ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 15 - Ojibwe Kihcimasina'ikan

Eawehcikaniwitc maanahcaanishenhs kaakii'wanihshink

¹ Peshikwaa ehkiishikahk taakihs (tax) shooniyaan kaamaawantoonaawaatc, iki kaye kotak kaa‑aanawenimintwaa okiihpi naasihkawaawaan Ciisahsoon ehpi pisintawaawaatc.

² Miitahsh iki Perahsiik (Pharisees) iki kaye kaakihkino'amaakewaatc onahshowewin kii'⁠ayihkitowak e'⁠aanwaapancikewaatc: “A'awe inini ominwentaan ewiiciiwaatc omacitootamoo', kaye tahsh ewiici wiihsiniimaatc.”

³ Miitahsh Ciisahs kaakii'-wiintamawaatc o'oweni awehcikewin:

⁴ “Kiishpin kiinawaa awiya ayaawaatc ninkotwaahk (100) maanahcaanihsha', peshik tahsh wanihshininitc, aaniin keishihcikehpan? Otaa nakanaa' maawiin i'i shaankahsimitanahshi shaankahso (99) maanahcaanihsha' i'imaa mihshawahkamik ciantone'waahpan ini peshik kaawanihshininitc, ekiih pakiciihsik paanimaa kaa'⁠mihkawaatc.

⁵ Ahpii tahsh mihkawaatc, taciihkentam, miihsh keshi wakitahsaatc otinimaakanink,

⁶ miihsh kenishi kiiwewinaatc. Oka maamawi antomaa' tahsh kaasaaki wiiciiwaatc, i'i kaye pehsho owiicitaamaakana' o'o ci'‑inaatc: ‘Wiici minwentamoomihshik, ninkii'-mihkawaa kaakii'-wanihshink nimaanahcaanihshim!’

⁷ Miitahsh eshi wiintamawinakook, miihsh peshikan eshi ciihkentamonaaniwank weti kihcikiishikonk a'a onci kaamacitootank kiikwehkaatisitc, ahpiihc wiin iniweniwa' shaankahsimitanahshi shaankahso (99) kweyahkwaatisinitc memwehc kekwehkaatisihsinik.”

Eawehcikaniwitc waapaapihkoshooniyaanhs ekiiwani'intc

⁸ “Inashke ihkwe kiiayaawaatc mitaahso waapaapihko shooniyaanhsa', peshik tahsh wani'aatc, aaniin tahsh keishihciketc? Mii 'i keshi sahka'ank owaahsahkonencikan, ewepa'iketc kaye owaahkaa'ikanink, weweni ehkakwe mihkawaatc ehpakiciihsik paanimaa ekii'-mihkawaatc.

⁹ Ahpii tahsh kaa'mihkawaatc, mii 'i eshi maamawi antomaatc kaasaaki wiiciiwaatc, i'i kaye pehsho kaawiicitaamikotc o'o e'⁠inaatc: ‘Wiici minwentamoomihshik, ninkii'-mihkawaa ohsha kaakii'-wani'ak niwaapaapihko shooniyaanhsim.’

¹⁰ Miitahsh peshikwan weti kihcikiishikonk Kishemanitoo otencalima' eshi ciihkentaminitc ini onci peshik omacitootamoon kaakwehkaatisinitc.”

Eawehcikaniwitc okosihsimaa kaakiiwawaniitc

¹¹ Ciisahs tahsh kii'⁠ani ihkito: “Kii'⁠ayaa inini ekii'-niishinitc (2) okosihsa'.

¹² Ini kaaohshiimenshimaawinitc okii'ikoon: ‘Nintete, taka noonkom kiishaac miinshihshin minihk kekoon kaawii'-miinshiyan kitipencikewinink onci ketipentamaan.’ Miitahsh a'a otetemaa kaaishi nenaawinank i'i owenootisiwin ekii'-maamiinaatc kaaniishinitc okosihsa'.

¹³ Kaawiin tahsh tashi naanaake, mii 'i aasha kaakii'-ataawaaketc minihk kaakiih tipentank. Miitahsh kaa'⁠ishi maacaatc waahsa pahkaan ahkiink ekii'-ishaatc. Miitahsh weti kaahtashi caakinaatc oshooniyaaman, ekiih kiiwashkwe pimaatisitc.

¹⁴ Kahkina tahsh kekoon kaakii'-ayaatc kiihcaakihse. Miihsh i'i ahpii kaakiikihci noontehsek miicim i'imaa misiwe ahkiink. Wiinke kewiin kiihkoohpaaci noontehse.

¹⁵ Miitahsh kaakii'-ishaatc ekii'-awi anohkiihtawaatc ininiwan i'imaa ahkiink eyaanitc. Miihsh kaakii'-ishinisha'ontc i'imaa kihtikewikamikonk cipami'aatc ciahshamaatc koohkoohsha' ciwiihsininitc.

¹⁶ Okii'-mihsawentaan tahsh kewiin cikii'-miicihpan i'iweni koohkoohsha' kaamiicinitc. Kaawiin tahsh awiyan okii'-miinikohsiin kekoon kemiicitc.

¹⁷ Ahpii tahsh kaa'‑ani pakahkentank o'o kii'itiso: ‘Inashke wiin nintete ehpaahtiinonitc otanohkii'aakana tewiihsiniwa', ishkohsewa' kaye miicim, niin tahsh wiin ehkawaskateyaan.

¹⁸ Taka hsa ninka maacaa cikiiweyaan ci‑ishaayaan nintetehkaank o'o ci‑inak: “Nintete, ninkii'-macitootawaa Kishemanitoo, kekiin kaye kikii'-macitootawin.

¹⁹ Kaawiin tahsh nintepakentaakosihsii ninkosihs ci‑ishinihkaamihshiyan. Kipakohsenimin tahsh kitanohkii'aakanak kaatootawatwaa keniin citootawiyan,” ’ kii'‑inentam ewii'-inaatc.

²⁰ Miitahsh tepwe kaa'⁠ishi pasikwiitc ekii'-maacaatc ekiih kiiwenotawaatc oteten. “Keyaapi tahsh enaawinaakwaninik cipwaa otihtank oteten otayaawinini, mii 'i aasha ekii'-waapamikotc oteten ehpi naakositc ekiih koohpaasinaakotc. Miihsh kaakii'-ahpatoonitc ehpi naakositc ekiih kihkinciciinikotc e'⁠ociimikotc.

²¹ Okosihsimaa tahsh kii'‑ihkito: ‘Nintete, ninkii'-macitootawaa Kishemanitoo, kekiin kaye kikii'-macitootawin. Kaawiin tahsh nintepakentaakosihsii ninkosihs ci‑ishinihkaamihshiyan,’ kii'ihkito.

²² A'a tahsh otetemaa okii'-inaa' otanohkii'aakana': ‘Taka weyiip piitook maawac wenishihshik kikishkikan, pisihkamo'ihk. Pisihkamo'ihk kaye naapininciipisonan oninciink, mahkisinan kaye pitahkisine'ihk.

²³ Miitahsh ishi maacaak cinaasihkawek kaaminonaakositc kaa‑aancipotc pishihkiinhs cinihsek. Maawaw kikakihci wiihsinimin ehpiihci minwentamank.

²⁴ Wa'a hsa ninkosihs ekii'-nipohpan noonkom tahsh pimaatisi. Ekii'-wanihshinkipan noonkom tahsh ekii'-mihkawintc.’ Miitahsh kaa'⁠ishi maaci kihci wiihsiniwaatc.

²⁵ “Mekwaa tahsh ekihci inahkamikaninik a'a wiin kaaohsayensimaawitc okosihsimaa kii'⁠anohkii kihtikewahkiink. Ahpii tahsh ehpikiiwetc pehsho e'⁠ani otihtank waahkaa'ikan, okii'-noontaan ematwe kitohcikaaniwaninik, kaye ematwe niiminaaniwaninik.

²⁶ Miitahsh kaakii'-antomaatc peshik anohkii'aakanan ehkakwecimaatc aaniin eshihcikaaniwaninik.

²⁷ Miitahsh kaa'ikotc: ‘Kihshiimensh ohsha kiihtakohshin. Kitete tahsh okii'-nihsaan ini maawac kaaminonaakosinitc, kaawiininonitc pishihkiinhsan aaniihsh minwentam ehpikiiwenotaakotc okosihsan ehpimaatisinitc kaye tahsh e'⁠minoayaanitc.’

²⁸ A'a tahsh kaaohsayensimaawitc kii'nishkaatisi ekiiwiih piintikehsik waahkaa'ikanink. Oteten tahsh okiihpi naasihkaakoon ekiihpi kaakiinsomikotc pisaan cipiintiketc.

²⁹ Miitahsh kaa'⁠inaatc ini oteten: ‘Inashke aaniin tahso pipoon aasha kaapi anohkiihtawinaan taapishkoo a'awe peshik kitanohkii'aakan kaa‑anohkiihtawihk, mooshak ehpi ishihcikeyaan kaashi antawenimiyan. Wekonen tahsh kaapi miinihshiyan? Kaawiin kanake peshik kikii'-miinshihsii maanahcaanihshenhs cikiiwiici wiihsinimakwaapan nisaaki wiiciiwaakanak!

³⁰ A'a tahsh wiin kikosihs ekii'-nihshiwanaacihtootc kahkina kitipinawewisiwin ekii'-mihci caakiniketc ehpapaa nootihkwewetc. Ahpii tahsh ehpikiiwetc mii 'i kaaishi nihtamawatc kaaonishihshinitc, kaawiininonitc pishihkiinhsan!’

³¹ O'o tahsh okii'ishi nahkwehtaakoon oteten: ‘Ninkosihs, mooshak o'omaa kipiwiici ayaamihsh. Minihk hsa kekoon kaatipinawewisiyaan mii hsa 'iwe kekiin tepinawewisiyan.

³² Oncita tahsh iko ishi na'inaakwan cikihci wiihsiniyankipan, ciminwentamankipan kaye aaniihsh kihshiimensh ekii'-nipohpan, noonkom tahsh ehpimaatisitc. Ekii'-wanihshinkipan kaye, noonkom tahsh ekii'-mihkawintc,’ okii'ikoon.”