ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 18 - Ojibwe Kihcimasina'ikan

Kiiwaacihkwe, a'a kaye otipaahkoniwe ehtashinsowaatc

¹ Ciisahs okii'-wiintamawaa' okihkino'amawaakana' awehcikan keonci kihkino'amawaatc mooshak cianami'ehtawaanihpan Kishemanitoon, wiihkaa ciaanawencikehsinik.

² “Kii'⁠ayaa iinsan inini ootenaank ekiih kohtaanenimaahsik Kishemanitoon, ekiih papaa pisiskenimaahsik kaye ininiwa'.

³ Kiiwaacihkwe kaye i'imaa kii'⁠ayaa peshikwan ootenaank ekii'-nihtaa naasihkawaatc ini otipaahkoniwen ekiih kakwecimaatc e'⁠antawentank kwayahk citootawintc o'o ekii'-inaatc: ‘Wiici'ihshin cishaakooci'ak kaakakwe macihse'ihshitc!’

⁴ Kaawiin tahsh nanaansh otipaahkoniwe kii'‑inentansii. Kekahpii tahsh o'o kii'‑inentam: ‘Aanawiin ekohtaanenimaahsiwak Kishemanitoo, ehpapaa pisiskenimaahsiwakwaa kaye awiyak

⁵ shaakooc itahsh a'a kiiwaacihwe nimikoshkaasomik, intawaa hsa ninka wiici'aa citepinank i'i kaashi antawentank. Kehcinaac maawiin ninka noonte caakii'ik e'⁠nipaaci piishaatc.’ ”

⁶ Miihsh Tipenciketc kaa'‑ani ihkitotc: “Inashke pisintamok aaniin ehkitotc a'a kaakwayahkohcikehsik otipaahkoniwe.

⁷ Miitahsh i'i nahke Kishemanitoo kwayahk keshi onaahkonaatc i'i kaakii'-onaapamaatc kaashaakowaanikotc ciwiici'aatc entahso kiishik, entahso tipihk kaye. Tapwaahtawii na ciwiici'aatc?

⁸ Miihsh eninakook, aahpici ohsha takitaahtapii kwayahk cishi wiici'imintc. Ahpii tahsh pitakohshink a'a Inini oKosihsan, oka mihkaan ina tepweyentamowin o'omaa ahkiink?”

Ekii'awehcikaaketc Perahsiin ini kaye kaatipa'ike'iwenitc

⁹ I'imaa tahsh kii'⁠ayaawaa' aaninta awiya' kaakiih kwayahkwaatisiiwi tepakenintisonitc, ekii'-aanwaapamaanitc tahsh kotak awiya' eshihcikenitc. Miitahsh Ciisahs o'o kaakii'-ishi awehciketc.

¹⁰ “Aapitink kii'⁠niishiwak ininiwak ekii ishaawaatc Kihcianami'ewikamikonk ekii'-anta anami'aawaatc. Peshik kiihPerahsiiwi, (Pharisee) a'a tahsh kotak kaatipa'ike'iwetc taakihs shooniyaan (tax) ekiih tinowitc.

¹¹ A'a tahsh Perahsii kii'⁠niikatekaapawi o'o ekii'ishi anami'aatc: ‘Kishemanitoo miikwehc hsa kitinin ehtinowihsiwaan taapishkoo kotak awiyak kaakimootiwaatc, kaamacitootamowaatc, kaapihshikwaatisiwaatc kaye. A'a kaye kaatipa'ike'iwetc taakihs shooniyaan kaamatwe ayaatc.

¹² Niishokiishik entahso tawahte kaawiin nintoonci wiihsinihsii piko e'⁠anami'aayaan. Kaye tahsh peshik mitaahso ehpakitinikeyaan misiwe minihk kaakashkihcikeyaan,’ kii'‑ihkito.

¹³ A'a tahsh wiin kaatipa'ike'iwetc taakihs shooniyaan nawac waahsa kii'⁠matwe niipawi. Kaawiin kaanake ishpimink kii'‑inaapihsii. Kiihpahkihte yaahkikane'otiso ehkihci mincinawesitc e'⁠ihkitotc: ‘Kishemanitoo koohpaasinawihshin, niin emacaatisiyaan,’ kii'‑ihkito.

¹⁴ Miitahsh eninakook, wa'a tahsh kaatipa'ike'iwetc taakihs shooniyaan ahpii ani kiiwetc nawac okii'-minwaapamikoon Kishemanitoon ahpiihc wiin a'a Perahsii. Awiya hsa kaaishpenintisotc, tatapahsenimaa. Awiya hsa kaatapahsenintisotc, mii hsa 'awe keishpentaakositc.”

Ciisahs kiihshawenimaatc apinoonciishenhsha'

¹⁵ Aaninta tahsh awiyak okiih piinaawaa' apinoonciisha' eshi ayaanitc Ciisahsoon cisaaminaanitc. Kihkino'amawaakanak tahsh o'o ewaapantamowaatc, okiih kishii kanoonaani i'i kaakiih piinaanitc.

¹⁶ Ciisahs tahsh okii'-antomaa' apinoonciisha' cinaasihkaakotc o'o ekii'-ihkitotc: “Maano apinoonciishak ninkapi naasihkaakook. Keko wiin kipihtinaahkekwaanik. Miiwak iitok iki kaatipentami'ikoowisiwaatc Kishemanitoon oTipencikewinini. Aaniihsh miiwak ihsa iki tino pemaatisiwaatc oko kaainaatisiwaatc apinoonciishink ketipenimikowaatc Kishemanitoon.

¹⁷ Tepwe hsa kaaininakook, awenen hsa piko keotaahpinansik Kishemanitoon oTipencikewinini taapishkoo kaaishi otaahpinank wa'a apinoonciish, kaawiin wiihkaa oka kashkihtoohsiin cipiintiketc. Kishemanitoo oTipencikewinink.”

Oshkiniiki kaakii'wenootisitc ekiihtashimintc

¹⁸ Aapitink tahsh inini okii'-naasihkawaan Ciisahsoon ekii'-inaatc: “Osasekaakihkino'amaake, wekonen sasekaa ishihcikewin keishihcikeyaampaan keonci miinikooyaan pimaatisiwin wiihkaa kepoonihsehsinok?”

¹⁹ Ciisahs okii'-ishi nahkwehtawaan: “Wekonen wenci ishiyan ehsasekaawiyaan. Kaawiin awiya sasekaawihsii, mii ehta ko Kishemanitoo.

²⁰ Kikihkentaanan iitok ini onahshowewinan: ‘Keko papaamenimimaahken pahkaan awiya wiiwan, keko nihshiwehken, keko kimootihken, keko kaye awiya noociko inaacimaahken tipaahkonintc, kihci inenim kitete, kimaamaa kaye.’ ”

²¹ Oshkiniikiwan okii'ikoon: “Kiipi oshkaatisiyaan ohsha piko ono kahkina onahshowewinan nimpi na'ihtaanan.”

²² Ciisahs tahsh o'o e'⁠noontank, mii 'i kaa'-inaatc: “Peshik kekoon kinoontehse kekii'-ishihcikeyampan. Ataawaaken kahkina kekoonan kaa‑ayaayan, cimiinatwaa shooniyaan ketimaakisiwaatc. Wenootisiwin tahsh kika ayaan weti kihcikiishikonk. Miitahsh ishi piishaahkan cipiminisha'oyan.”

²³ E'⁠noontaakotc itahsh ini ininiwan o'o e'⁠inaatc, wiinke kii'maanentamoon aaniihsh kikihci wenootisiwan.

²⁴ Ahpii tahsh Ciisahs e'⁠waapamaatc e'⁠maanentaminitc mii 'i kaa'ihkitotc: “Aahpici sanakanini kaawenootisitc cikiih piintikehpan Kishemanitoon eshi tipencikenitc.

²⁵ Nawac sanakanini kaawenootisitc cipiintikehpan Kishemanitoon eshi tipencikenitc, ahpiihc wiin pihkwaawikanemihtatim cishiipaashkaahpan i'iweni kaashi pakoneyaanik shaaponikan.”

²⁶ I'i tahsh pemaatisinitc e'⁠noontaakotc o'o e'⁠ihkitotc mii 'i kaa'ihkitonitc: “Awenen tahsh inaa kekiihpimaaci'ikoowisihpan?”

²⁷ Miihsh Ciisahs kaa'⁠ishi nahkwehtank: “Inini wiin kaawiin otaa kashkihtoohsiin o'o ci‑ishihciketc, Kishemanitoo tahsh wiin kahkina kekoon owencihtoon.”

²⁸ Okii'-ikoon itahsh Piitaroon (Peter): “Inashke, kahkina kekoon ninkii'-nakataamin ewiih piminisha'okooyan.”

²⁹ Miitahsh Ciisahs kaa'⁠ihkitotc: “Tepwe o'owe kaawiintamawinakook, awenen iko kenakatank otayaawin, kenakanaatc kaye wiiwan, wiicihkiwensiwan kaye, oniiki'ikoo' kaye, kaye tahsh otapinoonciishima' cikiih tipenimikoohpan Kishemanitoon.

³⁰ Mii 'awe awahshime tahsink kemiinintc mekwaa o'omaa pimaatisiwinink. Miihsh kaye citako miinintc pimaatisiwin wiihkaa kepoonihsehsininik.”

Miinawaa Ciisahs ekiihtashintank aaniin keshinihsintc

³¹ Ciisahs tahsh pahkeya'ii okii'-ishiwinaa' mitaahshi niishin (12) okihkino'amawaakana' ekii'-inaatc: “Pisintawihshik, Ceroosalamink (Jerusalem) kika ani ishaamin. Kahkina kekoon kaakii'-ishipii'ikewaatc iki kenootamawaawaatc Kishemanitoon tamooshkinehseni ekiih tashimaawaatc ini Inini oKosihsan enimintc.

³² A'a tahsh Inini oKosihsan tashi pakitinaa eshi ayaanitc kaaCoowiwihsinik. Miitahsh cipaahpi'intc, cimaanshi tootawintc kaye, miihsh kaye cisasiihkwaanintc.

³³ Miitahsh kaye cipahpahshanshe'ontc, miihsh kaye keshi nihsintc. Nihso kiishihk (3) tahsh ishihsenik, takiiwe pimaatisi,” okii'-inaa'.

³⁴ Kihkino'amawaakanak tahsh kaawiin cikii'-nihsitohtamowaatc kekoon kaakiih tashintaminitc aaniihsh kiihtootawaawak cinihsitohtansikwaa ini ihkitowinan. Kaawiin kaye cikii kihkentamowaatc wekonen kaakiih tashintaminitc.

Ciisahs kiiwaapi'aatc ininiwan kaakii'waapihsinik

³⁵ Aasha Ciisahs pehsho e'⁠ani otihtank Cerahko (Jericho) ootena, peshik ininiwan kaawaapihsinik kii'⁠namatapiwan ciiki miihkana ehpakohshi'iwenitc.

³⁶ Ahpii tahsh a'a inini e'⁠noontank ehpaahtiinonitc awiya' ehpimi ayaanitc kiihkakwetwe aaniin enahkamikaninik.

³⁷ Miihsh kaa'⁠inintc: “Ciisahs Naasaritink (Nazareth) kaaonciitc pimi ayaa,” kii'‑inaa.

³⁸ Miitahsh kaa'⁠ishi shaakowetc: “Ciisahs, Tepitink (David) kaaontahkaanesiyan koohpaasinawihshin.”

³⁹ I'i tahsh awiya' kaaniikaaniinitc okiih kishii kanoonikoo' ekii'-ikotc ciompiikisihsik. Aanciko tahsh enikohk kiihshaakowe ekii'-ihkitotc: “Tepitink kaaontahkaanesiyan koohpaasinawihshin.”

⁴⁰ Miitahsh Ciisahs kaakiih kipihciitc ekii'-anoohkiitc cipiitamawintc ini ininiwan Ahpii tahsh pehsho ehpi ayaanitc mii 'i kaa'⁠ishi kakwecimaatc:

⁴¹ “Aaniin eshi antawenimiyan ci‑ishihcikehtamawinaan?” okii'-inaan. “Tepencikeyan, ninantawentaan ciwaapiyaan,” okii'-ikoon.

⁴² Miitahsh kaa'⁠inaatc: “Miitahsh ishiwaapin. Kitepwewakentamowin hsa kiminwaaci'ikon.”

⁴³ Shemaak tahsh a'a inini okiikashkihtoon ciwaapitc, ekiih piminisha'waatc Ciisahsoon. Kaye tahsh ekii'-nanaahkomaatc Kishemanitoon. Ahpii tahsh iki kaapaahtiinowaatc awiyak ewaapantamowaatc o'oweni, mii 'i kewiinawaa kahkina kaa'⁠ishi nanaahkomaawaatc Kishemanitoon.