Maaihka 7 - Ojibwe Kihcimasina'ikan

Ehtashintenikin Isriyalak Omaci'ishihcikewiniwaan

¹ Etatawe hsa ninkakwaatakihse! Taapishkoo hsa inini kaa⁠maamooshakinank shiiwimiicim e⁠niipininik i'imaa eshi kihtikaasonitc shoomina'. Kaawiin hsa kanake ci⁠mihkawakwaa shoominak ke⁠amwakwaapan. Kaawiin kaye ci⁠mihkamaan ini ke⁠miiciyaampaan nihtam kaa‑atihtekin pik (figs) tinowiminan. Mii hsa 'i enentaakosiyaan taapishkoo inini kaa⁠mihkansik shiiwimiicim mihtikonk, kaa⁠mihkawaahsik kaye shoomina' ci⁠ayaanitc shoominaahtikonk. Aasha iitok kahkina shoomina', ini kaye menohpokwahkin pik tinowiminan kiih⁠caaki mooshakinikaatewan.

² Kaawiin hsa awaac peshik kwayahk inini ci⁠kihkentaakositc o'omaa ahkiink, kaawiin kaye awiya ci⁠kihciwenimaatc Kishemanitoon. Kahkina pemaatisiwaatc hsa mii 'i eshihcikewaatc e⁠ahkantoowaatc ewii nihshiwewaatc. Entahso peshikowaatc hsa onanaantone'waawaa' wiicipimaatisiiwaa' ke⁠nihsitiwaatc.

³ Wiinke hsa otetako nakacihtoonaawaa noociko e⁠ishihcikewaatc. Iki hsa okimaak, iki kaye otipaahkonikek wiinawaa antotamaakewak ci⁠tipa'amawintwaa cipwaa onentamowaatc kekoonini. Iki kaye kaa⁠mashkawentaakosiwaatc owiintaanaawaa entawentamowaatc, miihsh i'i eshi maamawihcikewaatc.

⁴ Iki hsa maawac sesekaa ininiiwiwaatc, kehci inentaakosiwaatc kaawiin awaac pankii inentaakosihsiiwak taapishkoo mashkohsiin kekoon enentaakwahsinikin. Mii ohsha 'i aasha kii⁠ocihcikiishikaninik Kishemanitoo ci⁠nana'ahsaatc pemaatisinitc, kaakii ishi ayaankwaamihtaakosikopanen kii⁠aapaci'aakopanen otahshawaapiiwininiima' kaa⁠kanootamaakotc. Miitahsh noonkom pemaatisiwaatc kaa⁠onci wawaanentamowaatc.

⁵ Keko kaye awaac tepwewakenimaahken kiwiicitaamaakan, a'a kaye kaa⁠saaki wiiciiwatc. Ayaankwaamisin kaye aaniin enatc kiwiw kaa⁠saaki'atc.

⁶ O'o hsa ahpii okosihsimaa kaawiin okihtenimaahsiin oteten, a'a kaye otaanihsimaa okani maanshi wiiciiwaan omaamaan. A'ahsh kewiin oshiimihsimaa okani maanshi wiiciiwaan osikohsan. Inini hsa ke⁠shiinkenimikotc otaawinink ta⁠onciiwa', tipinawe wiin iko otinawemaakana'.

⁷ Niin tahsh wiin ninka ahshawaapamaa kaaTipenciketc, ninka pii'aa kaye ninKishemanitoom kaa⁠pimaaci'itc. NinKishemanitoom hsa ninka noontaak.

Kishemanitoo Ehpimaaci'aatc Pemaatisinitc

⁸ Kaa⁠shiinkenimiyaank, keko tahsh paahpinotawihshinaahkaank. Mihsawaa ko kawihseyaank, ninka pasikwiimin hsa! Mihsawaa ko kaye kaashi kashkiitipihkahk ayaayaank, kaaTipenciketc hsa ninka waahseshkamaakonaan.

⁹ Ekii mamaanshihkantawankitc itahsh mii 'i eshinaakwaninik ci⁠pakamishkaakowank onishkaatisiwin. Weti tahsh ishkwaac kika naatamaakonaan ci⁠kwayahko tootawiyamintc i'i kaakii ishi mamaanshi tootaakowank. Kaashi waahseyaanik hsa kika ishiwinikonaan; miitahsh i'i ci⁠waapantamowank okwayahkwaatisiwin!

¹⁰ Ahpii hsa tahsh iki kaa⁠shiinkenimiyamintwaa waapantamowaatc o'o, aahpici hsa ta⁠kihci akatentamok. Miihsh o'o ke'ishiyamintwaa, “Aaniin itahsh ina 'a kaaTipenciketc kiKishemanitoomiwaa?” Ninka waapamaak hsa ci⁠shaakooci'intwaa, wiinke hsa ninka ninkociishkawakishkawaanaanik i'imaa miihkanaank!

¹¹ Ceroosalamink eyaayek, mii ohsha 'i aasha e⁠ocihcihsek cikii oshihtooyekipan i'i kiwaahkaayaapihkinikaniwaan, ci⁠nanki miinikooyek ke⁠ahko tipentamek kitahkiimiwaa.

¹² Miihsh i'i ahpii kiicipimaatisiiwaak misiwe tapi onciiwak ci⁠pikiiwe naasihkawinekwaa. Weti Ahsiiriya (Assyria) ahkiink, weti kaye kihci ootenaahkank Iicipahkiink (Egypt) tapi onciiwak. Weti hsa kaye nahke tapi onciiwak siipink Iyoohparetiis (Euphrates) ecikaatenik, kihcikamiink kaye nahke, weti kaye nahke kaashi ayaakin kihci waciin.

¹³ I'i tahsh ahki tani inentaakwan taapishkoo pikwatahkamik, onsaam aaniihsh kihci macitootamook iki i'imaa kaa⁠taawaatc.

KaaTipenciketc Kiikoohpaatenimaatc Isriyala'

¹⁴ Tepencikeyan, taka ishi naanaakaci'ihshinaam okanawi maanahcaanihshiwe kaa⁠tootawaatc maanahcaanihsha', niinawint iitok kipimaatisiimak kaakii onaapamiyaank. Aanawiin e⁠ishitaayaank weti pikwatahkamik, shaakooc hsa waahkaaya'ii ayaani kaashi wahke nihtaawikink kekoon. Taka mii weti ke⁠ishaayaank, ci⁠anta wiihsiniyaank kaashi mashkohsiihkaak Peshan (Bashan) ahkiink, Kiliyat (Gilead) ahkiink kaye, taapishkoo kaakii nihtaa ishihcikeyaankipan mewisha.

¹⁵ Maamahkaacihcikehtamawihshinaam Tepencikeyan, kaakii ishihcike'iyaankipan ahpii Iicipahkiink (Egypt) kii⁠saakiciwihshiyaankipan!

¹⁶ Iki hsa kaa⁠pepahkaanwewaanakisiwaatc pemaatisiwaatc waapantamowaatc o'o, mii hsa 'i ci⁠akatenintisowaatc aanawiin e⁠mashkawentaakosiwaatc. Miitahsh i'i eshi kipitoonenintisowaatc, ta⁠kipihtawakenintisowak kaye ke⁠ahpiihtakaciwaatc.

¹⁷ Taapishkoo hsa kinepikook kaa⁠pimootewaatc kaashi paashkinehkamikohkaanik mii hsa ke⁠ishinaakosiwaatc. Otahpa'iwewikamikowaank hsa tapi onciiwak ci⁠nininkishkaawaatc ke⁠ahpiihtaanimisiwaatc. Miitahsh ci⁠kwehkentamowaatc ci⁠kohtaanenimaawaatc kaaTipencikenitc kiKishemanitoominaanin.

¹⁸ Tepencikeyan, kaawiin hsa pahkaan manitoo ayaahsii kiin tino; kiin hsa kaa⁠pakitinatwaa, kaa⁠poonentamawatwaa kaye omacitootamowiniwaan kaa⁠tipinawewisiyan kipimaatisiimak kaa⁠ishkohsewaatc. Kaawiin hsa kinwesh kipimi kitaasohsii, aahpici tahsh kiminwentaan e⁠waapanta'iyaank kikoohpaasinaakewin.

¹⁹ Kiin hsa tahsh miinawaa kika koohpaasinawihshinaam, kika tahtahkohkaataanan kaye nimacitootamowininaanin, kika ishiwepinaanan kaye maawac iko kaashi kiishkayawaak kihcikamiink.

²⁰ Tepwe kaye kika tootawaak, ci⁠saaki'atwaa kipimaatisiimak, kaa⁠ontahkaanesiwaatc Eparahaamink (Abraham), Cekaponk (Jacob) kaye, taapishkoo kaakii ishi ahshotamawaawatwaapan ninkehteya'aaminaapaniik.