ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 24 - Ojibwe Kihcimasina'ikan

Ciisahs kiihkiiwepimaatisitc

¹ Wiipa kikishep e'anami'ekiishikaninik, ihkwewak kii'ishaawak na'initiiwikamikonk e'⁠ishiwitoowaatc takosehkwaanan kaakiih kwayaancihtoowaatc.

² Okii'-mihkawaawaan ahsiniin ekii'-maaci tihtipinikaasonitc i'imaa kaakiih kipapinihpan kaaonci piintikaaniwank na'initiiwikamikonk.

³ Miitahsh kaaishi piintikewaatc, kaawiin tahsh okii'-mihkansiinaawaa owiiyawini kaaTipencikenitc Ciisahsoon.

⁴ Mekwaa tahsh eniipawiwaatc i'imaa emaamahkaatentamowaatc o'o kaakii'-ishihsenik, miitahsh ketahto niishin (2) ininiwa' ewaahseyaanikin okikishkikanini kaakii'onci wiici kaapawihtaakowaatc.

⁵ Emooshkineshkaakowaatc tahsh sekisiwin iki ihkwewak mii 'i kaakii'-animihkohtaawaatc mihtahkamik. Miihsh o'o kaa'⁠ikowaatc ini ininiwa': “Wekonen wenci nanaantawaapamek kaapimaatisitc i'imaa mekweya'ii kaaishiayaanitc kaaniponitc?

⁶ Kaawiin o'omaa ayaahsii. Aasha kiihkiiwe pimaatisi. Kaawiin ina kimaamihkawihsiim kaakii'-ininekipan mekwaa kiiwiiciiwek weti Kaalaliink (Galilee)?

⁷ ‘Inini oKosihsan tashi pakitinimaawan eshi ayaanitc cionahshowaanikonitc kaamacitootaminitc ininiwa', ciakosaka'ontc kaye. Nihso kiishik (3) tahsh ishihsenik cikiiwe pimaatisitc.’ ”

⁸ Miitahsh ihkwewak kaakii'-maamihkawiwaatc kaa'ihkitonihpan Ciisahsoon.

⁹ Miihsh i'imaa iki ihkwewak kaa'⁠onci kiiwewaatc na'initiiwikamikonk ekii'-awi wiintamawaawaatc kaamitaahshi peshikonitc (11) kihkino'amawaakana' kahkina kekoon kaakii'-ishi waapantamowaatc. I'i kaye kahkina kotak okii'-wiintamawaawaa'.

¹⁰ Miiwak tahsh oko ihkwewak kaakii'-ishaawaatc Meri Maakatalawihkwe (Mary Magdalene), Coaana (Joanna), a'a kaye Meri (Mary) omaamaan Ciimis (James); i'i tahsh kaye kotak ihkwewa' kaakii'-wiiciiwikowaatc okii'-wiintamawaawaa' Ishinisha'waakana' kaakii'-inaapihshinowaatc.

¹¹ Iki tahsh Ishinisha'waakanak kaawiin okiih tepwehtawaahsiwaawaa' i'i ihkwewa' aaniihsh okiih kakiipaasihtawaawaa'.

¹² Piitar (Peter) tahsh kiihpasikwii, ekii'-ahpahtootc na'initiiwikamikonk. Ahpii weti kaa'⁠otihtank kiinawakihtaa ekii'-inaapitc. Miihsh kaakii'-waapantank ehta na'inikewi ishiikinoon e'⁠ahtenikin. Kii'⁠maamahkaatentam aaniin kaakii'-ishihsenik.

Ciisahs kiinaakosiihtawaatc niishin ininiwa'

¹³ I'iwe tahsh peshikwan ehkiishikahk, niishin (2) Ciisahs okihkino'amawaakana' kii'‑ishaawa' Imeyahs (Emmaus) eshinihkaatenik ayaawin. Kekaa maawiin niishwaahso (7) tipa'ikan (mile) kii'ahpiihcaani Ceroosalamink (Jerusalem) onci.

¹⁴ Kiihkakanoonitiwa' ehpapimohsenitc ekiih tashintaminitc kahkina kekoon kaakii'-ishihsenik.

¹⁵ Mekwaa tahsh ehkakanoonitinitc ehtashintamaatinitc onoweniwan, Ciisahs okiihpi atimaa', ekii'-ani wiita'atoomaatc.

¹⁶ Okii'-waapamikoo', kaawiin tahsh okii'-onci nihsitawinaakohsii'.

¹⁷ Miitahsh Ciisahs kaa'⁠ishi kakwecimaatc: “Wekonen i'i kaapimi tashintamaatiyek ehpimohseyek?” Miihsh kaa'⁠ishi kipihciinitc ekii'-maanentamowinaakosinitc.

¹⁸ Ini peshik Kaliiyahpahs (Cleopas) eshinihkaasonitc okii'‑ishi kakwecimikoon: “Mii na kiin ehta ehpapeshikooyan ehpi kiiyooteyan Ceroosalamink (Jerusalem), ekihkentansiwan tahsh onoweniwan kaapi inahkamikahk noonkom kaapi kakiishikahkin,” okii'ikoon.

¹⁹ “Wekonenan kaaitaman,” okii'inaan? Miitahsh kaaishi nahkwehtakootc: “I'iweni aaniin kaakiih tootawintc Ciisahs Naasaritink (Nazareth) kaaonciitc. Kiihtinowi kakanootamawaatc Kishemanitoon. Aahpici kii'⁠mashkawikiishwe, kii'⁠mashkawihcike kaye enaahsamiinitc Kishemanitoon, i'i kaye kahkina pemaatisinitc.

²⁰ Kihcianami'ewikimaak, iki kaye kaatipenimiyamintwaa okii'-ishi pakitinaawaan cionahshowaanimintc cinihsimintc. Miitahsh kaakii'-akosaka'waawaatc.

²¹ Mii hsa 'i kaa'⁠ishi pakohsenimoyaankipan wiin cikiih pimaaci'aahpan Isriyala' (Israel). O'o tahsh kahkina kaakii'-ishihsek, mii 'i aasha nihsokiishik kaakii'-inahkamikahkipan.

²² Aaninta tahsh kaye ihkwewak kaawiiciiwiyamintwaa ninkii'-maamahkaatentami'ikonaanik. Wiipa kikishep kii'‑ishaawak na'initiiwikamikonk.

²³ Kaawiin tahsh okii'-mihkansiinaawaa owiiyawini. Miihsh ehpikiiwewaatc kaa'⁠ihkitowaatc ekii'-waapamaawaatc iinsan encala', ekii'-ikowaatc ehpimaatisinitc Ciisahsoon.

²⁴ Aaninta tahsh kaye kaawiiciiwiyamintwaa kii'‑ishaawak na'initiiwikamikonk. Miitahsh kaakii'-mihkamowaatc mayaa ekii'-ishinaakwaninik kaakii'-ihkitonitc ihkwewa', kaawiin tahsh wiin okii'onci waapamaahsiwaawaan,” okii'ikoon.

²⁵ Miitahsh Ciisahs kaa'⁠inaatc: “Aaniin ehpiihci kakiipaatisiyek. Etatawe kipapeciim kite'iwaank citepwehtamek kahkina kaakiihpi ihkitowaatc kenootamawaawaatc Kishemanitoon.

²⁶ Kaawiin ina oncita pinamaa Christ o'onahke cikii'-ishi kakwaatakihtoohpan, cikii'-anishi piintikehpan tahsh okihci inentaakosiwinink?”

²⁷ Miitahsh Ciisahs awahshime kaa'‑aniishi wiintamawaatc wiin ekiih tashimintc i'imaa misiwe KihciOshipii'ikewinink. I'imaa ekii'-onci maacii tashimintc Moosihsoon eshipii'ikenitc piinihsh kahkina kaakii'-ishipii'ikenitc kenootamawaanitc Kishemanitoon.

²⁸ Aasha e'⁠ani pehshonaakwaninik i'imaa ayaawinink kaaishaawaatc, Ciisahs okii'-ishinaakohtoon taapishkoo keyaapi waahsa ewii'-ani ishaatc.

²⁹ Okiihkakwe kashkimaawaan tahsh ekii'-inaawaatc: “Mii 'omaa ishinipaan kaawii'-ishi nipaayaank. Aasha iitok ani ahpiihcinaakohshin, aasha kaye kekaa tatipihkan,” okii'-inaawaan. Miihsh Ciisahs kaaishi piintiketc ciwiici kapehshimaatc.

³⁰ Ciisahs tahsh kii'⁠onapi ewii'-wiitoohpamaatc. Okii'-otaahpinaan pahkweshikanan kaye tahsh ekii'-nanaahkomotc. Okii pahkwepinaan tahsh pahkweshikanan ekii'-ani ahshamaatc.

³¹ Miitahsh kaakiih paahkaapi'intwaa ekii'-nihsitawinawaawaatc. Ciisahs tahsh kii'⁠onci ankonaakosi.

³² Miitahsh kaa'‑ayitiwaatc: “Kaawiin ina taapishkoo ishkote kaapiskanek kikii'-onci inamanci'ohsiimin kite'inaank mekwaa i'i kaapi kakanooninank miihkanaank kaye tahsh kaapi wiintamawinank ehkitoomakaninik kihciOshipii'ikan?”

³³ Shemaak tahsh kii'⁠wanishkaawak Ceroosalamink (Jerusalem) ekii'-ishi kiiwewaatc. Miitahsh i'imaa kaa'⁠ishi mihkawaawaatc mitaahshi peshik (11) kihkino'amawaakana', i'i kaye kotak awiya' emaawaci'itinitc.

³⁴ Miihsh kaa'⁠ihkitonitc: “Tepwe kaaTipenciketc kiihkiiwe pimaatisi. Okii'naakosiihtawaan tahsh Saaimanoon (Simon)!”

³⁵ Iki tahsh kaashi niishiwaatc kii'⁠wiintamaakewak aaniin kaakii ayishihsenik mekwaa ehpimohsewaatc miihkanaank, aaniin kaye kaa'⁠ishi nihsitawinawaawaatc kaaTipencikenitc ahpii kaapahkwenaanitc pahkweshikanan.

Ciisahs kiinaakosiihtawaatc okihkino'amawaakana'

³⁶ Mekwaa tahsh i'i niishin 2 e'⁠waawiintamaakenitc o'oweni ketahto kaaTipenciketc wiin kii'⁠onci niipawi i'imaa mekweya'ii eshi ayaanitc ekii'-maamawi inaatc: “Pisaanentamowin kika wiiciiwikom!”

³⁷ Kiikihci sekisiwa' ciipay niwaapamaanaan e'⁠inentaminitc.

³⁸ Miitahsh Ciisahs kaa'⁠inaatc: “Wekonen wenci mikoshkaatentamek? Wekonen kaye wenci aanwehtamek kitinentamowiniwaank?

³⁹ Inashke waapantamok nininciin, nisitan kaye. Niin ohsha piko niin. Inashke saaminihshik. Kaawiin iitok ciipay wiiyaasiwihsii, kaawiin kaye ohkaniwihsii i'iwe niin kaashi waapamiyek.”

⁴⁰ O'o tahsh kaa'⁠ishkwaa ihkitotc, mii 'i kaa'⁠ishi waapanta'aatc oniciin, ositan kaye.

⁴¹ Kaawiin keyaapi kiihtepwehtansiiwa' kaa'‑ahpiihci minwentaminitc kaye tahsh kaa'‑ahpiihci maamahkaatentaminitc. Miihsh o'o Ciisahs kaa'⁠inaatc: “Kitayaam ina kekoon kemiiciyaan?”

⁴² Okii'-miinaawaan tahsh kiikooyan aasha kaakiih kiishisonitc.

⁴³ Miitahsh i'i kaakii'-otaahpinaatc ekii'-amwaatc mekwaa ehkanawaapamikotc okihkino'amawaakana'.

⁴⁴ Miitahsh o'o kaa'⁠inaatc: “Mii hsa 'owe kaakii'-wiintamawininakook mekwaa kaapi wiiciiwininakook. Kahkina kekoon kaaoshipii'ikaatek ehtashimikooyaan i'imaa otoonahshowewinink Moosihs (Moses) iki kaye otooshipii'ikaniwaank iki kenootamawaawaatc Kishemanitoon, i'imaa kaye masina'ikanink Nikamonan, nintashimikoo.”

⁴⁵ Miitahsh kaakii'-miinaatc cinihsitohtaminitc kihcioshipii'ikewinan.

⁴⁶ Miihsh kaa'‑ani inaatc: “Miitahsh o'o eshipii'ikaatek, ekii'-ishinaakwahk Kishemanitoo kaakii'-onaapamaatc cikiih kakwaatakihtoonitc kaye tahsh nipowinink cionci kiiwe pimaatisinitc nihso kiishihk (3) ishihsenik.

⁴⁷ Kwehkaatisiwin, i'i kaye awiya kaapoonentamawintc omacitootamowinan cikakiihkwaatenik owiinsowinink onci ciwiintamawintwaa kahkina kaapepahkaanwewaanakisiwaatc pemaatisiwaatc i'imaa Ceroosalamink (Jerusalem) cionci maacii kakiihkwaatek.

⁴⁸ Kiinawaa tahsh kiwaapantaanaawaan onoweniwan.

⁴⁹ Niin itahsh iko kika piicinisha'amawininim Noohs kaakii'-ahshotamaaketc. I'imaa tahsh kihci ootenaank kika tashi pii'om paanimaa kiihpi otihsikoyek i'i mashkawisiiwin ishpimink kaawiihpi onciimakahk.”

Ciisahs kii'ishimaacaatc kihcikiishikonk

⁵⁰ Miitahsh i'imaa kihci ootenaank kaa'⁠onci maaci wiiciiwaatc piinihsh weti e'⁠ani otihtamowaatc Pehtaniink (Bethany). Miitahsh i'imaa kaakii'-ompinihkehtaatc kwehkwehkinihk ekiih shawenimaatc.

⁵¹ Mekwaa tahsh ehshawenimaatc, okiionci nakanaa' ekii'-ompishkaatc kihcikiishikonk e'⁠ishiwinintc.

⁵² Miitahsh kaa'⁠ishi anami'ehtawaawaatc, Ceroosalamink (Jerusalem) ekii'-ani ishi kiiwewaatc ekii'-moshkineshkaakowaatc kihci minwentamowin.

⁵³ I'imaa tahsh mooshak kii'⁠ayaawak Kihcianami'ewikamikonk enanaahkomaawaatc Kishemanitoon.