ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 6 - Ojibwe Kihcimasina'ikan

Ehkakwecimintc i'iwe Anwepiiwi kiishikan

¹ Ciisahs ehpimohsekopanen i'imaa pahkweshikaniwi kihtikewinink, mekwaa e'Anwepiiwi kiishikaninik, okihkino'amawaakana' itahsh okiih ciihshipinaani kaaishi ohtikwaaniwaninikin ini pahkweshikaniwi kihtikaanan, miitahsh kaa'ishi shikonaminitc oninciiniink ekii'-miicinitc.

² Aaninta tahsh Perahsiwak (Pharisees) kii'ihkitowak: “Aaniin wenci ishihcikehsiwek kaainahtek i'i Inaahkonikewin kekiihtootamekipan e'⁠Anwepiiwi kiishikahk?”

³ Ciisahs itahsh okii'ishi nahkwehtawaa': “Kaawiin ina kikihkentansiinaawaa eshipii'ikaatek aaniin Tepit (David) kaa'ishihciketc ahpii kiinoonteskatetc, i'i kaye owiiciiwaakana'?

⁴ Ekiih piintiketc kihci pakwaanekamikonk Kishemanitoon kaaishi anami'ehtawimintc ekii'-otaahpinaatc pahkweshikanan ekii'-amwaatc, ekii'-ahshamaatc kaye kaawiiciiwikotc kaapakitinamawimintc Kishemanitoon Kaawiin iitok Inaahkonikewin ihkitoomakahsinoon i'iwe cikii'-ishihcikehpan. Anami'ewikimaak iitok ehta cikii'-amwaawaahpan ini pahkweshikanan,” okii'inaa'.

⁵ Miitahsh eni'inaatc: “Inini oKosihsan ohsha otipentaan kaa⁠Anwepiiwi kiishikaninik.”

Kiiminwaaci'aatc ininiwan kaakii'mamaancikoshkaanitc oninciinink

⁶ Miinawaa kotak e'Anwepiiwi kiishikaninik Ciisahs kiihpiintike anami'ewikamikonk ehkihkino'amaaketc. Kii'ayaawan hsa i'imaa ininiwan okihcinincini ekii'-mamaancikoshkaanitc.

⁷ Iki tahsh kaakihkino'amaakewaatc Onahshowewin iki kaye Perahsiik (Pharisees) okiihkakwe kaahcici'aawaan Ciisahsoon taka ciminoayaa'iwenitc Anwepiiwi kiishikaninik. Okiihkakwe mihkaanaawaa kekoon keonci anaamimaawaatc.

⁸ Ciisahs itahsh okiih kihkenimaa' i'i kaa'ishi naanaakatawentaminitc. Miihsh kaakiih kanoonaatc ini ininiwan kaamamaancikoshkaanik oninciini: “Pasikwiin, piishaan o'omaa niikaanaya'ii,” okii'inaan. Miitahsh kaaishi pasikwiinitc ekiihpi niipawinitc.

⁹ Miitahsh kaaishi kanoonaatc kaakihkino'amaakenitc Onahshowewin i'i kaye Perahsii': “Miitahsh eshi kakweciminakook, aaniin enahtek Inaahkonikewin keishihcikenaaniwankipan Anwepiiwi kiishikahk? Awiya ciminotootawintipan, komaa kaye cimaanshi tootawintipan. Cipimaacihcikaatekipan pimaatisiwin, komaa kaye cinihshiwanaacihcikaatenik?” okii'inaa'.

¹⁰ Miitahsh misiwe kaakii'-ayinaapitc kahkina ekiih kanawaapamaatc i'imaa kaa‑ayaanitc miihsh kaa'inaatc ini ininiwan: “Niiminihkenin.” Miitahsh kaa'ishi niiminihkeninitc, wiinke ekii'-minoayaanik oninciini.

¹¹ Miitahsh kaaishi mooshkineshkaakonitc kihci nishkaatisiwin ekii'ani maacii tashintaminitc aaniin kekiih tootawaawaahpan Ciisahsoon.

Ciisahs kiionaapamaatc mitaahshiniishin ishinisha'waakana'

¹² Mii 'iwe ahpii Ciisahs kaakii'-ishaatc wakitatin ekii'-antawi anami'aatc. Kapetipihk tahsh weti kii'ayaa ekii'-anami'ehtawaatc Kishemanitoon.

¹³ Ahpii tahsh e'⁠ani kiishikaninik okii'-antomaa' pehshoo cipiishaanitc okihkino'amawaakana'. Mitaahshiniishin (12) ekii'-otaahpinaatc ishinisha'waakanak kaakii'-ishinihkaanaatc.

¹⁴ Miitahsh o'o kaa'ishi nihkaasowaatc kaakii'-oneninimtwaa. Saaiman (Simon) mii 'awe Piitar (Peter) kaakii'-ishinihkaanikotc Ciisahsoon. Ini tahsh kaye Saaiman wiicihkiwensiwan Entaroo (Andrew). A'a kaye Ciimis (James), Cwaan (John) kaye, Pilap (Philip) kaye, a'a kaye Paarhtaalamiyo (Bartholomew).

¹⁵ Maahtiyo (Matthew) tahsh, a'a kaye Twaamahs (Thomas), Ciimis (James) wetetetc Aalipiyahsan (Alphaeus), a'a kaye Saaiman (Simon) kaakiih takoinintc kaawiihkakwe aancihsehtootc okimaawiwin.

¹⁶ A'a kaye Cootahs (Judas) wetetetc Ciimisan (James). A'a kaye kotak Cootahs Iskaariyat (Judas Iscariot) kaakii'-mamishimaatc Ciisahsoon.

Ciisahs kiihkihkino'amaaketc kaye kiiminwaaci'iwetc

¹⁷ Ahpii tahsh Ciisahs ehpi niihsaamaciwe wiiciiwaatc otishinisha'waakana', mii 'i kaa'ani ishi kipihcikaapawitc eshi tahtakwaanik. Miitahsh i'imaa aahpici kiihpaahtiinowa' kotak okihkino'amawaakana'. Aahpici kaye ehpaahtiinonitc awiya' i'imaa ekii'-ayaanitc misiwe Cootiiya (Judea) ekiih pionciinitc, kaye tahsh Ceroosalamink (Jerusalem). Weti kaye kiihpionciiwa' naanew kihcikamiink ootenawan eyaanikin eshinihkaatenikin Tayar (Tyre), i'i kaye Saaitan (Sidon).

¹⁸ Okiihpi anta pisintawaawaan Ciisahsoon, kaye tahsh ciminwaaci'intwaa aaniin kaa'ishi aahkosiwaatc. Miihsh kaye ikiweniwak kaamacitootaakowaatc maciahcaahkwa' kewiinawaa kii'minwaaci'aawak.

¹⁹ Kahkina tahsh awiyak okiih kakwe saaminaawaan Ciisahsoon. Aaniihsh esaaminaawaatc mii 'imaa kaa'onciimakaninik mashkawisiiwin kaakii'-antawi'ikowaatc.

Aaninta keshiminwentamowaatc, aaninta kaye keshikakwaatakentaakosiwaatc

²⁰ Miitahsh Ciisahs kaa'ihkitotc ehkanawaapamaatc okihkino'amawaakana': “Kishawentaakosim kiinawaa kaakitimaakentamek kiinawaa kitipinawewisim Kishemanitoo otookimaawiwin.

²¹ “Kishawentaakosim kiinawaa noonkom kaanoonteskateyek, piciinak kika tewiihsinim. “Kishawentaakosim kiinawaa noonkom kaamawiyek, piciinak kika paahpim.

²² “Kishawentaakosim ahpii awiyak kiishiinkeniminekwaa, kaye tahsh kiiwiiciiwihsinowinekwaa, kiimaci ininekwaa kaye, noociko kaye kii‑itamowaatc kiwiinsowiniwaa ini onci Inini Okosihsan.

²³ Minwentamok ahpii o'owe ishihseyek, kaye tahsh ciniimiyek keahpiihci ciihkentamek aaniihsh kihci ontisiwin kikanawentamaakoom kihcikiishikonk. Aaniihsh mii'iwe peshikwan kaahpi tootawintwaa okehte kihciaya'aamiwaapanii' ikiweniwak kaakiih kanootamawaanitc Kishemanitoon.

²⁴ “Aaniin iitok keahpiihci kakwaatakentaakosiyek, kiinawaa noonkom kaawenootisiyek; aasha kaawentahk pimaatisiwin ekiihpi ayaayek.

²⁵ “Aaniin iitok keahpiihci kakwaatakentaakosiyek kiinawaa noonkom kaatewiihsiniyek: piciinak ahpii kika noonteskatem. “Aaniin iitok keahpiihci kakwaatakentaakosiyek kiinawaa noonkom kaapaahpiyek: piciinak ohsha kika moohkonem, kika mawim kaye.

²⁶ “Aaniin iitok kiinawaa keahpiihci kakwaatakentaakosiyek kahkina awiyak minotashiminekwaa. Mii 'i iitok peshikwan kaa'inaawaatc okehte kihciaya'aamiwaa' kaakii'-inwaasonitc ehkanootamawaanitc Kishemanitoon.”

Cisaaki'intwaapan kaashiinkenimiwewaatc

²⁷ “Miitahsh eninakook kaapisintawiyek: saaki'ihkwak iki kaashiinkeniminekwaa, minotootawihkwak kaye iki kaanishkeniminekwaa.

²⁸ Kiishpin awiya inihk: ‘Kinantawenimin cimacihseyan,’ kiin tahsh kikainaa: ‘Kinantawenimin Kishemanitoo cishawenimihk.’ Anami'ehtamawihkwak iki kaamacitootawinekwaa.

²⁹ Kiishpin awiya pahsiinkwekanaamihk pakitinamaw pisaan kaye kwehkinahke ci‑ishi pahsiinkwekanaamihk. Kiishpin awiya mahkamihk kipinsihkawaakan, pisaan kaye kika miinaa kipapakiwayaan.

³⁰ Miinsh kahkina awiya kekoon kakwecimihk. Kiishpin awiya mahkamihk kekoon kaatipentaman keko kiiwe antotamawaahken.

³¹ Ishitootamawihkwak kotak awiyak kaaishi antawenimekwaa citootawinekwaa.

³² “Kiishpin ehta ehsaaki'ekwaa ikiweniwak kaasaaki'inekwaa, wekonen tahsh keonci shawentaakosiyekipan? Inashke kewiinawaa kaamacitootamowaatc osaaki'aawaan ini kaasaaki'ikowaatc.

³³ Kiishpin kaye minotootawekwaa ehta ikiweniwak kaaminotootawinekwaa wekonen tahsh keonci shawentaakosiyekipan? Mii hsa kewiinawaa peshikwan kaamacitootamowaatc eshihcikewaatc.

³⁴ Kiishpin kaye awi'ekwaa ehta ikiweniwak kaatanenimekwaa cikiiwenamawinekwaa, wekonen tahsh keonci shawentaakosiyekipan. Miihsh kewinawaa kaamacitootamowaatc eshi awi'aawaatc kotak kaamacitootaminitc peshikwan ci'ishi kiiwe miinintwaa minihk kaakii'-awi'iwewaatc.

³⁵ Saaki'ihkwak itahsh iki kaashiinkeniminekwaa, minotootaakek kaye. Pisaan kaye awi'iwek, keko kekoon kiiwe antawentankek. I'i tahsh kitipa'amaakoowiniwaa takihci wenootan. Miihsh keikooyek e'⁠oniicaanihsiminek Maawac kaaIshpentaakositc Kishemanitoo. Wiin iitok kaye kaaminotootawaatc awiya' kaatepinawewisihsinik, i'i kaye kaamaci ishiwepisinitc.

³⁶ Koohpaatenimiwe Koohsiwaa, miitahsh kekiinawaa ishi koohpaatenimiwek.”

Keko onahshowehkek

³⁷ “Keko onahkonaahkekwaanik awiyak, kaawiin itahsh Kishemanitoo kika onaahkonikohsiiwaa. Keko kaye inaahkekwaanik awiyak Kishemanitoon cinipoomikowaatc, kaawiin itahsh kekiin Kishemanitoo kika nipoomikohsii. Poonentamaw kotak awiyak, miitahsh kekiin cipoonentamawihk Kishemanitoo.

³⁸ Miikiwek, miitahsh cikiiwe miinikoowisiyek. Tamino mooshkine i'i kemiinikooyek, cikinikawi wepinikaatek, kaye tahsh cimaamaakonikaatek, cionsaamashkinek i'iwe kaashina'inikeyek. Aaniihsh minihk iko awiyak kaatootamawekwaa mii 'iwe kewiin minihk Kishemanitoo ketootamawinek.”

³⁹ Miitahsh Ciisahs okii wiintamawaa' o'owe awehcikewin: “Otaa kashkihtoon ina awiya kaawaapihsik ciniikaaniihtamawaahpan kotak ini kaawaapihsinik? Minciniish iitok taapiintaanihkaanehsewak.

⁴⁰ Kihkino'amawaakan kaawiin nawac kihkentaasohsii ahpiihc wiin ini kaakihkino'amaakotc. Shaakooc tahsh wiin a'a kaakihkino'amawintc ahpii tekiishihtootc okihkino'amaakoowin, miihsh peshikwan kewiin keahpiihci kihkentaasotc taapishkoo ini kaakihkino'amaakotc.

⁴¹ “Wekonen wenci kanawaapantamowatc kaapisinitc kiicihkiwensi oshkiinshikonk, kiin itahsh wiin ekihkentansiwan kihcimihtik e'⁠ayaak kishkiinshikonk?

⁴² Aaniin tahsh wenci kashkihtooyan e'⁠inatc kiicihkiwensi: ‘Niicihkiwensi pakitinihshin ciotaahpinamaan i'iwe kaapisiniyan,’ kiin itahsh e'⁠waapantansiwan i'i kihcimihtik kishkiinshikonk kaa'ayaak? Kiin kaaminwaatisiihkaasoyan pinamaa otaahpinan i'i mihtik kishkiinshikonk kaa'ayaak, miihsh payesh ciwaapiyan ciotaahpinamowatc kaapisinitc kiicihkiwensi oshkiinshikonk.”

Mihtik oncikihkenimaakaniwi eshinihtaawikihciketc

⁴³ “Kaaminonihtaawikitc mihtik kaawiin macimiiniwihsii. Kaamacinihtaawikitc mihtik kaawiin onihtaawikihtoohsiinan minomiinan.

⁴⁴ Entahshitc mihtik onci kihkenimaakaniwi aaniin eshinaakwaninik omiiniman kaanihtaawikihtootc. Kaawiin pemaatisiwaatc otoontinansiinaawaan pik tinowiminan i'imaa kawiminakishiiwaahtikonk, komaa kaye shoominaahtikonk.

⁴⁵ Minokekoon onciimakanini i'imaa opimaatisiwinink a'awe inini kaamino pimaatisitc aaniihsh kaaishi mooshkineshkaakotc mino kekoon ote'ink naakwanini. Miinawaa maci kekoon tahsh wiin onciimakanini i'imaa awiya kaamaci pimaatisitc aaniihsh kaaishi mooshkineshkaakotc maci kekoonan ote'ink kaanaakwaninik aniihsh inini ihkitoomakanini otoon kaaishi mooshkinenik ote'ink.”

Ciisahs e'awehcikaaketc niishin ininiwa' kaawaahkaa'ikenitc

⁴⁶ “Wekonen wenci ishinihkaashiyek ‘Tepencikeyan, Tepencikeyan!’ e'⁠ishihcikehsiwek itahsh kaaininakook?

⁴⁷ Awenen hsa piko kaapinaasihkawitc, kaa'ishihciketc itahsh aaniin eshi noontank nintihkitowinan, miihsh o'o eshinaakositc.

⁴⁸ Taapishkoo inini kaaoshihtootc waahkaa'ikan, anaamink kaainaanihketc eshi ahsiniihkaanik. Miihsh i'imaa kihtahsiniink eshi onaahkosiciketc. Ahpii tahsh siipi kiimooshka'ank, kaawiin ciwahkawisek i'i waahkaa'ikan ahpii aanakiiocihcipiik aaniihsh kwayahk kii'onahkicikaate.

⁴⁹ A'a tahsh wiin kaanoontank nintihkitowinan kaa'ishihcikehsik itahsh ehkitowak, mii 'i eshinaakositc taapishkoo inini kaaonaahkohsitootc waahkaa'ikan eshi ahsiniihkaahsininik. Ahpii tahsh kiinihkipiik, kiiani ocihcipiik i'iwe waahkaa'ikan shemaak iko takawihse cipiisihsek.”