Maaihka 3 - Ojibwe Kihcimasina'ikan

Maaihka Kiikishiikanoonaatc Kaakiiniikaanisinitc Isriyala'

¹ Miihsh o'o Maaihka (Micah) ehkitotc, “Pisintawihshik, kiinawaa kaa⁠niikaanisiyek Isriyalak. Kiinawaa iitok ke⁠kihkentamekipan aaniin weweni ke⁠tootawintwaapan pemaatisiwaatc.

² Tekwac iitok kishiinkentaam i'i kaa⁠onishihshik, eh⁠saakihtooyek itahsh macikekoon. Mii hsa 'i enentaakwahk taapishkoo kikipimaatis e⁠pahkonekwaa nimpimaatisiimak, owiiyaahsiwaa kaye ohkaniwank e⁠onci manipitaawek.

³ Mii kaye enentaakwahk taapishkoo e⁠ishihcikeyek e⁠amwekwaa nimpimaatisiimak, e⁠pihshakipinimek kaye oshakayaawaan. Ohkaniwaan kaye eh⁠piikwa'amowek, wiinke kaye e⁠pihkishka'wekwaa taapishkoo wiiyaahs kaa⁠toocikaatek kiiwii kiishisikaatek ahkihkonk.”

⁴ Ta⁠ocihcihseni ohsha ahpii ci⁠shaakowaanek kaaTipenciketc, kaawiin tahsh kika nahkwehtaakohsiiwaa, kaawiin kaye kika pisintaakohsiiwaa anami'ehtawek aaniihsh onsaam kisaakihtoonaawaa macikekoon.

⁵ Miitahsh o'o kaaTipenciketc ehkitotc, “Iki hsa wiin kaa⁠kanootamawiwaatc kaa⁠waniwinaawaatc nimpimaatisiima', kiishpin awiyan kii⁠tipa'amaakowaatc mii 'i eshi tashintamawaawaatc pisaanisiwin awiyan. Kiishpin tahsh awiyan kiih⁠tipa'amaakohsikwaa mii 'i eshi tashintamawaawaatc awiyan ciwi miikaanikonitc.”

⁶ Okoweniwak okanootamaakek kaaTipencikenitc e'ikowaatc, “Okanootamaakek, mii ohsha 'i aasha kekaa ci⁠pooni kiishikanihshiyek, kiisihs aasha eh⁠pankihshimotc. Onsaam itahsh e⁠waniwinekwaa nimpimaatisiimak, kaawiin hsa awahshime miinawaa kika niikaani pawaacikehsiim, kaawiin kaye kika kashkihtoohsiim niiyaak ci⁠tipaatotamek aaniin keni ishiwepahk.”

⁷ Iki hsa kaa⁠niikaanaacimowaatc, iki kaye kaa⁠mamaantaawi anta kihkencikewaatc ta‑akawiinkwenintisowak ke⁠ahpiihtakaciwaatc, aaniihsh Kishemanitoon kaawiin oka nahkwehtaakohsiiwaan.

⁸ Miihsh ehkitotc Maaihka, “Niin tahsh wiin kaaTipenciketc Otahcaahkwan nimooshkineshkaakowan, omashkawisiiwin kaye, mii kaye kaa⁠onci kihkentamaan weweni ci‑inaahkonikeyaan. Mii 'i kaye kaa⁠onci kashkite'eyaan ci⁠wiintamowak Isriyalak (Israel) aaniin eshinaakwaninikin omacitootamowiniwaan.

⁹ Pisintawihshik hsa kiinawaa kaa⁠niikaaniihtamawekwaa, kaa⁠tipenimekwaa kaye Isriyalak, kiinawaa kaa⁠shiinkentamek weweni inaahkonikewin, kaa⁠kwehkihsitooyek kaa⁠kwayahkonaakwahk noociko ci⁠tinowank.

¹⁰ Mii hsa 'i enentaakwahk nihshiwewin, maci'ishiwepisiwin kaye e⁠aapacihtooyek kii⁠oshihtooyek i'i kihci ootena, Ceroosalam, Kishemanitoo otootenaam ecikaatenik.

¹¹ Iki hsa kaa⁠naanaakacihtoowaatc ootenaani aahpici ominotootawaawaa' i'i niipiwa' kaa⁠mino tipa'amaakowaatc. Iki tahsh kaye anami'ewikimaak kaa⁠wiintamaakewaatc ehkitoomakaninik Onahshowewin shooniyaan ehta 'i kaa⁠onci ishihcikewaatc. Miihsh peshikwan iki okanootamaakek kewiinawaa shooniyaan ehta 'i kaa⁠onci wiintamaakewaatc aaniin eshinamo'ikowaatc Kishemanitoon, e⁠inwaanintisowaatc e⁠wiiciiwikowaatc kaaTipencikenitc. Miihsh o'o ehkitowaatc, ‘Kaawiin hsa kekoon kika ishi wahsitaawihsehsiimin, kaaTipenciketc iitok kiwiiciiwikonaan.’ ”

¹² Kiinawaa tahsh i'i kitishihcikewiniwaa ke⁠onci ishinaakwahk Saayan (Zion) taapishkoo kaa⁠toocikaatek kihtikaanahki kaa⁠piikwahkamikipicikaatek. Nooci kekoonan hsa kaa⁠mihci ohkohsinkin ta⁠ishinaakwan Ceroosalam (Jerusalem), i'ihsh kaye kaa⁠pihkwatinaak eshi'ayaanik kaaTipenciketc owaahkaa'ikan wiinke tani noohpimiiwan.