ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 12 - Ojibwe Kihcimasina'ikan

Keko ishinaakosihkek ominwaanitisiik kaainwaanitisowaatc

¹ Miitahsh ahpii i'iwe niipiwa' mitaahswaahk ehpi maawaci'itinitc wiinke ekiih siincishkotaatinitc kii'⁠ani tahtahkohkaanitiwa' kaye. Miihsh Ciisahs kaakii'-maacii kakanoonaatc okihkino'amawaakana' ekii'inaatc: “Ayaankwaamisik ci‑ishinaakosihsiwek Perahsiik (Pharisees) kaainwaanitisowaatc ominwaatisiik. Taapishkoo ompisikanenhs misiwe kaaishaamakahk anaamink pahkweshikanink, mii 'i eshinaakwaninik opimaatisiwiniwaa.

² Kekoon hsa piko kaa‑akwana'ikaatek tamohshe naakohcikaate, kekoon kaye kaakiimootentaawahk takihkentaakwan.

³ Aaniin ihsa ko ehkitoyek kiitipihkahk tanoontaakaaniwan kiishikahk. Aaniin kaye eshikiimooci kiikitoyan pahkehcikanink wakici waahkaa'ikanihkaank taonci kishiiwe tashincikaate.”

Awenen kekohsintc

⁴ “Miitahsh eninakook, keko tahsh wiin kohsaahkekwaanik iki kaanihtoowaatc wiiyawimaa, ekashkihtoohsikwaa tahsh awahshime ci⁠ani ishihcikewaatc.

⁵ Kiwiintamawininim itahsh awenen kekohsekipan. Kohsihk Kishemanitoo, wiin iitok kaakashkihtootc kii‑ishkwaa nihsaatc awiyan ci‑ishi wepinaatc maci ishkotenk. Tepwe tahsh kiwiintamawininim cikohsek Kishemanitoo.

⁶ Kaawiin ina naanan miskominihkehsiwak niisho piiwaapihkoonhs inakinsohsiiwak? Shaakooc itahsh kaawiin awaac peshik owaniihkentaakohsiin Kishemanitoon.

⁷ Inashke tahsh kiinawaa kaatahso peshikwahkin kiinisihsiwaan kahkina kihkencikaatewan entahsinkin. Keko tahsh kiinawaa sekisihkek, nawac kiinawaa kikihci inentaakosim ahpiihc wiin iki miskominihkehsiwak!”

Aaniin Ciisahs enaatc iniweniwan kaaihkitonitc ehkihkenimikotc

⁸ “Miitahsh eninakook, a'awe hsa kewiinshitc ekihkenimitc enaahsamiinitc pemaatisinitc, mii 'i keniin Inini oKosihsan ninka wiinaa ekihkenimak enaahsamiinitc Kishemanitoon otencalimini.

⁹ A'a tahsh wiin kaa‑aanawenimitc enaahsamiinitc pemaatisinitc, miitahsh kewiin peshikwan keshi aanawentaakositc enaahsamiinitc Kishemanitoon otecalimini.

¹⁰ “Awiya piko kemaci inaatc ini Inini oKosihsimaan tapoonentamawaakaniwi. Awiya tahsh wiin maci inaatc Kishemanitoon otAhcaahkoni kaawiin tapoonentamawaahsii.

¹¹ “Ahpii hsa ishiwinikooyek entashi maawaci'itiwaatc ewiih tipaahkoninekwaa enaahsamiiwaatc wekimaawentaakosiwaatc, iki kaye kihciokimaak, keko wiin wawaanentankek aaniin keishi naatamaasoyek, aaniin kaye keihkitoyek.

¹² Kishemanitoo otAhcaahkwan ohsha kika kihkino'amaakowaa aaniin keihkitoyek i'i ahpii.”

Kiiawehcikaasotc inini kekiipaatisinitc kaakii'ahpenimotc owenootisiwin

¹³ Peshik tahsh ininiwan kii'onci kiikitowan i'imaa eshi paahtiinonaaniwaninink ekii'ikotc: “Okihkino'amaake, taka kanoosh niicihkiwensi cinenaawinamawitc i'iweni minihk kekoon kaakii'-nakatamawiyamintc nintetenaan ahpii kaakii'-ishkwaa pimaatisitc.”

¹⁴ Ciisahs tahsh okii'ishi nahkwehtawaan: “Niicipimaatis, awenen kaa'inakimitc citipaahkoniweyaan, komaa kaye cionentamaan aaniin keshi nenaawinamaatiyek ini kaakii'-nakatamaakooyek?”

¹⁵ Miitahsh kaa'inaatc kahkina i'imaa kaakii'-ayaanitc: “Ayaankwaamisik, kanawenintisok ciayonsaamisihsiwek, aaniihsh kaawiin awiya onci pimaatisihsii aaniin minihk kekoon eyaatc, mihsawaa ko aana kihci wenootisitc.”

¹⁶ Ciisahs tahsh okii'-wiintamawaa' o'o awehcikan: “Aapitink kii'ayaa inini ekii'-wenootisitc, okihtikewahkamik ekii'mino nihtaawikihcikemakaninik.

¹⁷ Miihsh iinsan kaa'inentank: ‘Aaniin tahsh keishihcikeyaan? Kaawiin awahshime nintayaahsiin ahtaahsowikamik keshi ahtooyaan kaanihtaawikihkin nikihtikewahkamikonk.’

¹⁸ Miihsh iinsan kaa'itisotc: ‘Mii'owe keishihcikeyaan, ninka piikopitoonan nintaahtaahsowikamikoon, miihsh cioshihtooyaan kotak nawac cimamihcaakin keshi kanawentamaan kahkina kaanihtaawikihkin ninkihtikewahkamikonk, ini kaye kotak kekoonan kaatipentamaan.

¹⁹ Mii hsa keitisoyaan: “Oowa, etatawe kiminohse, niipiwa' kekoonan e'⁠ayaayan kaaonishihshinkin, kinwesh tahsopipoon wiihkaa cinoontehsehsiwan. Miihsh ishi mihci ayayaan, ciwiihsiniyan, ciminihkweyan kaye tahsh ciciihkentaman ehpimaatisiyan,” ’ kii'‑ihkito.

²⁰ Miitahsh Kishemanitoon kaa'ikotc: ‘Kiin kaakakiipaatisiyan. Noonkom kaawiih tipihkahk kipimaatisiwin taotaahpinikaate. Awenen tahsh keayaatc iniweniwan kiin kaakiih kwayaancihtamaasoyan ewii'ayaayan?’ ” okii'ikoon.

²¹ Miihsh Ciisahs kaa'‑ani ihkitotc: “Mii 'owe keishinaakositc a'awe kaakwayaancihtamaasotc wenootisiwin, kaawiin wenootisihsii enaahsamiinitc Kishemanitoon.”

Aaniin keshiahpenimonotawintc Kishemanitoo cikanaweniminek

²² Miitahsh o'o Ciisahs kaa'inaatc okihkino'amawaakana': “Keko onci mikoshkaatentankek kipimaatisiwiniwaan, wekonen kemiiciyek, wekonen kaye keminihkweyek. Keko kaye onci ocaanimentankek kiwiiyawiwaan, wekonen kaye kekikishkamek.

²³ Nawac ohsha pimaatisiwin kihci inentaakwan ahpiihc wiin miicim, i'i kaye miiyaw nawac kihci inentaakwan ahpiihc wiin kikishkikanan.

²⁴ Inashke kaakaakiwak kaapapaamihsewaatc, kaawiin kihtikehsiiwak, kaawiin kaye maawacihcikehsiiwak. Kaawiin kaye otayaahsiinaawaa miicimikamik, ahtaahsowikamik kaye. Shaakooc tahsh Kishemanitoon otahshamikowaan. Kaawiin ina kiinawaa awahshime kitahpiihtentaakosihsiim ahpiihc iki pinehshiinshak?

²⁵ Kinwesh ina kitaaonci pimaatis e'⁠mikoshkaatentaman? Kekeht ina kinwesh tapimaatisi?

²⁶ “Kiishpin tahsh ekashkihtoohsiwek citootamek i'iwe kaa‑akaahsink, wekonen tahsh weci ocaanimentamek kotak kekoonan?

²⁷ Inashke waapantamok waapikwaniin ehpimikihkin. Kaawiin anohkiimakahsinoonan, kaawiin kaye oshihtamaatisoomakahsinoonan kikishkikanan. Kiwiintamawininim itahsh, ampooshke 'awe kihciokimaa Swaalaman (Solomon) aana kiihkihci wenootisitc, kaawiin i'i kii'‑ishi minonaakwahsininiwan okikishkikanan taapishkoo peshik o'o waapikwan kaaishi minonaakwahk.

²⁸ Kishemanitoo iitok kaapihcikonayehtootc mashkohsiin eyaanikin pikwacaya'ii. Noonkom kaakiishikahk eyaanikin ini mashkohsiin, waapaninik tahsh e'⁠macohte wepinikaatekin. Nawac itahsh kiinawaa kika pihcikonaye'ikowaa. Etatawe akaahsentaakwan kitepwehtamowiniwaa.

²⁹ Keko tahsh onci mikoshkaatentankek wekonen kemiiciyek, keminihkweyek kaye? Keko ocaanimentankek.

³⁰ Miiwan ono mooshak kaananaantone'amowaatc iki kaakihkenimaahsikwaa Kishemanitoon. Koohsiwaa ohsha okihkentaan e'⁠noontehseyek onoweniwan.

³¹ Nawac tahsh antone'amowaahk otookimaawiwin, kika miinikoowisim tahsh onoweniwan kaye.”

Ahsancikok kaawenootahk weti kihcikiishikonk

³² “Keko tahsh sekisihkek, kiinawaa kaa‑akaahsiinoyek maanahcaanihshenhsak Koohsiwaa ohsha otishi minwaapantaan cimiininek kekiinawaa citipencikeyek i'imaa oTipencikewinink.

³³ Ataawaakek kahkina kitaya'iimiwaan cimiinekwaa tahsh shooniyaan iki kaakitimaakisiwaatc. Kwayaancihtamaasok tahsh shooniyaawashan wiihkaa kenoonte nihshiwanaatansinokin. Ciahtamaasoyek kaakihci inentamek kihcikiishikonk wiihkaa keshi caakihsehsinok. Kaawiin weti okiimoocishk taotihtansii, kaawiin kaye miikwanashk oka nihshiwanaacihtoohsiinan.

³⁴ Aanti hsa piko keayaak kaakihci inentamek, mii hsa 'imaa keayaakin kite'iwaan.”

Kaaehpemiiwaatc anohkii'aakanak

³⁵ “Kikihkonayek mooshak ciayehpiimeyek, maano ciwaahsahkonekin kiwaahsahkonencikaniwaan.

³⁶ Taapishkoo anohkii'aakanak kaaniipepiwaatc ehpii'aawaatc kaatipenimikowaatc cipikiiwenitc kaakii'-ishaanitc kihci wiitike wiihsiniwinink. Ahpii tahsh ehpi takohshininitc ehpi paahpaawa'ikenitc shemaak iko opaahkintenamawaawaan ishkwaantem.

³⁷ Aahpici hsa tashawentaakosiwak iki anohkii'aakanak mihkaakowaatc kaatipenimikowaatc ehpii'aawaatc cipitakohshininitc. Kiwiintamawininim tahsh, miihsh keshi pihsihkaminitc aakoopison ewii'-ahshamikowaatc. Oka api'ikowaan tapahsi toohpowinaahkonk ewiih pami'ikowaatc ciwiihsiniwaatc.

³⁸ Aahpici hsa tashawentaakosiwak iki anohkii'aakanak e'⁠mihkaakowaatc ehkwayaanciiwaatc, mihsawaa ko aapihtaa tipihkaninik pitakohshininitc, mihsawaa ko kaye paanimaa nawac naake wiihpi takohshininitc!

³⁹ Kihkentamok itahsh o'o, kiishpin inini kaatipentank waahkaa'ikan kihkenimaatc ahpii tipa'ikan waahpi takohshininitc okiimoocishkan, kaawiin otaa pakitinaahsiin ini okiimoocishkan cipiikwa'aminitc cipi piintikenitc owaahkaa'ikanink.

⁴⁰ Miitahsh peshikwan kekiinawaa keshi oshiihtaayekipan mooshak, aaniihsh Inini oKosihsan tapi takohshinoon ahpii tipa'ikanink kepii'imaahsiwek.”

Kwayahk anohkii'aakan komaa kaye macianohkii'aakan

⁴¹ Piitar (Peter) tahsh kii'‑ishi kakwetwe: “Tepencikeyan, niinawint ina piko kaawiintamawiyaank o'o awehcikewin, komaa kaye kahkina awiyak kaawiintamawatwaa?”

⁴² Miihsh kaaTipenciketc kaa'⁠ihkitotc: “Awenen hsa 'a kwayahk kaakakiihtaawentank anohkii'aakan? Mii hsa a'awe kaamiinikotc otookimaaman kaamaacaanitc, citipenimaatc kotak anohkii'aakana' ciahshamaatc ahpii ocihcihsenik ciwiihsininaaniwaninik.

⁴³ Aahpici hsa tashawentaakosi a'a anohkii'aakan mihkaakotc otookimaaman pikiiwenitc e'⁠ishihciketc kaakii'-inanohkii'intipan.

⁴⁴ Kekeht hsa kitinininim, a'a anohkii'aakan oka miinikoon otookimaaman kahkina otaya'iimini cinaanaakacihtootc.

⁴⁵ Kiishpin tahsh wiin a'a anohkii'aakan inentank: ‘Kaawiin hsa wiipa tatakohshinsii nintookimaam.’ Miitahsh ishimaacii pahpahkihte'waatc owiitanohkiimaakana' kaa⁠ininiiwinitc, i'i kaye kaa⁠ihkwewinitc. Miihsh eshi wiihsinitc, eshi minihkwetc kaye, tako kaye ehkiiwashkwepiitc.

⁴⁶ A'a tahsh anohkii'aakan tatakohshinoon otookimaaman ninkotink kiishikaninik ahpii ehpii'aahsik, ehkihkenimaahsik aaniin ahpii tahso tipa'ikaneyaanik ketakohshininitc. Otookimaaman tahsh oka piihsishokoon ci ishiwepinikotc eshi ayaanitc kaatepwehtansinik.

⁴⁷ A'a tahsh anohkii'aakan kaakiih kihkentank otookimaaman aaniin kaashi nantawenimikotc citootank, ishi kwayaanciihsik tahsh ciwiih tootank, eshi antawenimikotc otookimaaman ci‑ishihciketc tawiih kakwaataki'aa paahtiinwaa cikihci pahpahshanshe'ontc.

⁴⁸ A'a tahsh wiin anohkii'aakan kaakihkentansik aaniin eshi antawenimikotc otookimaaman, tootank itahsh kekoon kekiionci pahpahshanshe'ontipan, shaakooc pankii ehta tapahshanshe'waa. A'a hsa niipiwa' kaamiinikoowisitc antawenimaa niipiwa' cipakitiniketc. A'a kaye kihci niipiwa' kaamiinintc antawentaakosi awahshime wiin niipiwa' cipakitiniketc.”

Ciisahs kiipiminisha'ontc ayaamakan mawineshkotaatiwin

⁴⁹ “Ninkiih piishaa ewiih sahka'amaan o'owe ahki, aaniin ehpiihci mihsawentamaan aasha cipiskanekipan!

⁵⁰ Ayaa kakwaatakentamowin kaawiih siika'antaakooyaan, etatawe tahsh nintoonci mikoshkaatentam ehpiihtooyaan ci‑ishkwaahsek.

⁵¹ Kitinentam ina ekiih piitooyaan pisaanisiwin o'omaa ahkiink? Kaawiin pisaanisiwin ninkiih piitoohsiin, i'i mawineshkotaatiwin ninkiih piitoon.

⁵² O'o tahsh ishinoonkom naananiwaatc (5) awiyak peshik taawinink ishitaawaatc tamawineshkotaatiwak. Nihsin (3) iki oka mawineshkawaawaa' i'i kotak niishin (2) eyaanitc. Iki kaaniishiwaatc (2) oka mawineshkawaawaa' i'i kaanihsinitc (3).

⁵³ Otetemaa oka mawineshkawaan okosihsan, okosihsimaa oka mawineshkawaan oteten. Omaamaamaa oka mawineshkawaan otanihsan, otaanihsimaa oka mawineshkawaan omaamaan. Osikohsimaa oka mawineshkawaan ohshimihsan, ohshimihsimaa oka mawineshkawaan osikohsan.”

Cinihsitohtamowaahpan aaniin keishiwepaninik

⁵⁴ Ciisahs tahsh okii'inaa' pemaatisinitc: “Ahpii ewaapantamek wahkwi ehpi saakaanahkwahk ninkaapii'anonk inahke, mii 'i ehkitoyek ewiih kimiwank, miihsh tepwe eshi kimiwank.

⁵⁵ Ahpii kaye ehkihkentamek shaawanonk eoncinowek, mii 'i miinawaa ehkitoyek ewiih kishaahtek, miihsh tepwe eshi kishaahtek.

⁵⁶ Kiinawaa kaawiin ninihsitohtansiimin kaainwaanitisoyek, ehkanawaapantamek o'owe ahki, kaye tahsh ishpimink kiishikonk e'⁠inaapiyek kitoonci kihkentaam kaawii'-ani ishiwepahk. Aaniin tahsh wiin wenci kihkentansiwek aaniin keitamek o'owe noonkom kaa‑ani ishiwepahk!”

Kwayahkohtamaw kaamawine'ohk

⁵⁷ “Wekonen itahsh kiinawaa piko wenci onentansiwek kwayahk cikii'-ishihcikeyekipan?

⁵⁸ Kiishpin awiya wiihtipaahkonihk e'⁠nehpitasina'amawatc, ishiwinihk tahsh i'imaa tipaahkonikewikamikonk, minihk iko ehko kashkihtooyan kocihtoon cikwayahkohtamawatc cipwaa ishiwinihk weti tipaahkonikewikamikonk. Kiishpin o'owe ishihcikehsiwan kika ishiwinik enaahsamiinitc tipaahkonikewininiwan miitahsh keishi pakitinamawaatc shimaakanihshan kaye cipiinci wepinikoyan kipa'otiiwikamikonk.

⁵⁹ Miihsh i'imaa keayaayan, kaawiin kika saaka'ansii paanimaa ishkwaa tipa'ikeyan tahso piiwaapihkoonhs kaakii'-inaahkonikooyan,” kii'ihkito Ciisahs.