ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 22 - Ojibwe Kihcimasina'ikan

Kiionentamowaatc aaniin keshinihsaawaatc Ciisahsoon

¹ Aasha e'⁠ani pehshonaakwahk i'iwe kaakii'nihtaa maawaci'itinaaniwank kiiamontc kaaompihsikaniwihsik pahkweshikan, mii 'i kaa'⁠ishinihkaatek Pimaaci'ikoowi Wiihkwantiwin.

² Kihcianami'ewikimaak, iki kaye kaakihkino'amaakewaatc Onahshowewin okiih kohsaawaa' pemaatisinitc, miitahsh kaa'⁠ishikakwe mihkamowaatc aaniin inahke keshi kiimooci nihsaawaatc Ciisahsoon.

Cootahs kiiahshotamaaketc ewii'wiicihtwaatc cikaahcitinimintc Ciisahsoon

³ Miitahsh Setanan (Satan) kaakiih piintikeshkaakotc Cootahs Iskeriyat (Judas Iscariot) kaainintc, kewiin iitok Cootahs peshik kiihtinowi kaakii'-mitaahshi niishinitc (12) kihkino'amawaakana'.

⁴ Miitahsh Cootahs kaa'⁠ishi maacaatc ekii'-awi kanoonaatc kihcianami'ewikimaa', i'i kaye shimaakanihshan kaanihtaa kanawentaminitc Kihcianami'ewikamikoni aaniin keshi wiici'aatc cikaahcitinaanitc Ciisahsoon.

⁵ Wiinke hsa kii'⁠minwentamoo', miihsh kaakii'-ahshotamaakotc ewii'-miinikotc shooniyaan.

⁶ Cootahs tahsh okii na'entaan, miihsh kaa'⁠ishi maacii naanaakaci'aatc aaniin ahpii kena'ihsenik cikaahcitinaatc Ciisahsoon, ahpii kaye ewii'-mamishi'maatc cikihkentansinik pemaatisinitc.

Ciisahs kiiwiiciwihsiniimaatc okihkino'amawaakana'

⁷ Kiihpi ocihcihse ekii'-ishi kiishikahk ahpii kiiamontc kaaompihsikaniwihsik pahkweshikan. Mii 'iitok i'i ahpii kaakii'-nihsintwaa maanahcaanihshensak keaapatisiwaatc Pimaaci'ikoowi Wiihkwantink.

⁸ Ciisahs tahsh okii'-ishinisha'waan Piitaroon (Peter) ini kaye Cwaanan (John) o'o ekii'inaatc: “Maacaak, antawi kwayaancihtook Pimaaci'ikoowi Wiihkwantiwin ketashi wiihsiniyank,” okii'inaa'.

⁹ “Aanti eshi antawentaman ci‑ishi kwayaancihtooyaank?” okii'ikoo'.

¹⁰ Miihsh kaa'⁠inaatc: “Ahpii ani piintikeshkaayek kihci ootena kika waapamaawaa cimekwaashkawek inini iinsan ekii naata'ipiitc ahtoopaanink. Kika piminisha'waawaa tahsh aanti piko enishi piintiketc waahkaa'ikanink.

¹¹ O'owe kika'-inaawaa: ‘Okihkino'amaake kitik, aanti mawatihshiwewikamik eyaak ketahshi wiici wiihsiniimakwaa ninkihkino'amawaakanak ewiih Pimaaci'ikoowi Wiihkwantiyaank,’ mii 'i keinek.

¹² Kika waapanta'ikowaa ishpimink eyaanik e'⁠mihcaanik mawatihshiwewikamik kahkina kekoon i'imaa ehkwayaantahtenik. Miitahsh i'imaa keshi kwayaantahtooyek kahkina kekoon,” okii'-inaa'.

¹³ Miitahsh kihkino'amawaakanak kaa'⁠ishi maacaawaatc ekii'-ishi mihkamowaatc kahkina kekoon i'iweni Ciisahsoon kaakii'-ishi wiintamaakowaatc. Miihsh i'imaa kaahtashi kwayaanciiwaatc ketashi Pimaaci'ikoowi Wiihkwantiwaatc.

Ishkwaac kiiwiiciwiihsiniimaatc Ciisahs okihkino'amawaakana'

¹⁴ Ahpii tipa'ikan e'⁠ishihsenik ciwiihsininaaniwank Ciisahs kii'⁠onaahkohshin ishi ohpime tapahsi toohpowinaahkonk. Otishinisha'waakana' kaye kii'onapiwa'.

¹⁵ Miitahsh kaa'⁠inaatc: “Maawac ekii'-antawentamaan o'owe ciwiici wiihsiniiminakook o'owe kaatootamank Pimaaci'ikoowi Wiihkwantiwan cipwaa kakwaatakihtooyaan.

¹⁶ Tepwe 'owe kaawiintamawinakook, kaawiin miinawaa o'o ninkaishi wiihsinihsii kaawiihkwantiyank paanimaa kiihtipi kiishinaakwaninik Kishemanitoo oTipencikewin.”

¹⁷ Miitahsh Ciisahs kaakii'-otaahpinank minihkwaakan ekii'-nanaahkomaatc Kishemanitoon kaye tahsh ekii'-ihkitotc: “Otaahpinamok o'owe kaatahshiyek cionci maamawi minihkweyek.

¹⁸ Miihsh eshi wiintamawinakook, kaawiin miinawaa ninkaonci minihkwehsii o'o tino shoominaapo paanimaa Kishemanitoo oTipencikewin pitakohshinoomakaninik.”

¹⁹ Okii'-otaahpinaan kaye pahkweshikanan ekii'-nanaahkomotc ekiih pahkwepinaatc ekii'-maamiinaatc ciamwaanitc ekii'-inaatc: “Mii 'owe niiwiyaw kaapakitinamaakooyek. Mooshak o'o ishihcikek cimaamihkawinotawiyek.”

²⁰ Kaa'⁠ishkwaa wiihsiniwaatc tahsh, mii 'i peshikwan Ciisahs kaa'⁠ishi miinaatc i'i minihkwaakan ekii'-ihkitotc: “Mii 'owe minihkwaakan Kishemanitoo otooshki ahshotamaakewin nimiskwiimink kaaonci aayiicinaakwahk kaasiikinikaatek kiinawaa onci.

²¹ “Inashke kiwiici wiihsiniimikonaan o'omaa toohpowinaahkonk a'a kaawii'-mamishi'itc.

²² Ini hsa Inini oKosihsan taishihsewan taapishkoo Kishemanitoo kaakii'-ishi onentank. Aahpici tahsh takihci koohpaacihsewan iniweniwan kemamishi'mikotc.”

²³ Miitahsh kaakii'-maacii kakwecintinitc kaanika awenen o'owe keishihcikekwen.

Ciisahs ewiintamawaatc awenen a'a kekihci inentaakositc

²⁴ Miitahsh okihkino'amawaakana' ekii'-maacii kakanoonitinitc awenen a'a kaatahshinitc maawac kekihci inentaakosinitc.

²⁵ Miitahsh o'o Ciisahs kaa'⁠inaatc: “Iki hsa kaatipenimaawaatc pemaatisinitc kaakihkenimaahsinik Kishemanitoon, wiinke otipenimaawaa', iki tahsh kaaokimaahkantaakewaatc ishinihkaanitisowak kaaminohse'iwewaatc.

²⁶ Kiinawaa tahsh wiin kaawiin i'i kika ishihcikehsiim. Tekwac hsa kiin kehci inentaakosiyan cikii'-inentaakosiyampan taapishkoo maawac kaaoshkaatisitc. A'a tahsh kaye kaatipenimiwetc cikii'-inentaakosihpan taapishkoo kaapamiihtaaketc.

²⁷ Awenen tahsh nawac kehci inentaakositc? A'a na kaanamatapitc kaawii wiihsinitc, komaa kaye a'a kaapamiihtaaketc? A'awe iitok kaanamatapitc. E'⁠wiiciiwinakook tahsh niin kipamiihtawininim.

²⁸ Kiinawaa tahsh kaapi wiiciiwiyek i'i kahkina kaapishi kakweci'ikooyaan.

²⁹ Taapishkoo Noohs kaakii'-ishi miinshitc ciokimaahkantaakewak, miihsh peshikwan kekiinawaa eshi miininakook.

³⁰ Kiinawaa tahsh kikatashi wiihsinim, kikatashi minihkwem kaye nintoohpowinaahkonk kaatashi tipencikeyaan. Kiinawaa kikashi apim kihciokimaawapiwinink cionaahkonekwaa mitaahshi niishin (12) kaatahswewaanakisiwaatc Isriyalak (Israel) pemaatisiwaatc.”

Kikayish ehkihkenimihsiwan kii'‑inaatc Piitaroon

³¹ “Saaiman (Simon), Saaiman pisintawihshin, Setan ohsha kiihkakwetwe, kiihpakitinamawaa kaye ewiih koci'inek taapishkoo kihtikewinini kaashi nenaawinank wenishihshininikin, kaamacinaakwaninikin kaye pahkweshikaniminan.

³² Saaiman, aasha tahsh kikii'anami'ehtamawin, cipwaanawihcikemakahsinok kitepwehtamowin. Ahpii tahsh kaye pikiiwenotawiyan, wiici'aahkan kiwiici kihkino'amawaakanak cimashkawisiiwaatc.”

³³ O'o tahsh Piitar (Peter) kii'‑ishi nahkwehtam: “Tepencikeyan, ninka kwayaancii ohsha ewii'-ishi wiiciiwinaan kipa'otiiwikamikonk, kaye tahsh nipowinink,” kii'ihkito.

³⁴ Miitahsh Ciisahs kaa'⁠inaatc: “Kiwiintamawin Piitar, cipwaa noontaakositc aape ahpaahka'aahkwaan noonkom kaatipihkahk, mii 'i aasha nihsink (3) ci ihkitoyan ekihkenimihsiwan,” okii'inaan.

Shooniyaawash, pashkwewash, pashipa'ikewihkomaan kaye ehtashintekin

³⁵ Miitahsh kaa'⁠ishi kakwecimaatc kahkina: “Ahpii kaakii'-maacinisha'onakookipan weti otaanaank, kiimaaciitoohsiwekipan shooniyaawash, pashkwewash kaye, ini kaye mahkisinan, kekoon ina kikii'noontehsem?” “Kaawiin kekoon ninkii'noontehsehsiimin,” okii'ikoo'.

³⁶ Miitahsh kaa'⁠inaatc: “Noonkom itahsh awenen iko eyaakwen shooniyaawash, komaa kaye pashkwewash pisaan oka maaciitoon. Awenen itahsh iko eyaahsik pashipa'ikewihkomaan, oka ataawaaken okashkiikiiwin ci'⁠ataawetc pashipa'ikewihkomaan.

³⁷ Miitahsh eshipii'ikaatek: ‘Kewiin iitok kii‑inakintiso ewiiciiwaatc omacitootamoo'.’ Miihsh eshi wiintamawinakook niin i'i kaatashimikooyaan citipihsek. I'i hsa tepwe kaashi tashimikooyaan mii 'i aahsa cimooshkinehsek.”

³⁸ Miitahsh kaa'⁠ikotc okihkino'amawaakana': “Tepencikeyan, inashke piinaapin. Ina ono niishin pashipa'ikewihkomaanan,” okii'ikoo'. “Mii 'i teminihk,” kii'‑ihkito.

Ciisahs kiihtashianami'aatc kaashi ishpatinaanik Aalip Kihtikaanaahtikohkaank

³⁹ Ciisahs tahsh kiiani maacaa ekii'-ishaatc kaakii'-nihtaa ishaawaatc kaashi ishpatinaanik Aalip (Olive) Kihtikaanaahtikohkaank, okihkino'amawaakana' ewiiciiwikotc.

⁴⁰ Ahpii weti kaatakohshink kaakii'-nihtaa ishaawaatc, o'o okii'‑inaa' okihkino'amawaakana': “Anami'aak cinaasihkaakohsiwek kakweci'ikoowin.”

⁴¹ Miitahsh wiin keyaapi awahshime kii'⁠ani maacaa ekii'-nakanaatc okihkino'amawaakana'. Ehko tepi wepinikaaniwank minihk kii'‑ishaa, ekii'-ociciinkwanapihtaatc ekii'-anami'aatc:

⁴² “Noohs, kiishpin hsa ishinaakwahkipan, taka otaahpinamawihshin o'o minihkwaakan kaawii'-ishi kakwaatakihtooyaan. Kaawiin hsa niin eshi mihsawentamaan, kiin hsa eshi antawentaman taishihcikaaniwan,” kii'‑ihkito.

⁴³ Encalawan tahsh kihcikiishikonk okiihpi onci naasihkaakoon emiinikotc siitonikoowi mashkawisiiwin.

⁴⁴ Wiinke hsa kiikihci wiihsakentam ekii'-anami'aatc tepwe piko, miihsh otaapwesowin kaakiih pimaashikawininik taapishkoo miskwi kaapankikawink ahkiihkaank.

⁴⁵ Kiihpasikwii tahsh kaa'⁠ishkwaa anami'aatc ekii'-ishaatc eshi ayaanitc okihkino'amawaakana'. Okii'-otihsaa' e'⁠nipaanitc, aaniihsh kii'⁠ayehkosiwa' kaa'‑ahpiihci mincinawesinitc.

⁴⁶ Miihsh kaa'⁠inaatc: “Wekonen wenci nipaayek? Wanishkaak, anami'aak cinaasihkaakohsiwek kakweci'ikoowin.”

Ciisahs kiitahkonintc

⁴⁷ Mekwaa tahsh Ciisahs ehkakiikitotc, kiihpionci takohshinoo' ehpaahtiinonitc awiya' Cootahs (Judas) eshinihkaasonitc peshik kaakii'-mitaahshi niishinitc okihkino'amawaakanan ekiih piinaanitc. Miiwan tahsh ini Ciisahs kaakii'-ociimikotc.

⁴⁸ Miitahsh Ciisahs kaa'⁠inaatc: “Cootahs, kitoociimimaan ina Inini Okosihsan cimamishi'imatc?”

⁴⁹ Ahpii tahsh kihkino'amawaakanak ewaapantamowaatc aaniin waa'⁠ishihsenik mii 'i kaa'⁠ihkitowaatc: “Tepencikeyan, nimpashipa'ikewihkomaaninaanin ina ninka aapacihtoomin cimiikaasoyaank.”

⁵⁰ Peshik tahsh Ciisahs okihkino'amawaakanan okiih pahkihte'waani ini peshik otanohkii'aakanini ini Maawac Kihcianami'ewikimaan, miitahsh ekiih kiishki wepakanaantamawaatc ohtawakaani.

⁵¹ Ciisahs tahsh kii'‑ihkito: “Mii 'i minihk!” Miihsh kaa'⁠ishi saaminaatc ohtawakaaniink ini anohkii'aakanan ekii'-minwaaci'aatc.

⁵² Miitahsh Ciisahs kaa'⁠inaatc Kihcianami'ewikimaa', i'i kaye kenawentaminitc Kihcianami'ewikamik, i'i tahsh kaye kaaniikaanentaakosinitc kaakiihpi naasihkaakotc: “Niin ina okiimoocishk, epiishaayek ehpi kikiiyek pashipa'ikewihkomaanan, ini kaye pahkihte'ikanaahtikoon?

⁵³ Entahso kiishik iitok kikii'-wiiciiwininim Kihcianami'ewikamikonk, kaawiin tahsh kikiih papaamenimihsiim. Miitahsh o'owe kiinawaa kitipa'ikaniwaa, ahpii kaakashkii tipihkahk kiimaacii tipencikemakahk.”

Piitar kii ihkitotc ehkihkenimaahsik Ciisahsoon

⁵⁴ Miihsh kaakii'-otaahpinaawaatc Ciisahsoon ekii'-ishiwinaawaatc owaahkaa'ikaniniink Maawac Kihcianami'ewikimaan. Piitar (Peter) tahsh nawac iko waahsa otaanaank kii'⁠onci piminisha'ike.

⁵⁵ Akwaciink tahsh kiihpootawewa' Maawac Kihcianami'ewikimaan owaahkaa'ikaniniink naawaya'ii kaashi waahkaa menikanaahkoonikaatenik ekii'-waahkaanapinitc. Miihsh kewiin i'imaa Piitar kaahtakwapitc.

⁵⁶ Peshik tahsh ini oshkiniikihkwewi anohkii'aakanan okii'-waapamikoon i'imaa e'⁠namatapitc ciikishkote. Weweni okiih kanawaapamikoon miihsh kaa'⁠ihkitonitc: “Wa'a hsa inini kewiin okii'-wiiciiwaan Ciisahsoon.”

⁵⁷ Piitar tahsh kii'⁠aanwehtam: “Ihkwe, kaawiin ohsha ninkihkenimaahsii,” okii'-inaan.

⁵⁸ Naanaake tahsh e'⁠ani ishihsek ininiwan Piitar (Peter) okii'-waapamikoon ekii'-ikotc: “Kekiin iitok peshik kaatinowiyan.” Miihsh Piitar kaa'⁠inaatc: “Inini, kaawiin niin nintaawihsii!”

⁵⁹ Naanaake tahsh peshiko tipa'ikan e'⁠ishihsenik kotak ininiwan kiihkakwe tepwewan ekii'-ihkitonitc: “Wa'a hsa inini kewiin okii'-wiiciiwaan Ciisahsoon, kewiin iitok Kaalaliiwininiiwi (Galilean)!”

⁶⁰ Miitahsh kaa'⁠ishi nahkwehtawaatc: “Kaawiin kanake ninkihkentansiin i'i kaatashintaman.” Mekwaa tahsh ehkiikitotc, aape aahpahka'aakwaanan kiionci noontaakosiwan.

⁶¹ KaaTipenciketc kiikwehkikaapawi ekiih kanawaapamaatc Pittaroon. Miitahsh Piitar kaakii'-maamihkawitc kaakii'ikotc kaaTipencikenitc: “Cipwaa noontaakositc naape ahpaahka'aahkwaan noonkom kaatipihkahk, mii 'i aasha nihsink (3) ci‑ihkitoyan ekihkenimihsiwan.”

⁶² Piitar tahsh kiihsaaka'am ekii'-awi wiihsakatemotc.

Ciisahs kiimaanenimintc kaye tahsh kiihpahpahshanshe'ontc

⁶³ Iki tahsh ininiwak kaakiih kanawenimaawaatc Ciisahsoon okii'-maacii miihkinsomaawaan kaye tahsh ekii pahpahkihte'waawaatc.

⁶⁴ Okii'-aakawaapahpinaawaan ekiih kakwecimaawaatc: “Antakihkentan, wiintamawihshinaam awenen kaapahkihte'ohk.”

⁶⁵ Niipiwa' kaye kotak kekoonan okii'-ayinaawaan ekii'-maanenimaawaatc.

Ciisahs kiioncishkawikaapawihtawaatc onahshowewininiwan

⁶⁶ Ahpii e'⁠ani kishepaawakaninik kaaniikaanisiwaatc onahshowewinink, Kihcianami'ewikimaak kaye, iki kaye kaakihkino'amaakewaatc Onahshowewin kiimaamawi nakishkotaatiwak. Ciisahs tahsh kewiin i'imaa kiihpiicikaniwi cioncishkawi kaapawihtawaatc kaanihtaa Onaahkonikenitc.

⁶⁷ Miihsh kaa'⁠inaawaatc: “Wiintamawihshinaam, kiin ina Kishemanitoo kaakii'-onaapamaatc cipimaaci'iwenitc?” Miitahsh kaa'⁠ishi nahkwehtawaatc: “Kiishpin aana wiintamawinakook, kaawiin kitaa tepwehtawihsiim.

⁶⁸ Kakweciminakook kaye kekoon kaawiin kitaa nahkwehtawihsiim.

⁶⁹ O'o tahsh ishiahpii mii 'i cimaacihsek Inini oKosihsan ci'⁠apinitc okihcinihkiniink inahke kaakihci inentaakosinitc Kishemanitoon,” Ciisahs kii'ihkito.

⁷⁰ Miihsh kahkina kaa'⁠ihkitonitc: “Kiin ina tahsh Kishemanitoo oKosihsan?” O'o tahsh kii'‑ishi nahkwehtam: “Mii 'i ehkitoyek Niin eaawiyaan.”

⁷¹ Miitahsh kaa'⁠ihkitonitc: “Kaawiin awiyan awahshime otaa tipaacimikohsiin aaniihsh kiinawint iko kinoontawaanaan aaniin i'iweni kaa'⁠ihkitotc.”