ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 21 - Ojibwe Kihcimasina'ikan

Ketimaakisitc ihkwe kiipakitiniketc

¹ Ciisahs e'⁠ayinaapitc okii'-waapamaa' kaawenootisinitc awiya' ehpakitinaminitc opakitinikewinini kaaishi kanawenimimintc shooniyaan Kihcianami'ewikamikonk.

² Miitahsh kaakii'-waapamaatc ekitimaakisinitc kiiwaacihkwewan ehpakitinaanitc niishin 2 osaawaapihkoonhsa'.

³ Miitahsh kaa'⁠ihkitotc: “Tepwe 'owe kaawiintamawinakook, a'awe kaakitimaakisitc kiiwaacihkwe nawac niipiwa' pakitinike ahpiihc wiin iki kahkina kotak awiyak.

⁴ Ikiweniwak hsa wiin kotak owenootisiwiniwaank onci pakitinikewak, a'a tahsh wiin ihkwe ehkitimaakisitc omisiwe pakitinaan otoontaatisiwin.”

Kiishaac kiiwiintank cinihshiwanaacihcikaatenik Kihcianami'ewikamik

⁵ Aaninta tahsh okihkino'amawaakana' okiih tashintamini Kihcianami'ewikamik aaniin kaa'‑ahpiihci minohcikaatenik. Okiih tashintamini kaye pakitinikewinan kaakiih pakitinamawimintc Kishemanitoon. Miitahsh Ciisahs kaa'⁠ihkitotc:

⁶ “Onoweniwan tahsh kaawaapantamek, ninkotink iko taocihcihse, awaaciko peshik ahsin ci‑ishi apihsik kaakii'-ishi apihpan. Kahkina ohsha ahsiniik ta⁠naaniihsi wepinikaasowak.”

Ocaanimisiwin i'i kaye kaakakwaataki'ikoowin ehtashintekin

⁷ Miitahsh okihkino'amawaakana' kaa'⁠ishi kakwecimikotc: “Okihkino'amaake, wiintamawihshinaam aaniin ahpii keishihsek i'iwe kaa'⁠ihkitoyan. Aaniin kaye niiyaak keonci nihsitawinaakwahk i'iwe ahpii wii'‑ishiwepahk?”

⁸ Miihsh Ciisahs kaa'⁠inaatc: “Ayaankwaamisik, ciwaniwinihsinowininek awiya. Aaniihsh tapaahtiinowak awiyak cipi takohshinowaatc i'imaa nintishinihkaasowinink ci‑ihkitowaatc: ‘Niin hsa Kishemanitoo otOonaapamaakanan.’ ‘Aasha pehshonaakwan i'i ci‑ishihsek.’ Keko tahsh piminisha'waahkekwaanik.

⁹ Kika noontaam hsa 'i miikaatiwin, kika naanoontaam kaye e'⁠maamiikaatinaaniwank. Keko tahsh sekisihkek. Pinamaa hsa o'o taishihse cipwaa ishkwaahsekin ono kekoonan mekwaa kaawaapantamank.”

¹⁰ Miitahsh kaa'‑ani inaatc: “Tamaamiikaatiwak hsa pepahkaan kaatahswewaanakisiwaatc o'omaa ahkiink, okimaawiwinan kaye tamaamiikaatiimakanoon. Pepahkaan ahkiin tamaamiikaatiimakanoon.

¹¹ Taishiwepan cikakoshkohsek ahki, misiwe kaye miicim tanaanoontehse, pepahkaan ahkiink. Ta‑ayaamakan kaye kihci aahkosiwin misiwe pepahkaan ahkiink. Keishiwepahk kaye takohtaanentaakwan, kiishikonk kaye tapionci maamahkaasinaakwan.

¹² O'o tahsh kahkina cipwaa ishihsek kika tahkonikoom, kaye tahsh cikakwaataki'ikooyek. Kikashi pakitinikoom Coowi anami'ewikamikohkaank, kipa'otiiwikamikonk kaye. Kikaishiwinikoom kaye enaahsamiiwaatc kihciokimaak, iki kaye kaaniikaanisiwaatc nintishinihkaasowinink onci.

¹³ Miitahsh i'i ahpii kena'ihsek ciwiintamaakeyek minwaacimowin.

¹⁴ Kiishaac itahsh onentamok cimikoshkaatentansiwek aaniin keihkitoyek naatamaasoyek.

¹⁵ Niin hsa piko kika miinininim ihkitowinan, kakiihtaawentamowin kaye. Kaawiin tahsh oka kashkihtoohsiinaawaa iki kaashiinkeniminekwaa cipapaamihtansikwaa ehkitoyek, kaawiin kika shaakoosomikohsiiwaak.

¹⁶ Kikamamishi'ikowaak kiniiki'ikowaak, kiicihkiwensiwaak, kitinawemaakaniwaak, iki kaye kaasaaki wiiciwinekwaa. Aaninta tahsh kiinawaa kika nihsikoom.

¹⁷ Kahkina awiya kika shiinkenimikowaa niin onci.

¹⁸ Kaawiin tahsh kanake awaac peshik kiinisihsiwaa kihtikwaaniwank tawanihsehsinoon.

¹⁹ Aayiicikaapawik itahsh, miitahsh i'imaa keonci pimaatisiyek.”

Kiiniikaanitipaatotank Ceroosalam ewii'nihshiwanaacihcikaatenik

²⁰ “Ahpii tahsh waapamekwaa shimaakanihshak waahkashkamowaatc Ceroosalam mii 'i cikihkentamek aasha ehpehshonaakwahk cinihshiwanaacihcikaatek Ceroosalam.

²¹ Iki hsa kaataawaatc i'imaa Cootiiyaahkaank (Judea) weti ta‑ahpa'iwewak kaashi papiihkwatinaanik. Iki kaye piinci kihci ootena kaa‑ayaawaatc taka tasaakicipa'iwewak, iki kaye pikwacaya'ii eyaawaatc kaawiin tapiintikehsiiwak i'imaa kihci ootenaank.

²² Miitahsh o'owe kiishikan kaaishinihkaatek: ‘Kishemanitoo Onana'ahshiwewin.’ Miitahsh i'i ahpii cimooshkinehsek kahkina kaaishipii'ikaatek Kihcioshipii'ikanink.

²³ I'iwe tahsh ahpii kiishikahk, aahpici takoohpaacihsewak iki ihkwewak kaakikishkawaawahsowaatc, iki kaye omaamaamaak kaanooni'aawaatc oniicaanihsiwaa'. Wiinke hsa takihci wahsitaawentaakwan o'omaa ahkiink, Kishemanitoo onihskaatisiwin oka pakamishkaakonaawaa oko pemaatisiwaatc.

²⁴ Aaninta kaye taonci nihsaawak pashipa'ikewihkomaanink, aaninta kaye tamaaciicikaniwiwak ehtahkonintwaa ciayishiwicikaniwiwaatc misiwe pepahkaan ahkiink. Wiinke okapi tahtahkohkaataanaawaa Ceroosalam iki kaaCoowiwihsikwaa piinihsh kewiinawaa ciocihcihsenik ci‑ishkwaa tipentamowaatc.”

Ahpii kepitakohshininitc Inini oKosihsan

²⁵ “Ta⁠mayaki naakosi kiisihs, tipihki kiisihs kaye, iki kaye wanankohshak. Kahkina kaapepahkaanwewaanakisiwaatc pemaatisiwaatc takakwaatakentamook, ciwaanentami kohtamowaatc e'⁠matweyaakamishkaanik kihcikam, kaye ehkihci mamaankaashkaanik.

²⁶ Pemaatisiwaatc tawaniihkewak keahpiihci sekisiwaatc aaniihsh okakihkentaanaawaa aaniin wa'‑ani ishiwepaninik o'omaa misiwe ahkiink. Kiishikonk kaye eyaamakahkin meskawentaakwahkin takoshko wepinikaatewan.

²⁷ Miitahsh i'i ahpii Inini oKosihsan kenaakosinitc i'imaa wahkwiink cipi pimi ayaanitc cipi kikiinitc kihci mashkawisiiwin, kaye tahsh kihci kihtentaakosiwin.

²⁸ Ahpii onoweniwan maacii ishihsekin, mii 'i ishi pasikwiik ishpimink ci‑inaapiyek, aasha pehshonaakwan kipimaaci'ikoowiniwaa.”

E'awehcikaaketc mihtikoon kaasaakipakiinitc

²⁹ Ciisahs tahsh okii'-wiintamawaa' o'oweni awehcikewin: “Kanawaapamihk a'a miinishaahtik pik (fig) tinowaahtik, iki kaye kotak mihtikook.

³⁰ Ahpii ewaapamekwaa ehsaakipakiiwaatc, mii 'i ekihkentamek aasha wiipa ewii'-niipink.

³¹ Miitahsh i'i peshikwan, ahpii ani waapantamek ono ani ishihsekin, mii 'i cikihkentamek aasha ehpehshonaakwaninik Kishemanitoo oTipencikewin.

³² “Tepwe 'owe kaaininakook, kaawiin hsa tacaaki nipohsiiwak oko kaapimaatisiwaatc, mii 'i aasha kahkina ci‑ishiwepahkin ono kaawiintamawinakook.

³³ Mihsawaa ko kiishik, ahki kaye ishkwaahsekin, nintihkitowinan tahsh wiin kaawiin wiihkaa taishkwaahsehsinoonan kaashi tepwemakahkin.”

Mooshak ciahshawaapink

³⁴ “Ayaankwaamisik onsaam ci'⁠ontamentansiwek kakiipaatisiwin, i'i kaye minihkwewin. Keko kaye onsaamentankek o'o ahkiiwi pimaatisiwin, maakishaa i'iwe kaawii'-ishi kiishikahk kika kwetahto otihsikom, cikaahcitinikoyek taapishkoo wanii'ikan.

³⁵ Kahkina hsako pemaatisiwaatc o'omaa ahkiink eyaawaatc okaotihsikonaawaa o'oweni.

³⁶ Ahshawaapik, mooshak kaye cianami'aayek ciayaayek mashkawisiiwin cikashkihtooyek cishaaposhkamek i'i kahkina kaawii'-ishiwepahk, cikashkihtooyek kaye ci⁠niipawiyek enaahsamiinitc Inini oKosihsan,” kii'ihkito.

³⁷ Entahso kiishik tahsh Ciisahs kiikihkino'amaake i'imaa Kihcianami'ewikamikonk. E'⁠ani onaakohshininik tahsh ahko kii'⁠maacaa ekii'-awi tipikihshitc eshi ishpatinaanik Aalip (Olive) Kihtikaanaahtikohkaank kaaishinihkaatek.

³⁸ Wiipa tahsh ehkishepaawakaninik kahkina pemaatisiwaatc kii'‑ishaawak Kihcianami'ewikamikonk ewiih pisintawaawaatc Ciisahsoon.