ᒫᓀᑕᒧᐎᓐ 1 - Ojibwe Kihcimasina'ikan

Kihci'ootena Ceroosalam Ehtashintek Aaniin Kaakii'ishiwahsitaawihsek

¹ Wiinke hsa siipiskaatentaakwan kihci ootena Ceroosalam eh⁠pishihshikwaak. Aapitink wiinke ekii mooshkinewaatc pemaatisiwaatc i'imaa, maawac ekiih kihtentaakwahkipan, noonkom tahsh taapishkoo kiiwaacihkwenk e⁠inentaakwahk. Maawac e⁠niikaanentaakwahkipan, noonkom tahsh tahkonikanink e⁠inentaakwahk.

² Kapetipihk e⁠mawitc, e⁠wiihsakentank; osipiinkwaanan eh⁠pimiciwaninikin owanowink! I'i hsa ko kahkina entahshinitc kaakiih saaki'ikotc, kaawiin kanake awiyan peshik ciwiih kakwe minwentamo'ikotc. Kahkina hsa owiiciiwaakana' okiih kayeshi'ikoo'; miihsh noonkom kaa⁠onci shiinkenimikotc.

³ Coota ahkiink pemaatisiwaatc kaa⁠onciiwaatc hsa kaawiin kekoon otishi kashkihtoohsiinaawaa cishi naatamaasowaatc kaa⁠ishi kakwaataki mihtanohkii'intwaa. Pepahkaan ahkiink ekii ishiwinintwaa, kaawiin ninkoci ishitaahsiiwak, Misiwe hsa kaa⁠shiinkenimikowaatc owaahkaashkaakowaa', kaawiin ci⁠kashkihtoowaatc ci⁠tapasiiwaatc.

⁴ Kaawiin hsa awiya awahshime piishaahsii kihci anami'ewikamikonk noonkom cipi anami'aatc kii⁠wiihkwantiiwahkamikisink. Kaawiin kanake awiya cipi piintiketc kihci ishkwaantemihkaank, Saayan eh⁠kakwaatakentamoomakahk. Iki hsa ihkwewak kaa⁠nihtaa nikamowaahpan i'imaa maanentamok. Anami'ewikimaak kaye mihci moohkonewak.

⁵ Miitahsh noonkom kaa⁠shiinkenimikotc a'a kihci ootena Ceroosalam wiinke otipenimikoo', ekiih shaakooci'ikotc. KaaTipencikenitc ohsha kaa⁠tootaakotc kaa⁠onci kakwaatakihtootc onsaam aaniihsh paahtiinatininiwan omacitootamowinan. Kahkina hsa opimaatisiima' i'imaa wenciinitc kii⁠maaciicikaniwiwa'.

⁶ I'i hsa eshi kihci inentaakwahkipan Ceroosalam kaawiin kanake ci⁠kihkentaakwahk. Kaakii niikaanisinitc otininiima' hsa inentaakosiwa' taapishkoo waawaashkeshiwa' kaa⁠matisinitc kaa⁠noonteskatenitc. Mii 'i eshinaakosinitc kaa⁠noonte caakiinitc waawaashkeshiwa' onantawencike' kaa⁠piminisha'okonitc.

⁷ Noonkom itahsh Ceroosalam nihshihke nanawihshin, e⁠ishi naanaakatawentamoomakahk otaanaank kaakii ishi minonaakwahkipan. Ahpii hsa Ceroosalam opimaatisiima' kii⁠shaakoocihcikaniwinitc, kaawiin hsa awiyan kii⁠ayaahsiiwan ke⁠naatamaakotc. Kaakiih shaakooci'ikotc okiih paahpi'ikoo' ahpii kii⁠niisihsetc.

⁸ Ceroosalam wiinke hsa kiih⁠kihci macitootam, wiinke kaye kii⁠wiini'itiso. Miihsh kaashi kihtentaakosihpan kaa⁠onci kihkentaakwahsininik. Kahkina hsa kaakiih kihtenimikohpan otaanawenimikoo'. Miihsh eshinaakositc kekoon e⁠kikishkansik, e⁠akaci'itisotc kaye. Miihsh wenci moohkonetc, mii kaye 'i wenci akaci'itisotc.

⁹ I'i hsa kaashi wiininaakositc wiinke pehtenaakwanini, shaakooc itahsh kaawiin opapaapisiskentansiin aaniin keni ishihsetc. Wiinke hsa kiih⁠kihci shaakoocihcikaniwi; kaawiin awiyan kii⁠ayaahsiiwan cikii minwentamo'ikohpan. Kaa⁠shiinkenimikotc okiih shaakooci'ikoo', miihsh kaa⁠onci shaakowaanaatc kaaTipencikenitc.

¹⁰ Kaa⁠shiinkenimikotc hsa okiih kiimootimikoo' kahkina kaakii ishi wenootisihpan. Okii waapamaa' ihsa piko kaye eh⁠piintikenitc kihci anami'ewikamikonk, KaaTipenciketc itahsh ekii onci'aanihpan ci‑ishaahsinikipan i'i Kaa⁠Coowiwihsinik i'imaa.

¹¹ Kahkina hsa opimaatisiima' moohkonewa' eh⁠papaa nanaantawaskatenitc; eshi wenootisinitc meshkwac e⁠miikiwenitc ke⁠ontaatisinitc. Miitahsh Ceroosalam eshi shaakowetc, “Tepencikeyan, taka kanawaapamihshin o'o kaashi wahsitaawihseyaan.”

¹² Miitahsh kaye eni ihkitoomakahk Ceroosalam, eh⁠kanoonaatc kaa⁠mayaashkaakotc, “Inashke kanawaapamihshik! Kaawiin ohsha awiya wiihkaa ahpiihci wiihsakentansii taapishkoo kaa‑ahpiihci wiihsakentamaan, kaaTipenciketc ohsha 'i kaa⁠tootawitc. Wiin iitok o'o ishi ahpii nishkaatisi.

¹³ Weti tahsh ishpimink opionci ishinisha'aan ishkoteni, miihsh i'iwe kaa⁠caakisokoyaan piincaya'ii. Okiih tashwekihshimaan ihsa ahsapiin ci⁠pisokehshinowak, miihsh kaakiih kawihsewak. Ninkiih tootaak ihsa ci⁠piikonaakosiwak, mooshak iko ci⁠wiihsakentamowak ekiih tootawitc.”

¹⁴ Okii maamawinaanan hsa nimacitootamowinan, miihsh kaa⁠ishi maawantoohpitootc. Nihkwekanink ekii ishi akwahpitootc, miitahsh i'i kaah⁠caakii'ikoyaan onsaam eh⁠kosikwahkin. Ninkii ishi pakitinik eshi'ayaanitc kaa⁠shiinkenimimitc, kaawiin tahsh ninkii kashkihtoohsiin kekoon cishi naatamaasoyaan.

¹⁵ KaaTipenciketc hsa okiih paahpi'aa' nishimaakanihshiima' meshkawisiinitc; miihsh kaa⁠ishi ishinisha'waatc kotak shimaakanihsha' ke⁠shaakooci'aanitc nintooshkiniikiima'. Coota hsa ekii inentaakosiwaatc pehki oshkiniikihkwenk. KaaTipencikenitc okiih pakitinikowaan itahsh pisaan ci⁠shikoshkawintwaa taapishkoo shoominak kaa⁠tootawintwaa.

¹⁶ Miitahsh i'i mooshak kaa⁠onci mawiyaan, kaa⁠onci pimaanshikawisipiinkweyaan kaye. Kaawiin hsa awiya ayaahsii ke⁠minwentamo'ihpan, kaawiin kaye nintikohsii ci⁠mashkawentamowak. Kaa⁠shiinkenimiwaatc hsa ninkiih shaakooci'ikook, nimpimaatisiimak hsa tahsh wiinke koohpaacihsewak.

¹⁷ Nintaanakii niiminihken ohsha, kaawiin tahsh awiya kanake ninkii wiici'ikohsii. KaaTipenciketc tahsh okiih kanoonaa' kaa⁠shiinkenimimitc misiwe ci⁠onci waahkaashkawimitc; mii hsa 'i entootawiwaatc taapishkoo noociko kekoon, kekoon kaa⁠wiinatink.

¹⁸ Shaakooc tahsh kaaTipenciketc kwayahk ishi'ayaa, niin ohsha kaa⁠shashiipihtawak. Pemaatisiyek, misiwe eyaayek, taka pisintawihshik. Inashke kanawaapamihshik o'o kaashi wiihsakentamaan. Nintooshkiniikiimak, nintooshkiniikihkwemak kaye kii⁠maaciicikaniwiwak e⁠tahkonintwaa.

¹⁹ Nintaanakiih kanoonaak hsa kaa⁠nihtaa naatamawiwaahpan, kaawiin tahsh kii‑inentansiiwak ci⁠wiici'iwaatc. Anami'ewikimaak, kaa⁠niikaanisiwaatc kaye kiih⁠tashi nipowak eshi mamiihkanaawaninik kihci ootenaank, aanakii nanaantawaapantamowaatc kekoon ke⁠miiciwaatc ekiih kakwe pimaaci'itisowaatc.

²⁰ Oo Tepencikeyan, inashke waapamihshin ehpiihci kakwaatakihtooyaan piincaya'ii nimpimaatisiwinink. Wiinke ohsha nimpiikote'e ehpiihci maanentamo'ikoyaan nimacitootamowinan. Misiwe ohsha eshi mamiihkanaawank ayaamakan nihshiwewin, mihsawaa ko piintik e⁠ayaak nipowin.

²¹ Pemaatisiwaatc ohsha onoontaanaawaa eshi kakwaatakihtoowak; kaawiin tahsh awiya ayaahsii ke⁠minwentamo'itc. Kaa⁠shiinkenimiwaatc ohsha etatawe minwentamook o'o kaakii ishi maanshihse'iyan. Taka ishikiishikanohken kaakii ishi ahshotamaakeyan; ci‑ishi'atwaa kaa⁠shiinkenimiwaatc kewiinawaa cishi kakwaatakihtoowaatc o'o kaashi kakwaatakihtooyaan.

²² Tootaw omacitootamowiniwaank ci⁠onci kakwaatakihtoowaatc; nana'ashi kewiinawaa kaakiih tootawiyan nimaci'ishihcikewinan onci. Mii ohsha 'i kaa⁠onci moohkoneyaan eh⁠kakwaatakentamaan, ninte'ink wiinke e⁠niinamisiyaan.