ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 8 - Ojibwe Kihcimasina'ikan

Ihkwewak kaakii'wiiciiwaawaatc, kiiwiici'aawaatc kaye Ciisahsoon

¹ Naanaake tahsh e'⁠ani ishihsenik, Ciisahs kiihpapaa ishaa otenaahkaank, eshi kakapehshiwintc kaye. Kiihpapaa wiintamaake minwaacimowin, i'iweni kaye Kishemanitoon oTipencikewinini, ekii'-wiiciiwikotc mitaahshiniishin (12) okihkino'amawaakana'.

² I'i kaye aaninta ihkwewa' okiih piminisha'okoo' kaakiihpi minwaaci'aatc aahkosiwinink, aaninta kaye maciahcaahkwa' kaakiih saakicinisha'amawaatc. Mii 'awe peshik Meri Maakatalawihkwe (Mary Magdalene) kaaishinihkaanintc mii 'awe niishwaahso (7) maciahcaahkwa' kaakiih saakicinisha'amawintc.

³ A'a tahsh peshik Coaana (Joanna) kii'ishinihkaaso, onaapeman Koosa (Chuza) kii'ishinihkaasowan kaakii'-okimaahkantaminitc Heratan (Herod) otayaawinini, a'a tahsh kaye Sosaana (Susanna) eshinihkaasotc. Iki tahsh kaye kotak ihkwewak kaakii'-aapacihtoowaatc otaya'iimiwaan ewiici'aawaatc Ciisahsoon, i'i kaye okihkino'amawaakanini.

E'awehcikaatekin ehpapiiwiwepinikaatekin kihtikaanenhsan

⁴ Wiinke tahsh kiihpaahtiinowak pemaatisiwaatc ekii'-ohkwiino'itiwaatc ekiihpi anta waapamaawaatc Ciisahsoon. Pepahkaan ootenaank ekiihpi ayonciinitc. Miihsh Ciisahs kaakii'-wiintamawaatc o'o awehcikewin:

⁵ “Kii'ayaa hsa inini ekiih kihtikaatank kihtikaanenhsan. Mekwaa tahsh e'⁠ohswe wepinank kihtikaanenhsan, aaninta miihkanaank kii'ishi pankihsininiwan. Miiwan tahsh ini kaakii tahtahkohkaatekin, pinehshiinshak kaye okiih kitaanaawaan.

⁶ Aaninta tahsh kihtikaanenhsan, eshi ahsiniihkaak kaa'ishi tapahsahkamikaak kii'ishi pankihsinoon. Wiipa tahsh kii'nihtaawikinoon kihtikaanan. Miihsh kaa'ani ishi paahtekin kaawiin aaniihsh kii'nipiiwansinoonan.

⁷ Aaninta tahsh kihtikaanenhsan okaawiminakashiihkaank kii'ishi pankihsinoon. Okaawiminakashiin tahsh e'⁠ompikihkin okiih kipishkaanaawaan ini kihtikaanenhsan, miihsh kaa'ishi nipoomakaninikin.

⁸ Aaninta tahsh kihtikaanenhsan, maawac iko eshi minohkamikaak kii'ishi pankihsinoon. Wiinke tahsh kii'minokinoon ini kihtikaanan. Ninkotwaahk (100) tahsink kii'ontinikaatewan minihk kaakii kihtikaatekopanen ini kihtikaanan.” Miihsh kaa'ani ihkitotc: “Awenen hsa piko wenoontamaawinitc taka tapisintam,” kii'ihkito.

Ciisahs kaakii'onciaapacihtootc awehcikewinan

⁹ Miitahsh okihkino'amawaakana' kaakiih kakwecimikotc aaniin ehkitoomakaninik i'iweni awehcikewin.

¹⁰ Miihsh Ciisahs kaa'ishi nahkwehtawaatc: “Kiinawaa ohsha kipakitinamaakoom cikihkentamek ini kaakiih kihkencikaatehsinokin kekoonan Kishemanitoo oTipencikewin kaatashintekin. Wiinawaa tahsh wiin awehcikewinan nintaapacihtaawaanan ehkanoonakwaa: mihsawaa aana inaapiwaatc, kaawiin waapihsiiwak; mihsawaa aana noontamowaatc, kaawiin nihsitohtansiiwak.”

Ciisahs kiiwiintank ehkitoomakaninik kihtikaanenhs awehcikewin

¹¹ “Mii'owe ehkitoomakahk o'o awehcikan, i'i hsa kihtikaanenhs, mii 'iweni Kishemanitoo otihkitowin.

¹² Awiya kaanoontank ehtipaatotenik Kishemanitoon oTipencikewinini, e'⁠nihsitohtansik itahsh, mii taapishkoo eshinaakositc ini kaakiih pankihsinkin kihtikaanenhsan i'imaa miihkanaank. Maciaya'aa pitakohshin e'⁠otaahpinank ini aasha kaakiih kihtikaatenikin ote'imaank awiyan citepwehtansinik, kaye tahsh cipimaaci'aahsiwimintc.

¹³ Ini tahsh kaakiih pankihsinkin kihtikaanenhsan kaashi ahsiniihkaak, mii 'i eshinaakositc a'a shemaak kaaotaahpinank Kishemanitoo otipaacimowin ahpii e'⁠noontank, aahpici e'⁠minwentank. Kaawiin itahsh waahsa cikotaawikiink. Aahpici tahsh acina ehta tepwehtam. Ahpii tahsh koci'ikoowisiwin e'otihsikotc, mii 'i eshi pakiciitc.

¹⁴ Ini tahsh kaakiih pankihsinkin kihtikaanenhsan kaashi okaawiminakashiihkaak, mii 'i eshinaakositc a'a kaanoontank Kishemanitoo otipaacimowin. E'⁠ani pimaatisitc itahsh onsaam e'⁠ocaanimentank, onsaam kaye ehsaakihtootc wenootisiwin, i'iweni kaye ahkiiwi ciihkentamowin, mii 'i kaawiin cini kiishikitc.

¹⁵ Ini tahsh kaakiih pankihsinkin kihtikaanenhsan i'imaa kaashi minohkamikaak mii 'i eshinaakositc awiya kaanoontank Kishemanitoo otipaacimowin. Miiwak iki weweni kaakihciwentamowaatc, kaamino kanawentamowaatc kaye ote'iwaank. Ehshashiipentamowaatc itahsh, mii 'i kaaonci nihtaawikihtoowaatc shiiwimiicim.”

E'awehcikaaketc waahsahkonencikan

¹⁶ Miitahsh o'o Ciisahs kaa'ani ihkitotc: “Kaawiin awiya otahtoohsiin waahsahkonencikan anaami ahkihkonk, komaa kaye anaami nipewinaahkonk. Wakici waahsahkonencikanaahkonk ohsha ishi pakitinikaate i'i waahsahkonencikan, iki kaapiishaawaatc ciwaapantamowaatc e'⁠waahsahkonenik.

¹⁷ Kahkina kekoon kaakaacikaatek, mii 'iwe piciinak cimohsheyaapancikaatek. Kiishpin kaye aanakii'-akwana'ikaatekipan kekoon, mihsawaa tanaakwan waahseyaank.

¹⁸ Ayaankwaamisik itahsh aaniin eshi pisintamek. Awiya hsa kekoonini kaa ayaatc, tamiinaa kekoon awahshime. A'a tahsh wiin kekoonini kaa ayaahsik, mihsawaa ko pankii kekoonenhsini eyaatc taotaahpinamawaa.”

Ciisahs kiiwiinaatc awenen omaamaan, wiicihkiwensiwan kaye

¹⁹ Ciisahs tahsh omaamaan, wiicihkiweya' kaye kiihpi takohshinoo' ewii'-waapamikotc, kaawiin kiikashki'ohsiiwa' onsaam aaniihsh kiihpaahtiinowa' awiya'.

²⁰ Peshik itahsh awiyan okii'ikoon: “Taka pinamaa, kimaamaa, kiicihkiweyak kaye akwaciink niipawiwak ewii'-waapamihkwaa,” okii'ikoon.

²¹ O'o tahsh Ciisahs kii'ishinahkwehtam: “Miiwak ohsha oko nimaamaa, niicihkiweyak kaye kaaishihcikewaatc aaniin eshinoontamowaatc Kishemanitoon ehkitonitc. Iki ohsha kaana'ihtawaawaatc kaaishihcikewaatc kaye ehkitonitc Kishemanitoon, mii ohsha 'awe nimaamaa, niicihkiweyak kaye.”

Ciisahs kiihkipihtinank kihcinootin i'imaa saaka'ikaniink

²² Aapintink tahsh ehkiishikaninik Ciisahs kiihpoosi ciimaan ekii'-wiiciiwikotc okihkino'amawaakana'. Miihsh kaa'inaatc: “Haw, taka ishaataa weti akaamink,” okii'inaa'. Miihsh kaa'ishi aashawa'amowaatc.

²³ Mekwaa tahsh ehpimaashiwaatc Ciisahs kii'nipaa piintoonak. Miitahsh ketahto kiihkihci pakamaaniman ekiihkihci mamaankaashkaanik. Kiihsaahsiika'okowak ekii'ani mooshkinepiik i'i ciimaan. Kahkina kii'naniisaanisiwak.

²⁴ Kii'ishaawak tahsh eshi nipaanitc Ciisahsoon ekii'-amaci'aawaatc e'⁠inaawaatc: “Okihkino'amaake aasha kekaa ninka nihsaapaawemin,” okii'inaawaan. Ciisahs tahsh kiihpasikwii ekiih kanootank kihci noontin, nipiini kaye kehci mamaankaashkaanik. Miitahsh kaa'ani ishi anwaanoowenik, wiinke tahsh kii'anwaahtin.

²⁵ Miihsh kaa'inaatc okihkino'amawaakana': “Aanti tahsh i'i kitepwehtamowiniwaa?” Wiinke tahsh kii'maamahkaatentamoo', ekiih sekisinitc ekii'-ayitinitc: “Kaanaka awenen tenowikwen wa'a inini. Ehkanootank kihci nootin, kaamamaankaashkaanik kaye, miihsh eshi na'ihtaakotc!”

Ciisahs kiipimaaci'aatc ininiwan kekishkaakonitc maciahcaahkwan

²⁶ Miitahsh kaa'ishi aashawa'amowaatc i'i Kaalaliiwi Saaka'ikan, ekii'ishi mishakaawaatc i'imaa Kerahsaawahkiink (Gerasenes).

²⁷ Ciisahs tahsh ehpi kapaatc, okiihpi anta nakishkaakoon peshik ininiwan ehkikishkaakonitc maciahcaahkwan i'imaa ootenaank e'⁠onciinitc. Aasha kinwesh ekiihpi onci kikihkonayehsinik, kaawiin kaye waahkaa'ikanink kii'ishitaahsiiwan. Ciipekamikonk kii'ishitaawan, eshi na'inimintc kaaniponitc kii'ishitaa.

²⁸ Ahpii tahsh a'a ini ewaapamaatc Ciisahsoon ehpiihtowetc kii'ishi shaakowe: “Kiin Ciisahs weKosihsimihk Kishemanitoo maawac kaaishpentaakositc. Aaniin waahtootawiyan? Kipakohsenimin cikakwaataki'ihsiwan,” okii'ikoon.

²⁹ Ciisahs iitok okiih kanoonaan ini maciahcaahkwan cisaakici nakanaanitc ini ininiwan. Mooshak ekii'-otihtinikonitc, mooshak kaye ekiih kanawencikaniwinitc. Kaye tahsh ekii'-mamaancikwahpinimintc sakaapaanan e'⁠aapataninikin, ekiih kihciosite'omintc kaye mihtikonk. Mooshak itahsh okiih piikopitooni. Maciahcaahkwan ekii'ishi wiihkoshkaa'ikonitc pikwacaya'iink.

³⁰ Ciisahs tahsh okii'ishi kakwecimaan: “Aaniin eshinihkaasoyan?” Miihsh kaa'ikotc: “Opaahtiino nintishinihkaas, aaniihsh nimpaahtiinomin,” okii'ikoon.

³¹ Ciisahs tahsh okiih pakohsenimikoo' ci‑ishinisha'waahsik kaashi wiimpaanik kaashi mishahkiiyaahsininik.

³² I'imaa tahsh newatatin kiihpaahtiinowak koohkoohshak ekii'-ontancikewaatc. Okiih pakohsenimikoo' itahsh Ciisahs cipakitinaatc i'i maciahcaahkwa' i'imaa koohkoohshink cishi piintikeshkaanitc. Miihsh kaakiih pakitinaatc.

³³ Miitahsh kaa'ishi nakanaanitc ini ininiwan, ekii'ani ishi piintikeshkawaanitc i'i koohkoohsha'. Miitahsh kahkina koohkoohshak i'imaa kaa'ishi naasipiipa'itiwaatc eshi kiishkaamatinaanik ekiih pahkopiipa'itiwaatc saaka'ikaniink. Kahkina tahsh kii'nihsaapaawewak.

³⁴ Ikiweniwak itahsh kenawenimaawaatc koohkoohsha' e'⁠waapantamowaatc o'o, kii'maaciipa'itiwak ekii'awi papaa tipaacimowaatc, ootenaahkank, i'imaa kaye waahkaaya'ii ahkiink.

³⁵ Pemaatisiwaatc tahsh kii'ishaawak ekii'anta waapantamowaatc aaniin kaa'inahkamikaninik. Okiihpi naasihkawaawaan Ciisahsoon, okii'-waapamaawaan kaye ini ininiwan kaakiih kikishkawaanihpan ini maciahcaahkwa' e'⁠namatapinitc eshi sitekaapawinitc Ciisahsoon. Kiihkikihkonayewan, kwayahk ekii'-inentaminitc. Miihsh kahkina kaakiih sekisiwaatc.

³⁶ Miitahsh iki kaakii'-waapantamowaatc o'o e'⁠inahkamikaninik okiih tipaacimaawaan ini ininiwan kaakiih kikishkawaanihpan maciahcaahkwan aaniin kaye kaa'ishi pimaaci'imintc.

³⁷ Miitahsh kahkina i'imaa kaakii'-ayaanitc Kerahsaa (Gerasenes) ahkiink kaakiihpi kanoonikotc ciani maacaatc, onsaam aaniihsh kiikihci sekisiwa'. Miitahsh Ciisahs kaa'ishi poositc ciimaan ekii'ani maacaatc.

³⁸ Ciisahs tahsh okiihpi pakohsenimikoon ini ininiwan maciahcaahkwa' kaakii'onci saakicinisha'omintc opimaatisiwininiink ekii'ikotc: “Taka pakitinihshin ciwiiciiwinaan,” okii'ikoon. Ciisahs tahsh okii'-maacinisha'waan ekii'inaatc:

³⁹ “Maacaan anikiiwen, cini wiintamaakeyan aaniin Kishemanitoo kaa'ishihcikehtamawihk,” okii'inaan. Miitahsh kaa'ani ishi maacaanitc ini ininiwan ekiih papaa tipaacimotc i'imaa misiwe ootenaank aaniin kaa'ishihcikehtamaakonitc Ciisahsoon.

Ciisahs kiihpimaaci'aatc ini ihkwesenhsan kaakii'niponihpan, kaye tahsh kii'minoayaa'aatc ihkwewan kaakiihtaankinikotc

⁴⁰ Ahpii kaahpikiiwe aashawa'ank i'i saaka'ikan, kiihpaahtiinowa' pemaatisinitc menwentaminitc e'⁠mishakaatc, aaniihsh kahkina okiih pii'ikoo'.

⁴¹ Peshik itahsh kiihpi takohshinoon ininiwan kaaniikaaniskaminitc i'i Coowa' otanami'ewikamikoni, Ceirahs (Jairus) eshinihkaasonitc. Eshi sitekaapawitc inahke ekii'-ahpakisonitc ehpakohsenimikotc ci'ishaatc otaawininiink.

⁴² Kii'mihci peshikowan iitok otaanihsan a'a inini ekii'-mitaahshiniisho pipoonwenitc (12), ewii'ani niponitc. Ciisahs tahsh e'⁠ani pimi ayaatc, wiinke okiih siincishkaakoo' kaakiih paahtiinonitc awiya'.

⁴³ Peshik itahsh ihkwe i'imaa mekweya'ii kii'ayaa mitaahshiniisho pipoon (12) ekii'-wiihsakentank emiskwiiwaahpinetc. Aanciko tahsh kii'wiihsakaahpine aanakii'-antawi'ikotc mashkihkiiwininiwa', ekiih caakinaatc kaye oshooniyaaman minihk eyaawaakopanen. Kaawiin awiyan okii kashki'ikohsiin ciminoayaatc.

⁴⁴ Wa'a tahsh ihkwe otaanaank inahke okii'ishi naasihkawaan Ciisahsoon ekii saaminank wanahkweyiik owakici kashkiikiiwinini. Miitahsh iko shemaak kaakiihpooni miskwiiwitc.

⁴⁵ Miihsh Ciisahs kaa'ishi kakwetwetc: “Awenen kaahsaaminitc?” Kahkina awiya' okii'-aanwehtaakoo'. Piitaroon (Peter) tahsh okii'ikoon: “Okihkino'amaake, kiwaapamaak iitok ehpaahtiinowaatc awiyak waahkaaya'ii kaasiincishkawihkwaa,” okii'ikoon.

⁴⁶ Miihsh Ciisahs kaa'ihkitotc: “Awiya ohsha ninkiih saaminik; ninkihkentaan nimashkawisiiwin ehsaaka'amoomakahk,” kii'ihkito.

⁴⁷ Wa'a tahsh ihkwe okiih kihkentaan awahshime ehkaaci ayaahsik, miihsh kaakiih piishaatc ehsekisitc ekii'-ahpakisotc enaahsamiinitc. Kiihtipaacimo kahkina awiya' enaahsamiinitc wekonen kaa'onci saaminaatc Ciisahsoon, aaniin kaye shemaak kaa'ishi minoayaatc.

⁴⁸ Miitahsh Ciisahs kaa'inaatc ini ihkwewan: “Nintaanihs, kitepwehtamowinink kitoonci minoayaa, mii 'i pisaan anishi maacaan.”

⁴⁹ Mekwaa tahsh Ciisahs ehtanwewehtootc, awiyan kiihpionci takohshinoon eshitaanitc ini ininiwan kaaniikaanishkaminitc i'i anami'ewikamik ekii'-ihkitonitc: “Aasha kii'nipo kitaanihs. Keko awahshime ontami'aahken a'a okihkino'amaake,” kii'ihkitowan.

⁵⁰ Ciisahs tahsh e'⁠noontank o'o, okii'inaan ini Ceirahsan: “Keko sekisihken, mihci tepwehtan, miihsh ciminoayaatc,” okii'inaan.

⁵¹ Ahpii tahsh ehtakohshinowaatc owaahkaa'ikaniniink, kaawiin awiyan okiih pakitinaahsiin ciwiici piintikemikotc, mii ehta Piitaroon (Peter), Cwaanan (John), Ciimisan (James) kaye. Okiih pakitinaan kaye ini otetemaan, ini kaye omaamaamaan wetaanihsinitc ini ihkwesenhsan.

⁵² Kahkina i'imaa kaakii'-ayaawaatc okii'-mawimaawaan ekii'onci mincinawesiwaatc ini ihkwesenhsan. Miihsh Ciisahs kaa'inaatc: “Keko mawihkek, kaawiin ohsha nipohsii, mihci nipaa iitok,” ekii'inaatc.

⁵³ Kahkina tahsh okiih paahpinotaakoo' aaniihsh okii kihkenimaani ekii'-niponitc ini ihkwehsenhsan.

⁵⁴ Miitahsh Ciisahs kaakiih sakinihkenaatc ihkwesenhsan ekii'inaatc: “Ihkwesenhs, wanishkaan,” ekii'inaatc.

⁵⁵ Shemaak tahsh kiihkiiwe pimaatisiwan ekii'-wanishkaanitc. Ciisahs tahsh okii'-anoonaa' i'imaa eyaanitc ciahshamaanitc ini ihkwesenhsan.

⁵⁶ Oniiki'ikomaa' itahsh kiikihci maamahkaatentamoo'. Ciisahs itahsh okiih kanoonaa' awiyan ciwiintamawaahsinik o'o kaakii'-ishihsenik.