Maaihka 6 - Ojibwe Kihcimasina'ikan

Kishemanitoo Kii'onaahkonaatc Isriyala'

¹ Pisintawihk tahsh aaniin ehkitotc kaaTipenciketc. Pasikwiin Tepencikeyan ci⁠waapanta'iweyan aaniin waa⁠inaahkonikeyan, taka kihci waciin, kaa⁠pihkwatinaakin kaye oka noontaanaawaa aaniin waa⁠ihkitoyan.

² Waciin noontamok aaniin kaaTipenciketc eshi anaamihtaakositc. Pisintamok kaakii nehpici onahsikooyek o'omaa ahkiink! KaaTipenciketc ohsha owiih tipaahkonaa' opimaatisiima', ewii anaamimaatc Isriyala' (Israel).

³ Mii ehkitotc kaaTipenciketc, “Nimpimaatisiimak, aaniin hsa kaah⁠tootawinakook? Aaniin tahsh eshi ayehko'inakook? Taka nahkwehtawihshik!

⁴ Iicipahkiink (Egypt) iitok kikii onci saakiciwininim; kikii naatamawininim kaye kaakii mihtanohkii'ikooyekipan. Miihsh kaakii‑ishinisha'wak Moosihs (Moses), Eran (Aaron) kaye, Miriyam (Miriam) kaye eshi'ayaayek ci⁠niikaaniihtamawinekwaa.

⁵ Nimpimaatisiimak, inashke maamihkawik aaniin kaawiih tootawinekipan Pelak (Balak) kaakii kihciokimaawihpan Moowap (Moab) ahkiink, aaniin kaye kaakii ishi nahkwehtaakotc Pelamoon kaakii otetenitc Pii'oroon (Beor). Maamihkawik kaye aaniin kaakii ishihseyekipan i'imaa kii⁠onci maacaayekipan Shitim (Shittim) ayaawinink weti kii‑ishaayekipan Kilkal (Gilgal) ayaawinink. Miihsh i'imaa ci⁠onci kihkentamek aaniin kaa⁠ishi kwayahkohcikekopanen kaaTipenciketc kii⁠naatamawinekipan.”

Aaniin KaaTipenciketc Eshi'antawentank

⁶ Wekonen ini tahsh ke⁠piitamawak kaaTipenciketc, Kishemanitoo kihcikiishikonk eyaatc ahpii pi⁠anta anami'ehtawak? Ninka piitamawaa na pishihkiinhsa' kaa⁠peshikopipoonwenitc ci⁠pakitinamawak tino kaa‑ankwaahkisikaatenikin pakitinaahsowinan?

⁷ Konike otaa minwaapantaan kaaTipenciketc piitamawak mitaahswaahk (1,000) aape maanahcaanihsha'? Konike otaa minwaapantaan mitaahswaa mitaahswaahk (10,000) siipiin kaa⁠pimitewaakamininikin? Ninka pakitinamawaa na ini nihtam kaa⁠nihtaawikinitc niniicaanihsan ci⁠tipa'amaampaan nimacitootamowinan? Ninka miinaa na kekoon niwiiyawink wenciinik ke⁠onci tipa'ike'ikooyaampaan i'i kaashi macitootamaan?

⁸ Kaawiin! KaaTipenciketc iitok kikii wiintamaakonaan wekonenini wenishihshininik, aaniin kaye eshi antaweniminank ci‑ishihcikewank. Weweni ci⁠tootaakewank ci⁠naakohtaawank kaye eh⁠saaki'iweyank, ci⁠tapahsenimowank wiici pimohsemank kiKishemanitoominaan.

⁹ Aahpici ohsha onishihshin ci⁠kohtaanenimintipan kaaTipenciketc. Ootenaani iitok aanakiih kanootank, taka pisintamok kiinawaa kaa⁠ohko ayaayek i'imaa kihci ootenaank.

¹⁰ Kaawiin nintaa waniihkenotamowaahsiinan owaahkaa'ikaniwaank iki meci'ishiwepisiwaatc ininiwak e⁠ayaanikin wenootisiwinan okakayenisiwiniwaank kaakii onci tepinamowaatc. Wayeshimiwemakaniniwan iitok tipaapiishkoocikanan kaa‑aapacihtoowaatc. Mii hsa i'iweni kaa⁠shiinkentamowak.

¹¹ Aaniin itahsh inaa keshi poonentamawakwaapan iki ininiwak kaa‑aapacihtoowaatc weyeshimiwemakaninikin tipaapiishkoocikanan, kosikoshkoocikanan kaye.

¹² Kitininiimak kaa⁠wenootisiwaatc hsa okoohpaaci'aawaa' ketimaakisinitc, kahkina piko kaa⁠tahshiyek kikakiinawishkim.

¹³ Aasha tahsh ninkii maacihcike ewiih poohkoshkaa'inakook, ewii nihshiwanaacihtooyaan kaye kitootenaamiwaa, kimacitootamowiniwaan itahsh ini kaa⁠tootaakoyek.

¹⁴ Aana hsa wiihsiniyek, kaawiin kika tewiihsinihsiim, tekwac hsa keyaapi kika noonteskatem. Aana hsa ewi na'inamek kekoon, kaawiin kika kanawentansiim. Kekoon ke⁠kanawentamek ninka nihshiwanaacihtoon miikaatinaaniwank.

¹⁵ Aana kihtikaanek pahkweshikan, kaawiin kika manishwaahsiwaawaa; aana kaye siinipiikishkamek aalip tinowiminan kaawiin kiinawaa kika ontencikehsiim. Aana kaye siinipiikishkawekwaa shoominak, kaawiin hsa kiinawaa kika minihkwehsiim i'i shoominaapo.

¹⁶ Miitahsh o'o ke⁠ishihsek onsaam e⁠naapi ishihcikewek kaakii ishi nihtaa macitootank Amrii (Omri) kaakii kihciokimaawihpan, ini kaye okosihsan Ehaap (Ahab) kaakii kihciokimaawinihpan. Kaawiin hsa kipoonihcikehsiim e⁠ishihcikewek kaakii nihtaa ishihcikewaahpan, miihsh ke⁠onci nihshiwanaaci'inakook, kahkina tahsh awiyak entahshiwaatc kika aanawenimikowaak. Pemaatisiwaatc misiwe eyaawaatc kika paahpinotaakowaak.