciwak. Miitahsh miinawaa ohpimeya'ii ekii'-ishiwinaatc Ciisahs i'i mitaahshiniishin okihkino'amawaakana', okii'-maaciiwiintamawaa' aaniin ke⁠ishihcike'intc ekii'-inaatc:

³³ “Inashke noonkom iko kitani ishaamin weti Ceroosalamink. Niin Inini oKosihsan ninka ishihcike'ikoo ci⁠tahkoniwaatc iki Kihcianami'ewikimaak kaye iki kaa⁠kihkino'amaakewaatc onahshowewin. Ninka inaahkonikook itahsh ci⁠nihsikooyaan. Kaye ta anoohkiiwak ci⁠tahkonimitc i'i Coowak kaa⁠piiwiteyenimaawaatc.

³⁴ Miitahsh ikiweniwak ninka nihshipaahpinotaakook kaye ninka sasiihkwaanikook, shikwa ninka pahshanshe'okook, shikwa ninka nihsikook. Paanimaa tahsh kii⁠nihsokiishikwakaak ninka kiiwepimaatis,” okii'-inaa'.

Niikaanakinsowin ekiih kakwetwewaatc Ciimis, Cwaan, ci⁠miinintwaa

³⁵ Miitahsh pehsho okiihpi kanoonikoo' Ciimisan (James) kaye Cwaanan (John), Sepatii okosihsa'. “Okihkino'amaake,” okii'-ikoo'. “Ninantawentaamin wekonen iko ke⁠kakwecimikooyan ci‑ishihcike'iyaank,” ihkitowa'.

³⁶ Miitahsh kaa'⁠inaatc a'a Ciisahs: “Aaniin eshi antawentamek ci‑ishihcike'inakook?” otinaa'.

³⁷ Miitahsh okii'-ikoo': “Taka keniinawint ci⁠ayokimaawapiyaank, peshik kikihcinihkink inahke, peshik kaye kinamantinihkink, ahpii kii⁠ahpiihci okimaawiyan,” okii'-ikoo'.

³⁸ Okii'-nahkwehtawaa' itahsh a'a Ciisahs: “Kaawiin kikihkentansiim wekonen kekwecimiweyek. Kitaa kashkihtoom inahsh i'imaa waa'onci minihkweyaan kekiinawaa cionci minihkweyek i'i kaawiih sakaakamik? Kitaa kashkihtoom ina ci‑ishi siika'antaakooyek niin waa'ishi siika'antaakooyaan?” kii'‑ihkito, mii 'owe ekii'-itank: “Kitaa kashkihtoom ina kekiinawaa ci⁠kakwaataki'ikooyek keniin taapishkoo keshi kakwaataki'ikooyaan?”

³⁹ Kii'⁠nahkwehtamook itahsh Ciimis, Cwaan: “Eha', ninka kashkihtoomin.” Ciisahs itahsh okii'-inaa': “Tepwe hsa kikaonci minihkwem kaawiih sakaakamik i'imaa minihkwaakanink kaawii'onci minihkweyaan, kekiinawaa kikaishi siika'antaakoom keniin kaawii'ishi siika'antaakooyaan.

⁴⁰ Niin itahsh kaawiin awiya nintoonaapamaahsii ke⁠namatapitc i'imaa ninkihcinihkink inahke, ninamantinihkink kaye. Iki hsa ehta kaakii'-ahtwaakanihkawintwaa, ta⁠namatapiwak,” okii'-inaa'.

⁴¹ Iki tahsh mitaahso kotak kihkino'amawaakanak, ekii'-noontamowaatc okii'-nishkaatenimaawaa' Ciimisan kaye Cwaanan.

⁴² Ciisahs itahsh maamaw okii'-antomaa' kahkina okihkino'amawaakana', ekii'-inaatc: “Kikihkenimaawaak iki mincikahkina pahkaan kaa⁠tahswewaanakisiwaatc ahkiink, aaniin eshi okimaahkantaatiwaatc. Osanakisiihkantaakoo' iniweniwa' kaa⁠okimaawenimaawaatc. Shikwa oniikaanisiimiwaa' omashkawaahkonikowaa'.

⁴³ Kaawiin itahsh kekiinawaa kitaa⁠ishihcikehsiim. Awenen iko i'imaa kaa⁠tahshiyek waahkihci inentaakositc, oncita hsa ko kika anohkiihtaakowaa awiya.

⁴⁴ A'awe kaye kaawii'-niikaanentaakositc, oncita hsa ko kahkina awiyan ci⁠anohkii'ikotc ekaa memwehc ci⁠ontisihsik.

⁴⁵ Aaniihsh niin Inini oKosihsan e'⁠aawiyaan, kaawiin niin ninkii'onci piishaahsii ci⁠anohkiihtawiwaatc kotak awiyak, i'i tahsh wiin ci⁠anohkiihtawakwaa, kaye ninka pakitinitisohkantawaak ci⁠tipa'ikaakewak nimpimaatisiwin niipiwa' awiyak kewiinawaa cionci pimaaci'intwaa,” kii'‑ihkito.

Ekii'-waapi'intc a'awe Paarhtimiiyahs

⁴⁶ Kiih⁠takohshinook i'iweti Cerahkonk (Jericho) kaa⁠ishinihkaatenik ootena. Shikwa tahsh e'onci maacaatc Ciisahs e'⁠wiiciiwikotc okihkino'amawaakana' kaye pahkaan awiya' ekii'ani paahtiinonitc, peshik itahsh awiyan okii'-mayaashkawaawaan ekaa e'⁠waapihsinik, eh⁠pakohsencikenitc i'imaa ciikihkana e'⁠namatapinitc. Paarhtimiiyahs (Bartimaeus) kii'‑ishinihkaasowan, Timiiyahsan (Timaeus) e'⁠otetemaanitc.

⁴⁷ Wa'a tahsh Paartimiiyahs okii'-noontaan mii 'awe Ciisahs Naasaritiiwinini (Nazarene) e'⁠ihkitowintc. Ihkito tahsh eh⁠kishiiwetc: “Ciisahs! Kiin Tepitink (David) kaa⁠Ontahkaanesiyan! Kitimaakinawihshin!” kii'ishi shaakowe.

⁴⁸ Miitahsh okii'onci'-ikoo' niipiwa': “Etatawe kinipaatwewitam!” okii'-ikoo'. Nawac itahsh aanciko enikohk kiih⁠shaakowe: “Kiin Tepitink kaa⁠Ontahkaanesiyan, kitimaakinawihshin!” e'⁠ihkitotc.

⁴⁹ Miitahsh kaa'ishi kipihcikaapawitc Ciisahs. “Antomihk,” kii'‑ihkito. Miitahsh kaa'ishi antomaawaatc ini wiyaapihsinik: “Mashkawite'en! Pasikwiin, kinantomik,” okii'-inaawaan.

⁵⁰ Miitahsh kaa'ishi pakiciwepinank okashkiikiiwin a'a wiyaapihsik, ekiih pasikwincihsetc ekii'-ishaatc Ciisahsoon.

⁵¹ Miitahsh Ciisahs okiih kakwecimaan: “Wekonehsh ke⁠ishihcike'inaan?” okii'-inaan. Okii'-ikoon itahsh ini kaa⁠waapihsinik: “Okihkino'amaake, ampehsh miinawaa waapiyaan!” ihkitowan.

⁵² Miitahsh kaa'⁠inaatc Ciisahs: “Amii'i pisaaniko ani maacaan. Kimino/ayaa'ikon i'i kaashi ahpenimonotawiyan,” okii'-inaan. Shemaak itahsh kii'⁠waapi a'a inini. Okiih piminisha'waan itahsh Ciisahsoon i'imaa miihkanaank.