ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 7 - Ojibwe Kihcimasina'ikan

Kiiminwaaci'imintc Shimaakanihshiiwikimaa otanohkii'aakanan

¹ Ahpii Ciisahs kaakii'ishkwaa wiintamawaatc kahkina onoweniwa' pemaatisinitc kii'ishaa Kaparniyamink (Capernaum) ootenaank.

² Kii'ayaakopan peshik shimaakanihshiiwikimaa ekii'-ayaawaatc anohkii'aakanan wiinke ekiihkihci saaki'aatc, wiinke tahsh ekii'-aahkosinitc aasha kekaa ciniponitc.

³ Ahpii shimaakanihshiiwikimaa enoontank pehsho ehtanaacimimintc Ciisahsoon okii'-ishinisha'waa' aaninta kaaniikaanentaakosinitc Coowa' cikakwecimaanitc Ciisahsoon cipiishaanitc cipiminwaaci'aanitc otanohkii'aakanan.

⁴ Ekiihpi naasihkawaawaatc Ciisahsoon enikohk okiih pakohsenimaawaan: “Tepwe teahpiihtentaakosi o'o ci'ishihcikehtamawatc.

⁵ Aaniihsh wiin nisaaki'ikonaan kaaCoowiwiyaank, wiin kaye kaakii'-oshihtamawiyamintc anami'ewikamikoni,” okii'inaawaan.

⁶ Miitahsh Ciisahs kaakii'ani wiiciiwaatc aasha pehsho e'⁠ani otihtaminitc waahkaa'ikanini. Miihsh shimaakanihshiiwikimaa kaakii'-ishinisha'waatc seyaaki wiiciiwaatc o'o ci'awi inaanitc: “Tepencikeyan, keko wiin keyaapi mikoshkaaci'itisohken. Kaawiin iitok nintepakentaakosihsii cikii piintikeyan o'omaa niwaahkaa'ikanink.

⁷ Kaawiin kaye nintinenitisohsii ehtepakentaakosiyaan cikiihpi naasihkawinaan. Mihci ihkiton ehta, miihsh ciminoayaatc nintanohkii'aakan.

⁸ Mii 'i keniin eshinaakosiyaan inini ekii'-miinshitc tipencikewin nintookimaamak itahsh ninkanawaapamikook. Nintayaawak kaye shimaakanihshak kaakanawaapamakwaa. O'o peshik kii'inak: ‘Maacaan,’ mii 'i eshimaacaatc. Miinawaa kotak kii'inak: ‘Piishaan,’ mii 'i eshi piishaatc. Nintanohkii'aakan kaye kii'inak: ‘O'o ishihciken,’ mii piko 'i entootank.”

⁹ Ciisahs tahsh kii'maamahkaatentam ahpii kaa'noontank o'oweni. Okiih kwehkikaapawihtawaa' ekii'inaatc kaapaahtiinonitc kaapiminisha'okotc: “Kiwiintamawininim, kaawiin wiihkaa awiya nimpimihkawaahsii o'o nahke cishi tepweyentank o'omaa Isriyal ahkiink.”

¹⁰ I'i tahsh kaakiih piicinisha'ontwaapan ahpii ehkiiwewaatc owaahkaa'ikaniniink shimaakanihshiiwikimaan, miihsh kaakii'-mihkawaawaatc ini anohkii'aakanan eminoayaanitc.

Ciisahs kiihpimaaci'aatc kaakii'niponihpan okosihsimaan

¹¹ Wiipa naake Ciisahs kii'ishaa ootenaank Nen (Nain) eshinihkaatenik ewiiciiwikotc okihkino'amawaakana' i'i kaye kaapaahtiinonitc pemaatisinitc.

¹² Aasha tahsh e'⁠ani otihtank eshi ishkwaantemiwaninik i'i ootena, na'itaak okii'-mekwaashkaan ena'inikewintc. A'a hsa tahsh inini kaakii'-nipotc iinsan kii'mihci peshiko e'⁠okosihsimikotc kiiwaacihkwewan. Kiihpaahtiinowa' awiya' e'⁠wiiciiwikonitc ootenaank wenciinitc.

¹³ Ahpii tahsh kaaTipenciketc ewaapamaatc ini ihkwewan aahpici okiih koohpaasinawaan, miihsh kaa'inaatc: “Keko mawihken.”

¹⁴ Miitahsh pehsho kaakii'-ishaatc, ekiih saaminank pimaahkwa'ikan. Miihsh kaakiih kipihciinitc i'i kaapimiwitoonitc pimaahkwa'ikan. Ciisahs tahsh kii'ihkito: “Oshkiniiki, wanishkaan kitinin.”

¹⁵ Miitahsh ini kaakii'-niponihpan kiionci mayaawapiwan, kaye tahsh ekii'maacii kakitonitc. Ciisahs tahsh okii'ishi pakitinaan ini ininiwan eshi ayaanitc omaamaani.

¹⁶ Kahkina tahsh okii'-mooshkineshkaakonaawaa kohtaanentamowin, ekii'-nanaahkomaawaatc Kishemanitoon ekii ihkitowaatc: “Kishemanitoo kimiinikonaan kehci inentaakosintc kenootamaakotc eshi ayaawank,” miihsh kaye kaaihkitowaatc: “Kishemanitoo kiihpiishaa ewiih pimaaci'aatc opimaatisiima'.”

¹⁷ I'i hsa tahsh Ciisahs enaacimintc kii'noontaakaaniwanini misiwe Cootiiya (Judea) ahkiink, misiwe kaye waahkaaya'ii i'imaa ahkiink.

Cwaan okihkino'amawaakana' kiipikakwecimaanitc Ciisahsoon

¹⁸ Okihkino'amawaakana' itahsh Cwaan (John) okii'-wiintamaakoo' kahkina onoweniwan.

¹⁹ Miihsh kaakii'-antomaatc niishin (2) okihkino'amawaakana' ekii'-ishinisha'waatc ciawi kakwecimaanitc kaaTipencikenitc: “Kiin ina a'a kaaikooyan kaawiihpi takohshink, komaa kaye kotak awiya cipii'intipan?”

²⁰ Ahpii ehpi naasihkawaawaatc Ciisahsoon kii'ihkitowak: “Cwaan Siika'antaakewinini ninkiih piicinisha'okonaan cikakwecimikooyan kiishpin kiin a'a kaaikooyan kaawiihpi takohshink komaa kaye kotak awiya cipii'intipan?”

²¹ Mii'iwe ahpii Ciisahs kaakii'-minwaaci'aatc niipiwa' pemaatisinitc entahso inaahpinenitc, aaniin kaye eshi aahkosinitc. I'i kaye kekishkaakonitc maciahcaahkwa'. Kaye tahsh ekii'-waapi'aatc niipiwa' awiya' kaawaapihsinik.

²² Okii'aashitemaa' Cwaanan kaakiih piicinisha'waanitc: “Kiiwek, wiintamawihk Cwaan wekonen kaakii'-waapantamek, kaakii'-noontamek kaye. Ewaapi'intwaa iki kaawaapihsikwaa, iki kaye ehpimohse'intwaa kaapimohsehsikwaa, iki tahsh kaye wemikiiwaahpinewaatc epehki'intwaa. Ehkiiwe pimaatisii'intwaa kaye kaanipowaatc, iki kaye ketimaakisiwaatc e'⁠wiintamawintwaa minwaacimowin.

²³ Aaniin keahpiihci minwentamowaatc ikiweniwak kaa aanwehtansikwaa ehtashimikoowak.”

²⁴ Ahpii tahsh Cwaanan kaakiih piicinisha'waatc ekii'-maacaanitc Ciisahs okii'maacii wiintamawaa' kaapaahtiinonitc awiya' ehtashimaatc Cwaanan: “Ahpii kaakii'-ishaayek Cwaan kaashi ayaatc pikwatahkiink wekonen kaa'inentamek ciwaapantamek, cipeshikwahkitek ina mashkohsi ewahkawaahsink?

²⁵ Wekonen tahsh kaa'anta waapantamek kii ishaayek? A'a ina inini wenishihshininikin okikishkikanan? Miiwak iitok iki tino kaakihci minohkonayewaatc kaawenooci pimaatisiwaatc eshitaawaatc okimaawikamikonk.

²⁶ Wiintamawihshik, wekonen kaa'anta waapantamek weti kii‑ishaayek? Awiya na kaakanootamawaatc Kishemanitoon? Miitahsh eshi wiintamawinakook, kikii'-waapamaawaa iitok awiya nawac kehci inentaakositc ahpiihc wiin iki kenootamawaawaatc Kishemanitoon.

²⁷ Cwaan ohsha kaatashimintc aaniin Kihcimasina'ikan kaaihkitoomakahk: ‘Kishemanitoo ihkito, ninka ishinisha'waa ninka noocikehtamaake ciniikaaniitc ciahpiihci oshihtamawihk keani ishaawatc,’ ihkitoomakan.

²⁸ Kiwiintamawininim tahsh Cwaan maawac kihci inentaakosi ahpiihc kotak ininiwak kaakiihpi pimaatisiwaatc. Shaakooc tahsh a'a maawac pankii kaainentaakositc Kishemanitoo otipencikewinink nawac kihci inentaakosi ahpiihc wiin ini Cwaanan,” kii'ihkito.

²⁹ Ahpii tahsh iki pemaatisiwaatc, iki kaye kaamaawantoonaawaatc tipa'ikewishooniyaan (tax) o'o enoontamowaatc, mii 'i kaakiih kihkentamowaatc Kishemanitoon kwayahk e'⁠inaahkoniwenitc, ekiih siika'antaakowaatc Cwaanan.

³⁰ Iki tahsh Perahsiik (Pharisees) iki kaye kaamisiwe kihkentamowaatc Onahshowewin okii'-aanwehtawaawaan Kishemanitoon eshi antawentaminitc, kaawiin kaye kii'inentansiiwak cisiika'antaakowaatc Cwaanan.

³¹ Ciisahs kii'ani-'ihkito: “Aaniin itahsh keihkitoyaampaan iinsan e'⁠ishinaakosiwaatc oko ininiwak noonkom kaapimaatisiwaatc? Aaniin tahsh enentaakosiwaatc?

³² Miihsh enentaakosiwaatc taapishkoo apinoonciishak kaa‑apiwaatc kaashi ataawaaniwaninik. Miihsh o'o eshi shaahshaakowaanitiwaatc: ‘Kikiih kitohcikehtamaakoom wiitikewi kitohcikewin kaawiin cikii'onci niimiyek, kaye tahsh ninkii'-nikamomin na'inikewi nikamowinan kaawiin tahsh cikiiwii'-mawiyek,’ ihkitowak.

³³ Inashke Cwaan Siika'antaakewinini kiihpiishaatc kaawiin kii'onci wiihsinihsii, kaawiin kaye kii'onci minihkwehsii shoominaapo. Miitahsh kaakii'inek: ‘Okikishkaakoon maciahcaahkwan.’

³⁴ Ini tahsh wiin Inini oKosihsan kiihpiishaawan ehpi wiihsininitc, kaye tahsh ehpi minihkwenitc. Miihsh enimek: ‘Kanawaapamihk a'a maawac enihtaa wiihsinitc, kaye enihtaa minihkwetc, ehsaaki wiiciiwaatc kaamaawantoonaanitc tipa'ikewishooniyaan, i'i kaye omacitootamoo',’ mii'i enek.

³⁵ Ikiweniwak tahsh kaaotaahpinamowaatc Kishemanitoon okakiihtaawentamowinini, miiwak iki kaanaakohtoowaatc ehkwayahkwaanik,” okii'inaa'.

Kiiantomikotc Perahsiin ciwiiciwiihsiniimikotc

³⁶ Peshik tahsh Perahsiin (Pharisee) okii'-antomikoon ci'antawi wiici wiihsiniimaatc. Miihsh Ciisahs kaakiih piintiketc Perahsiin owaahkaa'ikaniniink ekii'wiici wiihsiniimaatc, ekii'-ohpimehshink tapahsi toopowinaakonk.

³⁷ I'imaa tahsh ootenaank kii'ayaa ihkwe maci ishiwepisiwinink eshi pimaatisitc. Kii'noontam iinsan a'a ihkwe Ciisahsoon ewiihsininitc i'imaa Perahsiin owaahka'ikaniniink. Miihsh kaakiih piitootc minaako'on ahsiniiwi waapaapihko omootayaapihkonk emoshkinenik.

³⁸ Kiihpiishaa, otaanaank inahke ekii'ishi niipawitc Ciisahsoon eshi sitehshininitc. Kii'mawi, otooncikawaapiwinan ekii'-aapacihtootc ehkisiipiikisitenaatc. Wiinisihsan itahsh okii'-aapacihtoonan ehpaankwa'ank ositini. Miihsh kaa'ishi ociimaatc ositiniink, ekiih siikinank kaye minaako'on ositiniink.

³⁹ Iniweniwan itahsh Perahsiin Ciisahs kaakii'-antomikotc ciwiici wiihsiniimaatc ahpii ewaapamaanitc ihkwewan eshihcikenitc kii'inentamoon: “Kiishpin wa'a inini tinowihpan Kishemanitoon kaakanootamawaatc otaa kihkenimaan aweneniwinitc ini ihkwewan kaasaaminikotc. Otaa kihkenimaan iitok e'⁠maci ishi wepisinitc.”

⁴⁰ Miitahsh Ciisahs o'o kaa'inaatc: “Saaiman (Simon) kekoon kiwii'inin,” okii'inaan. “Haw, wiintamawihshin waa'ishiyan,” okii'ikoon.

⁴¹ Miihsh kaa'inaatc: “Kii'ayaawak iinsan niishin (2) ininiwak ekii'-masina'amawaawaatc kaamasina'ike'iwenitc shooniyaan. A'a peshik okii'-masina'amawaan minihk naanwaahk (500) waapaapihko shooniyaanhsa', a'a tahsh kotak naanimitana (50) ehta.

⁴² Kaawiin tahsh okiih kashkihtoohsiinaawaa cikiiwe tipa'amawaawaatc. Miihsh kaamasina'ike'iwenitc kaakiih kisii'amaakowaatc ehpoonentamaakowaatc omasina'ikewiniwaan. Awenen itahsh enentaman maawac kesaaki'aatc,” okii'inaan.

⁴³ Miitahsh kaa'ikotc: “Mii 'i enentamaan, a'a maawiin peshik niipiwa' kaakiih poonentamawintc.” “Kitepwe,” kii'ihkito Ciisahs.

⁴⁴ Miitahsh kaa'ishi kwehkihkwenitc ekiih kanawaapamaatc ini ihkwewan. Miihsh kaa'inaatc Saaimanoon: “Kiwaapamaa na wa'a ihkwe? Ninkiihpi piintike kiwaahkaa'ikanink kaawiin tahsh kitoonci miinshihsii nipi cikisiipiikisiteyaan. Wa'a tahsh wiin ihkwe okisiihsipatoonan ninsitan osipiinkwaanan eaapacihtootc, wiinisihsan kaye ehpaakwa'ikaaketc.

⁴⁵ Kaawiin kaye kikii'onci ociimihsii ahpii kaapiintikeyaan. Wa'a tahsh wiin ihkwe kaawiin onci kipihciihsii e'⁠ayociintank nisitinan ahpii kaahpiintikewak.

⁴⁶ Kaawiin kanake kikiihsiikinansiin Aalip (Olive) tino pimite nihtikwaanink. Wa'a tahsh wiin ihkwe okiih siikinaan minaako'on nisitink.

⁴⁷ Kiwiintamawin tahsh i'iweni okihci saaki'iwewin mii 'imaa wenci kihkentaakwaninik ekiih poonentamawintc niipiwa' omacitootamowinan. Awiya tahsh wiin pankii ehta kaapoonentamawintc, pankii ehta onaakohtoon saaki'iwewin,” kii'ihkito.

⁴⁸ Miihsh kaa'inaatc ini ihkwewan: “Kimacitootamowinan kipoonentamaakoo.”

⁴⁹ Kotak tahsh iki kaakii'-apiwaatc toohpowinaahkonk kii'ayitiwak: “Awenen itahsh wa'a kaapoonentamaaketc macitootamowinan?” kii'ihkitowak.

⁵⁰ Miitahsh Ciisahs kaa'inaatc ini ihkwewan: “Kitepwewakentamowin kipimaaci'ikoon. Mii 'i pisaan anishi maacaan,” okii'inaan.