Maaihka 5 - Ojibwe Kihcimasina'ikan

¹ Pemaatisiyek Ceroosalamink (Jerusalem) kaa‑ayaayek, maawantoonihkwahk kishimaakanihshiimiwaak maamawi mashkawikaapawik! Kiwaahkaashkaakoomin iitok! Owii miikaanaawaan iitok ini kaa⁠niikaaniihtamawaanitc Isriyala'.

Kishemanitoo Kii'ahshotamaaketc Ewiimiikiwetc Ketipenimaanitc Isriyala' Ci'onciinitc Pehtalihemink

² Miihsh kaaTipenciketc ehkitotc, “Pehtalihem (Bethlehem) Ehparahta (Ephrathah), kiin maawac peshik kitakaahsentaakos kaa⁠tahsinkin ootenawan i'imaa Coota (Judah) ahkiink. Miitahsh i'imaa ke⁠ontinak ke⁠tipenimaatc Isriyala' (Israel), waahsa otaanaank otoontahkaanesiwin kaapi kihkentaakwaninik.”

³ KaaTipenciketc hsa oka nakanaa' opimaatisiima' ci⁠tipenimikonitc kaa⁠shiinkenimikonitc. Paanimaa tahsh ini ihkwewan kii‑ishkwaa nihtaawiki'aanitc okosihsini, mii 'i payesh ci⁠pooni tipenimikonitc. Miitahsh i'i ahpii kaakii maaciicikaniwaahpan Israel ci⁠pikiiwe wiici'ayaamaawaatc miinawaa owiici pimaatisiimiwaa'.

⁴ Ahpii tahsh pi⁠takohshink oka tipenimaa' hsa opimaatisiima' ci⁠aapacihtootc mashkawisiiwin ke⁠miinikotc kaaTipencikenitc, tako kaye enentaakosinitc otishinihkaasowininiink kaaTipencikenitc oKishemanitooman. Opimaatisiima' hsa tahsh pisaan ta‑ayintaawa', aaniihsh misiwe ahkiink eyaanitc pemaatisinitc oka wiintamini e⁠kihci inentaakositc.

⁵ Wiin tahsh kaye ke⁠piitootc pisaan ci⁠ayaawintc. Ahpii hsa tahsh Ahsiiriya (Assyria) ahkiink wenciiwaatc pi⁠anta miikaasowaatc kitahkiiminaanink, pi⁠shaaposhkaawaatc itahsh kitahpa'iwewikamikonaanin, mii hsa 'i ci‑ishinisha'wankitwaa maawac meshkawentaakosiwaatc kaa⁠niikaanisiwaatc ci⁠nanaahkonaawaatc.

Cinaatamawintwaa Kaye Cinana'ahsintwaa

⁶ Miitahsh ci⁠tipentamowaatc Ahsiiriya ahkiini kii‑ishkwaa shaakoocihtwaawaatc, i'i kaye Nimraat (Nimrod) ahkiini oka tipentaanaawaa. Miitahsh i'i nahke keshi naatamawinankitwaa ahpii Ahsiiriya wenciinitc pi⁠anta miikaasonitc kitahkiiminaanink.

⁷ Iki Isriyalak ke⁠ishko pimaatisiwaatc ta⁠inentaakosiwak taapishkoo kaa⁠oshki shahki'ayaak kaaTipenciketc ke⁠ishinisha'amawaatc kotak pemaatisinitc. Taapishkoo kaa⁠shahkipiihsa'ank eshi nihtaawikihkin kekoonan ta⁠inentaakosiwak. Kishemanitoon hsa ta‑ahpenimowak, kaawiin wiin ininiwan.

⁸ Isriyalak hsa tahsh ke⁠ayaawaatc mekweya'ii eshi'ayaanitc kaa⁠pepahkaanwewaanakisinitc pemaatisinitc. Mii hsa 'i ke⁠inentaakosiwaatc taapishkoo mihshipishiw eyaatc mekweya'ii noohpimiink eshi'ayaanitc kotak aya'aawihsha'. Taapishkoo oshki mihshipishiw kaa⁠otihtinaatc maanahcaanihsha' kaa⁠piihsipinaatc itahsh, kaawiin hsa awiyan oka kashkihtoohsiini ci⁠naatamaakonitc.

⁹ Isriyalak hsa oka shaakooci'aawaa' kaa⁠shiinkenimikowaatc, kahkina kaye oka caaki'aawaa'.

¹⁰ Miihsh ehkitotc kaaTipenciketc, “Mii hsa 'i ahpii ishi kiishikahk, ci⁠otaahpinakwaa kimihtatimoomiwaak, ci⁠nihshiwanaaci'akwaa kaye kimiikaasowi otaapaanaahkowaak.

¹¹ Kitootenaamiwaan kaye eyaakin kitahkiimiwaank ci⁠nihshiwanaacihtooyaan, ninka piikopitoonan kaye kitahpa'iwewikamikowaan.

¹² Kaashi mamaantaawisiyek kaye ninka nihshiwanaacihtoon, miihsh kaawiin kika kashkihtoohsiim kekoon ci‑inaahpinashiweyek.

¹³ Kimanitoohkaaniwaak hsa ninka nihshiwanaaci'aak, iki kaye ahsiniik enami'eyenimekwaa. Kaawiin itahsh awahshime kika anami'ehtawaahsiwaawaak kininciiwaank kaakii onci oshi'ekwaa.

¹⁴ Ninka pahkwatahkiipinaa kaye ihkwe manitoohkaan kaa⁠mihtikowitc kaa⁠patahkinintc Aahsharah (Asherah) eyaatc kitahkiimiwaank, kikihci ootenaamiwaan kaye ninka nihshiwanaacihtoonan.

¹⁵ Wiinke hsa tahsh ninkihci nishki'ikook kahkina kotak pemaatisiwaatc kaa⁠inentansikwaa ci⁠na'ihtawiwaatc, miihsh kaawii onci nana'ahsakwaa,” ihkito kaaTipenciketc.