ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 9 - Ojibwe Kihcimasina'ikan

Ciisahs kiimaacinisha'waatc mitaahshiniishin okihkino'amawaakana'

¹ Ciisahs tahsh okii'-antomaa' mitaahshiniishin (12) okihkino'amawaakana' ekii'-miinaatc mashkawisiiwin, kashki'ewisiwin kaye cisaakicinisha'waanitc maciahcaahkwa', cikashkihtoonitc kaye ciminoayaa'iwenitc.

² Miitahsh kaakii'ishi maacinisha'waatc cipapaawiintamaakenitc i'i Kishemanitoon ewii'oshihsitoonitc oTipencikewinini, kaye tahsh ciminwaaci'aanitc kaa‑aahkosinitc.

³ Miitahsh Ciisahs kaa'inaatc: “Keko kekoon maaciitoohkek ahpii ani maacaayek, sahka'onaahtik, pashkwewash, kemiiciyek, shooniyaa, kekoon kaye kemeshkocishkamek.

⁴ Piko aanti keshi antomikooyek cipiintikeyek, mii 'imaa ishi kapehshik, miihsh i'imaa kenionci maacaayek.

⁵ Aaniinti tahsh iko keshi piintike antomikoohsiwek, ahpii tahsh ani nakatamek i'i ootena, miihsh ishi paahpawisitehshimoonok cionci kihkentamowaatc e'⁠wanitootamowaatc.”

⁶ Miitahsh okihkino'amawaakana' kaaishi maacaanitc ekii'-ishaanitc misiwe eshi ayishitaaniwaninik ewiintamaakenitc minwaacimowin, kaye tahsh eminwaaci'aanitc awiya' piko aanti eyaanitc.

Herat kiihkakwekihkenimaatc aweneniwinitc Ciisahsoon

⁷ Ahpii Herat (Herod) kaakihci okimaawitc Kaalaliink (Galilee) enoontank kahkina kekoon kaa'ayishihsenik kii'onci wawaanentam i'iwe aaninta awiya' kaakii'-ihkitonitc. Ekii'ihkitonaaniwaninik iinsan Cwaanan (John) Siika'antaakewininiwan ekiih pikiiwe pimaatisinitc.

⁸ Kotak tahsh ekii'-ihkitonitc: “Ilaaica (Elijah) kii'naakosi,” aaninta tahsh ekii'-ihkitonitc mii hsa 'awe peshik ekiihkiiwe pimaatisitc mewisha kaakiih kanootamawaatc Kishemanitoon.

⁹ Miitahsh Herat kaa'ihkitotc: “Cwaan wiin ninkiih kiishkikweta'waa, awenen tahsh a'a tino inini kaanaanoontamaan.” Miitahsh mooshak kaakiihkakwe waapamaatc Ciisahsoon.

Ciisahs kiiahshamaatc naanink mitaahswaahk pemaatisinitc

¹⁰ Ishinisha'waakanak tahsh ekiih pikiiwewaatc, okii'-wiintamawaawaan Ciisahsoon kahkina kekoon kaakii'-ayishihcikewaatc. Miitahsh kaa'ishi maacii wiiciiwaatc otishinisha'waakana' wiinehtawaa ko ekii'-ishaawaatc ootenaank Pehseta (Bethsaida) eshinihkaatenik.

¹¹ Okiih kihkenimikoo' tahsh kaapaahtiinonitc pemaatisinitc weti ekii'-ishaatc, miihsh kaa'ishi piminisha'okotc. Miitahsh Ciisahs kaakii'inaatc e'⁠minwentank ehpiishaanitc, ekiih tashintamawaatc kaye Kishemanitoon oTipencikewinini, kaye tahsh ekii'-minwaaci'aatc iniweniwa' kaakiih kakwecimikotc ciminoayaanitc.

¹² Ahpii tahsh e'⁠ani onaakohshininik, okiihpi naasihkaakoo' i'i kaamitaahshiniishinitc (12) okihkino'amawaakana' ekii'ikotc: “Kanoosh pemaatisiwaatc cimaacaawaatc ci‑ishaawaatc eshi ootenaahsiwaninik, kaashi ayaaniwaninik kaye, ciawi nanaanta waapantamowaatc miicim, aaniinti kaye keshi nipaawaatc. Pikwacaya'ii iitok kitayaamin,” ekii'ikotc.

¹³ Miihsh Ciisahs kaa'inaatc: “Kiinawaa miinihkwak kekoonini kemiiciwaatc.” Miihsh kaa'ikotc: “Naanan ehta pahkweshikanihkaanenhsak nintayaawaanaanik, niishin kiikoyak. Kinantawenimihshinaam ina ciawi ataaweyaank miicim citepihsek kahkina oko ciwiihsiniwaatc?”

¹⁴ Ninkociko naanan mitaahswaahk (5,000) kiihtahshiwa' ininiwa' i'imaa. Miihsh Ciisahs kaa'inaatc okihkino'amawaakana': “Nenaanimitana (50) ishi ayoohkwapi'ihkwak,” okii'inaa'.

¹⁵ Miitahsh o'o kaahtootaminitc. Kahkina tahsh kii'onapiwa' i'imaa kaakii'-ayaanitc.

¹⁶ Miitahsh Ciisahs kaakii'-otaahpinaatc ini naanan pahkweshikanihkaanenhsa', ini kaye niishin kiikooya' kihcikiishikonk ekii'-inaapitc ekii'-nanaahkomaatc Kishemanitoon iniweniwa' onci. Miihsh kaa'ishi pahkwepinaatc, ekii'-miinaatc okihkino'amawaakana', cimaamaata'oonaanitc ini i'imaa kaakii'-ayaanitc.

¹⁷ Kahkina hsa kiihtewiihsiniwak. Kihkino'amawaakanak tahsh okii'-maawantoonaanaawaa i'i miicim kaakii'-ishkohsenik mitaahshiniishin (12) mashkohsiiwi miicimiwashan, ekii'-mooshkinekin.

Awenen entinowitc Ciisahs

¹⁸ Aapintink itahsh Ciisahs wiin ehta e'⁠anami'aatc, ewiiciiwikotc okihkino'amawaakana', miihsh kaa'ishikakwecimaatc: “Awenenan ehkitowaatc awiyak ehtinowiwak?”

¹⁹ Miihsh o'o tahsh kaa'ikotc: “Aaninta kitikook, Cwaan (John) Siika'antaakewinini. Kotak kitikook Ilaaica (Elijah). Kotak kitikook Cerimaaya (Jeremiah), komaa kaye peshik kiihkiiwe pimaatisiwitok kaakiih kanootamawaakopanen Kishemanitoon kitikoo,” okii'ikoo'.

²⁰ Ciisahs itahsh okii'inaa': “Awenen tahsh kiinawaa ehkitoyek ehtinowiyaan?” Saaiman Piitar (Simon Peter) tahsh okii'inaan: “Kiin ihsa a'a Kishemanitoon kaakiih kiishaaci onenimikotc ciPimaaci'iwetc.”

Kiiniikaaniwiintamawaatc aaniin keishinihsintc

²¹ Ciisahs tahsh okiih kanoonaa' okii'-aayicikanoonaa' ciwiintamawaahsinik o'oweni awiyan.

²² Miitahsh kaye kaa'inaatc: “Oncita piko Inini oKosihsan takihcikakwaatakihtoowan, oka aanawenimikoo' kaye kaaniikaanisinitc, i'i kaye anami'ewikimaa', i'i kaye onahshowewiniwaa' kaakihkino'amaakenitc onahshowewin. Miihsh cinihsimintc. Nihsokiishik tahsh ishihsenik takiiwe pimaatisii'aawan.”

²³ Miitahsh o'o kahkina kaa'inaatc: “Kiishpin awiya wiihpiminisha'otc, taka ta‑aanawenintiso, oka otaahpinaan otaashiteyaahtikoman kepimiwinaatc entahsokiishik cipiminisha'otc.

²⁴ A'a tahsh kemanaa wanihtootc opimaatisiwin, aanciko kaawiin tatepinamaasohsii tepwe keonci pimaatisitc. A'a tahsh kepakitinank opimaatisiwin niin onci, tatepinamaaso tepwe keonci pimaatisitc.

²⁵ Wekonen kekashkihtamaasohpan awiya kiishpin aanatepinamaasotc kahkina kekoon o'omaa ahkiink, wiin itahsh iko nihshiwanaaci'itisotc, kaye tahsh onci kakwaatakihtootc?

²⁶ Awenen hsa piko keonci akacitc niin onci, ini kaye nikihkino'amaakewinan, miihsa'we keakaciihtaakotc kehci inentaakosinitc Inini oKosihsini ahpii pitakohshininitc, kaye tahsh okihci inentaakosiwininiink Weyoohsimimintc, i'i kaye kehtentaakosinitc encala'.

²⁷ Tepwe tahsh o'o kaaininakook. Aaninta hsa o'omaa kaaniipawiwaatc kaawiin tanipohsiiwak paanimaa kii'waapantamowaatc i'i Kishemanitoon otookimaawinini.”

Ciisahs kiinaakohtootc okihci inentaakosiwin

²⁸ Nihshwaahsokiishik (8) tahsh e'⁠ishihsenik Ciisahs okii'maaciinaan Piitaroon (Peter), Ciimisan (James), ini kaye Cwaanan (John). Kii'ishaawak eshi ishpatinaanik ekii'awi anami'aawaatc.

²⁹ Mekwaa tahsh e'⁠anami'aatc pahkaan kii'ani ishinaakosi owiikwaank, okikishkikanan wiinke kii'waapishkiwaahsenaakwaniniwan.

³⁰ Miitahsh kihkino'amawaakanak kaakii'-waapamaawaatc niishin ininiwa' ehkakanoonikonitc. Moosihsoon (Moses) ini kaye Ilaaicawan (Elijah).

³¹ Wiinke kiikihci waahsenaakosiwa', ekiih tashintaminitc aaniin keshi nihsimintc Ciisahsoon aasha kekaa kaawii'-ishihsenik i'imaa Ceroosalamink (Jerusalem).

³² Piitar tahsh i'i kaye kaakii'-wiiciiwikotc kiikihpakikwashiwak. Ahpii tahsh ekoshkosiwaatc okii'-waapamaawaan Ciisahsoon eshikihci inentaakosinitc, i'i kaye niishin kaakii'wiici kapawihtaakonitc.

³³ Aasha tahsh kekaa ewii'ani nakanikonitc, Piitar o'o okii'inaan Ciisahsoon: “Tepencikeyan, aahpici hsa mii 'i kwayahk o'omaa kaa‑ayaayank, kiishpin ishimihsawentaman, nihsin akawaahte'ikanan ninka patahkitoomin, kiin peshik ciayaayan, Moosihs kaye peshik, Ilaaica kaye peshik,” kii'ihkito. (Kaawiin iitok okii kihkentansiin aaniin kaa'ihkitotc.)

³⁴ Mekwaa tahsh ehkakitotc, wahkwiini okii'-akawaahteshkaakonaawaa. Kihkino'amawaakanak itahsh kiihsekisiwak ekii'-aakawishkaakowaatc wahkwiini.

³⁵ Miitahsh kaakii'-noontawaawaatc awiyan wahkwiink e'⁠onci kiikitonitc: “Mii ohsha wa'a Ninkosihs, kaakii'-onaapamak; pisintawihk.”

³⁶ Ahpii tahsh awiyan kaa'ishkwaa kiikitonitc, Ciisahsoon ehta i'maa kii'ayaawan. Kihkino'amawaakanak kaawiin kii'noontaatihsiiwak. Kaawiin kaye awiyan okii'-wiintamawaahsiwaawaan o'o kaakii'-inaapihshinowaatc.

Ciisahs kiiminwaaci'aatc kwiiwisenhsan kekishkaakonitc maciahcaahkwan

³⁷ Miitahsh o'o kaa'ishihsenik e'⁠aniwaapaninik ahpii Ciisahs, i'i kaye nihsin okihkino'amawaakana' ishpatinaank ehpionci niihsaciwewaatc. Kiihpaahtiinowa' pemaatisinitc kaakii'-nakishkaakowaatc.

³⁸ Peshik tahsh ininiwan i'imaa mekweya'ii eshi paahtiinonaaniwaninik kii'onci kishiiwe kiikitowan ekii'-ihkitonitc: “Okihkino'amaake, kipakohsenimin cikanawaapamatc ninkosihs, miiehta'awe niniicaanihs.

³⁹ Ketahto onihtaa otihtinikoon ini maciahcaahkwan, miihsh eshishaakowetc. Ocipiniko kaye piinihsh ehpiihtewaninik otoon. Owiihsakentami'ikoon kaye, kaawiin nanaash cipooni'ikotc.

⁴⁰ Nintaanakiihpakohsenimaak kikihkino'amawaakanak cisaakicinisha'waawaatc ini maciahcaahkwan, kaawiin tahsh okiih kashki'aahsiwaawaan,” okii'ikoon.

⁴¹ Ciisahs tahsh kii'ihkito: “Etatawe kaawiin kitepwehtansiim, kaawiin kaye kwayahk kitishiayaahsiim! Kaanaka naa minihk kewiiciiwinakookipan? Kaanaka naa miina kitaashashiipenimininim?” Miitahsh Ciisahs kaa'inaatc ini ininiwan: “Piitamawihshin o'omaa a'a kwiiwisenhs.”

⁴² Miitahsh kaakiih piishaanitc ini kwiiwisenhsan. Miihsh kaakii'-otihtinikonitc maciahcaahkwan mitahkamik ekii'ishi kawiwepinikonitc, tako kaye ekii'-oncipinikonitc. Ciisahs tahsh okiih kanoonaan ini maciahcaahkwan. Miitahsh shemaak kaa'ishi saaka'aminitc. Shemaak tahsh kii'minoayaawan ini kwiiwisenhsan. Miihsh kaa'ishimiinaanitc ini oteteni.

⁴³ Kahkina tahsh i'imaa kaakii'-ayaawaatc kii'maamahkaatentamook aaniin ehpiihci kihci inentaakosinitc Kishemanitoon. Mekwaa tahsh awiya' emaamahkaatentaminitc o'o kahkina Ciisahs kaakii'-ishihciketc, miihsh o'o kaa'inaatc okihkino'amawaakana'.

Ciisahs miinawaa kiihtipaatotank ewii'nipotc

⁴⁴ Weweni pisintawihshik o'o kaawii'-ininakook, Inini oKosihsan ohsha tashi pakitinikaasowan ininiihkaank.

⁴⁵ Kihkino'amawaakanak itahsh kaawiin okii'-nihsitohtansiinaawaa o'o ihkitowin, kaawiin aaniihsh o'o kii'ishi miinikoowisihsiiwak cinihsitohtamowaatc o'oweni. Kiihshaakwenimowak kaye cikakwecimaawaatc o'oweni.

Ciisahs kiiwiintamaaketc awenenan kekihci inentaakosinitc

⁴⁶ Kihkino'amawaanak itahsh kii'maacii kihcikakanoonitiwak awenen a'a mayaa kehci inentaakositc.

⁴⁷ Ciisahs tahsh okiih kihkentaan aaniin enentaminitc. Miitahsh kaakii'-otaahpinaatc apinoonciishan ekii'-niipawi'aatc ciwiicikaapawihtaakotc.

⁴⁸ Miitahsh o'o kaa'inaatc: “Awenen iko kewiici'aatc peshik o'o apinoonciisha', niin onci e'⁠onci ishihciketc, mii peshikwan keniin e'⁠ishiwiici'itc. Awenen ihsa waaci'ikwen, kaawiin niinehta niwiici'ikohsii, iniweniwan ihsa owiici'aan Kishemanitoon, miiwan ini kaapi ishinisha'omitc. Awenen hsako maawac pankii enentaakosikwen kaatahshiyek, mii hsa 'awe kehci inentaakositc,” okii'inaa'.

Awenen iko kaanakaashkawihsinowinek kiwiiciiwikowaa

⁴⁹ Miitahsh kaa'ishi kanoonikotc ini Cwaanan (John): “Okihkino'amaake, ninkii'waapamaanaan peshik inini ehsaakicinisha'amawaatc maciahcaahkwa' e'⁠ahpimotc kitishinihkaasowin. Intawaa tahsh ninkii'onci'aanaan, aaniihsh kaawiin kipapaawiiciiwikohsiinaan,” okii'ikoon.

⁵⁰ Ciisahs itahsh o'owe okii'inaan: “Keko onci'aahkek. Awiya kaanakaashkawihsonowinankitc ohsha kiwiici'ikonaan,” okii'inaan.

Ciisahs kiipiitikanaahsiwintc Sameriya ayaawinink

⁵¹ Aasha tahsh kekaa e'⁠ocihcihsenik Ciisahs ci ishiwinintc kihcikiishikonk, kii'inentam ewii'ishaatc Ceroosalamink (Jerusalem).

⁵² Okii'niikaaninisha'waa' tahsh keniniikaanaacimonitc kaawii'ani ishaatc ci‑ishaanitc Sameriya (Samaria) ahkiink cikwayaancihtamaakotc kahkina kekoon.

⁵³ I'i tahsh pemaatisinitc i'imaa eyaanitc kaawiin okii'minwaapamikohsii', aaniihsh kii'mihci pimiayaa i'imaa ekii'-ishaatc Ceroosalamink.

⁵⁴ Ahpii tahsh kihkino'amawaakanak Ciimis (James) a'a kaye Cwaan (John) ewaawaapantamowaatc o'o mii 'i kaa'ihkitowaatc: “Tepencikeyan, kinantawenimihshinaam ina cikanootamaank ishkote cipionci naashiishmakahk kihcikiishikonk kenihshiwanaaci'ikowaatc?”

⁵⁵ Ciisahs tahsh kiihkwehkihtaa ekiihkishii kanoonaatc, [ekii'inaatc: “Kaawiin kikihkenimaahsiwaawaa eshiayaanitc Kishemanitoo otAhcaahkwan wenci tipentaakosiyek, aaniihsh niin Inini oKosihsan kiihpiishaawan cipi pimaaci'iwenitc, kaawiin wiin cinihshiwanaaci'iwenitc,” okii'inaa'.]

⁵⁶ Miitahsh pahkaan eyaawinik kaakii'-ishaawaatc.

Iki waahpiminisha'waawaatc Ciisahsoon

⁵⁷ E'anipimiayaawaatc itahsh miihkanaank, peshik ininiwan okii'ikoon: “Kihkino'amaake, kika wiiciiwin aanti piko keishaayan.”

⁵⁸ Miitahsh o'o Ciisahs kaa'ishinahkwehtawaatc: “Iki waakohshak owaashiwak, iki kaye pinehshiinshak owasihswaniwak. Niin tahsh Inini oKosihsan kaawiin nintayaahsiin aanti keshi pimihshinaan cianwehshinaan,” kii'ihkito.

⁵⁹ Ciisahs tahsh kotak ininiwan okii'inaan: “Piminisha'ohshin.” Miihsh kaa'ishi nahkwehtaakotc: “Pakitinihshin pinamaa cikiiweyaan ciantawi na'inak nintete.”

⁶⁰ Miihsh o'o Ciisahs kaa'ishi nahkwehtawaatc: “Taka wiinawaa piko okatashiihkaanaawaa cina'inaawaatc otinawemaakaniwaa' kaawii'niponitc, kiin itahsh wiin maacaan cipapaawiintamaakewatc Kishemanitoo otookimaawiwin,” okii'inaan.

⁶¹ Miinawaa tahsh awiyan okii'ikoon: “Tepencikeyan, kika piminisha'on. Pinamaa tahsh nihtam pakitinihshin cikiiweyaan ciawi pooshoo'akwaa nintaawinink eyaawaatc,” okii'ikoon.

⁶² Miihsh Ciisahs kaa'ihkitotc: “Piko awiya kaamaacii ompwehkamikipiciketc kiishpin itahsh ishi aapanaapitc kaawiin tateahpiihtentaakosihsii Kishemanitoon oTipencikewininiink cishi aapatisitc.”