ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 17 - Ojibwe Kihcimasina'ikan

Kohpaasinaakosi awiya kaamacitootank

¹ Miitahsh Ciisahs kaa'inaatc okihkino'amawaakana': “Kekoonan hsa tatakohshinoomakanoon keonci macitootamink. Aahpici tahsh takohpaasinaakosi a'a awiya wiin kaaonci otihshiwemakaninikin.

² Nawac iitok taaonishihshinini kaamihcaapihkisinitc piihsipoocikanahsiniin citahkopicikaniwinihpan ohkwekanink cinihsaapaawacikaniwihpan i'imaa kaashi kiishkaayawaanik kihcikamiink, ahpiihc wiin cipankihshimaahpan ini kaatepweyenimimitc.

³ Kanawenintison tahsh eshihcikeyan. “Kiishpin kiicihkiwensi macitootank, kitaa kanoonaa ohsha, kiishpin tahsh wiihpoonihtootc otishihcikewin, kika poonentamawaa.

⁴ Kiishpin tahsh macitootawihk niishwaahcink aapitink ehkiishikaninik, niishwaahcink tahsh pinaasihkawihk o'o inihk: ‘Taka poonentamawihshin.’ Pisaan hsa kika poonentamawaa.”

Tepweyentamowin ehtashintek

⁵ Ishinisha'waakanak okii'-inaawaan kaaTipencikenitc: “Wiici'ihshinaam cimashkawisiimakahk nintepwehtamowininaan.”

⁶ KaaTipenciketc tahsh kii'‑ishi nahkwehtam: “Kiishpin ayaayekipan tepwewakentamowin taapishkoo peshikomin maawac kaa‑akaahsink kihtikaanenhs kitaainaawaa wa'aweti kihci mihtik: ‘Pahkwaciciipihkepinitison antawi patahkison kihcikamiink,’ kita na'ihtaakowaa ohsha,” okii'inaa'.

Kwayahk anohkii'aakan keshihcikehpan

⁷ “Kaanika wiin kiinawaa peshik ayaawek anohkii'aakan e'⁠ompwehkahkamikipitootc kihtikewahkiini, kaye tahsh e'⁠nanaakaci'aatc maanahcaanihsha'. Ahpii tahsh ehpi onci takohshink kihtikewahkamikonk kitaainaa na: ‘Taka weyiip kakihtaahtapiin ciwiihsiniyan’?

⁸ Kaawiin i'iwe kitishihcikehsii. Nawac o'oweni kitaainaa: ‘Kwayaancihtamawihshin keonaakohshi miiciyaan. Pihsihkan aakoopison cipami'iyan ewiihsiniyaan, kaye tahsh eminihkweyaan. Paanimaa tahsh ishkwaa wiihsiniyaan, mii kiin i'i payesh ciwiihsiniyan,’ kikainaa.

⁹ Kaawiin ina tahsh miikwehc taaicikaniwihsii a'a anohkii'aakan ekii'-ishihciketc kaakii'-ishi anoonintc?

¹⁰ Miitahsh peshikwan kekiinawaa keishihcikeyekipan. Ahpii kii'‑ishkwaa ishihcikeyek kahkina kaakii'ikooyek, mii 'i keihkitoyekipan: ‘Niinawint hsa piko anohkii'aakanak nimihci tinowimin, ekii'mihci ishihcikeyaank ehta kekii'inanohkiiyaankipan.’ ”

Mitaahso kii'minwaaci'intwaa kaaomikiiwaahpinewaatc

¹¹ Ciisahs tahsh e'⁠anipimi ayaatc Ceroosalamink (Jerusalem) e'⁠ishaatc, nahsawaya'ii inahke kii'⁠ani ishaa eshi ayaanik Sameriya (Samaria) ahki, i'i kaye Kaalalii (Galilee) ahki.

¹² Aasha tahsh kekaa e'⁠ani otihtank eshitaaniwaninik, mitaahso ininiwa' wemikiiwaahpinenitc okiihpi anta nakishkaakoo'. Waahsayiihsh iko kii'matwe niipawiwa'.

¹³ Miitahsh kaa'⁠matweikotc: “Ciisahs Okihkino'amaake, taka koohpaasinawihshinaam!”

¹⁴ Ciisahs e'⁠waapamaatc mii 'i kaa'⁠inaatc: “Maacaak, anta waapamihk anami'ewikimaa cianta kihkeniminek.” Mekwaa tahsh e'⁠ani pimi ayaawaatc, mii 'i kaakiih pehki'ikoowisiwaatc eshi omikiiwaahpinewaahpan.

¹⁵ Peshik itahsh a'a ewaapantank ehpehki'ikoowisitc, okiihkiiwe naasihkawaan Ciisahsoon, ekiihkishiiwetc e'⁠nanaahkomaatc Kishemanitoon.

¹⁶ Eshisitekaapawinitc Ciisahsoon kii'‑ishi animihkopani'o ekii'-nanaahkomaatc. A'a hsa tahsh inini Sameriya ahkiink kii'⁠oncii.

¹⁷ Miitahsh Ciisahs kaa'ihkitotc: “Mitaahso ohsha ininiwak kiihpehki'ikoowisiwak, Aanti tahsh wiin iki kotak shaankahso?

¹⁸ Aaniin tahsh wiin ehta wa'a pahkaan ahkiink kaaonciitc wenci pikiiwetc ehpi nanaahkomaatc Kishemanitoon?”

¹⁹ Miihsh kaa'⁠inaatc ini ininiwan: “Pasikwiin mii 'i ishi maacaan. Kitepwewakentamowin kikii'-minwaaci'ikon,” okii'-inaan.

Kishemanitoo oTipencikewin kaawiihpi takohshinoomakaninik

²⁰ Aaninta Perahsiik (Pharisees) okiih kakwecimaawaan Ciisahsoon aanahpii keoshihsicikaatenik Kishemanitoo oTipencikewin. O'o tahsh Ciisahs okii'inaa': “Ahpii Kishemanitoo pioshihsitootc oTipencikewin kaawiin iitok tanihsitawinaakohsinini.

²¹ Kaawiin kaye awiya taaihkitohsii: ‘Inashke, mii 'oweni, komaa kaye ina 'iweni Kishemanitoo oTipencikewin.’ Kishemanitoo oTipencikewin ohsha ayaamakan kipimaatisiwiwaank.”

²² Miitahsh Ciisahs kaa'⁠inaatc okihkino'amawaakana': “Taocihcihse ohsa tipa'ikan ahpii cimihsawentamek cikii'waapantamekipan peshik okiishikanom Inini Okohsihsan, kaawiin tahsh kika waapantansiim.

²³ Tani ayaawak tahsh o'o keininekwaa: ‘Inashke weti inaapin.’ ‘Inashke 'omaa inaapin.’ Keko tahsh weti ishaahkek ciawi inaapiyek.

²⁴ Taapishkoo kaashi waahtehsek weti ishpimink, kwehkwehk itahsh inahke weti ishpimink e'⁠ishi mamishahkii waahseyaak, miihsa keishinaakwaninik ahpii pitakohshininitc Inini oKosihsan.

²⁵ Pinamaa tahsh nihtam niipiwa' tashi kakwaatakihtoo, ciaanawenimikotc pemaatisinitc o'o noonkom kaakiishikaninik.

²⁶ I'iwehsa kaakiihpi ayishihsenik mekwaa ahpii Noowa (Noah) kiihpi pimaatisitc, miitahsh peshikwan keishinaakwaninik Inini oKosihsan okiishikanom.

²⁷ Pemaatisiwaatc kii'⁠wiihsiniwak, kii'⁠minihkwewak kaye. Ininiwak, ihkwewak kaye ekii'-waawiitikentiwaatc piinihsh ahpii Noowa kaakiih poositc kihci ciimaan. Miitahsh kaakii'-nihkipiik misiwe ahkiink kahkina pemaatisiwaatc kii'⁠nihshiwanaatisiwak.

²⁸ Miitahsh i'iwe keishihsek kaakiihpi ishihsek mekwaa Laat (Lot) kiipimaatisitc. Pemaatisiwaatc iitok kii'⁠wiihsiniwak, kii'⁠minihkwewak kaye. Kii'⁠ataawewak, kaye tahsh kii'⁠ataawaakewak. Kiikihtikewak, kaye tahsh kii'⁠waahkaa'ikewak.

²⁹ Ahpii tahsh ehkiishikaninik Laat i'imaa kiionci maacaatc Swaatam (Sodom) ootenaank, miihsh ishkote, a'a kaye ahsin kaawiihsakaapahsowetc kaakii'onci pankihshink kiishikonk kahkina i'imaa eyaawaatc ekii'-nihsikowaatc.

³⁰ Miitahsh i'iwe peshikwan keishinaakwahk kiishikahk ahpii Inini oKosihsan naakosinitc.

³¹ “Ahpii i'i ishi kiishikahk, awiya wakici waahkaa'ikanink kaa ayaatc taka kaawiin tapi niihsaantawehsii pinamaa cipi naasihkank otaya'iiman. A'a kaye weti kaa‑ayaatc mishawahkamik kaawiin takiiwehsii cinaasihkank kekoon.

³² Maamihkwenimihk kaakii'-ishiwepisinitc Laat wiiwan.

³³ Awenen hsa piko kekakwe kihciwinank opimaatisiwin kaawiin oka ontinansiin cipimaatisitc. A'a tahsh kaye kepakitinank opimaatisiwin niin onci, mii 'awe kepimaatisitc.

³⁴ Miihsh eshi wiintamawinakook. Niishin awiyak tanipaawak nipewinaahkonk ehtipihkaninik. Peshik taonci otaahpinaa, kotak itahsh tanakanaa.

³⁵ Niishin ihkwewak ta‑anohkiiwak ehpiihsipoocikewaatc. Peshik taonci otaahpinaa, a'a tahsh kotak tanakanaa.”

³⁶ [Niishin hsa ininiwak ta‑ayaawak ishipeshikwan mihshawahkamik, peshik taonci otaahpinaa, a'a tahsh kotak tanakanaa.”]

³⁷ Okihkino'amawaakana' itahsh okii'-ishi kakwecimikoo': “Tepencikeyan, aanahpii i'iwe keishihsek?” O'o tahsh Ciisahs kii'‑ishinahkwehtam: “Aanti hsa piko keshiahtek kaanipoomakahk miiyaw, mii hsa 'imaa ketashi maawaci'itiwaatc iki mihtaskihtikwaanehsiwak.”