ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 23 - Ojibwe Kihcimasina'ikan

Ciisahs kiipiinawitc eshiayaanitc Paailatoon

¹ Kahkina hsa kaaonahshowewaatc maamaw kiihpasikwiiwak ekii'-ishiwinaawaatc Ciisahsoon enaahsamiinitc Paailatoon (Pilate).

² Miitahsh i'imaa kaakii'-maacii anaamimaawaatc Ciisahsoon ekii'-ihkitowaatc: “Ninkiih kaahcitinaanaan ohsha wa'a inini e'⁠wanimaatc kipimaatisiiminaani', e'⁠wiintamaaketc citipa'amawaahsiwimintc Maawac Kihciokimaan taakihs shooniyaan. Miitahsh kaye enwaanitisotc wiin e'⁠aawitc Kishemanitoon kaaonaapamikotc, wiin iinsan ekihciokimaawitc.”

³ Paailat tahsh okiih kakwecimaan Ciisahsoon: “Kiin ina okihci otookimaamiwaan Coowak?” Miitahsh kaa'⁠ikotc: “Mii kwantosha 'i ehkitoyan.”

⁴ Miitahsh Paailat kaa'⁠inaatc Kihcianami'ewikimaa' i'i kaye kaapaahtiinonitc: “Kaawiin kekoon nimihkamowaahsiin keonci tipaahkonintipan wa'a inini,” kii'ihkito.

⁵ Aanciko tahsh kiihkakwe shaakoosohtaakosiwa' ekii'-ihkitonitc: “Wa'a inini eshi kihkino'amaaketc kii'⁠onci ompwehkamikanini misiwe Cootiiya ahkiink. Weti hsa kii'‑ishi maacihtaa Kaalaliwi-ahkiink (Galilee) piiniihsh tahsh o'omaa ekiih pitakohshink.”

Kiiani ishinisha'ontc Heratan ciwaapamikotc

⁶ Ahpii tahsh Paailat kaa'⁠noontank o'o kiihkakwetwe: “A'awe inini Kaalaliink (Galilee) ina oncii?”

⁷ Ahpii Paailat kaakihkentank Ciisahsoon e'⁠onciinitc Heratan (Herod) kaaishi tipencikenitc, mii 'i kaakii'-ishinisha'waatc eshi ayaanitc Heratan. Ceroosalamink iitok na'itaak kii'⁠ayaawan i'i ahpii.

⁸ Wiinke tahsh Herat kii'⁠minwentam ewaapamaatc Ciisahsoon. Aasha kinwesh kiihpionci naanoontam ehtashimimintc, okii'-ishi mihsawentaan kaye ewii'-waapamaatc Ciisahsoon maamahkaacihcikenitc.

⁹ Niipiwa' itahsh kekoonan okiih kakwecimaan, kaawiin tahsh Ciisahsoon okii'-onci nahkwehtaakohsiin.

¹⁰ Iki tahsh Kihcianami'ewikimaak iki kaye kaakihkino'amaakewaatc Onahshowewin kii'⁠mate kaapawiwak ekiihkakwe mashkawi anaamimaawaatc.

¹¹ Miihsh Herat i'i kaye oshimaakanihshiima' okiih paahpinotawaawaan Ciisahsoon kaye tahsh ekiih miihkinsomaawaatc. Okii pihsihkamoonaawaan kaye maawac wenishihshininik kashkiikiiwin. Miihsh kaa'⁠ishi kiiwenisha'waawaatc miinawaa eshi ayaanitc Paailatoon.

¹² Miitahsh i'i ahpii ehkiishikaninik Herat a'a kaye Paailat kaakii'-mino wiiciintiwaatc, otaanaank iitok kiihshiinkenintiwak.

Kiionahshowaanintc Ciisahs cinipotc

¹³ Paailat (Pilate) okii'-maamawi antomaa' Kihcianami'ewikimaa', kaaniikaanihtamawaanitc kaye Coowa', i'i kaye pemaatisinitc.

¹⁴ Miihsh kaa'⁠inaatc: “Kikiih piitamawihshim wa'a inini ekii'-ihkitoyek e'⁠wanimaatc pemaatisinitc kaaonci ompwehkamikisinitc. Enaahsamiiyek tahsh kii'⁠antakihkenimaa, kaawiin tahsh kekoon nintishi mihkamowaahsiin keonci tepimekipan i'iweni kaainek.

¹⁵ Kaawiin tahsh kaye Herat (Herod) okii'-mihkansiin kekoon cikii'-wanitootaminitc miihsh kaakiihpi onci kiiwenisha'waatc. Kaawiin mihkikaatehsinini kekoon keonci nihsintipan.

¹⁶ Miitahsh keishihcikeyaan cipahpahshanshe'ontc, miihsh keshi pakitinak,” kii'ihkito.

¹⁷ Mii 'i iitok kaa'⁠ishihsenik oncita ko peshik tahkonikanan cikiih pakitinaahpan i'i ahpii ewiihkwantiiwahkamikisiwintc.

¹⁸ Iki tahsh kahkina kaamaawaci'itiwaatc kiimaamawi shaakowewak: “Nihsihk wiin a'a inini. Pakitinamawihshinaam a'a Paraapahs (Barabbas)!” kii'ihkitowak.

¹⁹ A'a iitok Paraapahs kiihpiinci wepinaa kipa'otiiwikamikonk ekii'-mamaanshiitc ekii'-ompwehkamisikopanen i'imaa ootenaank. Kaye tahsh ekii'-nihshiwekopanen.

²⁰ Paailat okii'-antawentaan cikiih pakitinaahpan Ciisahsoon, miihsh miinawaa kaakiih kanoonaatc kaapaahtiinonitc pemaatisinitc.

²¹ Miitahsh enikohk kaakiih shaakowenitc ekii'-ihkitonitc: “Akosaka'o, akosaka'o!”

²² Miitahsh o'o nihsink Paailat kaa'inaatc: “Aaniin tahsh kaa'⁠ishi mamaanshiitc? Kaawiin kekoon nimihkamowaahsiin keonci nihsintipan. Ninka anoohkii cipahpahshanshe'ontc, miihsh keshi pakitinintc,” kii'ihkito.

²³ Aanciko tahsh enikohk kiihkishiiwewa' ehshaakowenitc ekii'-ihkitonitc ciakosaka'omintc Ciisahsoon, piinihsh ekii shaakoosohtaakosinitc.

²⁴ Paailat tahsh okii'-inaahkonaan Ciisahsoon i'i kaakii'-ishi kakwetwenitc.

²⁵ Miitahsh kaakiih pakitinaatc ini ininiwan kaakii'-antawenimimintc kaakii'-mamaanshiinihpan e'⁠ompwehkamikisinitc i'imaa ootenaank. Okiih pakitinaa' pisaan iko enentaminitc citootawaanitc Ciisahsoon.

Ciisahs kiiakosaka'ontc aashiteyaahtikonk

²⁶ Shimaakanihshak tahsh okii'-maaciinaawaan Ciisahsoon. Mekwaa e'⁠ani pimi ayaawaatc okii'-mekwaashkawaawaan ininiwan Sairiiniink (Cyrene) wenciinitc, Saaiman (Simon) eshinihkaasonitc, ehpi takohshininitc i'imaa ootenaank pikwacaya'iink ekiihpii onciinitc. Miiwan ini kaakii'-manipinaawaatc ekiih pihciwane'aawaatc aashiteyaahtikoon cipimiwitamawaanitc otaanaank inahkeya'ii Ciisahsoon kaa'⁠ishi pimohsenitc.

²⁷ Aahpici tahsh kiihpaahtiinowak pemaatisiwaatc ehpiminisha'waawaatc Ciisahsoon. Aaninta kaye ihkwewak ekii'-mawiwaatc, ekii'-mincinawesiwaatc kaye.

²⁸ Ciisahs tahsh kiihkwehki kaapawi ekii'-inaatc: “Kiinawaa ihkwewak Ceroosalamink wenciiyek, keko niin mawimihshihkek. Kiinawaa piko mawintisok, kitapinoonciishimiwaak kaye mawimihkwak.

²⁹ Ninkotink ohsha taocihcihse cishi kiishikahk ahpii pemaatisiwaatc ci‑ihkitowaatc: ‘Aahpici shawentaakosiwak iki ihkwewak kaapwaanawi otapinoonciishimiwaatc, iki kaye kaanihtaawiki'aahsikwaa apinoonciisha', wiihkaa kaye kaapi nooni'aawahsohsikwaa.’

³⁰ Miitahsh i'i ahpii pemaatisiwaatc keitamowaatc kihci waciin: ‘Patakoshkawihshinaam. Miihsh kaye ci itamowaatc kaapihkwatinaanikin: Aakawishkawihshinaam.’

³¹ Kiishpin tahsh o'oweni ishihcikewaatc mekwaa mihtikoon e'⁠ashkaahtikowinitc, aaniin tahsh wiin keishiwepahk ahpii paahsotc a'a mihtik?”

³² Niishin tahsh (2) kotak ininiwak kaakiih kihci mamaanshiiwaatc kewiinawaa kii'‑ishiwicikaniwiwak ciwiici nipoomaawaatc Ciisahsoon.

³³ Ahpii kaa'⁠otihtamowaatc i'imaa Ohtikwaanikekanihkaank eshinihkaatenik mii 'imaa Ciisahs kaakiihtashi akosaka'ontc, i'i kaye niishin omamaanshii'. Peshik okihci nihkink inahke, kotak itahsh onamanti nihkink inahke kii'‑ishi akosaka'omaawa'.

³⁴ Miihsh Ciisahs kaa'⁠ihkitotc: “Noohs, poonentamaw, kaawiin okihkentansiinaawaa aaniin eshihcikewaatc.” Shimaakanihshak tahsh kiihkakwe pahkinaatiwak ekii'-ahpakicikewaatc ekii'-nenaawinamaatiwaatc i'i okikishkikanini.

³⁵ Ikiweniwak tahsh pemaatisiwaatc, iki kaye kaaniikaaniihtamaakewaatc Coowak kii'⁠niipawiwak ehkanawaapiwaatc okiih pahpinotawaawaan Ciisahsoon ekii'-inaawaatc: “Okiih pimaaci'aa' iitok kotak awiya'. Taka tahsh tapimaaci'itiso kiishpin wiin tepwe ayaawikwen Kishemanitoo otonaapamaakanan cipimaaci'iwenitc.”

³⁶ Shimaakanihshak tahsh kewiinawaa okiih paahpinotawaawaan. Ekiihpi naasihkawaawaatc ekiiwi'-mina'aawaatc shoominaapo kaawiihsakaakamininik

³⁷ ekii'-inaawaatc: “Pimaaci'itison kiishpin kiin okihciotOokimaamiwaan Coowak,” okii'-inaawaan.

³⁸ Ishpimink inahke kaaishi akoocink kii'⁠akooteni oshipii'ikan ekii'-ishipii'ikaatenik: “Miiwan ono okihciotOokimaamiwaan Coowak.”

³⁹ Peshik tahsh omamaashiin kaakii'-wiici akosaka'okoomaatc okii'-onci kanoonikoon: “Kaawiin ina kiin kaaonaapamintc cipimaaci'iwetc? Pimaaci'itison, keniinawint tahsh pimaaci'ihshinaam.”

⁴⁰ Ini tahsh kotak omamaashiin okiih kishii kanoonaani: “Kaawiin ina kikohsaahsii Kishemanitoo? Kahkina o'o kaashi nihsiyank (3) peshikwan kikii'-ishi onahshowaanikoomin keshi kakwaataki'ikooyank.

⁴¹ Kiinawint wiin kwayahk kitinaahkonikoomin, kitishihcikewininaanink e'⁠onci kashkihtamaasoyank o'o. Wiin tahsh kaawiin kekoon kii'‑ishi wanitootansii.”

⁴² Miihsh kaa'⁠inaatc Ciisahsoon: “Ciisahs, maamihkawenimiihshiihkan ahpii pitakohshinan kitookimaawiwinink.”

⁴³ Ciisahs tahsh okii'inaan ini ininiwan: “Kitahshotamawin, noonkom kaakiishikahk kika wiiciiwihsh i'imaa Parataaisink (Paradise) kaaishiwinintwaa kaashawentaakosiwaatc.”

Ciisahs kiinipotc aashiteyaahtikonk

⁴⁴ Miitahsh i'iwe ninkoci ko ahpii eaapihta kiishikahk kii'⁠ani kashkii tipihkan misiwe ahkiink piinihsh ekii'-ani nihsotipa'ikaneyaak (3).

⁴⁵ Kiisihs kaye kiihpooni saakaahsike. Miitahsh i'i kihcianami'ewikamikonk kihcikipiika'ikan naawaya'ii kaakiih taashkiikihsek.

⁴⁶ Miitahsh Ciisahs enikohk kaakiih shaakowetc e'⁠ihkitotc: “Noohs, kikanawenta'in nintahcaahk!” Ahpii 'i kaa'⁠ishkwaa ihkitotc, mii 'i kaa'⁠ishi nipotc.

⁴⁷ A'a tahsh shimaakanihshiiwikimaa kaawaapantank aaniin kaa'⁠ishihsenik okii'-nanaahkomaan Kishemanitoon ekii'-ihkitotc: “Tepwe iinsan kwayahk kii'‑ininiiwi wa'a!”

⁴⁸ Iki tahsh pemaatisiwaatc kaakiih paahtiinowaatc emaawaci'itiwaatc e'⁠waapantamowaatc o'oweni, aaniin kaye kaaishihsenik, kii'⁠ani kiiwewak ekiih pahpahkihte yaahkikane'otisowaatc kaa‑ahpiihci mincinawesiwaatc.

⁴⁹ Kahkina iki kaakii kihkenimaawaatc Ciisahsoon, iki kaye ihkwewak Kaalaliink (Galilee) kaakiionci piminisha'waawaatc waahsayiish iko kiiniipawiwak kaa'⁠onsaapiwaatc.

Ciisahs owiiyaw kiina'inikaatenik

⁵⁰ Kii'⁠ayaa inini Coosap (Joseph) ekii'-ishinihkaasotc. Kwayahk kii'‑ininiiwi, kaye tahsh kii'⁠minwaatisi, ekiih takwapitc kaanihtaa onaahkonikenitc.

⁵¹ Eramahtiiya (Arimathea) ootenaank, Cootiiya ahkiink kii'⁠oncii. Kewiin iitok okiih piihtoon i'i kaawii'-maacii tipencikenitc Kishemanitoon. Kaawiin kaye wiin okii'-na'entansiin kaakii'-inentaminitc, i'i kaye kaakii'-ishihcikenitc.

⁵² Kii'‑ishaa enaahsamiinitc Paailatoon (Pilate) ekiih kakwetwetc owiiyawini Ciisahsoon.

⁵³ Miitahsh kaakiih pina'ank, ekii'-wiihkweyiikinank waapishkiikinonk. Miihsh kaa'⁠ishi ahtootc na'initiiwikamikonk kaakii'-ishi wiimpaapihka'ikaatenik ahsiniihkaank, wiihkaa ekiih pionci aapatahsininik.

⁵⁴ Mii 'i ekii'-ishi kiishikahk Kaanihtaa kwayaanciiwaatc, aaniihsh aasha kekaa kiimaacihse ciAnwepiiwi-kiishikahk.

⁵⁵ Ikiweniwak tahsh ihkwewak kaakiihpi onci piminisha'waawaahpan Ciisahsoon Kaalaliink (Galilee) onci, okiih piminisha'waawaan Coosapoon. Okii'-waapantaanaawaa tahsh i'i na'initiiwikamik, kaye tahsh okii'-waapantaanaawaa aaniin Ciisahsoon owiiyawini kaa'⁠inahcikaatenik.

⁵⁶ Miitahsh kaa'⁠ishi kiiwewaatc ekiih kwayaancihtoowaatc minaako'onan, kaye tahsh tino menomaakwaninik poosiiwin kaa‑ahcikaatek wiiyawimaank. E'⁠Anwepiiwi kiishikaninik kii'⁠anwepiwak Onahshowewin kaainahtek citoocikaatek.