ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 1 - Ojibwe Kihcimasina'ikan

¹ Kiin Tiyaahpilahs (Theophilus) kaaniikaanentaakosiyan, kitooshipii'amawin. Pipaahtiinowak ihsa kaapi oshipii'ikewaatc ehtipaatotamowaatc onoweniwan kekoonan kaakii ayishihsekin o'omaa kaaishi ayaayaank.

² Wiinawaa ekii'-ishipii'ikewaatc aaniin kaakiihpi'-ishi wiintamaakowaatc i'i kaawiintamaakenitc Kishemanitoon ehkitonitc kaakii'-waapantaminitc nihtam kekoonan kiimaacihsenikin.

³ Kiin kehci'inentaakosiyan, keniin ohsha weweni nimpikakwe kihkentaanan kahkina onoweniwan kaakiih pionci maacihsekin. Miihsh kaakii'-inentamaan cioshipii'amawinaan weweni ciwiintamawinaan mayaa eshihsekin.

⁴ Miitahsh kaaonci'-ishihcikeyaan kekiin cimisiwe kihkentaman kahkina kekoonan kaakiihpi'-ishi kihkino'amaakooyan.

Kiiniikaanitipaacimintc Cwaan Siika'antaakewinini cinihtaawikitc

⁵ Mekwaa kihciokimaa Herat (Herod) kaatipentank Cootiiya (Judea) ahki, kii'ayaa peshik anami'ewikimaa Sehkaraaya (Zechariah) eshinihkaasotc. Mii 'awe kaakii'onci tipentaakositc kaakii'ishi anami'ewikimaawinikopanen Apaaicawan (Abijah). Wiiwaan tahsh Ilisipaht (Elizabeth) kii'ishinihkaasowan. Kewiin a'a ihkwe ekii'-ontahkaanesitc kaakii'ishi anami'ewikimaawinitc Eranan (Aaron).

⁶ Minciniish itahsh kiihkwayahkwaatisiwak enaahsamiinitc Kishemanitoon, kekoon ekii'ishi anaamentaakosihsikwaa eshi pimaatisiwaatc. Ekii'-ishihcikewaatc kahkina eshihsininikin onahshowewinan, enaahkonikenitc kaye kaaTipencikenitc.

⁷ Kaawiin tahsh apinoonciishan cikii'-ayaawaawaatc, aaniihsh wiin Ilisipahtan kaawiin okiih kashkihtoohsiini ciayaawaanitc apinoonciishan. Minciniish itahsh kiihkihci aya'aawiwak.

⁸ Peshikwaa tahsh ehkiishikaak Sehkaraaya kii'anami'ewanohkii Kihcianami'ewikamikonk, ekii'ishi kiishikaninik wiin nihtam i'i ci'inanohkiitc.

⁹ I'iwe kaakii'-ahpakicikewaatc e'⁠anta kihkencikewaatc anami'ewikimaak wiin mayaa kiimiihkohse cipiintiketc oKihcianami'ewikamikoniink kaaTipencikenitc ciminaahsiketc.

¹⁰ Kiipaahtiinowa' itahsh awiya' akwaciink Kihcianami'ewikamikonk enami'aanitc mekwaa eminaahsiketc.

¹¹ Miitahsh kaakii'-otihsikotc ekii'-naakosinitc Tepencikenitc otencalimini eniipawinitc kihcinihkink inahke minaahsikan eshi pakitinaahswaatenik.

¹² Ahpii tahsh Sehkaraaya ewaapamaatc kiimikoshkaatentam ekiih sekisitc.

¹³ Okii'ikoon tahsh encalan: “Sehkaraaya, keko sekisihken. Kishemanitoo ohsha kinoontaak kaaishi pakohsenimoyan. Inahshke tahsh kiwiiw Ilisipaht kika nihtaawikihtamaak ciokosihsiyan. Cwaan (John) kika ishinihkaanaa.

¹⁴ Wiinke hsa kika ciihkentam ciminwentaman. Niipiwa' tahsh awiyak taminwentamok ahpii nihtaawikinitc.

¹⁵ A'a kikosihs okakihci'-inenimikoon kaaTipencikenitc. Kaawiin taminihkwehsii shoominaapo, komaa kaye kaamashkawaakamininik minihkwewin. Ahpii piko nihtaawikitc oka mooshkineshkaakoon Kishemanitoon otAhcaahkoni.

¹⁶ Okakwehkaaci'aa' ihsa niipiwa' awiya' Isriyalihkaank (Israel) kaaonci tipentaakosinitc cipikiiwenotawaanitc kaaTipencikenitc oKishemanitoomiwaan.

¹⁷ Wiin taniikaani takohshin cipwaa takohshininitc kaaTipencikenitc. Taapishkoo Ilaaica (Elijah) kaakii'ishi wiiciiwikotc Kishemanitoon otAhcaahkoni ekii'-mashkawisiitc, mii hsa peshikwan keishinaakositc kikosihs. Oka kwehkinaan otetemaan kaye tahsh otapinoonciishimini miinawaa cipisaani wiiciintinitc. Okakwehkinaan kaye awiyan kaashashiipihtaminitc cipisintaminitc eshi kakiihtaawentaminitc kweyahkwaatisinitc. Wiin cikwayaanciihtamawaatc kaaTipencikenitc opimaatisiimini,” okii'ikoon encalan.

¹⁸ Miitahsh Sehkaraayah kaa'inaatc ini encalan: “Aaniin tahsh keonci kihkentamaan tepwe o'o ci‑ishiwepahk, aaniihsh ekihci aya'aawiyaan niwiiw tahsh kewiin tepwe ekihciaya'aawitc.”

¹⁹ Miitahsh kaa'ikotc encalan: “Niin ohsha Kepariyal (Gabriel),” okii'ikoon. “Nintinaahsamikaapawihtawaa ohsha Kishemanitoo. Mii 'awe kaakiih piicinisha'otc cipi wiintamawinaan o'owe mino tipaacimowin.

²⁰ Shaakooc tahsh kaawiin kitepwehtansiin o'owe kaainaacimohtawinaan, i'i kehcinaac kaawii'-ishiwepahk ahpii ocihcihsek. Ehtepwehtansiwan itahsh, kaawiin kika kashkihtoohsiin cikakitoyan, kaawiin kaye kika noontaakosihsii. Paanimaa piko kiishikaak ocihcihsek kaainahshotamawinaan ci'ishiwepahk, miihsh miinawaa cikashkihtooyan cikakitoyan,” okii'ikoon encalan.

²¹ Sehkaraaya hsa okiih pii'ikoo' pemaatisinitc, ekii'-wawaanentaminitc wekonen wentami'ikotc i'imaa Kihcianami'ewikamikonk.

²² Ahpii tahsh kiipi saaka'ank kaawiin okiih kashkihtoohsiin cikakanoonaatc. Miihsh kaakiih kihkenimikotc kekoon ekii'-waapantank Kihcianami'ewikamikonk. Kaawiin okii kashkihtoohsiin kekoon ci'ihkitotc, mii ehtako ekii'mihci ayishinihkenitc.

²³ Sehkaraaya tahsh kaa'ishkwaahsenik otanami'ewanohkiiwin i'imaa Kihcianami'ewikamikonk, mii 'i kaa'ani'-ishi kiiwetc.

²⁴ Naanaake tahsh e'⁠ani'-ishihsek, mii 'i wiiwaan Ilisipahtan kaakiih kikishkawaawahsonitc. Kaawiin ninkoci kii'ishaahsiiwan naanokiisihs minihk.

²⁵ Miihsh kaa'ihkitotc: “Miitahsh o'owe nahke kaaTipenciketc eshihcikehtamawitc e'⁠minwaapamitc noonkom kaakiishikaninik. Kaawiin tahsh miinawaa wiihkaa ninka'-akacihsii awiyak ci'ishiwaatc ehkashkihtoohsiwaan iinsan ciayaawak apinoonciish,” kii'ihkito.

Kiiniikaanitipaacimintc Ciisahs cinihtaawikitc

²⁶ Ahpii tahsh aasha ninkotwaahsokiisihs Ilisipaht (Elizabeth) ehkikishkawaawahsotc, Kishemanitoo okii'-ishinisha'waan otencaliman Kepariyal (Gabriel) kaaishinihkaasonitc, Kaalalii (Galilee) ahkiink ci'ishaanitc i'imaa Naasarit (Nazareth) ootenaank.

²⁷ Ekii'-ishinisha'ontc a'a encal eshiayaanitc ini pehki oshkiniikihkwewan Meri (Mary) kaaishinihkaasonitc. Aasha iitok kii'ahshotamaatiwaakopan Coosap (Joseph) eshinihkaasonitc ciwiitiketiwaatc. A'a hsa Coosap kiiontahkaanesi Tepitink (David) kaakiih kihciokimaawinikopanen.

²⁸ Miitahsh encal kaakiihpi naasihkawaatc ini oshkiniikihkwewan ekii'inaatc: “Kipooshoo'in, kaaTipenciketc ohsha kiwiiciiwik kaye tahsh aahpici kikihci shawenimik,” okii'inaan.

²⁹ Meri tahsh kii'onci mikoshkaatentam i'i kaakii'ikotc encalan, kii'wawaanentam kaye wekonen i'i nahke kaakii'ishi pooshoo'ikotc.

³⁰ Miitahsh o'o encalan kaa'ikotc: “Meri, keko i'iwe onci sekisihken Kishemanitoo ohsha kimino kanawaapamik.

³¹ Inahshke tahsh kika kikishkawaawahs cinihtaawiki'atc keokosihsiyan. Ciisahs tahsh kika ishinihkaanaa.

³² Wiinke hsa takihci'-inentaakosi, miihsh kaye keshinihkaanintc Maawac kaaIshpentaakositc Kishemanitoo oKosihsan. KaaTipencikenitc Kishemanitoon kaye oka kihciokimaawi'ikoon taapishkoo peshikwan Tepitan okehteya'aamipaniin kaakii'ishi kihciokimaawinitc.

³³ Wiin itahsh kaye nehpic oka okimaahkantawaa' Cekapoonk (Jacob) wentahkaanesinitc. Kaawiin wiihkaa ta'ishkwaahsehsinini okihciokimaawiwin,” kii'ihkito encal.

³⁴ Miitahsh Meri kaa'inaatc ini encalan: “Aaniin tahsh i'i ke'onci'-ishihsek? Keyaapi iitok pehki oshkiniikihkwe nintinow,” okii'inaan.

³⁵ Miitahsh encalan kaa'ishi nahkwehtaakotc: “Kishemanitoo otAhcaahkwan kikapi naasihkaak kaye tahsh omashkawisiiwin a'awe Maawac kaaIshpentaakositc kikapi akawaahteshkaakowaan. Miitahsh o'oweni onci, a'a kaawii nihtaawiki'atc, misiwe kaawiih tipenimikotc Kishemanitoon ciaapaci'ikotc, Kishemanitoo oKosihsan taishinihkaacikaniwi.

³⁶ Inahshke a'a kitinawemaakan Ilisipaht (Elizabeth) kaaishinihkaasotc aana ekihci aya'aawitc aasha ninkotwaahsokiisihs pikikishkawaawahso. Aanawiin e'⁠inintc ekashkihtoohsik ciayaawaatc apinoonciishan.

³⁷ Aaniihsh kaawiin kekoon Kishemanitoo opwaanawihtoohsiin kaawii'-ishihciketc,” okii'ikoon encalan.

³⁸ “Kinoontawin, niin hsa kaaTipenciketc otanohkii'aakanan,” kii'ihkito Meri. “Maano ninka ishihsewaan aaniin ehkitoyan.” Miitahsh ahpan encalan kaa'ishinakanikotc.

Meri kiihkiiyootamaatc Ilisipahtan

³⁹ Miitahsh iko weyiip Meri (Mary) kaakii'-maacaatc ekii'-ishaatc weti ootenaank eshi papiihkwatinaanik Cootiiya (Judea) ahkiink.

⁴⁰ Miitahsh kaakii'ani piintiketc i'imaa Sehkaraayawan (Zechariah) owaahkaa'ikaniniink, kaye tahsh ekiih pooshoo'aatc otinawemaakanan Ilisipahtan (Elizabeth).

⁴¹ Ahpii tahsh Ilisipaht e'⁠nootawaatc Meriin ehpooshoo'ikotc, miihsh kaakii'matwe toohkipani'onitc apinoonciishan anaamink omihsataank, miitahsh Ilisipaht kaakii'-mooshkineshkaakotc Kishemanitoon otAhcaahkoni.

⁴² Miitahsh kaa'ihkitotc ekiih kishiiwetc: “Kiin maawac kitoonci kihci shawentaakos kaatahshiwaatc ihkwewak kaye tahsh ehkihci shawentaakositc apinoonciish kenihtaawiki'atc.

⁴³ Wekonen itahsh o'o kihcikekoon wenci'-ishihseyaan, ninTipencikem omaamaan ehpi mawatihshimitc?

⁴⁴ Ahpii piko kaa'noontawinaan kaakiihpi pooshoo'iyan mii 'i a'a apinoonciish kaakikishkawak kaakiih toohkipani'otc ehpiihci ciihkentank.

⁴⁵ Aahpici shawentaakosi a'a ihkwe kaatepwehtank kahkina cimoshkinehsenik kaakii'ikotc kaaTipencikenitc.”

Meri kaakii'ishinanaahkomaatc kaaTipencikenitc

⁴⁶ Meri (Mary) tahsh kii'ihkito: “Ninte'ink nintooncinanaahkomaa kaaTipenciketc,

⁴⁷ Nintahcaahkonk nintooncitepinawe'ik Kishemanitoo nintOopimaaci'iwem!

⁴⁸ Aaniihshwiin kaamaamihkawinotawitc niin kaatapahsentaakosinitc otanohkii'aakanihkweman ehtinowiyaan. Miitahsh noonkom kahkina awiyak kemaacii ishinihkaashiwaatc ‘kaashawentaakositc’!

⁴⁹ Tepwe hsa kihcikekoonan a'a Kehcimashkawisiitc Kishemanitoo ninkii'-ishihcikehtamaak. Miihsh eshinihkaasotc ‘Kehtentaakositc.’

⁵⁰ Oshawenimaan iniweniwan kaakohtaanenimikotc, iniweniwa' kaye kahkina keani aayaanihkepimaatisinitc.

⁵¹ Tetako soonkentaakosi ekii'-mashkawitootank, ekii'-ohswenisha'waatc kahkina kaakihtenimonitc ote'iniink.

⁵² Okii'niihsinaan kaamashkawisiinitc kihciokimaan i'imaa onci kaakii'ishi okimaawapinitc. Okii'ompinaan tahsh iniweniwan kaatapahsentaakosinitc.

⁵³ Okiih tewiihsini'aan iniweniwan kaawiiwiihsininitc pishihshik e'⁠ahshamaatc wenishihshininikin kekoonan, Ini tahsh wiin kaawenootisinitc piniskwe inkoci otishinisha'waan.

⁵⁴ Kii'ishihcike kaye kaakii'ishi ahshotamawaatc kikehteya'aaminaapanii', ekiihpi ishaatc cipiwiici'aatc otanohkii'aakana' Isriyalink wenci tipentaakosinitc.

⁵⁵ Okii'ishimaamihkwentaan okishewaatisiwinink ciwiici'aatc Eparahaaman i'i kaye kahkina keniopiiwesiiminitc nehpic iko.” Mii 'oweni kaa'ishinanaahkomotc Meri.

⁵⁶ Meri okii'-wiiciayaamaan ninkoci ko ninkotwaahsokiisihs Ilisipahtan (Elizabeth), miitahsh Meri kaa'anishi kiiwetc otaawinink.

Kiinihtaawikitc Cwaan kesiika'antaakewininiiwitc

⁵⁷ Ahpi tahsh kaa'ocihcihsenik Ilisipaht (Elizabeth) cinihtaawikinaawahsotc, miihsh kaakii'-ayaawaatc keokosihsitc.

⁵⁸ E'⁠noontaminitc tahsh owiicitaamaakana', i'i kaye otinawemaakana' kaa'ahpiihci minotootaakotc kaaTipencikenitc, kahkina hsa okii'wiici ciihkentamoomikoo'.

⁵⁹ Nihswaahsokiishik (8) itahsh e'⁠ishihsenik, okiih kihkinawaatashakeshwaawaan ini oshkapinoonciishan. Miihsh kaye kaa'inentamowaatc ci'ishinihkaanimintc Sehkaraaya (Zechariah) aaniihsh mii 'i kaa'ishinihkaasonitc oteten.

⁶⁰ “Kaawin,” kii'ihkitowan omaamaan. “Cwaan (John) taishinihkaaso,” kii'ihkitowan.

⁶¹ Miitahsh kaa'inaawaatc Ilisipahtan: “Kaawiin iitok awiya kitinawemaakan i'i ishinihkaasohsii!”

⁶² Miitahsh ekii'-ayishinihkehtawaawaatc ini otetemaan ehkakwecimaawaatc aaniin keshi antawenimaanitc okosihsan ci'ishinihkaasonitc.

⁶³ Sehkaraaya tahsh kii'antotamaake keshi oshipii'iketc, miitahsh kaa'ishipii'iketc: “Cwaan ishinihkaaso.” Aahpici tahsh kahkina kiihkoshkwentamoo'.

⁶⁴ Miitahsh shemaak Sehkaraaya ekiih kashkihtootc miinawaa cikakitotc kaye ekiimaacii kihcinanaahkomaatc Kishemanitoon.

⁶⁵ Aahpici tahsh kahkina owiicitaamaakana' kiihsekisiwa'. Misiwe hsa tahsh kiihtashincikaate i'i kaakii'-ishiwepahk i'imaa Cootiiya (Judea) pepiihkwatinaak.

⁶⁶ Kahkina hsa awiyak kaakii'-noontamowaatc o'o okii'-naanaakatawentaanaawaa ekii'ishi kakwetwewaatc: “Kaanaka awekwen kenitinowikwen a'a apinoonciish?” Kiihpayahtenaakwanini kaaTipencikenitc eshi mashkawisiinitc ewiiciiwikotc a'a apinoonciish.

Sehkaraaya kiihkanootamawaatc Kishemanitoon enanaahkomotc

⁶⁷ Miihsh Cwaan (John) oteten Sehkaraayawan (Zechariah) kaakii'-mooshkineshkaakonitc Kishemanitoo otAhcaahkoni, kaye tahsh ekiih kanootamawaanitc Kishemanitoon ekii'-ihkitonitc:

⁶⁸ “Taka tananaahkomaakaniwi kaaTipenciketc kaaoKishemanitoomiwaatc Isriyalak wiin ekiih piishaatc, ekiihpi antanaatamawaatc opimaatisiima' cipimaaci'imintc.

⁶⁹ Wiin hsa piko kii'miikiwe meshkawentaakosinitc Opimaaci'iwen wentahkaanesinitc Tepitihkaank kaakii'-otanohkii'aakanimikopanen.

⁷⁰ Mewisha o'o kikii'-ahshotamaakonaan Kishemanitoo ekii'-aapaci'aatc kweyahkwaatisinitc kenootamaakotc,

⁷¹ ewii'-naatamawinank onci kaamiikaaniyamintwaa, i'i kaye eshimashkawisiinitc kaashiinkenimiyamintwaa.

⁷² Kii'ihkitokopan cikohpaatenimaatc iniweniwa' kikihciaya'aaminaapanii', kaye tahsh cikanwiihketc kaakihci'inentaakwaninik otahshotamaakewin.

⁷³ Ekii'aayiiciahshotamawaakopanen kikihciaya'aaminaapaniin Eparahaaman,

⁷⁴ ewiinaatamawinank i'i onci kaashiinkenimiyamintwaa, kaye tahsh pisaan cikashkihtaawankitc anohkiihtawankitc memwehc cisekisihsiwaank.

⁷⁵ Miitahsh kiinawint cipehkentaakosiyank, cikwayahkwaatisiyank kaye Kishemanitoo enaahsamiitc, minihk hsako entahso kiishik keani pimaatisiyank.

⁷⁶ Kiin, niniicaanihs, kika ishinihkaanikoo kaakanootamawaatc Maawac kaaIshpentaakosinitc Kishemanitoon. Kiwii niikaani'-ishinisha'on hsa nintipaacimowininiim, mii hsa 'awe kekwayaancihtamawatc aanti keni'-ishaatc.

⁷⁷ Ciwiintamawimatc opimaatisiima' pimaaci'ikoowisiwin, tako cipoonencikaatenikin omacitootamowiniwaan.

⁷⁸ KiKishemanitoominaan aahpici koohpaatenimiwe ehkishewaatisitc. Eshinaakwaninik taapishkoo kaapi saakaahtek kesaakaahsokoyank.

⁷⁹ Tasaakaahtenamawaawak hsa iki kaaishi pimaatisiwaatc kaashi kashkiitipihkaninik, kaa ayaawaatc kaye kaaishi aakawaahtehsininik nipowin, kaye tahsh cikihkinowinikoyank miihkana kaainamok peyahtakenimowinink.”

⁸⁰ Miitahsh a'a apinoonciish kii'ani mintito, kii'ani mashkawisii kaye owiiyawink, otahcaahkonk kaye. Pikwatahkiink tahsh kiihtashi pimaatisi, paanimaa piko ekii'-ocihcihsenik mekweya'ii cinaakositc kaaishi ayaanitc Isriyalihkaank.