ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 19 - Ojibwe Kihcimasina'ikan

Ciisahs kiimawatihsaatc Saahkiiyahsan

¹ Ciisahs okiihpi otihtaan Cerahko (Jericho) ootena ekii'mihci shaaposhkaatc.

² Kii'⁠ayaa tahsh i'imaa inini Saahkiiyahs (Zacchaeus) eshinihkaasotc maawac kaaniikaanishkawaatc kaamaawantoonaanitc taakihs shooniyaan (tax) kaye tahsh wiinke ekii'-wenootisitc.

³ Okiihkakwe waapamaan aweneniwinitc Ciisahsoon. Kaawiin tahsh okii'-waapamaahsiin aaniihsh kiitahkoosii, onsaam kaye kiipaahtiinowa' pemaatisinitc.

⁴ Miitahsh kii'⁠niikaanipahtoo ehpimohsenaaniwaninik kaye tahsh ekii'-ahkwaantawetc Sikamwariwaahtikonk (Sycamore) waa'⁠onci waapamaatc Ciisahsoon mayaa i'iweti wiiani ishi pimohsenitc eshi akoositc.

⁵ Ahpii Ciisahs kaapi otihtank eshi akoosinitc Saahkiiyahsan, ishpimink kii'‑inaapi ehkanoonaatc: “Saahkiiyahs, weyiip piniihsaantawen. Noonkom kaakiishikahk oncita ninkapi ayaa i'imaa kitayaawinink,” okii'inaan.

⁶ Saahkiiyahs tahsh kiihpapaashii e'⁠niihsaantawetc, kaye tahsh ekii'-minwentank Ciisahsoon pisaan cipiintikaakotc.

⁷ Kahkina tahsh awiyak o'o e'⁠ishi waapankewaatc kii'⁠maacii kihci kaakiikitowak ekii'-ihkitowaatc: “Mii 'i ahpan Ciisahs e'⁠anta mawahtihsaatc otaawininiink omacaatisan,” kii'‑ihkitowak.

⁸ Saahkiiyahs tahsh kiihpasikwii ehkanoonaatc kaaTipencikenitc: “Inashke Tepencikeyan aapihta ninka pakitinaanan nintaya'iiman cimiinakwaa kaakitimaakisiwaatc. Minihk kaye kaakiihpi wayeshimakwaa awiyak niiwink (4) awahshime minihk ninkashi kiiwe tipa'amawaak,” okii'-inaan.

⁹ Miitahsh Ciisahs kaa'⁠inaatc: “Pimaaci'ikoowisiwin otootihsikonaawaa o'omaa kaa‑ayaawaatc taawinink noonkom kaakiishikahk aaniihsh kewiin a'a inini Eparahaamink (Abraham) nihtaawikihcikanink ontahkaanesi.

¹⁰ Niin aaniihsh Inini oKosihsan ninkiih piishaa ehpi antone'wakwaa, kaye tahsh ewiih pimaaci'akwaa kaawanihshinowaatc,” kii'ihkito.

Eawehcikaakaaniwiwaatc anohkii'aakanak osaawi shooniyaan kaakiihkanawenta'intwaa

¹¹ Mekwaa tahsh pemaatisinitc ehpisintaakotc Ciisahs keyaapi okii'ani wiintamawaa' awehcikewin aasha epehshonaakwaninik ciotihtank Ceroosalam (Jerusalem). Mii 'iitok kaa'⁠inentaminitc aasha shemaak cinaakwaninik Kishemanitoon oTipencikewinini.

¹² Miitahsh kaa'⁠ihkitotc: “Peshikwaa kii'ayaa inini maawac ehkihci inentaakositc. Kiihkwayaancii waahsa ahkiink ewii'-ishi maacaatc, weti ewii'-awi tashi kihciokimaawi'intc. Ahpii tahsh kii'‑ishkwaa onakimintc, ewiih pikiiwetc ciokimaahkantank ahkiink kaaonciitc.

¹³ Cipwaa maacaatc tahsh okiih kanoonaa' mitaahso otanohkii'aakana' kahkina ekii'-maamiinaatc pehpeshik osaawi shooniyaanhsa'. Miihsh kaa'⁠inaatc: ‘Ishi pakitinihk wa'a shooniyaa keonci shooniyaahkeyaan minihk iko keontentiyaan piiniihsh cipitakohshinaan,’ okii'inaa'.

¹⁴ A'a tahsh inini kaashiinkenimikotc owiici pemaatisiimaakana' okii'-ishinisha'waani kaatipaacimonitc o'o ciawi ihkitonitc: ‘Kaawiin ninantawenimaahsiwaanaan wa'a inini cikihci otookimaamiyaank.’

¹⁵ Shaakooc itahsh a'a inini kiihkihciokimaawi'aa, miihsh kaah⁠pishi kiiwetc. Shemaak itahsh kii'‑inaahkonike otanohkii'aakana' cipi niipawinitc enaahsamiitc ewii'-anta kihkentank aaniin minihk kaahkashkihcikenitc.

¹⁶ Ini nihtam kaapiishaanitc kii'‑ihkitowan: ‘Nintookimaam, kotak mitaahso nintayaawaak osaawi shooniyaanhsak kaakii'onci kashkihcikeyaan a'a peshik kaakii'-miinshiyan onci,’ okii'ikoon.

¹⁷ Miitahsh kaa'⁠inaatc: ‘Mii 'iwe ekii'-minohcikeyan, kiin kwayahk anohkii'aakan kitinow. Ehkwayahko tootaman tahsh mihsawaako kaa akaahsentaakwahk, kimiinin cinaanaakacihtooyan mitaahso kihciootenawan,’ okii'inaan.

¹⁸ Ini kotak otanohkii'aakanan kiihpiishaawan ekii'ikotc: ‘Nintookimaam kotak naanan nintayaawaak osaawi shooniyaanhsak kaakii'-onci kashkihcikeyaan a'a peshik kaakii'-miinshiyan onci,’ okii'ikoon.

¹⁹ Miitahsh wiin ini kaa'⁠inaatc: ‘Kiin tahsh wiin kika miinin naanan cinaanaakacihtooyan kihci ootenawan,’ okii'inaan.

²⁰ Iniweniwan itahsh kotak anohkii'aakanan kiihpiishaawan ekii'ikotc: ‘Nintookimaam, ina wa'a kitoosaawi shooniyaanhsim. Aapihkaakanink ninkii'-kashkiikinaa ekiih kanawenimak,

²¹ ekiih kohsinaan aaniihsh kikihkenimin aaniin ehpiihci aahkwaatisiyan e'⁠otaahpinaman kiin kaatipentansiwan, kaye tahsh e'⁠maawantoonaman e'⁠manishiman kiin kaakiih kihtikaatansiwan,’ okii'ikoon.

²² Miitahsh kaa'⁠ikotc otookimaaman: ‘Kiin maawac noociko anohkii'aakan. Kitihkitowinan ninka aapacihtoonan keonci onaahkoninaan. Kikihkentaan aahpici e'⁠aahkwaatisiyaan, e'⁠otaahpinamaan kaye kaatipentansiwaan, e'⁠manishamaan kaye kaakiikihtikaatansiwaan.

²³ Wekonen tahsh kaa'⁠onci ahsaahsiwaatc nishooniyaam kekii'-onci kashkihcikeyaampaan ahpii tahsh kiipitakohshinaan cikii saakisi'akipan nishooniyaam, minihk kaye kaa‑aanihke kashkihciketc?’

²⁴ Miitahsh kaa'⁠inaatc i'imaa kaakii'-niipawinitc: ‘Otaahpinimihk ini osaawi shooniyaanhsan kaa‑ayaawaatc, ini tahsh miinimihk anohkii'aakanan mitaahso osaawi shooniyaanhsa' kaa‑ayaawaanitc.’

²⁵ Miihsh kaa'⁠inintc a'a kihciokimaa: ‘Nintookimaaminaan, aasha iitok wiin mihtaahso shooniyaanhsa' otayaawaa',’ kii'inaa.

²⁶ Kihciokimaa tahsh kii'‑ihkito: ‘Kiwiintamawininim o'o, kahkina awiya kekoon kaa‑ayaatc aanciihke awahshime tamiinaakaniwi, a'a tahsh wiin kekoon kaa‑ayaahsik, taotaahpinamawaa mihsawaa ko pankii kekoon kaa‑ayaatc.

²⁷ Ikiweniwak tahsh wiin kaashiinkenimiwaatc kaakii'-antawenimihsikwaa ciokimaahkantawakwaa, piinihkwak o'omaa eshi ayaawak. Nihsihkwak enaahsamiiwak,’ ” kii'ihkito.

Ciisahs kiitakohshink Ceroosalamink

²⁸ O'o tahsh Ciisahs kaa'⁠ishkwaa ihkitotc, kii'⁠ani niikaani maacaa Ceroosalamink (Jerusalem) e'⁠ishaawaatc.

²⁹ Ahpii tahsh kekaa e'⁠ani takohshink Pehpaci (Bethphage) eshinihkaatenik ishtaawinink kaye Pehtani (Bethany) eshi ayaanikin ehpihkwatinaanik Aalip (Olive) ecikaatenik, Ciisahs tahsh okii'-niikaaninisha'waa' niishin (2) okihkino'amawaakana',

³⁰ o'o ekii'inaatc: “Ani niikaani ishaak kaa⁠matwe ayaak kaaishitaaniwank. Ahpii tahsh ani piintikeshkaayek kika waapamaawaa maanshimihtatim cisakaakwahpisotc mahshi awiyan ehpoosonotaakohsik. Aapa'waahkek tahsh cipiinek.

³¹ Kiishpin tahsh awiya o'o ishi kakweciminek: ‘Wekonen wenci aapa'wek a'a maanshimihtatim?’ O'o hsa kika inaawaa: ‘KaaTipenciketc owii'-aapaci'aan,’ ” okii'inaa'.

³² Iki tahsh kaakii'-niikaaninisha'ontwaa kii'‑ishaawak ekii'-ishi mihkamowaatc kahkina kaakii'-inintwaa.

³³ Mekwaa tahsh e'⁠aapa'waawaatc ini maanshimihtatimoon, tepenimikonitc okii'-ikowaan: “Wekonen tahsh wenci aapa'wek maanshimihtatim.”

³⁴ Miihsh kaa'⁠inaawaatc: “KaaTipenciketc owii'-aapaci'aan,” okii'-inaawaan.

³⁵ Okiih piinaawaan tahsh ini maanshimihtatimoon eshi ayaanitc Ciisahsoon. Miitahsh kaa'⁠ishi wakitahtoowaatc okashkiikiiwiniwaan, miihsh i'imaa kaa'⁠ishi ahpapinitc Ciisahsoon.

³⁶ E'⁠ani pimi ayaatc itahsh, pemaatisinitc okiih tashwekiikihsitooni okashkiikiiwinini i'imaa miihkanaank.

³⁷ Ahpii pehsho e'⁠ani otihtank Ceroosalam eshi niihsaciwemoninik miihkana kaashi ishpatinaanik Aalip Kihtikaanaahtikohkaank ecikaatenik, aahpici kiihpaahtiinowa' kaapiminisha'okotc ekii'-maacii ciihkentaminitc enikohk ekiih shaakowenitc e'⁠nanaahkomaanitc Kishemanitoon kahkina maamahkaacihcikewinan kaakii'-waapantaminitc:

³⁸ “Shawentaakosi a'a kihciokimaa kaapi takohshink otishinihkaasowininiink kaaTipencikenitc. Pisaanisiwin ayaamakan kihcikiishikonk, kaye tahsh maawac kihci inentaakosiwin otayaan Kishemanitoo maawac ishpimink kaa‑ayaatc,” kii'‑ishi shaakowewak.

³⁹ Aaninta tahsh Perahsiik (Pharisees) mekweya'ii kaashi paahtiinonaaniwaninik okii'-onci kanoonaawaan Ciisahsoon ekii'-inaawaatc: “Okihkino'amaake, kanoosh kikihkino'amawaakanak cinoontaatihsikwaa.”

⁴⁰ Ciisahs tahsh kii'‑ishi nahkwehtam: “Kiwiintamawininim, kiishpin wiinawaa noontaatihsikwaa, ahsiniik ohsha tashaahshaakowewak.”

Ciisahs kiimawintank Ceroosalam

⁴¹ Ahpii Ciisahs aasha pehsho e'⁠ani otihtank Ceroosalam (Jerusalem) kihciootena, ahpii ehtepaapantank okii'-mawintaan,

⁴² ekii'-ihkitotc: “Kiishpin tahsh kiikihkentamekipan noonkom kaakiishikahk aanti keonci miinikooyekipan pisaanisiwin; kaawiin tahsh kikii waapanta'ikoohsiim iniweniwan.

⁴³ Kika otihsaapantaam ohsha kiishikahk, ahpii kaa⁠shiinkeniminekwaa ciwaahkaa pihkwahkamika'ikewaatc keonci miikaaninekwaa. Kika waahkaashkaakowaak kaye, misiwe kaye inahke kika onciihkaakowaak.

⁴⁴ Wiinke hsa ko oka nihshiwanaacihtoonaawaa kitootenaamiwaa. Kika nihsikoom, apinoonciisha' kaye oka nihsaawaa'. Kaawiin kanake peshik ahsin tainapihsii kaakii'-ishi kihtapihpan, onsaam aaniihsh kaawiin kikii'-nihsitawinansiim ahpii kiishikaninik Kishemanitoo kekiih pimaaci'inekipan.”

Ciisahs kii‑ishaatc Kihcianami'ewikamikonk

⁴⁵ Ciisahs kiih⁠piintike i'imaa Kihcianami'ewikamikonk, ekii'-maacii saahsaakicinisha'waatc kahkina kaakii ataawewikamikohkenitc.

⁴⁶ Miihsh o'o kaa'⁠inaatc: “Mii hsa eshipii'ikaatek Kihcimasina'ikan Kishemanitoo ekii'-ihkitotc: ‘Niwaahkaa'ikan hsa taishinihkaate anami'e waahkaa'ikan,’ kiinawaa tahsh e'⁠ishi naakohtooyek taapishkoo ciokaasoowikamikowaatc omahkantweshkak.”

⁴⁷ Tahso kiishik Ciisahs kiihkihkino'amaake Kihcianami'ewikamikonk. I'i tahsh kihcianami'ewikimaa', i'i kaye kaakihkino'amaakenitc Onahshowewin, i'i kaye kaaniikaaniihtamawaanitc pemaatisinitc okiih kakwe nihsikoo'.

⁴⁸ Kaawiin okiih kihkentansiini aaniin kekii'-onci nihsikohpan aaniihsh kahkina pemaatisinitc okii kihciwentamini kaakii'-ihkitotc. Kiikihciwi ayaawa' ekiih pisintaakotc aaniin ehkitotc.