ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 16 - Ojibwe Kihcimasina'ikan

Eawehcikaakaaniwitc anohkii'aakan kaakiihkakiihtaawihciketc

¹ Ciisahs okii'-inaa' okihkino'amawaakana': “Peshikwaa kii'⁠ayaa inini aahpici ekii'-wenootisitc kaye tahsh ekii'-ayaawaatc anohkii'aakanan kaakiih kanawentamaakotc otipentaahsowinan. A'a tahsh inini kiihpi wiintamawaa kaakanawentamaakotc kwayahk ekii'-inaapacihtoohsinik otaya'iiman kaatipentank.

² Miitahsh kaakiih kanoonaatc cipiintikenitc o'o ekii'-inaatc: ‘Wekonen o'o kaaishi noontamaan e'⁠ishihcikewanwen? Piwaapanta'ihshin misiwe aaniin enaapacihtooyan nintipentaahsowinan. Kaawiin tahsh awahshime kika kanawentansiinan nintipentaahsowinan.’

³ A'a tahsh anohkii'aakan kii'‑itiso: ‘Nintookimaam kaa‑anohkiihtawak niwiih pakitinik i'i enanohkiiwak. Aaniin tahsh keishihcikeyaan? Onsaam niniinamaatis ciwaanihkeyaampaan, nintaa akac kaye cipapaa pakohshi'iweyaan.

⁴ Aasha ninkihkentaan aaniin keishihcikeyaan kaasaaki wiiciiwiwaatc keonci piintikashiwaatc otaawiniwaank ahpii pakitinikooyaan o'o enanohkiiyaan.’

⁵ “Miitahsh kaa'⁠ishi kanoonaatc kahkina awiya' iniweniwa' kaamasina'amawaanitc otookimaaman. Miihsh kaa'⁠ishi kakwecimaatc ini nihtam ininiwan: ‘Aaniin minihk mesina'amawatc nintookimaam?’ okii'inaan.

⁶ Miitahsh kaa'ikotc ini ininiwan: ‘Nihshwaaswaahk (800) tahso tipa'oopaan aalip (Olive) tino pimite nimasina'amawaa,’ okii'ikoon. Miitahsh kaa'inaatc: ‘O'omaa ishi apin. Shemaak iko niiwaahk (400) ishipii'an i'i kimasina'ikewin,’ okii'inaan.

⁷ Miinawaa tahsh kotak okii'-ishi kakwecimaan: ‘Kiin tahsh wiin aaniin minihk mesina'amawatc?’ okii'inaan. ‘Mitaahswaahk (1,000) tahso mahkahk pahkweshikanan nimasina'amawaa,’ okii'ikoon. Miihsh kaa'inaatc: ‘Ina 'owe kimasina'ikewin, nihshwaahswaahk (800) ishipii'an,’ okii'inaan.

⁸ “Miitahsh a'a okimaa kaakii'-antomaatc ini kaakanawentamaakotc otaya'iiman kaakii'-wayeshihcikenitc: ‘Wiinke kikakiihtaawihcike ehkanawaapantisoyan,’ okii'inaan. Inashke wiin iko pemaatisiwaatc noonkom ahkiink kaaonci tipentaakosiwaatc nawac kwayahk okanawentaanaawaa kaashi anohkiiwaatc ahpiihc wiin ikiweniwak waahseyaank kaaonci tipentaakosiwaatc.”

⁹ Miihsh Ciisahs keyaapi kaa'‑ani ihkitotc: “Miitahsh o'owe eshi wiintamawinakook. Ahkiiwi wenootisiwin aapacihtook ciontinamaasoyek kesaaki wiiciiwinekwaa, ahpii hsa tahsh kiihcaakihsek, miitahsh ciminwentamonaaniwank cipiintikanikooyek taawinink wiihkaa keishkwaahsehsinok.

¹⁰ Piko awenen keayaankwaamisiihkantamokwen kaa‑akaahsentaakwaninik mii peshikwan keshi ayaankwaamisiihkantank kaakihci inentaakwaninik kekoon. Awenen kaye keonci wayeshi'iwekwen mihsawaa akaahsentaakwaninik mii peshikwan keishi wayeshi'iwetc i'iweni kaakihci inentaakwaninik.

¹¹ Kiishpin tahsh tepweyentaakosiyek cinanaakacihtooyek ayaankwaamisiihkantansiwek eshi aapacihtooyek ahkiiwi wenootisiwin, aaniin tahsh wiin keshi pakitinamaakooyekipan kaakwayahkwahk wenootisiwin?

¹² Kiishpin tahsh tepweyentaakosihsiwek cinaakacihtooyek ekiionci ayaankwaami aapacihtooyek kotak awiya otaya'iiman, aaniin itahsh kekii'-ishi pakitinamaakooyekipan kekoon citipentamek?

¹³ “Kaawiin anohkii'aakan oka tipenimikohsii' niishin okimaa'. Aaniihsh peshik oka shiinkenimaan, shikwa peshik okasaaki'aan. Peshik iniwe oka kihciwinaan, shikwa peshik oka wepinaan. Kaawiin kitaa tipenimikohsii Kishemanitoo kayehsh citako tipenimihkipan shooniyaa.”

Kotak kekoonan Ciisahs kaakii'ayihkitotc

¹⁴ Ahpii tahsh iki Perahsiik (Pharisees) enoontamowaatc kahkina o'oweni, okiih paahpinotawaawaan Ciisahsoon, aaniihsh okiih saaki'aawaan shooniyaan.

¹⁵ Miitahsh Ciisahs kaa'inaatc: “Kiinawaa ohsha kaakakwe minonaako'itisoyek enaahsamiiwaatc pemaatisiwaatc, Kishemanitoo tahsh wiin kikihkenimikowaa enaatisiyek kite'iwank. I'iweni ohsha awiyak kaakihci inentamowaatc, mii 'iweni Kishemanitoo kaashiinketank.

¹⁶ “Moosihs (Moses) OtOonahshowewinan, i'i kaye kaakii'-ishipii'ikewaatc kenootamawaawaatc Kishemanitoon kiihpi tashinteni piinihsh kiihpi ayaatc Cwaan siika'antaakewinini. Miitahsh i'i ahpii kaakii'-maacii tashintenik eshiminwaatotenik Kishemanitoo oTipencikewin. Miihsh kahkina awiyak enikohk eshi kakwecihtoowaatc cipiintikewaatc i'imaa cionci tipentaakosiwaatc.

¹⁷ Nawac wentan i'iwe kiishik, ahki kaye cipoonihsek, ahpiihc i'we peshik cahkipii'ikan ciotaahpinikaatek Onahshowewinink onci.

¹⁸ “Awenen iko inini kaawepinaatc wiiwan kotak tahsh ihkwewan kaawiitikemaatc pihshikwaatisi. A'a tahsh inini kaawiitikemaatc ihkwewan kaakii wepinikonitc onaapemini pihshikwaatisi.”

Kaawenootisitc, a'a kaye kaakitimaakisitc eawehcikaakaaniwitc

¹⁹ “Peshik kii'⁠ayaa inini aahpici ekii'-wenootisitc ehkikishkank kaye maawac kaa‑aahkwakintenikin kikishkikanan. Maawac iko ekiikihci wenootaatisitc entahso kiishihk.

²⁰ Kii'⁠ayaa tahsh kaye ehkitimaakisitc inini Laasarahs (Lazarus) eshinihkaasotc, misiwe owiiyawink ekii'-omikiiwitc. Kii'⁠nihtaa api otishkwaanteminiink ini kaawenootisinitc ininiwan.

²¹ Kii'‑ishi mihsawentam cimiicitc ishkwancikanan kaaonci pankihsininikin otoohpowinaahkoniink ini kaawenootisinitc. Animoo' itahsh kiihpiishaawaa' ekiihpi nooskwaata'aminitc Laasarahs kaashi omikiiwitc.

²² Kaakitimaakisitc inini kii'ishkwaa pimaatisi. Encala' tahsh okii'-maaciinikoo' ekii'-ishiwinikotc kihcikiishikonk ciawi wiitapimaatc Eparahaaman (Abraham). A'a tahsh kewiin kaawenootisitc inini kii'‑ishkwaa pimaatisi, miihsh kaa'⁠ishi na'inintc.

²³ I'imaa hsa tahsh kii'‑ishi ayaa kaashi kanawentaakosiwaatc kaanipowaatc. Wiinke kiihkakwaataki wiihsakentam. Ishpimink tahsh e'⁠inaapitc okii'-waapamaan Eparahaaman waahsa ematwe ayaanitc, e'⁠matwe wiitapimaanitc Laasarahsan.

²⁴ Miitahsh kaakiih shaakowaanaatc: ‘Nintete Eparahaam koohpaasinawihshin, taka piicinisha'o Laasarahs cicehkipiininciinitc nipiink cipi tahkaapaawatootc nintenaniw, etatawe ohsha niwiihsakaahkis o'omaa ishkotenk.’

²⁵ O'o tahsh Eparahaaman okii'ikoon: ‘Ninkosihs, maamihkwentan mekwaa kiipimaatisiyan kaaonishihshinkin kekoonan kikii'-ayaanan. A'a tahsh wiin Laasarahs kaaonishihshinsinikin okii'-ayaanan. Noonkom tahsh wiin minwentami'aa, kiin tahsh win ekihci wiihsakentaman.

²⁶ Kaawiin tahsh ehta i'i minihk, ayaamakan hsa 'iwe emishahkiiyaahsinok waana'ikan o'omaa nahsaw kaashi ayaayank. Miitahsh o'omaa kaashi ayaayaank kaaonci kashkihtoohsikwaa weti ci‑ishaatc kaashi ayaayek, miihsh kaye weti kaa'ayaawaatc eshi ayaayek kaaonci kashkihtoohsikwaa o'omaa nahke cipiishaawaatc.’

²⁷ Kaawenootisitc inini tahsh kii'ihkito: ‘Nintete, Eparahaam kipakohsenimin ehkakweciminaan ci‑ishinisha'watc Laasarahs ninteten owaahkaa'ikaniniink.

²⁸ Mii ohsha weti eyaawaatc naanan niicihkiwensiwak. Pakitin ci‑ishaatc ciantawi wiintamawaatc, cipiishaahsinik o'omaa kakwaataki wiihsakentamowin eshi ayaanik,’ okii'inaan.

²⁹ Miitahsh o'o kaa'ikotc Eparahaaman (Abraham): ‘Kiicihkiwensiwak iitok otayaawaawaan Moosihsoon (Moses), i'i kaye kaakanootamawaanitc Kishemanitoon. Miiwa' iniweniwa' kepisintawaawaatc.’

³⁰ Miihsh kaa'-ishi nahkwehtawaatc: ‘Nintete Eparahaam kaawiin i'iwe teminihk. Kiishpin hsa awiyan nipowinink pionci naasihkaakowaatc, mii 'i kehcinaac cikwehkaatisiwaatc,’ okii'inaan.

³¹ Miitahsh kaa'ikotc Eparahaaman: ‘Kiishpin wiihpisintawaahsikwaa Moosihsoon, i'i kaye kaakanootamawaanitc Kishemanitoon, kaawiin taakashkimaahsiiwak mihsawaa ko awiyan nipowinink onci wanishkaanitc,’ okii'ikoon.”