ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 10 - Ojibwe Kihcimasina'ikan

Ciisahs kaakii maacinisha'waatc niishwaahsimitanahshiniishin

¹ Ahpii kaaTipenciketc kaa'ishkwaa kakanoonaatc, miihsh kaakii'-onakimaatc niishwaahsimitanashiniishin (72) ininiwa' cineniishinitc cikii niikaani ayishaanitc misiwe ootenaahkaank, ayaawinink kaye wiin iko waa'ani ishaatc.

² O'o ekii'inaatc: “Paahtiinat kemanishikaatekipan, aahpici tahsh akaahsiinowak otanohkiik. Kakwecimihk Kishemanitoo kaatipentank manishikewin ci‑ishinisha'waatc otanohkii' cimaamooshakinikenitc okihtikewinink.

³ Miitahsh ishi maacaak. Mii 'i eshinaakosiyek taapishkoo maanahcaanihshak kaaishaawaatc mekwe ma'iinkanihkaank.

⁴ Keko maaciitoohkek kishooniyaawashiwaan, kipiina'ikaniwashiwaan kaye, kaakikishkamek ehta kimahkisiniwaan kikamaaciitoom. Keko kipihciihkek ciontamwewehtooyek kiishpin awiya nakishkawek.

⁵ Aanti tahsh iko keshi piintikeyek waahkaa'ikanink, mii 'owe nihtam keihkitoyek: ‘Kikashawentaakosim o'omaa waahka'ikaniink eyaayek.’

⁶ Kiishpin tahsh minowiiciiwinekwaa i'imaa kaa‑ayaawaatc waahkaa'ikanink, i'imaa ishinakatamok i'iwe kaakii'-ihkitoyek kiipipiintikeyek: ‘Pisaan pimaatisik.’ Kiishpin tahsh inaatisihsikwaa i'imaa waahkaa'ikanink, kiiwe otaahpinamok i'iwe kaakii'-ihkitoyekipan.

⁷ Miihsh i'imaa kaakii'ishi piintikanikooyek keshi ayaayek, pisaan iko inancikek, ishiminihkwek kaye aaniin iko enahshamikooyek, aniihsh citipa'amawintipan awiya kaa‑anohkiitc. Keko wiin paapiintikehkek pepahkaan owaahkaa'ikanihkaank.

⁸ Aanti piko ootenaahkaank eshi piintikeshkaayek, kiishpin tahsh iki pemaatisiwaatc ineniminekwaa pisaan cipiishaayek, pisaan iko miicik kekoon keahshamikooyek.

⁹ Minwaaci'ihkwak kaa‑aahkosiwaatc i'imaa ootenaank kaa‑ayaawaatc o'o cishi wiintamawekwaa: ‘Aasha kipehshawaapantamowaam Kishemanitoo citipeniminek.’

¹⁰ Ahpii tahsh ani piintikeshkaayek ootenaank, awiyak tahsh inentansikwaa i'imaa cipiishaayek, miihkanaank ishaak o'o ci‑ihkitoyek:

¹¹ ‘I'i hsa kaapaashkinehsek kitootenaamiwaank kaa‑akohkek nisitinaank nintooci paahpaawisitehshimoonomin cionci kihkinawaacinaakohtooyaank enaatisiyek. Keko tahsh waniihkehkek aasha ehpeshwaapantamowek Kishemanitoo citipeniminek.’

¹² Kiwiintamawininim ahpii tipaahkonikewikiishikahk Kishemanitoo nawac okakoohpaasinaan i'i Swaatam (Sodom) ahpiihc wiin i'i ootenaani.”

Aaniin keishihsewaatc kaatepwehtansikwaa ootenaank eyaawaatc

¹³ “Kiinawaa Kwaraasin (Chorazin) kaa‑ayaayek kika ocaanimisim. Kekiinawaa kika ocaanimisim Pehseta (Bethsaida) kaa ayaayek. Kiishpin ini kaawaapantamek maamahkaacihcikewinan kiinaakohcikaatekopanenan i'imaa ootenaank Tayarink (Tyre), Saaitanink (Sidon) kaye, aasha mewisha otaakiih pihsihkaanaawaan kaa‑ahsapiwekaninikin kaye mewisha otaakiih piiwiwepinaanaawaa piinkwiini ohtikwaaniwaank cinaakohtoowaatc kaakiih kwehkaatisiwaatc.

¹⁴ Maamihkawik itahsh o'o: Ahpii tipaahkonikewi kiishikahk, Kishemanitoo nawac oka koohpaasinawaa' i'i Tayarink, Saaitanink kaye kaaishi ayaanitc ahpiihc kiinawaa.

¹⁵ Kiinawaa tahsh Kaparniyamink (Capernaum) kaa‑ayaayek; kikii'-inentaam ina ewii'-ishpenintisoyek kihcikiishikonk inahke maawac cikihci inentaakwahk kitootenaamiwaa? Weti onipook kaashi ayaawaatc kikaishi wepinikoom.”

¹⁶ Miihsh Ciisahs kaa'inaatc okihkino'amawaakana': “Awenen iko kepisintawinek, niin kaapisintawitc. Awenen iko kaa‑aanaweniminek, niin ohsha kaa‑aanawenimitc. Awenen itahsh iko kaa‑aanawenimitc otaanawenimaan iniweniwan kaapiicinisha'omitc,” kii'ihkito.

Kiipikiiwewaatc iki niishwaahsimitanahshiniishin kaakii'-maacinisha'ontwaapan

¹⁷ Iki tahsh niishwaahsimitanahshiniishin ininiwak kaah⁠pikiiwewaatc wiinke kiihpi ciihkentamook ekii'-ihkitowaatc: “Tepencikeyan, maciahcaahkwak hsa kiihpatapiiwak cisaaka'amowaatc ahpii kiikanoonankitwaa kiwiinsowinink onci,” kii'ihkitowak.

¹⁸ Miitahsh Ciisahs kaa'inaatc: “Ninkii'-waapamaa Setan (Satan) kihcikiishikonk e'⁠onci pankihshink taapishkoo kaanaashahkiiyaahtehsek ekii'-ishinaakositc.

¹⁹ Pisintawihshik, kikii'-miinininim ohsha kashki'ewisiwin citahkohkaanekwaa kaakohtaanentaakosiwaatc kinepikook, iki kaye osowiwaank kaaonci ciihsowewaatc, kaye tahsh cishaakoocihtooyek misiwe eshi mashkawisiitc a'a Setan kaanakaaniwetc. Kaawiin kekoon kika wiihsakaahpinanikohsiim.

²⁰ Keko tahsh wiin onci ciihkentankek ehpisintawinekwaa maciahcaahkwak, nawac onci minwentamok kiwiinsowiniwaan e'⁠oshi'pii'ikaatekin kihcikiishikonk.”

Minwentamowin kiimoshkineshkaakotc Ciisahs

²¹ Miitahsh i'i peshikwan tipa'ikan Ciisahs okii ciihkentamoshkaakoon Kishemanitoon otAhcaahkoni. Miihsh kaa'ihkitotc: “NinTete, miikwehc kitinin, kaatipentaman kiishik, ahki kaye, aaniihsh kaawiin kikiih kihkentamoonaahsiik ono kekoonan ikiweniwak kaakakiihtaawentamowaatc kaakihkentaahsowaatc kaye, iki tahsh wiin aahpici kaakihkentansikwaa kekoon kikii'-waapanta'aak. NinTete, mii 'owe eshi minwaapantaman.”

²² Miitahsh kaa'ani ihkitotc: “NinTete tahsh kahkina kekoonini ninkii'-miinik. Kaawiin awiya okihkenimaahsiin ini oKosihsimaan, mii ehta a'a Kaaoyoohsimintc. Kaawiin kaye awiya okihkenimaahsiin ini Kaaoyoohsimimintc, mii ehta a'a oKosihsimaa. I'i tahsh ehta kaye kaainentank oKosihsimaa cikihkentamoonaatc.”

²³ Ciisahs okiih kwehkikaapawihtawaa' okihkino'amawaakana' e'⁠inaatc: “Etatawe kiinawaa kishawentaakosim ewaapantamek o'o kaawaapantamek.

²⁴ Kiwiintamawininim pipaahtiinowak Kishemanitoon kenootamawaawaatc, iki kaye kihciokimaak ekii'ishi mihsawentamowaatc ciwaapantamowaatc noonkom kiinawaa kaawaapantamek, kaawiin itahsh okii'-waapantansiinaawaa. Kaye tahsh cinoontamowaatc kekoonan kiinawaa kaanoontamek, kaawiin tahsh okii'-noontansiinaawaa,” okii'inaan.

E'awehcikaasotc inini Sameriya kaaonciitc ekiihkoohpaasinaaketc

²⁵ Peshik tahsh kaakihkino'amaakenitc Onahshowewin okiihkakwe wanikiishwe'ikoon ekii'ishi kakwecimikotc: “Okihkino'amaake, aaniin keishihcikeyaan ciayaayaan kaakike pimaatisiwin,” okii'ikoon.

²⁶ Miihsh Ciisahs kaa'inaatc: “Aaniin tahsh eshipii'ikaatek i'i kehte Onahshowewin? Aaniin eshinihsitohtaman?”

²⁷ Miitahsh kaa'ikotc: “Kitaa saaki'aa Tepenciketc kiKishemanitoom i'imaa misiwe kite'ink, i'imaa kaye misiwe kitahcaahkonk, i'imaa kaye misiwe kimashkawisiiwinink, i'imaa kaye misiwe kinaakatawentamowinink. Cisaaki'aatc kaye kiicipimaatis taapishkoo kaashi saaki'itisoyan,” okii'ikoon.

²⁸ Miihsh Ciisahs kaa'inaatc: “Kwayahk kitishinahkwehtam. Mii 'owe ishihciken, miihsh ciayaayan pimaatisiwin,” okii'inaan.

²⁹ Ini tahsh kaakihkino'amaakenitc Onahshowewin kiiwiihkakwe kehcina'owaan, miihsh kaa'ishi kakwecimikotc: “Awenen tahsh a'a niicipimaatis?”

³⁰ Miitahsh o'o Ciisahs kaa'inaatc: “Peshikwaa inini Ceroosalamink (Jerusalem) kii'onci maacaa ekii'-ishaatc Cerahkoo (Jericho) ootenaank. Mekwaa tahsh ehpimi ayaatc okiimoocishka' okii'-otihtinikoo' ekii'-mahkamikotc, kaakiih kikishkank kaye ekii'-mahkamintc, kaye tahsh ekiih pahpahkihte'okotc. Miihsh kaa'ishi nakanikotc, ekii'-aapihtoonipotc.

³¹ Na'itaak tahsh anami'ewikimaa kewiin kiihpipima'atoo i'i miihkanaani. Ahpii tahsh e'⁠waapamaatc ehpimihshininitc ini kaakii'-miikaacikaniwinitc, mii 'i nahpaac inahke kaa'ishi wemaashkawaatc.

³² Miitahsh kewiin a'a anami'ewanohkii'aakan Liipayink (Levite) wentahkaanesitc okiihpi otihtaan i'imaa. Ahpii tahsh ewaapamaatc ehpimihshininitc ini ininiwan, mii 'i kewiin nahpaac inahke kaa'ishi wemaashkawaatc.

³³ Peshik tahsh inini Sameriya (Samaria) wenciitc ehpimi ayaatc i'imaa miihkanaank okiihpi otihtaan eshi pimihshininitc ini ininiwan. Ewaapamaatc itahsh okiih koohpaasinawaan.

³⁴ Miihsh kaakii'-naasihkawaatc epimihshininitc. Okiih siikinaan shoominaapooni, pimiteni kaye ekii'-aapacihtootc ekiih poosinaatc kaaishi nameyaahpinanimintc. Miihsh kaye kaa'ishi siitoohpinaatc, ekii'ani wakicishimaatc i'imaa mihtatimoonhsink. Okii'-ishiwinaan kaye kapehshiiwikamikonk, ekii'awi naanaakaci'aatc.

³⁵ Ahpii tahsh e'⁠ani waapaninik ewii'ani maacaatc, okiih kitinaa' niishin (2) waapaapihko-shooniyaanhsa' ekii'-miinaatc kaakanawentaminitc kapehshiiwikamik ekii'inaatc: ‘Kwayahk kanawenim. Ahpii tahsh pikiiweyaan pikipihciiyaan o'omaa, kika tipa'amawin aaniin minihk kemehtinike'ihk ehkanawenimatc, okii'inaan.’ ” Mii 'i Ciisahs kaa'inaacimotc.

³⁶ Miitahsh Ciisahs kaa'ishikakwecimaatc: “Aaniin kiin enentaman ikiweniwak nihsin (3) kaakiihpimi ayaawaatc, awenen a'a kaakiih tootank taapishkoo ewiicipimaatisiimaatc iniweniwan ininiwan kaakii miikaanikonitc okiimoocishka'?” okii'inaan.

³⁷ Miitahsh kaa'ikotc: “A'awe hsa kaakiih koohpaasinawaatc ini ininiwan,” okii'ikoon. Miihsh Ciisahs kaa'inaatc: “Mii 'i anishi maacaan, peshikwan o'o ci‑ishihcikeyan,” okii'inaan.

Ciisahs kiimawatihsaatc Maarhtawan ini kaye Meriin

³⁸ Ciisahs tahsh okihkino'amawaakana' kaye mekwaa ehpimi ayaawaatc okiihpi otihtaanaawaa ootenawenhs. Mii 'imaa kaakiih piintikanikotc ihkwewan Maarhta (Martha) eshinihkaasonitc.

³⁹ Maarhta kii'ayaawan wiicihkwen Meri (Mary) eshinihkaasonitc. Miiwan ini kaakii'-apinitc eshisitepinitc kaaTipencikenitc ehpisintaawaanitc aaniin eshi kihkino'amaakenitc.

⁴⁰ Maarhta kiionci ocaanimentam wiin ehta cianohkiitc ehpamiihtaaketc. Pehsho kiihpiishaa ekiihpi-'ihkitotc: “Tepencikeyan, kaawiin ina kekoon kitinentansii ewiici'ihsik nicihkwe o'owe anohkiiwin kaatootamaan. Wiintamaw cipi wiici'itc,” kii'ihkito.

⁴¹ Miihsh kaaTipenciketc kaa'ishi nahkwehtawaatc: “Maarhta, Maarhta, etatawe niipiwa' kekoon kimikoshkaaci'ikon, ewanashkwe'ikoyan kaye.

⁴² Peshik ehta shaakooc kekoon niikaanentaakwan. Meri tahsh wiin okii'-otaahpinaan ewii'-ishihciketc kaaminonaakwaninik, kaawiin tahsh tamahkamaahsii i'iweni,” okii'inaan.