ᓬᐃᐱᑎᑲᔅ 19 - Ojibwe Kihcimasina'ikan

Kishemanitoo Kii'inaahkoniketc Cisaakiwiiciiwitink

¹¹ KaaTipenciketc tahsh ihkito, “Keko kiimootihkek, keko kaye wayeshimiwehkek, keko kaye kiiwanimohtaatihkek.

¹² Keko kaye niwiinsowin ahpimohkek kii⁠ahshotamaakeyek kekoon, memintake kota oncita kiiwii ishihcikehsiwek kaakii ihkitoyek. Mii ohsha 'imaa wenci maanencikaatek niwiinsowin, niin ohsha kaaTipenciketc kiKishemanitoomiwaa.”

¹³ “Keko kaye nihshi kakwaataki'aahken kiicipimaatis, keko kiimootimaahken. I'iweni hsa okashkihcikewin a'a kaa‑anohkiihtawihk keko kihciwinamawaahken peshiko tipihk piinihsh cini waapaninik.

¹⁴ Keko kaye maci'inaahken awiya kaa⁠onsihtehsik, keko kaye ahtaawaahken kekoonini ke⁠pisokeshink a'a kaa⁠waapihsik. Mii hsa 'i eshinaakwahk ci⁠kohtaanenimatipan kiKishemanitoomiwaa, niin iitok kaaTipenciketc.”

¹⁵ “Kwayahk, weweni kaye inaahkonikek ahpii kiiwii onentamek aaniin awiya ke⁠inaahkonintc kii⁠tipaahkonitink. Keko wiin nawac koohpaatenimaahkek kaa⁠kitimaakisitc, keko kaye kohsaahkekwaanik kaa⁠wenootisiwaatc.

¹⁶ Keko kaye papaa kiiwanimohken misiwe ci⁠papaa tashimatc kaashi ayaawaatc kiicipimaatisiik. Ahpii hsa awiya tipaahkonikaniwitc opimaatisiwin tahsh naniisaanatininik, pisaaniko kiikiton kiishpin kota ke⁠ihkitoyan ci⁠naatamaakotc. Niin hsa kaaTipenciketc.”

¹⁷ “Keko kaye shiinkenimaahken kiicipimaatis i'imaa kite'ink. Kakwe nana'ihsitoon hsa kaashi pepahkaanenintiyek, maakishaa kiin ci⁠onci macitootansiwan wiin onci.

¹⁸ Keko mawine'waahken awiya ci⁠kakwe nana'ahsatc, keko kaye shiinkenimaahken kaa⁠wiici onciimatwaa. Ehpiihci saaki'itisoyan mii 'i ahpiihci saaki' kiicipimaatis. Niin ohsha kaaTipenciketc!”