ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 5 - Ojibwe Kihcimasina'ikan

Ciisahs nihtam kiiantomaatc awiyan keokihkino'amawaakanitc

¹ Peshikwa Ciisahs mekwaa e'⁠niipawitc i'imaa kohpaya'ii Kenehsarit (Gennesaret) Saaka'ikaniink, awiya' kaapaahtiinonitc okii'-miiwishkaakoo' ehpisintaakotc ewiintamawaatc Kishemanitoon otihkitowinini. Ehkopiinaanik kii'ishiniipawi.

² Okii'-waapantaanan niishin (2) ciimaanan ecehkihsininikin ciikipiik, opakitawaa' ekii'-nakataminitc iinsan, ekii'anta kisiihsipanaanitc otahsapiini.

³ Miitahsh kaa'ishi poositc i'i peshik ciimaan, Saaimanoon (Simon) tepentaminitc. Miitahsh kaa'inaatc: “Niminaawepinan pankii.” Ciisahs piintoonak kii'namatapi ekii kihkino'amawaatc kaapaahtiinonitc pemaatisinitc.

⁴ Ahpii tahsh kaaishkwaa kakitotc, mii 'i kaa'inaatc Saaimanoon: “Niminaaweya'ii kaa‑ahkokiishkaayawaak, mii weti ishi pahkopii'o kitahsapiim, cipita'anaayan kiikooyak.”

⁵ Miitahsh kaa'ikotc: “Okihkino'amaake kapetipihk ohsha nintaanakiih kihcianohkiimin ehpakita'waayaank. Kaawiin kekoon nintoonci pita'anaahsiimin. Kiishpin tahsh wiin pakita'waan ishiyan, miinawaa ninka pahkopii'waa nintahsapiim.”

⁶ Miitahsh kaa'ishi pakita'waawaatc. Niipiwa' kiikooya' ekiih pita'anaawaatc, miihsh kaakii'maacii piikoshkoosonitc otahsapiiwaa'.

⁷ Okii'-waahta'amawaawaa' itahsh owiiciiwaakaniwaa' kotak ciimaanink metwe ayaanitc cipiantawi wiici'ikowaatc. Miitahsh kaa'ishi piishaanitc ehpi wiici'ikowaatc emaamawi anohkiiwaatc e'⁠kii mooshkina'aawaatc kiikooya' niishoonak. Miihsh kaakii'ani konsaapiinikin ociimaaniwaan, kaa'ahpiihci kihci pita'anaawaatc.

⁸ Ahpii tahsh Saaiman Piitar (Simon Peter) kaa'waapantank aaniin kaa'ishihsenik kii'ociciinkwanapihtaa enaahsamiinitc Ciisahsoon. Miihsh kaa'inaatc: “Tepencikeyan niin hsa wiinke nimacipimaatis. Ishinaakwan hsa cinakashiyampan.”

⁹ Aaniihsh wiinke kiikihci maamahkaatentam, i'i kaye kahkina kaakiihpi wiici'ikotc, aaniin minihk kaa'ahpiihci kihci pita'anaawaatc.

¹⁰ Miitahsh peshikwan iki kaa'inentamowaatc Ciimis (James), a'a kaye Cwaan (John) kaaokosihsimikowaatc Sepatiin (Zebedee). Miiwa' iitok o'o Saaiman (Simon) kaakii'-wiici'ikotc. Miitahsh Ciisahs kaa'inaatc Saaimanoon: “Keko sekisihken, miitahsh noonkom cikaahcitinatwaa awiyak pemaatisiwaatc,” okii'inaan.

¹¹ Miitahsh kaaishi ihkopitoowaatc ociimaaniwaa i'imaa mihtahkamik. Kahkina kekoon ekii'-nakatamowaatc, ekiih piminisha'waawaatc Ciisahsoon.

Ciisahs kiiminwaaci'aatc kaaomikiiwaahpinenitc

¹² Peshikwaa tahsh Ciisahs e'⁠ayayaatc peshik kihci otenaank, kii'ayaawan i'imaa peshik ininiwan misiwe enihshimikiinitc. Ahpii ewaawaapamikotc mii 'i kaakiihpi ahpakinitisonitc enaahsamiitc ehpakohsenimikotc ekii'ikotc: “Tepencikeyan, kiishpin inentaman kitaa kashkihtoon cikiih pehki'iyampan.”

¹³ Miitahsh Ciisahs kaa'ishi niiminihkenitc ehsaaminaatc ekii'inaatc: “Mii 'i tepwe enentamaan, kika pehki'ikoowis,” okii'inaan. Miitahsh iko shemaak kaakii'-nakanikonitc i'iweni eshi omikiiwinihpan.

¹⁴ Miihsh Ciisahs kaa'ishi onci'aatc ekii'inaatc: “Keko awiya wiintamawaahken o'o. Maacaan ishaan antawaapam anami'ewikimaa ciwaapamihk, cipakitinaahsoyan kaye ekiih pehki'ikooyan. Ishihciken mayaa enahtenik Moosihs (Moses) kaakii'-inahshowetc, cionci kehcinaa'owaatc kahkina awiyak tepwe noonkom eminoayaayan,” okii'inaan.

¹⁵ Shaakooc itahsh Ciisahs otipaacimikoowin aanciihke waahsa kiiani ompweshkaamakanini. Niipiwa' kaye awiya' kiihpiishaawa' ehpianta pisintaakotc, kaye tahsh ciminoayaa'aatc i'iweni otaahkosiwinini.

¹⁶ Ciisahs itahsh wiin ehta kii'nihtaaishaa i'imaa pikwatahkamik ekii'awi anta anami'aatc.

Ciisahs kiiminwaaci'aatc kaanipowaahpinenitc

¹⁷ Peshikwaa ehkiishikaninik mekwaa Ciisahs ekihkino'amaaketc aaninta Perahsiwa' (Pharisees) kaye kaakihkino'amaakenitc Onahshowewin kii'namatapiwa' i'imaa kaakiihpi onciinitc entahso ootenaahkaank Kaalaliink (Galilee) kaye Cootiiya (Judea) kaye tahsh Ceroosalamink (Jerusalem). Omashkawisiiwinini kaaTipencikenitc hsa kii'miinaakaniwi Ciisahs cionci minwaaci'imintc kaa‑aahkosinitc.

¹⁸ Aaninta tahsh ininiwak kiihpiishawak ekii'ishi pimiwinaawaatc onipewininiink ininiwan kaanipowaahpinenitc, ekiih kocihtoowaatc cipiintikanaawaatc i'imaa waahkaa'ikanink, ewiih pimihshimaawaatc i'imaa pehsho Ciisahsoon eshi ayaanitc.

¹⁹ Onsaam tahsh epaahtiinonitc awiya' kaawiin okii'-mihkansiinaawaa aanti keani ishiwinaawaatc. Miitahsh wakitapahk enapakaanik waahkaa'ikan kaaishi ishiwinaawaatc waapikani apahkwaan ekiih pakonepitoowaatc. Miihsh i'imaa kaaishi pakitaapiikinaawaatc mekweya'ii eshi paahtiinonaaniwaninik Ciisahsoon enaahsamikaapawinitc.

²⁰ Ahpii tahsh Ciisahs e'⁠waapamaatc ehpiihci tepweyentaminitc, miihsh kaa'inaatc ini ininwan: “Niicii, kimacitootamowinan kipoonentamaakoo.”

²¹ Kaakihkino'amaakewaatc Onahshowewin, iki kaye Perahsiik (Pharisees) o'o kii'ayihkitowak: “Awenen tahsh a'a inini Kishemanitoonk kaa'inakintisotc? Kaawiin awiya otaa kashkihtoohsiin cipoonentamaaketc macitootamowinan, mii ehta ko a'a Kishemanitoo.”

²² Ciisahs okiih kihkenimaa' eshi naanaakatawentaminitc, miihsh kaa'inaatc: “Wekonen itahsh i'i nahke wenci'ishi naanaakatawentamek?

²³ Nawac ina taawentan ci'ihkitoyaampaan: ‘Kimacitootamowinan kipoonentamaakoo,’ komaa kaye ci‑ihkitoyaampaan: ‘Pasikwiin cipimohseyan’?

²⁴ Cikihkentamek itahsh Inini oKosihsan eyaatc kashki'ewisiwin o'omaa ahkiink cipoonentamaaketc macitootamowinan.” Miitahsh kaaishi kanoonaatc iniweniwan ininiwan kaanipowaahpinenitc: “Miitahsh eninaan, pasikwiin, otaahpinan kitahpihshimon, miitahsh ishikiiwen,” okii'inaan.

²⁵ Miitahsh iko shemaak kaaishi pasikwiinitc i'imaa kahkina enaahsamiiwaatc. Ekii'-otaahpinaminitc otahpihshimonini eshi pimihshininihpan, miihsh kaa'ani ishikiiwenitc ekihci nanaahkomaanitc Kishemanitoon.

²⁶ Kahkina tahsh i'imaa kaakii'-ayaawaatc okiihkihci maamahkaatentaanaawaa o'oweni, kaye tahsh ekii'-mooshkineshkaakowaatc sekisiwin. Miihsh kaa'ishi kihci nanaahkomaawaatc Kishemanitoon ekii'-ihkitowaatc: “Tepwe hsa maamahkaac kekoonan kiwaapantaamin noonkom kaakiishikahk.”

Ciisahs kiiwiishaamaatc Liipai kaaishinihkaasonitc

²⁷ Ahpii tahsh o'o e'⁠ishkwaahsek Ciisahs kiihsaaka'am, ekii'ani maacaatc. Miihsh kaakii'-waapamaatc ininiwan enamatapinitc i'imaa eshi tipa'ikewintc kaamaawantoonaanitc taakihs (tax) tino shooniyaan Liipaai (Levi) eishinihkaasonitc. Miitahsh kaa'inaatc: “Piminisha'ohshin.”

²⁸ Miitahsh Liipaayan kaaishi pasikwiinitc kahkina kekoon ekii'-nakataminitc ekiih piminisha'okotc.

²⁹ Miitahsh Liipaai kaaishi kihci ahshanketc ekii'-ahshamaatc Ciisahsoon i'imaa piintik owaahkaa'ikanink. Kiipaahtiinowak itahsh iki kaamaawantoonaawaatc taakihs shooniyaan i'imaa ekii'-ayaawaatc, iki kaye kotak awiyak ekii'-wiitapimaawaatc.

³⁰ Aaninta Perahsiwak (Pharisees), iki kaye kaakihkino'amaakewaatc Onahshowewin okii'onci kihci kanoonaani Ciisahsoon okihkino'amawaakanini: “Wekonen wenci wiici wiihsiniimekwaa, kaye tahsh wenci wiici minihkwemekwaa kaatipa'ike'iwewaatc, iki kaye awiyak omacitootamook?”

³¹ Miitahsh Ciisahs kaaishi nahkwehtawaatc: “Awiyak kaaminoayaawaatc kaawiin onantawenimaahsiwaawaan mashkihkiiwininiwan, ikiweniwak ehta kaa‑aahkosiwaatc.

³² Kaawiin wiin kaakii'onci piishaayaan ciantomakwaa ikiweniwak kaakwayahkwaatisiwaatc, iki hsa piko omacitootamook cikwehkaatisiwaatc.”

Wekonen wencimanaa wiihsininaaniwank

³³ Aaninta awiyak okii'inaawaan Ciisahsoon: “Cwaan wiin okihkino'amawaakana' eskam kaawiin onci wiihsinihsiiwa', kaye tahsh e'⁠anami'aanitc. Mii peshikwan Perahsiwak (Pharisees) okihkino'amawaakaniwaa' eshihcikenitc. Kiin tahsh wiin iki kihkino'amawaakanak wawiihsiniwak, tako kaye maminihkwewak.”

³⁴ Ciisahs tahsh kii'ishinahkwehtam: “Kitinentaam ina cikashki'ekwaapan ciwiihsinihsikwaapan ikiweniwak awiyak kaa‑antomintwaa i'imaa kaashi wiitike wiihsininaaniwank mekwaa wiiciiwaawaatc ini ininiwan kaaoshki wiitikenitc? Kaawiin iitok.

³⁵ Ninkotink hsa taishi kiishikanini ahpii keotaahpinamawintwaa iniweniwan ininiwan kaaoshki wiitikenitc. Miitahsh ahpii kewiinawaa ciwiihsinihsikwaa.”

³⁶ Ciisahs tahsh kii'wiintamaake ekii'ishi awehciketc: “Kaawiin awiya otaaonci pahkwepitoohsiin oshki kikishkikanink cipakwa'ank kehte kikishkikan. Kiishpin i'i tootank otaa piikopitoon i'iweni oshki kikishkikan, kaye tahsh i'iwe oshki pakwa'ikan kaawiin mihsawaa mayaa taishinaakwahsinoon kehte kikiskikanink.

³⁷ “Kaawiin kaye awiya otaaishi siikinansiin oshki shoominaaponi i'imaa kehte shoominaapo pashkwekinowashink. Kiishpin i'i tootank taatamakohseniwan iniweniwan pashkwekinowashan. Miihsh cisiikihsekipan oshki shoominaapo, kaye tahsh pashkwekinowashan tanihshiwanaatanoon.

³⁸ Nawac oshki shoominaapo ishinaakwan ci'ishi siikinikaatekipan oshki pashkwekinowashink.

³⁹ Kaawiin kaye awiya onantawentansiin oshki shoominaapo kii'ishkwaa minihkwaatank kehte shoominaapo. Kehteya'ii nawac minohpokwan taihkito,” okii'inaa'.